Archive for the ‘Opinion’ Category

Dawr nghaktu

Sunday, February 17th, 2013

Engemaw mai mai thai kawi leh teh ang. Hmanni chu Dar 10.00AM velah thil leitur ka neih avangin dawr pakhat ah ka kal a, dawr lian ve tak ania, thawktu pawh kha 7/8 vel chu an awm ang. Ka lut kha bengvar takin ‘Enge I duh?’ min lo ti vat a, dawr an nuam vat vat hle mai a. An thil zawrh ka en a, ka duh zat leh a rate te kan inbe fel a, an tehfel lai chuan thutna awlah ka thu a, coffee te min pe a, an hawihhawm khawp mai a.

Coffee in a ka thut pah chuan dawr chhung chu ka thlir kual a, a neitunu kum 60 bawr vel tur hian a Tiffin chaw a lo ei mek a, dawrtu an tam bawk si, chaw a ei laklawh si, rem leh remlo in, tawng pah bawk, chaw ei pah bawk, pawisa dawn a lo ngai bawk. An indaih lo em em khawp a. Ka thil leitur ka la fel a, pawisa ka pe a ka chhuahsan ta a.

Office ka thlenin ka thil leite thiante’n min enpui a, a neitunu buaizia, chaw ei paha customer te a biak dan leh pawisa dawn ngai bawk, a indaih loh zia ka sawi a, kan thawhpui pakhat chuan ‘A ni reng ang chu, a duham em alawm. Tikhawp khuan an hausa a, a pasal ni se Pu……Sorkar Department pakhata Gazetted Officer pension tawh ani a, in leh lo ropui tak, motor nise a chhuak thar apiang an nei thei a, nikhat pawh a dawr khu zuk chawlhsan phal lova’ a lo ti a.

Ka ngaihtuah zui rilru ta reng a. Mihring te hi kan va duham tak em! Neih tam lua pawh a awm theilo ani maw? A ngah apiangin a ai a tam an duh a, dawr neitunu pawh kha han inthlahdul ve se, tar a lam a phar buai phar buai lo khan a tu leh fa te kutah dah ngam se, sum nise an ngah a, a duh leh a pasal nen engthawl tak te’n han zin dun vel se la nun hi a hadam ang mawle ka tih rilruk sak a. Kei chu ni I la Pu Hva te vengah te ka zinsan daih ang mawle :-D

Posted in Lifestyle, Opinion | 36 Comments »

Pherh Fesawn

Friday, February 15th, 2013

Tûn hma chuan Lusei mipain ‘Hnawkhal’ (Vaiza pil aṭanga siam) an inbel a, hmeichhia-in ‘Siapsuap’ (Vaiza pil aṭanga siam bawk) an inbel ṭhin. A hnu deuhah hmeichhia leh mipa-in ‘Puanmâwl’ thuam an inbel a; hun a lo kal zêl a, kan thawmhnaw inbel pawh a changkang zêl a, tûn hi kan lo thleng ta a ni.

Changkânna khawvêlah hmasâwnna pawh a thlawhin a thlâwk fua fua tawh a. Thil ‘dangdai’ kan ngaisangin, mite tih loh ang deuha ‘danglam’ kan châk ṭhin. Fesawn chungchâng thu-ah chuan mipa aiin hmeichhia hi an sângin fesawn stail hrang hrang pawh an ngah hle. Lu chhîp aṭanga ke lêr thlengin fesawn stail thar hi ni tin a chhuak ti ila ka duhâm lutuk lo vang chu maw. Mipate erawh a chângin kekawr bawp a arh a, a chang leh a zuih a; danglam nasa lutuk a awm ngai mang lo. Kamis thâwl hek hawk, a bân thleh; jacket kâwnga hrên tih vêl kha tûnhma fesawn a ni mai a. Tûnah chuan heti hi kan ni leh a.

Fesawn hian hma a sâwn zêl a, dangdai leh maksak pawh tam tak hmuh tûr a awm ta. Tûnah chuan uchuak lutuk a nih ngawt loh chuan ‘mak’ pawh kan ti tawh lêm lo. Hmeichhia-in mipa thuam inbel an duh a, mipa-in hmeichhe thuam inbel an duh bawk si; fesawn lam tuimi leh siamtuten ‘uni sex style’ te an siam chhuah phah a. Mipa leh hmeichhia hian danglamna kan nei tlêm ta hle. Tûnlai mipa fesawn chhuak thar pakhat chu ‘Pherh Fesawn’ tia a hming ka phuah ve hi a ni. TV sirial kan en aṭangin a ni emaw, mipate hmeichhe bula an tâl tam avang emawa lo awm pawh a ni thei a, chu lo pawh chu tam tak a awm thei ang. Tûnlai fesawn chhuak thar pakhat chu a ni ve hrim hrim. Mahse, he pherh fesawn hi chuan tûnhma fesawn inthlâk ang mai ni lovin nunphung a khawih buai pha tlat.

Kan pawm emaw pawm lo emaw pherh fesawn hian Mizoram a rûn mêk a. Mipa, a bîkin râwltharte hian he fesawn hi nalh an ti a, an awt a; heti anga inchei hi nuam an ti a, nunpui hi an châk tlat a ni. Chu chuan mahni inhriatna dik lo a hring a, midang an hmuh dân a dang a, mawi lo takin an kawnfi êm êm tawh mai a ni.

(more…)

Posted in Lifestyle, Mizo Society & Culture, Mizoram, Opinion | 25 Comments »

Valentine’s Day Vangin i buai a mi?

Thursday, February 14th, 2013

Vawiin Valentine’s Day a lo nileh ta reng mai, hemi alo thlen hian thalai tamtak chu ka za huai huai thin tih pawh kan hai awm lo e. Mahse ngun takin I han ngaihtuah chiang the ang u hmiang. Tun tumah hian Valentine’s Day ropui na lam pang ka rawn sawi dawn hauh lo a, ka ngaihnep vang pawh a ni chuang lo. Mahse ka rilru a a rawn lan ve dan ka rawn sawi ve mai dawn zawk a ni.

!4th February vang a thil thleng zawng zawng hi ava tam em…mi tamtak chuan an nunna hial an chan phah a, hmangaihna lem leh in bumna vangin. Mi tamtak chuan tullo ah sum harsa taka an thawhchhuah kha an khawh ral mai mai bawk a. Mipa ten an bialnu te tan inhualna hmangaihna tak tak ni silo neih tumin an hman hlel a, hmeichhia te pawh bang chuanglo. Chuan hmeichhia ten hun rei tak an thianghlimna an lo vawn tawh chu hmangaihna lem leh he Ni nidang nena danglamna awmlo vang hian an lo hloh nual bawk a. Mi tamtak te chu an thinlung kehchhia vangin an mahni nunna hial an la a. Buaina tamtak an in siam belh a ni. Heng zawng zawng hi he Ni nidang nen a in ang reng vang mai hian a ni. Ngaihtuahna han hmang zau deuh ila chuan harsatna kan tawh tamtak hi kan pumpelh ngei ang.

Kan hmangaih tak tak te chungah kan hmangaihna kan lantir tur a ni lawmni iti a ni mai thei, aw ni e, matheilovin kan lantir tur ani alawm, mahse nikhat atan chuah nilo, kumkhua atan a ni zawk dawn lo em ni? Hemi Ni chuah hian kan lantir a nih chuan hmangaihna tak tak nilo, hmangaihna suak a ni zawk tihna a ni. Hmangaih tak tak te chungah chuan nitin hi Vanlentine’s Day a ni vek dawn lawm ni? He Ni nidang nen a danglamna awm chuanglo vang a ilo buai ve vak a, tulloah I in tih buai vak kha awmzia ava awmlo tak em. I hmangaih nen a in in hmangaihna lantir nan khan ni special bik enge a ngaih chuan na?

(more…)

Posted in Advice, Opinion | 10 Comments »

ELECTION REFORM

Monday, February 11th, 2013

Inthlan a lo hnai leh ta a. Election ah hian Vote thlak ngei hi Citizens te chuan kan bat leh kan duty a ni. Mahse, Candidate zingah khan duh nei ta miah lo ila, tun ang, Electronic Voting Machine awm chinah chuan Vote a tih thih theih ngawt tawh si lo. Tumah ka Vote duh loh chuan a hranin Polling Official te hnenah lehkha lain keimah leh Polling Party te ka tih buai hrep a ngai dawn a. Chu mai a la ni lo, Candidate zinga ka mi duh an awm loh thu kha langsar takin ka tihlan a lo tul ta a ni.

Hetiang lo deuh hian tih dan Election Commission hian a ngaihtuah a ngai a ni. Ballot Machine hnuai berah hian “NONE OF THESE” tih dah tel ta mai se. “None of These” hian a pumpuia Vote tla atanga 50% a hmuh tlin phei chuan Election hi neih that leh mai nise, chutah chuan a hunlaia Candidate ding mek te kha ding thei tawh lo tura tih ni ta se kan Political system hi a siamtha phian lovang maw ? Enge in ngaih ve dan ?

Posted in Opinion, Politics | 14 Comments »

Kahpup Chaw

Saturday, February 9th, 2013

Thuhmahruai
Kan tûnlai Mizoram boruak thlîr hian ‘a mak’ tih loh rual a ni lo. Thihna maksak tak tak leh natna maksak tak takin min tlâkbuak mêk chu a ni si a. Hêng ‘tûnlai hri’ maksak tak tak hian ‘chhan leh vang’ a nei ngei ang tih chu rinhlelh rual a ni lo. ‘Over Dose’ tih thâwm te pawh kan hre châmchi a; mahse, eng vangin nge OD hi tleirawl zîngah an awm reng si? Mu hlum leh inâwkhlum tih thâwm te hian ni tin deuh thaw kan hriatna beng a fah a; lirthei leh in hâl thâwm te pawh chanchin thar tichanchin thartu a ni ta zêl mai si.

Hêng buaina leh manganna te hian ‘bul thûm’ a nei ngei ang tih hai rual a ni lo. Nu leh pate’n kan fate thiltih ṭha lo tak tak te hi hre reng mah ila, kan dang zo tawh si lo. A tâwpah mangang chal dawma kun ngawih ngawihin “Lalpa, Lalpa…” kan ti a, chhânna erawh “I tuh rah i seng a nih kha” min tih hi ka ring ṭhin asin. A bilhah kan tho fu tawh lo va, engkim mai hi a inkahpup chaw chho zut ta mai a nih hi.

Mizoramah hnam dang mistiri sîng chuang an awm tawh a; mahse, an zîngah mu hlum leh OD tih te hi zuk awm ve miah lo va! Tin, chakma zîngah mu hlum te hi an awm ve miah lo an tih chu! Eng vangin nge a ram mi ‘Mizote’ hian heti ang êm êma kan tawrh bîk le? Zawhna chhân tûr a va tam tak êm!

(more…)

Posted in Lifestyle, Mizo Society & Culture, Mizoram, Opinion | 20 Comments »

Kan Nunna Hi!!

Wednesday, January 30th, 2013

Vawin chu hnathawhna ngai te bawk lam pan tur in kan in phur chhuak leh a, kan chungah engthil nge lo thleng dawn kan hre lawk hauh lo. Hrelawk ila zawng ka teichhuak hian ka ringlo!! Chutia kan tlan zel lai chuan, thawklehkhat ah kan hma a car chu ding deuh chawtin, keini pawh kan chesual chu a ni ta mai. Thil pawi lutuk em chu thlenglo mahse hlauhna khan ka thau ah min man a, ka dik thei lo nileng chu ani deuh mai. A thlen hung chhung kha reilo hle mahse mitkhapkar loah hian thil hi ava lo danglam thei tak em aw! ka ti vawng vawng a, ka ngaihtuahna chu a kal thui hle mai.

Ni e, mihringte hian kan nunna ah hian thu kan va lo nei lo tak em! Kha second reilote chhung khan kan nunna hlu tak hi kan lo hlauh hman thelh asin. Tumah hian kan thih huntur kan hre lawk lo, amaherawhchu thi tur hian kan inpeih reng em?, lo thi ta ila miten engtingnge ka chanchin an sawi zui ang? tih hi ka rilru a zawhna lian tak awm chu ani. He kan dam chhung ni tawite, chum reilo te a lo langa, a ral leh ang mai nia kan Bible meuh in a sawi hi, mahni duh zawng tihnan leh min siamtu Pathian duhloh zawng tih nan hian kan lo hmang liam fo mai lo maw? Mifing te chuan kan dam rei leh rei lo hi kan dam zat kum ah innghat lo in, kan thiltih khan a hril zawk ani an ti thin, mi fing leh fel, mi tangkai te chu an boral hnuah pawh mite thinlungah an damlaia an thil tih that te khan thu ala sawi chawk in, an thinlung ah an nung reng thin.

Dr. Alfred Nobel hi kan hre ngai em? Khawvel a Dynamite(Bomb chikhat ani mai ang chu) hmuchhuaktu hi, kum 1888 a unaupa thih thu French chanchinbu lar tak in hriatsual palh in amah zawk emaw thi ti in, an chanchinbuah chuan “Thihna hmanga sumdawng chu a thi ve ta……Dr. Alfred Nobel ,thawklehkhata mitam tak thahna hmanrua a hmuhchhuahna atanga hausa ta chu nimin khan a thi” ti in an ziak kuau mai a. Chu thu chuan Alfred Nobel a chu a khawih hle mai, miten a tha zawnga an hriat reng theih dan tur chu a ngaihtuah ta a. kum 1895 ah chuan a sum neih zawng zawng atanga 94% lai chu mi ropui te chawimawinan ahlan ta zawk a. Vawiin ah meuh chuan Alfred Nobel-a chu a dynamite hmuhchhuah vang nilo in, Nobel Peace Prize vang in khaw velin a hrereng ta zawk ani!
(more…)

Posted in Opinion, Religion | 13 Comments »

Chalfilh Constituency Bye-Election tur i thlir ang u hmiang!

Sunday, January 27th, 2013

February ni 23-a Chalfilh Bye Election lo awm tur hi a ngaihnawm tan ta hle mai! Bye-Election dang zawng zawng aiin a ngaihnawm zawk hial awm e. A chhan chu term tawp dawn a ni tawh a, he inthlan hian General Election lo awm tura Party tinte dinhmun a hril thui hle tura ngaih a ni. MPC, ZNP leh BJP-in an candidate tur an tichiang tawh a, MPCC leh MNF-in an la tichiang lo thung a. He party lian pahnihte hi inthlan tingaihnawmtu tur an ni. He inthlana tling lote chu pute lamah an mark a that vak a rinawm si loh va, General Election-ah an chuang nalh thei tlat. Hei hi a tingaihnawm zualtu tur pakhat a ni. February ni 6 thleng khi nomination file hun a ni a, a ngaihnawm telh telh ang! Party tinte an thlir zau ila.

Mizo National Front (MNF):
Anni hian candidate tur an la ti chiang lo va, hmanni lawka MPC atanga lo lut Lalvenhima Hmar leh Laltlinkima Fanai te hi rin kai an ni. Lalvenhima Hmar hi rin kai zawk a nih avangin han chip ta deuh bik ila. Amah hi Suangpuilawn khaw chhuak a ni a, inthlan hmasaah khan UDA atanga dingin vote 500 chuang hret chauhvin Pu Chawngtinthanga a hneh lo a nih kha. Tunah hian party lian zawk behchhanin a rawn ding chhuak ta se, eng nge a an ang? Chalfilh Constituency huam chhunga voters ngah ber, Sesawng Group MNF te chuan Lalvenhima an duh loh thu an puang nghal pang mai! Chuti a nih si chuan Phullen leh Phuaibuang tlangdung lam atang hian candidate an awm hmel si a, Khawruhlian bakah Suangpuilawn leh a chhehvelah bak vote an hmuh that a beiseiawm loh! Congress lamin Sesawng khaw chhuak Pu C. Lalruata an vawrh chhuah phei chuan Sesawngah vote a hmu mangin a rinawm loh va. Chutih laiin a thawm nei lian ber a ni lawi si. Hnam feelings nasatna hmun a ni a, Hmar tamna hmun a nih avangin advantage a nei viauin a rinawm. Amah vawrh chhuak lovin Pu TKA hi lo ding ta sela, an pu berin a thlem luh a nih hmel bawk si a, ticket a chan tak si loh chuan â takin a che duh ngeiin a rinawm. Hemi avang hian candidate tur puan hma hi a tha ber lo maithei. Pu TKA pawh hi Luangpawn lampang chhuak a nih hmel bawk a, a tu zawk zawka pawh hi ding thut thei an ni. February ni 6 i lo nghak chawt phawt teh ang u.
(more…)

Posted in Event, Mizoram, Opinion, Politics | 24 Comments »

Mipa chu MIPA! Hmeichhia chu THIL.. :)

Saturday, January 26th, 2013

Mak ve mai mai chu han ti ringawt ila, mahse a makna pawh a awm chuanglo a :) . Hmeichhia chu thil (Motor, Computer, Fridge, Cooking Gas. etc..) ang an ni. :P

Nupa tam tak inthen nachhan leh an inthen in hmeichhe zawk thiamloh an chantir bur thin nachhan hi Mipa in hmeichhia chu ‘thil’ ang anni tih an hriatloh vang a ni. Motor tawng deuh pawh lei mah la, fai tak leh duat taka, tha taka i enkawla, a thalo lai te a thar a i thlak chuan Motor tha tak leh mawi takah a chhuak thei a ni. Mahse Motor thar, nalh leh chak tak pawh lei mah la i enkawl uluk lo a, i tihfai peihloh chuan reilo teah Motor chhia leh hmanthlak lohah a chhuak ang. I computer chu rei tak i hman duh chuan duat taka i enkawl a ngai, chutiang bawk chuan i thil neih zawng zawng chu duat taka i enkawl chuan thil tangkai leh hmanthlak ni in, kum tam tak pawh i hmang thei ang. Thil chu a enkawltu/neitu zir a ni.

Hmeichhia chu THIL ang an ni tih hre reng thin i la (thinrim fe fe an tam ang chu :) ), Thil chu kan chei chuan a mawi a, kan cheiloh chuan a mawi chuanglo. Hmeichhia pawh an inchei chuan an mawi a, an inchei loh chuan an mawi hran chuanglo..:) ”A nupui chu a sual lutuk a” tih emaw ” A nupui chuan a pasal engah mah a ngailo” tih te pawh hi kei chuan an pasal thiamloh zawkah ka ngai thin. Ngati nge? A ‘thil’ chu a enkawl thiamlo a ni mai lawm.. ‘Thil’ chu a that chuan a neitu vang, a chhiat pawn a neitu vang.. :)

Posted in Mizo Society & Culture, Opinion | 33 Comments »

Class system Mizo zingah..

Tuesday, January 22nd, 2013

Tum khat chu viva voce kan neia. Kan course instructor chuan Mizoramah class system (social stratification chi khat) kan neih leh neihloh min zawt mauh maia. Kan neihloh thu leh tribal kan nih anga mitin inpawh taka kan chenho vek theih thu leh class hrang hrang anga kan inthliarhran veloh thuin ka chhanga. A ringhlel deuhva. Chal chuar deuh tap hian, “Anih leh mi hausa leh rethei deuh pawh an inneih pawlh vek tho amaw?” a’n ti leh hauva. Kei chuan thahnemngai tak hian ,”Tehreng mai……an inhmangaih phawt te chuan…..” ka lo ti leh zung zunga.

Ama’rawhchu, tunlai context-in ka’n ngaihtuaha, ka chiang ngam ta hauh lo mai. Kan incheina, ei leh in, kan thil tih duhzawng leh kan thil neih hrim hrim hian kawng tam takah kan nihna leh kan thian kawmturte a hrila. Kan in leh lo leh khawsak phung azirin thenrual leh laina pawh kan zawng ta deuh niin a lang. Kan fate sikul kalna atanga kan Biakin lawina thleng hian khawtlanga kan dinhmun ava hril ta em!

Vai society-a an inthliar ang em chuan kan inthliar lo pawh ani mahna, mahse keimahni pual tehna leh inthliarna hrang hrang hi kan nei ve nual tho mai. Changkang leh thing, pawlchhuak leh ziding, neinung leh rethei, hmeltha leh hmelchhia, ngo leh hang, lehkhathiam leh thiamlo, thingtlangmi leh khawpui mi, sikul tha chhuak leh sikul chhe chhuak, sawrkar hnathawk leh kuthnathawk, chhim mi leh hmar mi adt.,

(more…)

Posted in Mizo Society & Culture, Opinion | 68 Comments »

Zirna Lam leh Bawk

Wednesday, January 16th, 2013

Zirna lam ka rawn sawi ngun tawh bawk a. Thu vak ka ziak lo ang. Mi siamsa mah nise, tangkai pui te in lo awm tak in…lo en ve teh u.

Infographic hi a tawk viau in ka hria (Mizo thu leh hla thiam ve vak loh tan chuan…ziah tum kan ziak chhuak zo lo thin a…..! Ka website lamah te pawh ka lo post tawh thin a…..)

Career Path Finder

Posted in Education, Information, Opinion | 16 Comments »

« Older Entries
Newer Entries »