mi(sual).com

Aizawl Lammualah Ni 2 Chhung NE State Beat & Solo Contest & Music Festival Neih A Ni Dawn
Aizawl, Oct 31: Mizo Zaimi Insuihkhawm Pawl (MZI) buatsaihin Nov.ni 2 leh ni 3-ah Aizawl lammualah N.E.State Beat & Solo Contest a awm dawn a, Mizoram, Nagaland, Manipur leh Meghalaya atangte chuan rimawi leh zai thiamte an tel tur a chiang tawh. A ni khatna hi intihsiakna a ni ang a, a ni hnihna chu Music Festival a ni ang a, intihsiaknaa telte bakah Mizoram zaithiam lar leh hmingthangte an zai ang. Hemi chungchangah hian Organising Committee chuan an Chairman Pu P.Lianhrima hovin nimin khan Aizawl Press Club-ah chanchinmite an kawm a, a ni khatna hi dar 1:00 p.m.-ah a ni hnihna dar 2:00 p.m.-ah tan a ni ang an ti. Beat & Solo Contest-ah hian state tin atangin Beat Group 3 leh soloist mipa leh hmeichhia 2 ve ve tel theih a ni a, Mizoram atanga he intihsiaknaa Mizoram aiawha tel turte chu intihsiakna neia lo thlan tawh an niin, Beat Group-ah chuan Dropped Out, Boomerang leh Incarnation an ni a, mimal (soloist) te chu Fiona Lalmalsawmi, Khatla, Lalrodingi, Kolasib leh Michael Zosangzuala, Tuikhuahtlang leh Zoremmawia, Chawnpui an ni.
He N.E.State Beat & Solo Contest atan hian North Eastern Council chuan cheng nuai 4 a pe dawn a, lawmman atan Beat group pakhatna Rs.50,000, pahnihna Rs.30,000, pathumna Rs.10,000 a ni ang a, solo lawmman chu pajhatna Rs.10,000, pahnihna Rs.7,000 leh pathumna Rs.3,000 a ni ang. Group-ah hian mimal lawmman pawh siam a ni dawn bawk. Group hian hla 2 theuh an sa ang a, soloist chuan sap hla pakhat an sa ang. State dang atanga lokal turte chuan judge an rawn hruai zel ang a, Mizoram atang chuan Pu Lalremmuana, Addl.S.P., Kolasib ruat a ni a ang. Conest a nikhatnaah hian Pu H.T.Sangliana, MP khual lian a ni ang a Beat Group pakhatna lawmman ‘trophy’ a tum dawn a ni. Solo mipa leh hmeichhia lawmman trophy chu Pu Lalthara, IAS chuan a tum dawn bawk.
He N.E. State Beat & Solo Contest-ah hian school naupangte chu an uniform nen an kal phalsak an ni dawn a, luhman an chawi lovang. Lammual luh man hi mipui tan mi pakhat Rs.10/- zel a ni ang. He Beat & Solo Contest thupui atan “Music for Peace in the North East India” tih a ni.

Tluang Takin Bye Election Vote Thlak : Tlungvelah 70%; Chawngteah 60% Vote Tla
Nimina Tlungvel leh Chawngte Assembly biala bye election vote thlak chu tluang taka neih a ni a, Tlungvel bialah hian vote tla 70% a tlin phak beisei a ni a, Chawngte bialah 60% chuang a tlin phak rin a ni. Chief Minister Pu Zoramthanga. MNF President ni bawk chuan tun tum bye election anga inthlanna boruak tha leh Model Code of Conduct pawisakna leh sawrkar thil man dik lohna awm lo hi a la awm ngai lo a ni a ti a. All India Radio, Aizawl palai zawhna chhangin MPCC President Pu Lal Thanhawla chuan inthlanna fel fai leh thianghlim nei tura MPF ten nasa taka tan an la chung pawhin rorel lai party miten Model Code of Conduct nasa takin an bawhchhia a ni a ti a. HPC hruaitute chet dan leh thil sem awm nia sawite chu tha lo a tih thu a sawi.
Chawngte bial inthlanna polling station pathum Borapansury, Kamalanagar II leh hemi hmuna Auxiliary Polling Station-ahte chuan hun tiam chhung tlai dar 4:00-ah vote thlak zawh hman a ni lo a, hung chhung lut hmante chu vote thlaktirin tluang takin inthlanna hi zawh a ni.
Tlungvel bial leh Chawngte bial vote tla hi Aizawlah leh Lawngtlaiah naktip ningani-ah chhiar a ni ang. Tlungvel biala inthlanna hi Mizoram People Forum General Secretary Upa Lalramthanga chuan boruak tha tak hnuaia neih a ni a ti a, MPF tan lakna party hrang hrangin an zawm a ni a ti.

MSU-in Hnam Dang Pasal Nei Chhui Dawn
Mizo Students Union (MSU) Gen.Hqrs. chuan Mizo hmeichhia hnam dang pasal neite chhui chhuak turin an Vice President kaihhruainain Committee an din. Mizo hmeichhiaten hnam dang pasala an neih avanga ram leh hnam a him loh danah seminar buatsaih thuai an tum. MSU Gen.Hqrs. hian Mizo District Council (Transfer of Land) Act 1963 kalha Mizorama awmte chhui chiang turin an General Secretary kaihhruaina hnuaiah member 4 awmna Committee an din bawk. Mizo hnahthlak hnam peng hrang hrangte inpunkhatna tha zawk a awm theih nan thu leh hla kutpui buatsaih an tum bawk
Tun hnaia MSU Gen. Hqrs. Executive inkhawm chuan thingtlang lama zirlaite tan khawpuiah hostel din a nih theih nan Chief Minister vawi tamtak an lo biak tawh chu nawr zui leh turin Chief Minister hmuh leh thuai an tum a, Minister leh Officer thenkhat, hnam dang supplier leh contractor eng emawzat thurualpui a, ram leilung fate chanpual hnam dang supplier leh contractor-te kuta hlan thin nia sawi an duh loh thu an sawi a, hetiang thil a awm tawh loh nan theihtawpa hma lak an tum bawk. Mizoram sawrkarin Middle School 200 leh High School 38 sawrkara a lak avangin Mizorama Deficit College 12-te chu sawrkarin provincialise ve nghal turin an phut.

AMFU-in Sapthei Tiak Leh Thil Dang Tiak : Supply Kalphung Tha Lo An Ti
All Mizoram Farmers Union (AMFU) chuan sapthei ching thar turte hnena a tiak supply chu tha lo a tih thu sawiin sapthei chingtute ngeiina chi an duh turin hma lak ni tawh se an ti a. Thlai tiak supply kalphung hi Mizoram hlawhchham tawhna a ni tiin sawrkar chuan heti zawng hma la tawh lo tura an duh thu an sawi. Sapthei chi mamawh chuan AMFU Hen.Hqrs. office, Treasury Square-ah a thlawnin lam theih reng a ni an ti.
October ni 27 khan AMFU President Pu R.Lalduhawma chuan Chhingchhipa sapthei sawngbawlna khawl a tlawh a, he khaw tihchangtlunna atana Italy atanga khawl concentrator chah thlen tawh chu electric power sang zawk mamawh a nih avangin hman lohin a la awm a, Power & Electricity department hma lakna ngaihchan mek a ni. He khawl hian darkar khatah sapthei quintal 25 a her thei a, mahse, a tlangpuiin darkar khatah quintal 20 vel a her thei.
AMFU chuan kum 2007-a Mizoram sawrkar MIP hma lakna lian ber kut hnathawkten sapthei an chin, hralhna mumal zawk a awm reng theih nan Chhingchhipa sap thei sawngbawlna khawl hi mumal taka hnathawk theia siam an duh thu an sawi a. Power & Electricity department chu an hma bak hlen thuai turin an beisei. Tunah hian Champhai district Chawngtlai leh a chhehvelah sapthei eng emawzat thar a ni tawh a, MIFCO chuan kg.1 Rs.10-in a lei mek a, kum 2007-ah chhungkaw 40,000 velin sapthei hi hma lakna atan an hman leh chuan Mizoramah sapthei tam tham tawk thar chhuah a ni dawn a ni AMFU chuan an ti a, hengte hi mumal taka hralhna a awm theih nan a tul anga hma an lak tur thu an sawi.
AMFU President hian Serchhip-a Cold Storage leh Mushroom Unit a tlawh bawk a, he unit hi kumin chhung ngeia hman tangkai a nih theih nan hma a la dawn. Heng Chhingchhip leh Serchhip a tlawhnaah hian AMFU President hi Pu Ngurthansanga Sailo, Deputy Manager, MIFCO leh Pu Lalhlawhliana, AMFU Vice President, Pu R.Laltluanga Treasurer leh Tv. Ngurthanmawia, Gen.Secretary ten an tawiawm.

Millenium Centre Dawr Hawng Dawn
August ni 15, 2006-a Chief Minister Pu Zoramthanga’n a hawn Millenium Centre-a dawr neitute Millenium Centre Dawr Neitu Association) chuan naktuk atangin an dawrte an hawng tan dawn a, dar 10:00 a.m.-ah dawr hawn tanna inkhawm an nei dawn.

Kuhva/Panhnah Zuar Khawmpui
Mizo Kuva.Panhnah Zuar Insuihkhawm Pawl chuan vawiin dar 11:00 a.m.-ah Archives Hall, Babutlangah General Assembly an nei dawn. He an General Assembly-a khual lian tur Minister Pu K. Sangthuama chu Tlungvel leh Chawngte bial bye election la zawh fel a nih loh avangin Model Code of Conduct-in a phur avangin a thei leh dawn lo.

Tug of War Champions
Kar kal ta zirtawpnia zawh tak Mizoram Sports Festival-ah khan inhruipawh intihsiakna mipaah Zemabawk North YMA chuan finalah 3rd.Bn.MAP hnehin an champion a, hmeichhiaah Chaltlang YMA chuan Khatla Bethel hnehin an champion bawk. Zemabawk North YMA leh Chaltlang YMA hi Chapchar Kut, 2006-a champion ve ve kha an ni.

US Pawisa Tam Tham Man
Kar kal ta zirtawpni khan Aizawl Customs Officer duty-ten Lengpui Airport-ah Kolkata atanga lokal Thlabika, 33, Sangau khua inti, Aizawl Electric Venga mi in luaha khawsa mek nia insawi hnen atangin US pawisa dollar 3,30,400 an man a, dollar khat India pawisa Rs.45-a chantirin Rs.2,97,18,000/- vel hu a ni.Thlabika hian US pawisa hi ama ta ni lovin a sawi a, Myanmar mi Thanga ta Rs.8,000 hlawha a kensak a ni a ti. Thlabika hian tun hma pawhin US dollar hi a lo keng tawh thin a, danin a phal loh thil ti-ah pawh a inngai lem lo a ni awm e. Customs Officer-te hian Thlabika hian US dollar hi a keng tih hre lawka lo chang an ni.

Heroin Man
Central YMA leh Bawngkawn Chhim Veng YMA Branch chuan nimin khan mi pahnih Lalbiakliana, Bungkawn Vengthara awm inti hnen atangin Tuikual-ah leh Myanmar mi nia hriat hmeichhe pakhat, Ramhlun North-a mi in puaha awm hnen atangin Khamrang-ah heroin an man a, an heroin man nen hian Excise department-ah an hlan.

Similar Posts:

• YMA General Conference October 25-27, 2011
• Sapthei
• CNBC TV18 Opinion Poll for FM
• Mizo te hi hnam thatchhia kan ni em?…
• Mizo Hmeichhe Sexy Ber poll

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Tuesday, October 31st, 2006 at 1:01 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.