Kum tam a liam ve ta : Uniform kan nei ve a, kawr pawdâng leh kekawrbul pawl tak a ni mai. Pheikhawk erawh freestyle an phal. Sikul-ah hian tui thak kan pai thin a. Ingredients a tlem hle-Saidawiuma tui daha, chi leh hmarcha tlem pawlh a ni mai. Awm thei deuhin aieng an pawlh belh thin a, kan ît ve thin hle. Chawlhlawk laia sakawr chungchuan kha ka thil châk pawl tak a ni kumtluan ziah thin nain a tê pawl ka nih thin avangin a ziding leh a zakûl bak ka chang ve ngai meuh lo. Kan Sikul bulah upa tawh tak, Pu Chîn-a a awm thin a, a tiang kha artui pum thum man tih kan hre bel hlawm thin hle.
Ka hre reng thin : Kha Sikula kan zirtirtu thahnemngai tak takte kha ka theihnghilh tawh ngai lovang. Pu Kaia’n Sap ram fai ziate, Vai ramah chuan motor ke lian lian an tlanchak thu min hrilh thinte kha bengah hian ala châm reng a. Mathe min zirtirtupa, Khumbeu leh Tiang, a nuna bet tlat anga kan ngaih thin, Arith ti talh talh thin, Pu Khuma kha mitthlaah ala châm reng. Pi Biaki’n ‘Row Row Row Your Boat’ tih min zirtir laite khan sap naupang ang ta riau hian kan inhre thin a. Nu nunnêm leh zaidam tawpkhawka ka ngaih, Pi Hnûni’n ‘Zotui thiangte’ tih min zirtir dalh dalh laite kha aw.. kan naute hian an thiam tawh awm der silova. Pawl 4 ka zir kuma ka sikul tlanbo ve ringawt, Pi Hnûni’n mittui tla zawih zawiha min zilh atang khan vawi khatmah Sikul hi ka tlanbo leh ta lo. Pi Laithuami’n His-Tory min zirtir khan a hmanlai hmel bik tlat thin hian ka hria. Pawl 4 kan nih kum hian Sap tawng zirtirtu kan nei. ‘Kutchu where are my glasses?’ tih min zirtir lai khan enge a awmzia kan hre lem lo, mahse Miss Sangliani khan sap tawng a thiam kan ti thin hle.
Farewell kan nei thin : Kum tawpah Farewell kan nei ziah a. Pawisa tlem a zawng naupangten kan thawhkhawm a, a bak kha chu kan zirtirtute khan an intumsem mai thin a niang. Bawng-lâ talh tur kan kai kumtin a, kan phûr thei hle. Thleng leh sipai bengtung no kan keng ziah a, traditional law a ni hauh lo, mahse hemi ni chawhnu her hi chuan no leh thleng kan chhu ri mur mur zel. An sawi ‘Thihthiap vêng’ kan an hmel viau thinin ka hria. |um khat chu kan pu in Bawngsaah chi aiah chini a telh mauh mai a. Sa thlum ka ei vawikhatna leh ka ei hnuhnun ber a ni. Mahse puar el euhin kan ei tho.
Produce a nei tha riau asin : Kha sap sikul naupang chhuakte kha mi chhuanawm tak tak an awm nuk mai. Kan hun lai chuan naupang harsa ve tak pakhat a awm thin. ‘Ramhlun’ tiin an ko mai a, naupang ngawichawi leh inthlahrung tak a ni thin. A uniform leh zirlaibute kan zirtituten an tum sak vek zel. Retheihna leh harsatna hnehin hlawhtlinna a sualchhuak ta a, Doctor a ni ta. Ka ngaisâng ngawt mai. Tin, naupang lubuk deuh, tihduhdah rawn an nei thin. A hming tak pawhin an ko ngailo, Mûnga an ti mai thin. Tunah chuan thlatin singbi hlawhin Football a pet tawh an ti. He sikul chhawrtu tam ber chu vengchhung mi kan ni nghe nghe.
Ka ni ve miau a : Ka rualpui tam takte chu naupan têt atanga English Medium-a seilian an ni a, kei chu Pu Kaia Sap Sikul-a seilian ngat ka ni. Mahse ka zâm ngailova, ka insit ngai hek lo. Ka hnufûm bikna ka hrelova, ka zirchhohnaah pawh a hmawr ka bawkna thlengin kan pawlah a thiam thei pawl ka ni chho ve ziah. Pu Kaia Sap Sikul chhuak ka ni miau a.
________________________
He article hi maryma.org ah a awm a. a ziak tu hi MARYMA editor, Maenga a ni e. He sikul ah hian kum khat chu ka kal ve a lom. Nuihzathlak thei a nia, helikoptar leh motor thawm kan hriat tawh hi chuan class hi kan thlanchhuah san vek a, kan thlir liam hnu ah class kan chhunzawm leh thei hram zel a ni. Lehkhapuan phek 3 tal lo chuan thiante chi thak leh tui thak tem sak chu har tak a ni. Ruah a sur leh tuihawk khuap reng reng in kan buai leh a. A chungah khian farewell a sawi tawh a, ka zir ve kum hian kan zirtirtu pakhat in vawksa chhum ah chi aiah chini a lo thlak pek a.. vawksa thlum chu a tui hran lo khawp nia! Ka sawi hmaih dawn chu le.. SAWHBUR ka sawi lo… mau bur ah hian anthur hi kan sawh thin a, kan liak sen duai duai zel mawle…. a hun lai chuan poisa a lei ni silo ah chuan man to ve deuh mai a nia. Paathum hmun khat paathum, paathum hmun hnih paaruk.. kan tih that that thin lai te kha awww….
This entry was posted
on Sunday, October 22nd, 2006 at 11:31 am and is filed under More than words.
Both comments and pings are currently closed.
