I ram chu vanram ang hiala tehkhinin ‘chhawrpial run’ tiin an lo chhal thin a, mahse, dikna leh rinawmna te’n mual an liam a, a nawmna leh a mawina te a bo mek a ni. Finna leh thiamna aiin hmelhriat neih thatin kawng ro a su ta zawk a. I lehkha zirpui thin, nang aia thiam lo zawkte pawhin chhungte an neih that a zarah hna zawk thawh tur an hmu a, nang aia dinhmun tha-ah an ding ta zel a, mak tihna leh beidawnnain a tuam zo ta che. I kawmchhak pa, engmah ni lem lova i ngaih thin pawhin a tlin leh a thiam zawk vang ni lovin doctor ni tura in interview-naah a tlin khalh che a, khi, car thar a lei nghal hmiah mai khi. A pa Liana sawrkar milian a ni tlat alawm. Nupui fanau chawm tur i nei a, chutichuan kutdawh ngai lo, mi tlawn ngai lo i lo nih thinna leh i rilru-a i lo induh ve thinna chu loh theih lohva i paihthlak a, dawl zawra i zawr a, hotute hmaa i inphah hniam loh chuan engmah i chang ve dawn chuang lo tih i chiang ta tulh tulh mai maw? Thil kalphung i man thiam ve ta zel a nih chu. Mi rilru chak ngang i ni a, i zir chho ve zung zung mai alawm. I tum phawt chuan midang aiin i thiam hma zawk em em ang. Zir zel rawh.
Ram hruaitute’n missionary tirhchhuah an vei a, Kohhran hruaitute’n ram leh hnam an veiin ram rorelnaah an duh duhin an inrawlh a, Civil Services hovin Pathian thu khirh pui pui, fundamentalism te, fa neih tlem thu te leh rinna lungphumte an chai a. MZP-ah zirlai an tlem hle a, YMA-ah pawh “You are young even when you are 60. Youth is just a state of mind” tih chang chawi niawm takin pa chal tak tak an awm bawk a. Lingletna khawvelah hian i duh reng vang ni lovin i lo lut ve ta a nih hi, he chhawrpial runah hian.
Kristian ramah inthahna leh uirena te leh sualna te a pung thur thur a, zep ruk theih lah ni hek lo. Tumahin an nihna dik tak an sawi duh lova, an sawi ngam lo. Inti eiru lo apiang hian an eiru tam a ni awm e. Rinawm hmel apiang an rinawm lo. Zu khap tum nazawng hian mi thlarau nun an vei ber lo. Sual hre suh, hmu suh, khawih suh, hmet suh, tualchai suh, ngaihtuah pawh ngaihtuah suh. “Suh” tamna apiangah buaina a pung mai. In buai tulh tulh hi.
He inbawlna ramah hian bawlin i awm a, i phuan peih em? A chhuak thar apiang an bawh ruih ruih a, car te, incheina te, zaithiam te, ruat mawi te. A peih peihin an sep a, an sawi a, an suangtuah a, an ziak a, an inti a zo ta a. Tak hlawm hian. Hetianga an buaipui tluk zet hian rinawmna leh tlawmngaihna te hi lawmin buaipui sela an va thatpui nasa dawn em. A chhuak thar apiang bawh ruih ruih chakna thlarau leh taimakna hi lo sengkhawm theih ni se, thil tangkai dangah hmang ta zawk se mi tam tak a chawikang dawn si.
Ngawlveina hian sual bawiah mi a hnuk lut a, tih tur ang mi a tih tir thei lova, nih tur ang min nih tir phak lo. A la rei love, chhawrpial run ngawlvei rama a lo chan takna hi. Duhamna avanga sum leh pai mahni tana lo chheprelh tute tuh rah an fate’n an seng a, damdawi ruih theih leh ruih theih loh thlengin an rui a, a ngawl an vei a, an thih pui a ni. An sualna tlengfai turin biak bukah an lut a, kar khata vawi khat luh mai duh tawk lovin an lut tluk tluk a, an chhungril nun erawhin Siamtu lung a tiawi mawlh si lo. “I pindan chhungrilah lut la, i pa a ruka hmu thintu hnenah tawngtai rawh” tia hrilhtu aw chu an ngaithla ngam lova, a fala hmuh chu an ngam lo. Nun inzawmna nei mawlh hek lo. Thiante nen a huhova tih deuh huk huk chuan tha ve mai turah leh kai chho ve mai turah an in ngai deuh a ni. Zing tawngtai inkhawm atangin an tan a, zan lam thlengin. In chhungkhur rel fel si lovin Kohhran ro rel tur leh biak buka kal turin zantin in an chhuahsan a, chhungkua an awp lum hman lo. Chu chuan an fate nun chu chhiatnaah a hnuk lut a, an boral mek a ni.
Thuhriltu vak vel an pung a. Piangthar tawh sa sawi hnawm thiam leh mi nun nghet sa inrinhleh tira piangthar chiang lova sawi thiam apiangin campers tur an hmu tam a. Nun chawm len aiin nausen sawngnawi tam tak an hring chhuak thin. Pathian thu leh Pathian lawmzawng aiin mihring beng hriat chak zawng an sawi tam zawk a. A dik chu a dik tia ko ngam leh a dik lo chu a dik lo a ni tia kawk chat chat ngam an tlem ta. Inkhawm tlem rawt chu thlarau mi lo nihna a ni a, zu ni lovin Setana hi sualna bulpui a ni tih sawi chu mi piangthar lo an ni. Chatuan damdawi aiin na chhawkna an hmang nasa lutuk ta a ni, a chhawk rei thin si lo. An sual hriat dan leh an sual do danah an chiang lo a ni. Pathian thu a pumpuia inzirtir chet chet aiin “pulp theology” leh “prosperity gospel” in min chiah hneh zawk a, chu chuan a saseh hun a lo thlenin kan rinna min vawn ngheh tir thei lova. Ringtu chu ringlotu aia bawraw zawka a chet chhuah chang a tam hle thin. Van Jerusalem aia lei Jerusalem ngaisang zawka, chumia an kal theihna tura chatuan nunna thu hransan hial duhtu tam tak an lo awm ta hi thilmak a ni em? Ni love, five year plan pawh kalpui thiam lo hnam tan chatuan thil ngaihtuah chu a hla lutuk deuh a ni. A mak love.
He ram mak tak maiah hian i vak vel a, vawk englo kawm eite chu i hmu a, awt thei ngaia i inrin loh leh thil tenawm nia i lo ngaih thin chuan a lo hip tan ta mek che a nih hi. I la naupan deuh lai leh zirna ina i awm lai khan ram kha i hmangaih thin a, “Naia khat pawh ka eiru lovang, ram tan ka inpe ral thak ang” tih rilru i lo put thin leh i lo intiam thin kha khawvar ar khuan hma hian vawi thum lai i phatsan mai dawn em ni? Hla tak atanga thlir kha chuan tih theih mai turah khan i ngai a, mahse, a “system” ah i han luh chilh meuh chuan a harsa i ti ta hle mai a nih hi, tiraw? Nangmah chauh i ni lo a nia. Chutichuan, enge hrilh zel che ila min tih? Ka rinawmna zawng zawng chhalin, “He ramah hian awm la, rinawmna um zel rawh, i lawmman chu i la hmu em em ang,” tiin ka tiam dawn che em ni? “Zam suh!” tiin hrilh ta che ila ka hlauhthawnna leh ka zamna aw khur hi hriain i zam nasat phah zawk ang em?
Zam suh!
(www.zawlbuk.net ah tarlan a ni tawh na a, dah nawn ve leh reng reng ang! ninawm atan tal)
October 11th, 2006 at 4:56 pm
ni zam suh…ziak tha khawp mai….zam pawn zam hmel put loh luih tur….
mahse. ti thei dinhmun a indah ve ta theuh ila,mahni ta tur chan ngam a thenawm naute pe phal chu mizoram mai lo pawh, khawvel mihring ah chuan tlem te an niang……
thil duh tam na, a duh zawng zawng in an indaih bawk si lohna khawvel ah hian, i thil duh midang in an neih khalh hma che a i ta a siam thei ngei turin midang nen intlan siak naah i tlan ve ani……chuvang in i hnuai a awm thin ten an rawn leh pelh che khan i thlen chin a tawi ta tihna ani lova, midang nang aiin an tlan thui tawh zawk a , chuvang in i dinhmun pawh anmahni nen a teh chuan a lo hniam ta ani…..zam ngawt lovin, bei tang tang rawh…….
Report this comment
October 13th, 2006 at 1:23 am
Ziak tha khawp….
Report this comment
April 11th, 2007 at 12:13 pm
Van ziak tha kher em! Pu Eiruliana te ho chuan chhiar se an kimki choih2 don a nih khi le. Mahse ni e, myself soi ang deuh khian mahni ta midangte pek chu har tak tur a ni, a… a theih loh hrim2 chuvangin MAHNI TA LO LAK/ MI CHANAI LAK hi sim ila kan tha tlang maiin a rinawm.
Report this comment