MICLUN-in Nova Operation Nei Mek : Officer Dik Lote Tihmualpho An Tum
Mizoram Cultivator and Labour Union (MICLUN) chuan Mizoram pumah “Nova Operation” an nei mek tih sawiin district pangaah department tin an luh chhuah tawh a, district pathum chauh hmabak an nei tawh tih an sawi. Nimin khan press release chhuahin kut hnathawktute leh lo neituten an chanvo dik tak an chan theihna tura RTI Act hmanga department hrang hrang an luhchilhnaah officer thenkhatte an fel hle laiin thenkhatte chu zawhnate chhang chiang duh lo, vawili lai zawh nan ngaite an awm a ni an ti a, heng mite hi an hming an chhinchhiah zel a, an thil tih sual leh an tuhrah chu an la seng tho ang an ti. Kut hnathawktute leh loneitute chanai eitute chu mipui hriatah an thil tih dan puan chhuah an tum tih sawiin danin an tuhrah chu a sengtir ngei dawn a ni an ti.
MICLUN chuan kut hnathawktute leh lo neitute pawl thenkhatte inkarah hem thlak tuma nasa taka bei mi mi thenkhat an awm tih sawiin henghote lakah fimkhur turin kut hnathawktute leh lo neitute an chah a, a tul anga intanpui zawk turin an ngen. Henghiote hi tanpui an inhuam reng thu MICLUN chuan an puang.
Supply Carrying Contractor-ten An Rin Zawng Motor Supply Phurhtir Dawn
Mizoram sawrkar Food, Civil Supplies and Consumer Affairs hnuaia Carrying Contractors Association chuan buhfai leh thil dang phurh bo thlau a awm tawh loh nan leh hetianga bo thlau a awm thin avanga pawisa an chawi thin pumpelh nan Mizoram Truck Drivers Association (MTDA)-in motor hman tur an lo ruat anga driverte hnena buhfai leh thil dangte phurhtir tawh lovin anmahni Carrying Contractor-ten an rin zawng leh an hriat chiante chauh leh anmahniin motor hman tur list an siam chauh an hmang tawh dawn tih an puang. Hemi chungchang hi press release hmanga sawifiahin tender hmanga sawrkarin supply phur tura carrying contractor a thlante leh department chuan inremna fel tak siamin security deposit atan pawisa tamtak an dahkham a, inremna anga an tih loh emaw buhfai lak chhuah tawh a bo emaw, a tlin loh emaw chuan security deposit atang hian contractor-te chawitir zel thin an ni an ti a. Heng an motor hman thinte hi Carryng contractor-ten an duh thlang lovin MTDA ten motor hman tur an lo ruat sate an ni a, tute motor leh eng driver nge tih pawh hriat lohte hman reng chu him tawk lovin an hre ta a ni. Chuvang chuan anmahni tihbo leh fel lohna ni lova pawisa an chawi thin pumpelh nan leh thingtlang lama buhfai dawng turten tihchingpen loha an dawn tur tak an dawn nan anmahni rin zawng leh hriatchiante chauh driver/motor phurhtir hi an tih makmawhah an ngai ta a ni an ti. MTDA-te hian an ruahman anga motor/driver te Carrying contractor-te an hmantir dawn a nih chuan chung driver/motor-te chuan buhfai,etc. hralh ruk leh tihchingpen a awmin a rulh leh pawisa sawrkara driver/motor-ten an chawi chu an tihawm taka an ngaih thu an sawi a, chutiang mawhphurhna chu MTDA ten an lak ngam hma chuan Carrying Contractor-te chuan anmahniin supply phurtu tur an rinngam an hman mai chu an tih makmawhah an ngai ta a ni an ti.
PRISM-in CM-ah Memorandum Thehlut : RTI Act Section 4 Hman Loh A La Ni An Ti
PRISM (People’s Right to Information & Development Implementing Society of Mizoram) chuan Chief Minister hnenah memorandum thehlutin Right to Information (RTI) Act 2005 secion 4 chu Mizoramah tihpuitlin a la ni lo a ni an ti a, he dan bung leh chang hi tipuitling ngei tura Mizoram sawrkara thuneihna nei zawng zawngte hnenah lo hriattir turin an ngen. PRISM chuan an pawl chu tlawmngai pawl liau liau, sawrkar langtlang leh mawhphurhna nei a nih theihna tur leh, sawrkar policy-te leh programme leh hnathawhte mipui hnena hriattir tura ding liau liau a ni tih an sawi a. RTI Act hi hman a nih atanga tun thlenga hmang tangkaitu a ni an ti.
Chief Minister hnenah chuan RTI Act tihpuitlin chu Constitution anga rorel tur leh hna thawk tura a intiamna anga a tihpuitlin ngei ngei tur a ni an ti a. RTI Act tihpuitlin chu Chief Minister a nih dawna Constitution anga rinawmna thu a tiam leh Chief Minister thuneihna anga a tihtur pawimawh taka ni an ti.RTI Act hman a nih hnuah hian Mizoramah chuan sawrkar atanga thil hriat a harsa ta zawk a, he dan hman hmaa hriat theih mai mai ang chi pawh kha he dan hman hnuah chuan dan ang thlip thlepa dil a ngai ta zel a, chu chuan hun eng emawti chhung a lo duh a, mimal insenso pawh a ngai ta zel a ni.
Chhiahtlangin Faina Kutpui Hmang
Kum 2002 atanga Mizoram chhunga khaw fai ber nihna chelhtu Chhiahtlang chuan nimin khan Ramlai Community Hall-ah Faina Kutpui vawi 19 an hmang a, Home Minister Pu Tawnluian a hmanpui.
He Home Minister chuan mihring mimal, khawtlang leh hnam dinhmun lantirtu ber chu Fai leh Thianghlimna hi a ni a ti a. Chhiahtlang khua chu Mizorama khaw fai ber ti a hriat lar a nih avangin a lawmpui thu a hrilh a; Mizorama khaw dangten an entawn a duhthu sawiin, PHE Department phei chuan India rama thingtlang khaw fai leh thianghlimte hnena pek thin chawimawina dawng turin central sorkar-ah a rawt mek thu a sawilang bawk. Home Minister chuan khawtlang leh kan in leh lo kan vawnfai ang bawkin kan taksa pawh kan vawngfai tur a ni a ti a; a bik takin Mizote hian ei leh in sawngbawl kawngah thianghlimna kan uar a hun tawh a ni a ti. Chhiahtlang khaw chhungkaw 700 te hnenah PHE Department chuan Septic Tank a pek tawh thu sawiin, tunah hian BPL chhungkua 124 te hnenah sem leh mek a ni Minister chuan a ti bawk.
Chhiangtlang VCP Pu Lalrawna pawhin thusawiin Chhiahtlang khua chu khaw hrisel lo tak sikserh, santen, kawthalo te avanga nunna chan an tam em em na thin a nih avangin 1988 atang khan Sanitation Committee dinin fai leh thianghlim kawngah beihpui thlak a nih thu te, he Committee hmalakna hnuaiah hian mipui zirtirna kawng hrang hrang, thosi tui theihna chi tih reh te, thosilen zar leh zun leh ek thiar kawnga tanlak dan tur te inzirtirin khawtlang huapa lungrual taka hmalak dan a tarlang a. Kum 2002 atang phei kha chuan Mizoram-a khaw faiber leh hrisel niin vawiin thleng hian he dinhmun hi an hauhzui ta mek a ni a ti.
Chhiahtlang khua hi tunah chuan Serchhip District Hqrs. Town Area chhungah dah ni tawhin chhungkaw 800 chuang mihring 4000 chuang chenna a ni a, he District chhunga khaw fai thlanna ah pawh khawdang er phak rualloh an nih thin avangin hetiang inelna ah hian lawmman hmu sa ah puan kumtin a ni zui ta bawk.Nimina Faina Kutpuiah hian Chhiahtlang khaw chhunga zirna in, Office, veng leh mimal chhungkua fai thlanchhuah te hnenah lawmman sem a ni bawk.
Saddam Hussein Khai Hlum Tur : Khawvel Dawnsawn Dan A In-ang Lo
Aizawl, Nov 07 : Iraq President atanga United States-in an paihthlak Saddam Hussein leh a thuihruai mi pahnih thi tura an chungthu Baghdad Court-in a relsak chu dawnsawn dan a in-ang lo a, a thenten an lawm a, a then an lungawi lo. Baghdad laili-ah chuan silai kapin an lawm a, Dujail khuaah chuan court thu chhuak hi lawmin mi 148 thahna tura thu petu Saddam Hussein lim an hal.
Saddam Hussein pianna khawpui Tikrit-ah chuan Saddam Hussein thlawptute chu an thin a ur a, curfew pawisa lova kawtthlerah lo chhuakin an pasaltha (Saddam Hussein) thlalakte an lek chhuak thung. Basra khawpuiah chuan lawmin kawtthlerah an hlim le lu mai a ni. Arab ram leh West Asia ramah pawh Saddam Hussein chungchang court-in a relsak chu dawnsawn dan a inchawhpawlh a, Muslim ram thenkhatte chuan van lam atanga rorelna dik lo thleng an ti a, thenkhat chuan court thutlukna chu tenawm an ti thung. Iraq nena rei tak lo indo Iran sawrkar thupuangtu chuan mihring khawngaihna nei lova pawi a tawhnaah Saddam Hussein chungah hremna dik tak pek a ni ta a ni a ti a. Kuwait Parliament Speaker chuan Saddam Hussein chu tihkhawtlaina awm lova khai hlum vat mai tur a ni a ti. Thailand-ah chuan Muslim Cleric pakhat chuan Saddam a thih chuan United States chu hremhmunah a chantir ang a ti. Russia law maker leh tun hmaa Turkey diplomat-te chuan Saddam-a hremna chuan Iraq-a Muslim peng inkara inthenna thuk zawk a siam dawn a ni an ti. Italy rama eptu hruaitu langsar tak chuan Saddam Hussein hremna chu dam chhung lung in tana let (tihnepsak) turin Europe khawmualpui pum chuan a nawr tur a ni a ti. Claudio Cordone, Human Rights Group Amnesty International Senior Director chuan thi tura inhremna court thu chhuak pawi a tih thu a sawi a, an pawl chuan Saddam Hussein chungchang ngaihtuahna (trial) chu a ‘fair’ lo a, court chu tan lam nei loah a ngai lo a ni a ti. Thi tura chungthu inrelsakna reng reng an dodal tih a sawi. Iraq thenawm Syria chuan court thutlukna chu thil thiang lo a ni a ti.
Nimina kah rawn ziak tawh ang khan Baghdad court chuan Saddam Hussein leh a unaupa (half brother) leh tunhmaa Intelligent hotu ber Barzan Ibrahim leh tunhmaa Revolutionary Copurt Chief Judge Awad Hamed a-Bandar chu thi turin an chungchan a relsak a, Vice President thin Taha Yassin Ramadan chu dam chhung lung in tang tur leh mi dang 3 chu kum 15 lung in tang turin a hrem bawk a, Baath Party Official Mohammaed Azawi Ali chu amah puhnaah finfiahna a awm lo tiin Court chuan a chhuah thung.
US President George Bush chuan Saddam Hussein thi tura hremna chu a welcome a, Iran democracy naupang tak tak mel lung phun pawimawh tak a ni a ti a, Saddam Hussein-an a thahte chuan rorelna dik an lo hmuh ngai loh chu an hmu ta a ni a ti. European Union-a ram tamtak chuan Saddam Hussein hremna hi an welcome a, mahse, Iraq thuneitute chu Saddam Hussein khaihlum lo tura fimkhur turin an ngen.
India chuan Saddam Hussein thi tura hrem chungchangah fimkhur takin ngaihdan a sawi a, External Affairs Minister Pranab Mukherjee chuan India chu Iraq chungchang muanawm taka chinfelnaah a ding reng a ni a ti a, her court thutlukna hian Iraq mipuite tuarna a belhchhah loh India chuan a duh a ni a ti.
India rama political party hrang hrangte pawhin fimkhur takin an ngaihdan an sawi hlawm a, Congress party thupuangtu Abhishek Singhvi chuan a party chuan he court thutlukna hian Iraq rama muanna leh democracy a nghawng pawi loh a beiseiin a ring a ni a ti. CPIM chuan he court thutlukna hi nasataka tihchingpen (totally rigged verdict) a ni an ti a, CPIM Politbureau chuan thu chhuahin UPA sawrkar chuan Saddam Hussein hremna hi sut a nihna turin a inrawlh tur a ni an ti. British leh United States pawhin he hremna hi kenkawh a nih chuan court thuneihna thahna (judicial assassination) angin thlir a ni ang a, a hnu lama thil thleng reng rengah mawh phurh an ni ang an ti. CPI chuan he court thutlukna hian Iraq pawn leh chhunga nghawng namen lo (resious repurcussion) a nei dawn a ni an ti. All India Forward Block chuan Saddam Hussein hremna chu democracy kalh a ni a ti a. CPI (M-L) pawhin thiang lo leh court rorelna nuihzatbura dahna a ni an ti.
MZP Assembly Tan
Zanin hian MZP Assembly vawi 14-na Nov. ni 9 zana tawp tur chu Champhaiah palai lawmna inkhawmin tan a ni dawn a, naktuk chawhma inkhawmah Home Minister Pu Tawnluia khual lian a ni ang. Chawhnu lamah rorelna inkhawm neih a ni ang a, zan dar 6:30 -ah Variety Programme a ni ang. He MZP Assembly-a tel turte chu tukin dar 6:30-ah MZP pisapui atanga chhuah tur a ni.
Cancer Awarness Day
Regional Cancer Centre, Aizawl leh Directorate of Hospital & Medical Education buatsaihin vawiin chhun dar 12:00-ah Aizawl Press Club-ah National Cancer Awareness Day hman a ni dawn a, Pu H. Darzika, Joint Secretary, Health & Family Welfare Department khual lian a ni ang. Thupui “Cencer hi ven leh tihdam theih a ni” tih a ni. Cancer chungchang mi thiamten an sawi ngaihthlak tur a awm ang a, Essay Wrting Competition lawmman sem a ni ang.
Thingpui Inpui
Nimin khan Mizoram State Sports Council Vice President Pu Rochhunga Ralte chuan a office-ah October ni 31-a zawh tak National Sub Junior Badminton Championship Pondicherry-a Mizoram atanga tel champion Samuel Lalnunmawia leh Lalchhuanawma leh an manager Lalchhuanawma leh coach Zosiamliana leh an kalpuite pualin lawmpuina thingpui a buatsaihsak a, fuihna thu sawiin sports lama hmasawn turin inthununna leh tumruhna a pawimawh a ni a ti a, heng khaikhawmtu chu mahni leh mahni inhneh (win yourself) a ni tiin thupui bera nei turin a chah. Pu Rochhunga hi Pu Ngurthanmawia, Joint Secretary, MSSC te, Pu John Kima, President, USAM leh Pu K.Lianhmingthanga, Secretary, MBA ten an tawiawm.
MLA Thar Pahnih Lalut
Nimin khan Assembly Speaker Chamber-ah Member of Legislative Assembly atana Bye-Election a Chawngte (ST) Assembly Constitutency atanga thlan tlin Mizo National Front Candidate Pu Alok Bikash Chakma s/o Buban Bihari leh Tlungvel (ST) Assembly Constituency atanga thlan tlin Mizo National Front Candidate Pu Lalchhandama Ralte s/o R.B. Laitawia te chu Assembly Speaker Pu Lalchamliana’n India Danpui hnuaiah rinawmna thutiam tirin Mizoram Member of Legislative Assembly atan a la lut. He inkhawm ah hian Chief Minister Pu Zoramthanga bakah Minister leh MLA engemawzat an tel a ni.
Diamond Jubilee Lawm Dawn
Naktip ningani Nov. ni 9 dar 10:00 a.m.-ah Mizoram Primary Teachers Association chuan Vana Pa Hall-ah an Diamond Jubilee an lawm dawn a, primary zirtirtu tanglai bakah pension tawh zawng zawngte tel vek turin an sawm. School Education Minister Dr.R.Lalthangliana khual lian a ni ang a, Director of School Education Pi Malsawmthangi khual zahawm a ni ang.
Zaninah Gospel Concert
Zanin dar 7:00-ah Vana Pa Hall-ah Gospel Concert a awm dawn a, Venghlui Baptist Church tanpui nan a ni. Sora Family, Vanlalsailova, Nancy Zothanmawii, Isaac Malsawmtluanga, Maggie, Melody (Mimi), Debbie, Romalsawma, P.B.K.Liankhuma & Nl.Vanlalawmawii te an zai dawn a, ticket man Rs.50 leh Rs.30 a ni.
Hlimhlawp Hlawhtling
Entertainment Mizoram-in inrinni kal taa Sihhmui-a Holoday Palace-a Autumn Festival an buatsaih chu zawngchhang tlak an ti. Heta an pawisa hmuh hi Aizawl Civil Hospital hnuaia Oncology department hnenah thehlutin BPL chhungkua naupang cancer veite enkawlna (chemotherapy) atan hman a ni dawn a ni.
Aizawl Theological College Day
November 17, 2006 khian ATC College Day & Professorial Lecture hman a ni dawn a. India rama Pathian thu zirna lama hotu pawimawh tak, Rev. Dr. Samson Prabhakar, Director SATHRI, Bangalore chu Chief Guest & Speaker atan sawm a ni. College Day thupui atan Peace with Justice through Theological Education tih a ni.
