Lengpui Airport -ah Khawchhe Hnuaia Thlawhna Tum Theihnan Instrumental Landing System Dah Dawn
Aizawl Sept 01 : Nimin khan MJA memberte chuan Lengpui Airport an tlawh a; ruahmanna hrang hrangte an thlir bakah Aviation Service ten kang thelh dan leh a chhunga chuangte chhanchhuah dan a taka entirna an nei a. Pu. J.Lalhmingliana, OSD, Aviation Wing, Asst. Director Pu Saidenga leh Pu Lalthanzuala, SDO, PWD ten airport chanchin leh ruahmanna an neihte an sawifiah bawk.
Lengpui Airport tihchangtlun nan hian Runway tawpa ground extension metre 75 a thui siam belh te, Runway sir a Isolation Parking Bay siam belh te, thlawhna chawlhna Apron tihzauh leh a panna kawng siam belh te, Digital Current Weather Information System (DCWIS) siam bakah Control Tower sak thatte a tel a. Airport tihchangtlun nan hian Rs. Vaibelchhe 150 vel senna tur project buatsaihmek a ni.
Khawchhe hnuaiah pawh thlawhna tum thei tura Instrumental Landing System vuah tura ruahman mek a ni a. Thlawhna boruak sa phuhchhuahin a tihchhiat phak loh tura Runway tawp atanga metre 150 a hlaah ILS hi vuah a tul vangin ground extension hi metre 75 dang siam belh a ngai a. ILS hi vuah anih chuan Reiek lam hawi pawhin thlawhna a thlawk chhuak thei tawh dawn a ni.
Thlawhna chawlhna (apron) hi thlawhna tam zawk an chawlh theih nana siam belh tum a ni a; Runway atanga luhna kawng pawh a hran a siam tum a ni bawk. Control Tower ah hian zunram thiarna pawh a awm loh vangin duty te chuan buaithlak tihchang an neih thu an sawi a. Control Tower pawh hi changtlung zawk a siam turin ruahmanna siam mekah chuan telh a ni a. Meteorological Office pawh Control Tower-ah hian awmin, hmanrua an la neih that loh em vangin meteorological lama mithiam bik duty ten mitlawng a khaw awm dan an hmuh chu thlawhna tum nana kaihhruai nan hman a ni a. Visual Flight Rulesah khaw hmuh theih chin hi thlawhna te chi ah 3.5 km, thlawhna lian chi ah 5 km tal anih a ngai a; ILS a awm erawh chuan khaw hmuh theih chin 1.5 km chauhah pawh thlawhna tum phal a ni thung a. ILS awmloh vang hian 1.5 km visibility aia tam ah pawh thlawhna tum tur te tum lovin an kir leh phah fo thu Pu J.Lalhmingliana chuan a sawi.
Kangthelh pawl (Aviation Fire Service) chuan Runway sirah kangthelh dan leh mihring nunna chhanchhuah dan a takin an entir a. AFS hian kangthelhna motor an neihda 2 bakah Slovakia siam Fire Crush Tender pahnih an nei bawk a. Fire Crush Tender man hi a to hle a, pakhat man pawh Rs. Vaibelchhe 2.4 man zet niin, kangthelhna bawlhlo nena pawlh tui 7000 litre a phur thei a, minute 2 chhunga thlawhna kang thelh hman tura ngaih an ni. He Fire Crush Tender hian tui a phuhchhuak thui thei hle a, 200 feet a thui a phuh theih bakah, minute 10 chhung lekin tui a thunkhah (refill) theih bawk a. Motor chhungah hian computer awmin, chu chuan motor hnathawh dan chu a en vek bawk a. Heng bakah hian hmanraw tha leh changkang tak tak dang a la keng tel bawk.
Lengpui Airportah hian nitin Airbus leh ATR a tum bakah ni thum danah Boeing a tum thin a. Thlawhna pilot leh ATCT duty ten runway marking fiah tawk lo leh Runway sir tawn tawn a light eng tha lo thinte chu an sawisel thin a. ATCT atang Runway hmuh kim harsa khawpa Runway sira hnim awm samfai tur pawh a sum lamah harsatna an neih thin thu Aviation Wing hotute chuan an sawi.
MNYF Leh MCPYF Sub.Hqrs. In Thawhho Zel An Duh
Nimin khan MNYF leh MCPYF Sub.Hqrs. Lunglei chuan Joint meeting neiin, hetiang hian resolution 5 an passed:
1. Keini MNYF Sub.Hqrs. Lunglei leh MCPYF Sub.Hqrs. Lunglei te chuan MNF party leh MCP thawhhona hi Pathian remruatah kan pawm tlat a, pathian leh kan ram tan lungrual taka thawhho zel kan tum tlat a ni.
2. Kan Sorkar chak tak Pu Zoramthanga kaihhruaiin Chhim mipuiten zirna a hma kan sawn zel theihna atana hmalakna- Law College, B.Ed Training College, Mizoram University Campus Lunglei te din tura chak taka hma a la hi lawmawm kan ti takzet a ni.
3. Lunglei Distric-in kan nghahhlelh em em Indo-Bangladesh Border Trade Tlabung kaltlanga harsatna hrang hrang kara hmalak chhunzawm zel niin Rs.Vbc 14.16 zet sanctioned tawh anih hi ropui kan tiin kan lawm tak zet a ni.
4. Mizoram chhim lam hmasawnna tura, Lunglei bul ‘Saitluk Ram’ a airport puitling siam tura Mizoram Sorkar-in chak taka hma ala hi lawmawm kan ti takzet a. A hlawhtlin ngei theih nan mipuite thlawpna pawh kan sawm tak meuh ani.
5.Remna leh Muanna rah hlu leh duhawm tak kan chan avanga development ropui leh ro tling tak tak sawisen loh kan nei hi lawmawm kan ti a, hengte vawng nung reng tura Pu Zoramthanga kaihhruai MNF Party leh Pu J.Lalsangzuala kaihhruai Mizoram Congrses Party ten thawhhona tha tak kan nei hi tha kan tiin kan thlawp tlat a ni, tih an tarlang.
Baffacos VanginThinrim Puahkeh Hlauhawm
Mizoram Kut Hnathawktu Pawl Gen. Hqrs. Saitual chuan Mizoram sawrkarin Mautam tanpuina Baffacos pawisa a hman dan ngun taka an thlirin a thlenna tur dik tak a thleng lovin a hmanna tur ni awm lo pui puia hman ni ngeiin an hria a, lungawi har an ti. Nimin khan press release chhuahin Baffacos sem dan hi tidanglam lova a ngai renga kalpui chhoh zel a nih chuan kut hnathawktute thinurna l;eh beidawnna a puakkeh lovang tih sawi theih a ni ta lo an ti a. Chuvangin Baffacos sum sem dan leh hman dan kut hnathawktute lam hawia her danglam vat turin Mizoram sawrkar an phut. Hemi chungchangah hian Zoram Kut Hnathawktu Pawl chuan Mizoram mipui 100-a 80 aia tam thlawpna nei niin an insawi.
Ram Pum Huap Right To Information Khawmpui Nei Dawn
Right to Information Act, 2005 hman atanga kum khat a tlin hun denchhenin 13th – 15th October, 2006 hian New Delhi-ah ram pum huap Right to Information (RTI) khawmpui neih a ni dawn a. He khawmpuiah hian India ram State tin atanga State Chief Information Commissioner zawng zawng te chu tel tura tih an ni a. President of India chuan 13th October, 2006, khian he khawmpui hi Vigyan Bhawan ah a hawng ang a, Prime Minister in he khawmpui kharna ni ah thu a sawi bawk ang.
He khawmpuia thu ngaihtuah tur pawimawh deuh te -1. He RTI dan hman atanga mimal pawl ang zawnga RTI hmanga thil tih pawimawh zualte thlir letna leh sawihona.2. RTI dan hlawhtling taka hman a nih zel theihna tur kawng sial dan rel.3. Thingtlang mi mawl berte pawhin a RTI chungchang an lo hriat zawk theihna tur zawnga hmalak dan ngaihtuah.4. He RTI Act hman hun chhunga hlawhtlinna chanchin leh harsatna tawhte chungchang thlirhona.
He inkhawmpuiah hian State Public Information Officer (SPIO) hna thawk tha chungchuang bik pahnih (2) hmingte (hetiang mi an awm chuan) bakah, tlawmngai pawl RTI hmanna kawnga mi thawh hlawk bikte hming pahnih (2) theuh pek theih a ni.
Chalfilh Block MNF in Zu Rs.1,000/- man leiah Congress puh
Chalfilh Block MNF chuan thuchhuah siam in MPCC President Pu Hawla’n Sesawng khua atanga MNF a lungawilo mi 181 lawm lut anga chanchinbu a tarlan chu thu belhchian dawllo a ni, an ti.
An Thuchhuah chuan an lawmluhte hi Vengthlang MNF Unit atangin -10, Vengthar – 13, an vaiin 23 an ni a. Vengthlang MNF Unit President nilai anga an chhuah Pu R.Zaihnuna hi President a ni tawh lo tiin insawn kual reng, therhlo ngaina mi tak a ni, an ti a. Lawmluhna-ah hian Zu leh Pawisa an chelek hle a ni tiin Zu dawr-ah Rs 1,000/- man an lei a, a duh apiang in theih turin an phalrai tih an tarlang bawk.
Mizoram Tan A Tha Bik Ang Em ?
Mizoram sawrkar chuan a hnathawkte tan ICICI Lombard-in Health Insurance Scheme a siam chu hmang turin Minister-te hnenah thu a chhuah nia hriat a ni a.
Thu dawn dan chuan ICICI hian nikumah khan Assam sawrkar hnenah pawh hetiang Health Insurance hi an pe a, mahse, kuminah hian he project hi renew a ni lo a, he project hi a hlawhchham a ni a ti. India sawrkar pawhin an report-ah ICICI hi project hlawhchham an ni a ti niin thu dawn chuan a sawi. ICICI Insurance-ah hian chhungkaw nuai 2.5 tan kumtin premium Rs. 17.23 crores a ni a, hemi bakah hian service tax 12.24% a awm. Bajaj Allianz chuan hetiang Health Insurance Scheme hi a nei bawk a, chhungkaw nuai 9.15 cover-in premium Rs.20 crores a tiam thung niin thu dawn chuan a sawi.
Iran-in UN Thu Zawm Lo : Engtin Nge An Tih Dawn ?
United Nations Security Council-in uranium an siam leh chu chu thil dang siam nana an kalpui tihtawpna tura Iran hnena hun a pek chu nimin khan a tawp ta a, mahse, Iran President Mahmoud Ahmadinejad chuan nuclear thiamna chungchangah Iran-in amaha thuneihna a neih chu khawthlang lam nekna avangin inch khat pawhin a inphah hnuai mai dawn lo a ti. Iran sawrkar television-ah thu sawiin Ahmadinejad chuan Tehran chuan a zalenna leh dikna tihchhiatsakna chu a pawm dawn lo a ti.
UN Security Council-in titawp tura a tih, uranium enrichment chu Iran chuan a thuneihna huang chhung a ni tiin uranium enrichment chu a kalsan dawn lo a ti. International Atomic Energy Agency nuclear inspector-te, Iran-a awmte chuan UN resolution chu Iran-in a zawm lovin uranium enrichment a titawp lo tih an report thuaia rin a ni.
United States chuan a tir atang rengin Iran hian UN Security Council resolution a pawm loh chuan Ran ensanna tur sawihona neih a duh thu a lo sawi tawh thin. United Nations-a US palai John Bolton chuan Iran hian UN resolution a pawm loh chuan ensan a tawk thei tih a inhresa a ni a ti a, UN resolution a zawm loh chuan UN Secxurity Council permament member panga chuan ensan dan tur an zawng dawn tih Iran chuan a hresa reng a ni a ti.
US State department thupuangtu Sean Mc Cormark chuan US Under Secretary of State Nicholas Burns leh UK, France, Russia, China lehHermany atanga senior official-te chu karlehah Europe-ah inhmukhawmin Iran ensan chungchang hi an sawi ang a ti a, Iran ensan dang (veto) thei Russia leh China chuan dawh theihna neih an duh a, na taka Iran hrem chu an thlawp dawn lo a ni. Iran hian a nuclear programme chu hmasawnna (peaceful purpose) atan a ni a ti fan a, mahse, khawtlang lam sawrkarte chuan a ruka nuclear ralthuam siam nan a hman an ringhlel a ni.
Minister Chungah Lawm
Lawngtlai District Cement & Rode Dealers Association chuan an dil angin Supply Minister Pu K.Sangthuama chuan Lawngtlaiah Legal Metrology Inspector dah nghal turin a ti a ni an ti a, Minister leh Supply Director chungah lawmthu an sawi.
Union Minister Aizawlah
Programme duan lawk ang chuan Union Minister of State for Commerce & Industry Pu Jairam Ramesh chuan zan khat riakin vawiinah Aizawl a lo thleng dawn a, chawhnu dar 2:30 -a I&PR Auditorium-a Public Information Campaign kharna inkhawmah khual lian a ni ang. Tlai dar 6:30 p.m.-ah CM leh Minister-te nen an inkawm ang a, naktuk chaw hma lamah hmun thenkhatte a tlawh ang a, dar 11:30-ah press conference neiin a zawhah Kolkata panin a chhuak ang.
CM Relief Fund Pe
Mizoram Municipal Steering Committee chuan Rs.2,000, Brigade Zau Oranic Farming Society chuan Rs.1,579, Carrying Contractors Association chuan Rs.50,000, Lunglei Truck Owners Association chuan Rs.10,000 Chief Minister’s Relief Fund-ah an pe.
MCP-ah Mi 186
Mizoram Congress Party (MCP) chuan Tlungvel bialah mi 123 leh Suangpuilawn bialah mi 53, an vaiin mi 186 ten MCP an zawm thar niin an sawi a, Tlungvel bialahj hian Darlawng atangin 71 leh Phulmawi atangin 52, Suangpuilawn bial North Khawlek atangin mi 53 niin an press release chuan a sawi.
YHAI Inthlanna
Youth Hostel Association of India (YHAI) chuan vawiin tlai dar 7:00-ah Tourist Lodge Chaltlangah hruaitu thar thlanna an nei dawn a, chawhlui an kilho nghal ang. State Council member zawng zawngte kal ngei tur an ti.
Vairengte ZNP-te MNF-ah
Vairengte Kawngthar Venga ZNP Unit President Pu Lalnunzira ho, Vice President leh Secretary tiamin mi 26 chuan MNF an zawm niin MNF press release chuan a sawi.
Kharna Inkhawm Pahnih
Vawiin dar 11:00 a.m. 19th Inter Departmental Sports 2006 kharna inkhawm Kulikawn Indoor Stadium-ah neih a ni dawn a, Home Minister Pu Tawnluia khual lian a ni ang. Vawiin dar 11:00 a.m.-ah bawk Women Polytechnic chuan an Week kharna inkhawm an Polytechnic Multipurpose Hall, Durtlangah an hmang dawn a, MPSC Member leh an Principal hlui Pu B.Sangkhumi khual lian a ni ang.
Chama Nigeria Ramah
Mizoram Assembly Speaker Pu Lalchamliana chu Commonwealth Parliamentary Meeting Nigeria rama Abuja khawpui neih hmang turin nimin khan an nupain Aizawl an chhuahsan a, September ni 23-ah Aizawl a lo thleng leh ang. Israel ram fan nghal an tum.
Science Seminar Saikuti Hall-ah
Nimin khan Saikuti Hall, Lunglei-ah District Level Students’ Science Seminar neih a ni a. Thupui, “Conservation of Biodiversity – Prospects and Concerns” tih a ni. Hetah hian BHSS, Sacred Heart School, GHSS leh Pukpui H/S te an tel.
Lunglei Bazar vengah Vantlang Ekin/Footpath
Bazarveng V/C, Lunglei chuan TFC (LAD) Sum hmangin Ek In leh Zun In inkawp Concrete an sa a. Hetah hian Rs 45,680/- sengin, Vantlang tan man chawiin a hman theih dawn a, Lunglei khawpui chhungah hetiang hi nei hmasaber an ni a. Tukin zing dar 7:00am hian Bazarveng a upa ber Pu J.Zathuama chuan hei hi a hawng ang. Hei bakah hian Footpath, Rs 46,200 sengin an buatsaih bawk a. Pu Vanlalzawma MP (LS) chuan Rs 50,000/- a pe a ni.
Similar Posts:
- Lunglei-ah M-28 Skytruck Aircraft service dawn
- Thlawhna chetsual vangin ILS la hman theih dawn loh
- Lengpui Airport ah Instrument Landing System (ILS) ?
- Lengpui Airport ah North East Shuttle thlawhna a chesual
- Public Debate
September 1st, 2006 at 4:46 pm
great…state khat airport ve ruang si khi changtlung lo em bawk a ni..,ira, a kal chang mawlh hian rualawh a na thin…privatize se hma a sawn chak zawk a nge maw chu?
Hnim sam faina tur a tan mai mai poh sum ka la in daih lo chu a ni si a leh…
Report this comment