mi(sual).com

Trinity Mapuii “ Samari Mitha” Comeback Mizo R&B Album A Hnai

* Mautam Pawisa Mipui Chanai Eiah MNF Hruaitute Congress-in An Puh
* MJA President-in Mizoram Sawrkar Infiammite Talent Cho Chhuak Zo Loah Puh
* Zoram Kuthnathawktu Pawl Hruaitu Sum Tam Tham Tak Hmangin Thlem
* AMFU-in Mizoram Sawrkar Mak An Ti
* Israel sipai Bnei Menashe (Mizo) 11 ten raldo mek
* Lions Club-in Water Cooler Dah Dawn

Mautam Pawisa Mipui Chanai Eiah MNF Hruaitute Congress-in An Puh

Aizawl, August 5 : Mizoram Congress (MPCC) Treasurer Pu R.Lalzirliana, MLA chuan MNF-a hruaitu deuh deuhte chu mautam tur den chhena North Eastern Council pawisa mipui chanai eiah leh mau awm lohnaah mau phurhchhuahna tur kawng laia duhsak zawngte sum siamnaa hmangah a puh. Zirtawpni apianga Congress Bhavan-a politics chungchang sawia inkhawm (political session) an neih thin nimina an neihah thu sawiin Pu Zira chuan Chief Minister Pu Zoramthanga chuan RTB Order a sign lo a tih laiin a sign ngei a ni tih Ex-MNA Association-ten lehkha an semah a lang a ni a ti. Pu Zira chuan CM chu ngaihtuah mang lova thu sawi chingah puhin CM hmasaten an lak duh miah loh angah agriculture portfolio chu sawiin “Kum thum chhunga ei leh bara Mizoram intodelhtir tumin agriculture portfolio a la a, kei pawhin lawmawm ka ti a. Beiseina sang tak neiin kan lo thlir a, mahse, intodelh chu sawi loh, kan buh thar a tlem tial rial a, agriculture department bungruate chu Aii Puk lamah an chheprelh a, CM ber pawh chuan agriculture portfolio chu a kalsan ta a ni” a ti.
MPCC Treasurer chuan Chief Minister chuan mau hmanga eizawnna siam mipui a kawhhmuh a, foreign mau tha tiin a chak chhuak a, kum khata vawithum tuai thei mau tha a tih chu a puitlin pawhin kawng chen bak a pel thei lo a, department pawhin an manganpui hial a ni a ti a. Mautam do nan Baffacos a ti leh a, thingtlang mite aiin khawpui miten sum siam nan an hmang nasa a. Bamboo Processing Industry hrang hrang hmingin MNF-a a tithei deuhten sum siam nan NEC pawisa an dil a, industry siam si lovin mipui chan ai an ei a ni a ti.
Congress MLA chuan Congress sawrkar laiin World Bank loan leh central sawrkarah project lian hrang hrang tihfel a ni a, Shukla Commission-ah Pu Sainghaka a awm ve avangin Project tha tak tak Mizoramin a neih phah a, heng zawng zawng hi MNF sawrkar Pu Zoramthanga kaihhruai chuan rawn chhawm chhovin an enkawl a, tihpuitlin awm si lovin pawisa an tlan a. Hengho hian ram neitu nihna rilru pu miah lovin ram an enkawl a; mikhual ang maia ram enkawltute kut atanga thuneihna laksak hi he rama cheng mipuite hian an bat a ni a ti a. Mizoram ziamtha tura tangrual a, ram leh hnam kaihruai a, rorel turin Congress party tihchak a ngai a ni a ti.
Congress Bhavan inkhawm hi MPCC General Secretary Pu J.H. Rothuama’n kaihruaiin Congress sawrkar khan MNF sawrkar hnenah project lian tak tak pali Greater Aizawl Water Supply Phase II, World Bank Loan hmanga kawngpui laih, Referal Hospital khum 500 awm theihna leh Tuirial Hydel Project an ni a, hengte hi pawisa awm sa veka hnutchhiah an ni a, mahse, hengte hi engmah loah an chan mek a ni a ti a. MNF sawrkar chuan sumleh paiah mipui a rawk a, hmasawnna than a thu ta a ni a ti.

MJA President-in Mizoram Sawrkar Infiammite Talent Cho Chhuak Zo Loah Puh

MJA President Pu J.Sapdanga chuan infiamnaah ram pum huap senior levela Mizote an lan hleih theih lohna chu indiammite chuan an tlin a, a enkawltu sawrkarin Mizote talent a cho chhuak zo lo a ni a ti. Infiamna lama hmasawn zelna atana pawimawh infrastructure lamah kan pachhia a, infiammite hnena lawmthu hrilh tur tamtak a awm laiin sawrkarah chuan infiammite tana ngen tur tamtak a awm a ni a ti.
Nimin chhuna XUU Mizoram Sub Junior Boys & Girls Judo Championship 2006 kharna inkhawm SAI, SAG hmun Mission Vengthlanga a hmanpuinaah MJA President chuan infiamna sang lamah Mizote an hniam thin tih sawiin football-ah under 17-ah India champion, judo leh combat games dangah pawh sub junior-ah record tha tak Mizoten an nei a, senior levelah kan zuih chho a ni a ti.
Indiammite hmasawn zel tura fuihin MJA President chuan sub junior-a hlawhtling thei chu junior-ah engvanginnge a hlawhtlin loh ang, junior-a hlawhtling chu seniorah engahnge a hlawhtlin loh ang, senior-a hlawhtlin chuan national level leh a piah lam international thleng pawhin engvanginnge kan hlawhtlin loh ang tih rilru pua, tumruhna leh thahnemngaihna nen infiammite chu insangphek turin a fuih.
August ni 2-4 chhunga XII Mizoram Sub Junior Boys & Girls Judo Championship-ah hian Club 13 atangin infiammi mipa 105 leh hmeichhia 46 an tel a, Aizawl pawn atangin Sesawng, Seling leh Champhai atangin an tel. Weight category 20-ah thenin a pumpuiah gold medal 11, silver 8 leh bronze 7 latu TNT chu team champion an ni a, trophy, certificate leh Rs.3,000 an dawng. Runner up team SAI chuan gold 4, silver 2, bronze 3 an la a, certificate, trophy leh Rs.2,000 an dawng. Mizoram Judo Association chuan kum 1987 atang khan national levelah leh regionallevelah medal 300 chuang an dawng tawh.
MJA President hi MJA hruaitute leh member thenkhatten an tawiawm.

Zoram Kuthnathawktu Pawl Hruaitu Sum Tam Tham Tak Hmangin Thlem

Thuneitu leh politician te laka beidawng, hahtaka mahni thawhchhuah ngei chauh hmanga intungnun, Zoram Kuhnathawktu Pawl chuan din a nih atang thla lina lekah sum leh pai hmanga thlemna a tawk. He pawl hruaitu, an chairman Pu Thanbanglova chu an pawl a thiat chuan chenna in leh pawisa fai cheng nuai 10 pekah an thlem nia sawi a ni.
Mahse he thlemna hi Zoram Kuthnathawktu Pawl hruaitu Pu Thanbanglova chuan a hnar thu leh a thlemtute hi tutenge an nih a hriat loh thu a sawi a, mahse Mizorama political party zinga mi leh sate an nih a rin thu a sawi a. Pu Thanbanglova chuan, “Ruling party nge opposition party an nih ka hre lo a. Kan pawl hi ka thiat a nih chuan chenna in leh pawisa cheng nuai 10 pek min tiam a. Mahse ka hnarfilthla a ni” tiin a thlemna tawh chungchang chu a sawi.
Zoram Kuthnathawktu Pawl hi Saitual khua-ah Saituala kuthnathawktu sawrkar laka beidawngte’n April thla a an din a ni a. Tunah hian Mizoram hmun hrang hrangah an pawl zawmtu hi an pung chak hle a. Thingtlang khaw hrang hranga Branch din pui tura sawmna pawh an buai em avang hian tihlawhtling hman meuh rih lova. Kar hmasa khan Champhai tlangdung fangin, khaw hrang hrangah Branch an han din a ni.
Mizo zinga mi thiam tak pakhat chuan tharum thawh lo mahse he pawl lo ding ta hian Mizorama kuthnathawktute beidawn tawhzia a tarlang nia a ngaih thu leh sorkar tan ngaihthah mai chi nia a hriat loh thu a sawi. Mi hausa leh mi duham pawl/mi thenkhatin an pawl hruaitu chu sum hmangin thlem mah se Zoram Kuthnathawktu Pawl chuan an pawl hmalaknaah tharum hman an tum loh thu an sawi.
Zoram Kuthnathawktu Pawl hruaitute hi tun Pathianni liam ta khan Aizawl Theological College a zirtirtu pathumte chuan an tlawh a. Heng zirtirtu pathumte hian ZKP nihphung diktak an hriat duh vanga tlawh an ni a. “Hmalakna ngaihna hre tawh lo khawpa beidawngte din a nih avang hian, engnge an thu leh hla leh an ngaihmawhte tih hriat hi kan duh a. An thiltum lamah thil pawi a awm awm reng kan hmu lo a. An thiltum tihhlawhtlin nan hian fimkhur takin thil an ti a ni” tiin ATC zirtirtute hian an thilhmuh dan an sawi.
Kuthnathawktu pawl vice-president chuan tunhnai lawk a BAFFACOS pawisa, government godown leh weigh bridge siamthat nana pawhpen a nih chungchangah a lungawi loh thu a sawi.

AMFU-in Mizoram Sawrkar Mak An Ti

All Mizoram Farmers Union chuan Mizoram sawrkarin MIP leh BAFFACOS hmanga hma a laknaah NGO dangte thawhpui a, kut hnathawktu pawl ber AMFU a thawhpui lo chu mak an tiin sawrkar chu AMFU thawhpui ve ngei turin an phut. Nimin khan AMFU Gen.Hqrs. Executive Committee inkhawm chuan sapthei ching tura thlan GI wire dawng mek leh sem chhunzawm dan tur leh endikna tura sawrkarin AMFU aiawh mi pahnih tel ngei tura sawmna bawhzui dan tur an sawiho a, uluk leh felfai taka endik ni se an ti. AMFU Executive inkhawm hian 11th.Plan atana thalaite eizawnna kawnga tel tur rawtnate an pawm bawk. Mizoram chhunga agriculture & allied sector-a Centrally Sponsored Scheme (CSS)-IWDP/Haryali. NWDPRA, WDPSCA, Technology Mission leh VFDA,etc. te uluk taka chhui chianga an tha thawh tawh leh thawh zel dan tur mipuite hrilh hriat leh mipui tana tangkai zawka thawhna kawngah a tul anga hma lak ni se. Heng state budget pawna pawisa lokalte hi sawrkarin state fund-a hman thin ang thoa uluk zawk leh tangkai zawka a hman theih nan hma lak ni se an ti.
AMFU Executive chuan grape juice hralhna kawngah a tul anga hma la tura inbuatsaih zel ni se, an office atanga hralhchhuahna atan bungraw mamawhte lakkhawm ni se an ti a. An office atang hian grape juice an zuar dawn a ni.

Israel sipai Bnei Menashe (Mizo) 11 ten raldo mek

Mizoram leh Manipur atanga Israel a haw thla (Bnei Menashe), Israel sipai a tang mi 11 te chu tunah hian Lebanon a Hizbollah leh Gaza a Hamas ho beiin an rammu mek a. Hamas ho bei a raldo mek te chu : Tamir Baite (Israel sipai tha thlanchhuah 120 zinga thlan), Samuel Menashe (Lalrindika), Binyamin Zadeng, Gershon Chonglai, Yosef Menashe leh Itzchak Menashe te an ni.
Lebanon chhim lam a Hizbollah helho bei a rammu mek te chu : Abraham Hangshing, Liel Lunkhel, Shalom Manlun, Rav Yehuda Gin leh Shimshon Lotjim te an ni.

Lions Club-in Water Cooler Dah Dawn

March ni 12, 2004-a din Lions Club of Aizawl chuan kumin chhung hian Project Sight First neih tumin pilot project an siam thuai dawn a, Aizawl Civil Hospital-ah tui thianghlim in tur dahna Water Cooler dah an tum bawk a, Out Door Patient Department awmna tur sak zawh veleh an dah dawn. Lions Club of Aizawl hian cylinder 30 hmangin Oxygen Bank an nei mek a, mipui mamawh a phuhruk loh avangin cylinder 10 leibelh turin ruahmanna an siam bawk. Hruaitu an inthlang thar a, President Dr.Sangzuala Pachuau, Immediate Pas President Lalhmingliana, Vice President, C.Lalramdina, Secretary Dr. John Zohmingthanga, Treasurer Malthantluanga, Jt. Secretary Vanlalsangi, Directors Dr.K. Lalremsanga, S.Hom Chauduri, Lion Tamer Lalthankima Hauhnar an ni.

Sap Tawnga Pathian Biakna
Hnam dang Mizo tawng thiam loten Pathian biakhona leh thu leh hlaa Pathian fakhona an neih ve theih nan leh thalai, saptawng thiam, mahse, hmang thang loten saptawng an hman tlangnel leh hnam dang zingahte rawngbawlna zau zawk an neih theih nan Baptist English Fellowship ruahman a ni a, hemi hawnna hi naktuk August ni 6 Pathianni dar 2:00 p.m.-ah Aizawl Town Baptist Biak In, Upper Khatlaah neih a ni dawn.

FUWS Puhna Dawta Mantir Tumna
Former Underground Welfare Society (FUWS) chuan anmahni fuihpawrha hel tum an awm thu leh hel tumte an lo kir leh kim tawh thu PAMRA thuchhuah chanchinbu hrang hranga chhuak chu FUWS-in ramri chungchanga a hma chhawp a chhunzawm theih loh nana ruahmanna leh dawta FUWS hruaitute mantir tumna a ni an ti a. Nimin khan thu chhuahin heng hi mipui leh FUWS member zawng zawngten lo hre turin an duh. FUWS chuan sawrkar hma lakna thlir chung zelin ramri chinfel thuai a nih theih nana an hma chhawpte mipui hriatah an puangzar zel dawn a ni an ti a, a huntakah an memberte pawh an hriattir thin dawn a ni an ti.

Taxi Stand 18 Pekbelh ZTOA Lawm
Zoram Taxi Owners Association (ZTOA) chuan sawrkara an ngenna ngai pawimawha Aizawl khawpui chhungah taxi stand hman lai mek baka a dang 18 siamsak an nih avangin sawrkar chunga an lawmthu an sawi a, Vehicle General Parking Place-a ding ve thinte ngaihhnathiam an nih avangin Aizawl SP leh a thawhpuite chungah lawmthu an sawi bawk.

Champion Team-ah Mizo 3 An Tel
Wales ram Cardiff-a Milk Cup Football Tournament tun hnaia zawh takah chuan Tata Football Academy (TFA) an champion a, TFA-ah hian Mizo pathum Lalramluaha, Salem Veng, Aizawl, Malsawmtluanga, Ramhlun Sports Complex leh Henry Gangte, Manipur (A nu Aizawla awm) an tel. TFA team hian India an lo thleng leh tawh.

Lunglei MSU-in chhui
Tunhnai lawk khan Mizo Student Union (MSU), Lunglei, hruaitute chuan Lunglei district chhunga SSA hnuaia zirtirtu hnathawk te chhui chianna an nei a. SSA Project hnuaia zirtirtu thenkhat chu an hnathawhna hmunah an kal tha lo hle tih an hmuchhuak a. Hei bakah hian SSA in school a hman tur computer a pek thenkhat chu hmanloh a dahtawl mai mai anni tih an hmuchhuak bawk a. Heng an thil hmuhchhuah te hi thuneitu sang zawk hnenah thlen thuai an tum a ni.

Proxyvon man hnem
Nimin piah khan Mizoram Excise, Vairengte Station a mite chuan Vairengte Check Gate-ah Proxyvon 4032 capsules chu MZ-03/1827 ah an man a. A neitu nia rinhlelh Rinsailova S/o Lalruata, Diltlang (Driver), Lalrintluanga S/o R.Lalkima, New Colony, Saiha leh J.Nango (Pari) D/o Aihra, New Colony, Saiha (Motor neitu) te chu an man nghal bawk a. Assam Drug (Control) Act, 1950 hmanga thubuai siamsak an ni.

Lunglei-ah University leh
Law College din tum
Lungleiah University leh Law College din theih a nih dawnleh dawn loh enfiah turin Institute of Charter Analyst of India atangin mi thiam pahnih an kal a. B.Halder, BTech leh JJ Kola, North East a Law College chungchang bik ngaihtuahtute chu Hyderabad atangin an kal. Hemi chungchang hi Lunglei DC chamber-ah sawiho a ni. Tunah hian hemi atan hian detail project report thehluh tawh ani a; Law College bik atan hian Lunglei DC chuan application a thehlut tawh a ni.

Solo Competition
MZI Lungsen Branch, Lunglei chuan Sept. 6&7, 2006 khian Lunglei District huap Solo competition buatsaih an tum a. ‘Zan lalnu’ Roliana Ralte phuah leh mahni duhzawng hla dang pakhat sak a inelna hi neih tur a ni a. Lawmman : 1st- Rs. 2000/-, 2nd- Rs. 1,500, 3rd- Rs. 1000/- leh Certificate a ni ang. Hrechiang duh tan mobile Phone No. 9436146081 / 9436370587 ah te zawhfiah theih a ni.

Similar Posts:

• “ZKP kan phel lo”: ZKP
• Zoram Kuthnathawktu Pawl a phel
• United Democratic Alliance (UDA) a ding
• T Sailo working on alliance without Cong and MNF
• UDA is messiah?

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Sunday, August 6th, 2006 at 2:21 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.