“AIDS Doral a hrang lua e”
AIDS veite chunga rilru zau hi hmasawnna ropui a ni.
– Haukhum Hauzel
Aizawl September 7 : Nimin chawhnu dar 1.30 khan Mizo Zirlai Pawl (MZP) General Headquarters buatsaih ‘AIDS Doral A Hrang Lua E’ tih hmingpu lehkhabu chu Chief Secretary Haukhum Hauzel chuan a pisaah a tlangzarh. He lehkhabuah hi HIV Positive-ten HIV hrik an kai dan chanchin chipchiar taka an ziakna a ni a; a thlawna sem tura ruahman a ni. Haukhum Hauzel chuan ” AIDS chuan Mizoram pawh min rawn luhchilh mek a; chuvang chuan sawrkar pawhin hei hi a vei a, a invenna kawngah pawh theih tawp a chhuah zel a ni. Mizo mipuiten HIV positive-te chungah rilru zau tak kan pu thei ta hi hmasawnna lawmawm tak a ni” a ti. Chief Secretary chuan, “AIDS vei hi a veitu tan a vanduaithlak mai piah lamah ram leh hnam tana thalai thawhhlawk tak tak turte kan chan mai tur hi Mizoram tan a vanduaina belhchhahtu a ni” a ti bawk. MZP, General Hqrs.-in All Mizoram Career & HIV Awareness Campaign a buatsaih avanga lawmthu sawiin, Chief Secretary chuan, “Eizawnna tling tur hna hi Central, state leh private sector hnuaia inthensawm a nih avangin sawrkar chuan vei hle mah se a chinfel dan tur kawng felfai tak ruahman thlap chu a harsa a ni” a ti. Mizoram-a thalai eizawnna neilo pung zel chinfel dan tur chungchangah mipuite nena inrawnkhawmna hun buatsaih a nih thu a sawi a; rawtna hrang hrangte chu 11th Five Year Plan-a telh turin Mizoram sawrkar chuan Central-ah a thehluh tur thu a sawi bawk. Inkhawm kaihruaitu MZP President PC Laltlansanga chuan zirlaite zinga HIV hrik darhsarh tan mek leh eizawnna kawng zawh tur mumal hrelo an pung zel chu MZP-in an vei avanga August8, 2006 atanga beihpui thlak an nih thu a sawi. He an campaign-a tawiawmtu Mizoram Coaching Academy leh Positive Network of Mizoram te chungah lawmthu a sawi bawk. MZP-te hi group 4-ah inthenin Serchhip leh Mamit district-te chu an tuam zo tawh a; tunah hian Champhai leh Saiha district-ah campaign an nei mek a ni. He an awareness campaign pual hian eizawnna kawng inkawhhmuhna lam hawi ‘Zirlaite Hlawhtlinna Lamtluang’ lehkhabu chu an lo tlangzarh tawh a; zirlaite hnenah a thlawnin an sem a ni.
Hindi teacher bo
PC Vanlalsiama (40 vel) s/o PC Lalmuana, Reiek khua chu tunhnai khan a awmna chin hriat lovin a bova, khawthlang lam Tuipuibari lamah a awma rin a nih avangin Reiek mi tlawmngaite chu motor pahnihin a zawng tur hian an thang mek a ni. Amah hi S Hlimen H/S a hindi zirtirtu a nia, Reiek high school a thawk turin sawn a ni a, order pawh a chhuak tawh a, mahse a la zawm lo a ni. A nupui nen an inthen a, chuta tang chuan a mumal lo deuh nia sawi a awm. Inrinni khan Tuipuibari bul Tuilut-ah chaw a ei a, mihring a hlau hle a, a bikin uniform lam ha chu a hlau leh zual an ti a, hemi hnu hian mi thlamah hmuh a ni leh a, helai velah hian a la awm an ring. Rs 10000 leh mobile phone a keng niin hriat a ni.
Lalduhoma kuthnathawk pawl nilo
ZNP chuan thuchhuah siamin August tawp lam khan MNF hruaitu ten an party leh block hruaitute kokhawmin Kuthnathawk pawl lo ding ta chu ZNP president Lalduhoma remruatpui leh sum leh paia a puih a ni a, telna tlak a ni lo tiin an zirtir a. Chumi bawhzui chuan Serchhip MNF block chuan tel lo turin circular hial an siam a ni. Tunhma atang tawhin sorkarna chelhtute kaihhruaina hnuaiah kuthnathawktuten dinchhuahna hmu lo nia inhriain he pawl hi an lo din ta a ni mai a, sorkar kalphung dik lo hrin chhuah a ni. ZNP chuan he pawl hi kuthnathawktute tan malsawmna lo nise a duh em em a, inrawlhna hranpa a nei lo. MNF ten heti taka an lo huphurh lawk hi hriatthiam a har a, party rawngkai anga an hriat phawt chuan an thinhrik dawn a ni tih hriain MNF party chuan dawt phuahchawp hnmangin ZNP an puh ta mai a ni, an ti.
CS chungah MSU lawm
Mizo Students’ Union chuan Sept 4 khan chief secretary chu a offics-ah an hmu a, Tlabung khawtlang harsatna thenkhat thlenin zin turin an sawm a, zin a tulna chhan an sawite chu Border trade hmalakna en, Natural Gas chungchang, department hrang hrang building leh quarter mumal lo, Sapho sulhnu Post & Telegraph office hmasaber, Thana (police station hmasa ber) Inspection Bangalow a ni a. Hengte hi kum 100 a tlin tawh hlawm avangin enkawl that loh chuan a chhe mai dawn a, chief secretary hian an sawmna hi tihpuitlin sak ngei a tiam avangin MSU hi a chungah an lawm em em a ni. Hei hian ram tan rah tha tak a chhuah ngei an beisei. Tin, zirlaite puala Football tournament an siam turah lawmman tum sak a tiam avangin lawmthu an sawi bawk.
Basketball-ah MNF lawm
MNYF chuan sub junior National Basketball Championship 33-na Kolkata a neih zawh takah Mizoram team chu team champion an nih bakah Andrew Lalmalsawma chu top scorer a ni a, kan chhuangin kan lawmpui a ni.He intihsiaknaah hian team 23 an tel. Mizoram hian basketball hi kan uarna ala rei lo hle a, heti chung hian India ram aiawh a kal thei kan awm mai bakah state intihsiaknaah team champion hial kan ni thei hi Sports department hnathawktute leh minister ZH Ropuia hmalakna rah a ni an ti. MNF sorkar hian Tuikhuahtlang a CM Bangla leh Secretariat thin chu Basketball court atan YMA hnenah an pe a ni.
MJA meeting
Naktuk chhun dar 12 khian MJA executive chuan Press Club-ah meeting an nei dawn a, member te insawifiahna an ngaihtuah dawn a ni.
ITI result
Nimin khan ITI 2005-06 result chu tihchhuah a ni a, exam beitu 167 zingah 148 (88.60%) in an passed a, a kimchang hi Principal office-ah tarchhuah a ni. Provisional certificate pawh lam theih a ni bawk.
Kawng ping
Aizawl atanga Lunglei leh Champhai lam panna kawngpui chu Bung Bangla bulah leimin in a hnawh avangin lirthei engmah a kaltlang thei lova, vawiin tlai lam hian a tlang hman beisei a ni.
Tlungvel bialah
Minister K Sangthuama chu Sept 8 khian lehlangin Tlungvel tlangdung a fang dawn a, Chhiahtlang thlenga kalin buhfai dinhmun leh thil pawimawh dangte a en nghal dawn a ni.
Tihdam rawngbawl
Rome atanga lokal Bro Dennis Lalfela chuan naktuk zan atang khian Kulikawn Catholic Biak In-ah tihdam rawngbawlna a nei dawn a, Pathianni zan thleng hun a awh ang. Rilru, taksa leh thlarau a harsatna neite chu kal ngei turin an sawm.Inkawm hi zing dar 10-ah tan a ni ang a, a duh tan zanriah ei nghal a ni ang a, riak duh tan a riah theih nghal bawk ang.
(Hnehtu Daily News)
