Judiciary Dah Hran Chawlhtir Eptu Pawl Pathumin An Sawisel
Aizawl, Nov 17 : Mizorama eptu pawl pathum Mizoram Congress (MPCC) , Mizoram People’s Conference (MPC) leh Zoram Nationalist Party (ZNP) Thalai chuan Mizoram sawrkarin court rorelna (judciary) a hranga dahna a chawlhtir chu an sawisel. MPCC chuan judiciary a hranga dahna chawlhtir hi hnung zawnga kalna (back gear) a ni an ti a, hei hi a bul tanna chauh a ni dawn an ti. Nimin khan press release chhuahin MPCC chuan Pu Zoramthanga hruai MNF sawrkarin a tum tak zawk chu inthlan leh huna a lal zawm leh theih nan a huphurh ber MPCC President pu Lal Thanhawla thubuai neihtir (charge frame) a nih theih nan a lang lo atanga awka nei theia lo indah hi a ni an ti a. Pu Zoramthanga chu a lal tantirh phat atanga a thutiam tihhlawhtlin loh tamtakin a um mek laiin a hnung tawlh zawngin a kal ta a ni an ti a, Zoram mipuiin an lo thlir reng a ni tih inhria se an duh thu an sawi.
MPCC chuan press release hmangin Chief Minister Pu Zoramthanga’n inthlan dawna a lo tiam tawh leh an party manifesto-ah pawh an dah thlap Mizoram sawrkar atanga judciary/court lam lak hran chu kum rei tak mipuiin tlumtea thlir taka an lo thlir laiin naupang hmuia chithlum tat ang deuhin mipui bum nan a ti ve uk a. Court lama thuneitute thunun a thlakhlelh leh si avangin chhuanlam dawrawm te te siamin Nov. ni 10, 2006 khan a hma lak tawhna zawng zawng chu sut lehin mipui a barakhaih a ni an ti a. Hemi zawh ciahah mi rethei chanhaite thlavang hauhtu MJS Officerte chu an kat ta rawk rawk mai a ni an ti.
MPCC chuan democracy ramah chuan inthlan dawnin mipui hnenah an thil tih tumte political party leh hruaituten tarlangin chutiang duhtute chuan an lo vote lal thin a ni an ti a. Chutianga mipui thlan lalna chu zah lek lovin Pu Zoramthanga chu a sapatal ta chiam mai a ni tiin democracy leh mipui namen lovin a palzut a ni an ti.
MPCC chuan a lang leh lang lova mipui chanai Chief Minister leh a hoten an eiruk nasatzia pulpit atang leh tlawmngai pawlte atanga hailan mek a nih avangin a tal buai hle a ni an ti a. Hma lam pan thei lek lova eirukna thup mawi dan zawngin programme dangte cancelin Aizawl daia mau sawngbawlna industry hrang hrang a tlawh rum rum a tul ta a ni an ti a, pawi an tih thu an sawi. MPCC chuan heng mau sawngbawlnate hi Pu Zoramthanga tan hian mangkhawngah an chang dawn a ni siin uire sim leh anga ‘mahni inthuahfai’ leh ‘tihsual/eiruk’ a tum tawh loh thu a puang phei kha chu mipuiin an ei lo a ni an ti a. Hetiang hruaitu lemchang avanga Zoram mipuite beidawng mai lova an tan khawvar tep tawh lo nghak fan fan turin mipui an ngen.
MPC chuan Judiciary dah hranna tur tihtawp leh a ni ta hriatthiam har an tih thu sawiin mipui rahbehna a ni an ti a, Executive atanga Judiciary dah hran hi ram leh mipui tana tul a ni tiin hemi chungchangah hma la leh nghal turin Mizoram sawrkar an phut.
ZNP Thalai pawhin press release chhuahin Judiciary dah hran chu MNF thiil tih that awm chhun a ni an ti a, mahse, a thisawn leh mai tur tiin vanduaithlak an tih thu leh Zoram mipui zahlohna leh inbumnaah an ngaih thu an sawi. “MNF hi kan hriat theih atanga vawiin ni thlenga mipui mum hmang, “Kum thum chhunga intodelh min tiamtu’ “Switzerland of the East-a min siam tumtu†“Electric a thlawna chhit min tiamtu’ kha an ni tih Zoram mipuiin an hre chiang a, vawiin nia separation of Judiciary an pawngsual leh duh mai pawh hi an tihawm reng a lo ni†an ti.
ZNP Thalai chuan ‘Mipui mar dek zawnga Officer thenkhatten sawrkar kalphung an ziah thin ngaimawhna avanga khaw eng pawh zah zo lova mahni mawng hlim duh sawrkar kan nei hi a vanduaithlak tak meuh a ni†an ti.
NEE A Conference-ah Hmarchhak Hmasawnna Tur Ruahmanna Hman Tangkai A Har Thu Pu H. Rammawian Sawi
Ni hnih awh tur North Eastern Economic Association (NEEA) Annual Conference vawi 8-na chu Mizoram University-ah vawiin khan tan a ni a. “North East as a Common Market & Learning from Success Story” tih chu conference thupui atan hman a ni. NEEA Annual conference hi seminar nena hman a ni a. A hawnna inkhawm hi Prof. Lianzela, Head of Economics department-in a kaihruai.
Khuallian Pu Rammawi chuan India hmarchhak state te hmasawnna ngaihtuah a, kawng dap tur chuan helai bial dinhmun dik tak leh harsatna te hriatchian hmasak a tul a ni, a ti a. India ram pum dinhmun thlirin hmarchhak bialte chu state hnufual ber ber te an la nih avangin sorkar laipuiin hmarchhak bial hmasawnna tura programme tha tak tak a duan thin te chu a taka hman tangkai a har thu a sawi a. Sorkar laipuiin Ministry tinte sum hman tur, Plan Fund za zela 10% chu hmarchhak bial hmasawnna tura DoNER Ministry a dah hrang tura a tih te leh India Look East Policy te pawh ruahmanna tha tak niin lang mah se, hmarchhak bial state te tan hman tangkai tawk a har thin thu a sawi a. Inkalpawhna leh inbiakpawhna tha te, mipui hriselna leh zirna hmanraw changtlung zawk te, remna leh boruak ralmuang tak a awm lohna hmun ah chuan chak taka hmasawnna kawng dap a har a ni, tiin Pu Rammawi chuan a intahtawla hma lak a tul a ni, a ti a. Agriculture chu mi tam ber eizawnna a la nih avangin hmarchhak biala ‘per capita income’ tipung tur chuan agriculture leh a kaihhnawih eizawnna lam chu hma lakna tur pawimawh hmasa nia a hriat thu pawh a sawi bawk a. Hmarchhak bial dinhmun chawikan dan tur ngaihtuah chu thil awlsam ni lo mah se thil tih makmawh a nih avangin NEEA conference chu hemi kawnga mi finchhuahtu a nih ngei a beisei thu tarlangin Pu Rammawi chuan helai bial tana pawimawh hmasa ber, remna leh muanna boruak a awm theih nan sorkar laipui chu chak lehzuala hma la tura nawr turin NEEA hruaitute chu a chah.
NEEA Annual conference vawi 8-na hi financial institution hrang hrang, NABARD, SBI, MRB, Vijaya Bank, ICSSR ten a senso tumin Mizoram University Economics Department in a buatsaih a ni a. India ram hmun hrang hrang atangin NEEA member leh economist te bakah tualchhung atangin mithiam leh sawm bik thahnem tak an tel bawk. Conference hi vawiin hian neih chhunzawm ani ang.
Ramthianghlim lam panin Mizo Israel 218
Nilaini leh ningani khan Bnei Menashe (Mizo Israel) mi 218 chuan Israel panin Lengpui Airport atangin Mumbai an pan.Mumbai atang hian tun thla November 21 khian Israel Airline El Al hmangin a ruala Israel pan tura ruahman a ni a. Lengpui atanga Israel an thlenna senso zawng zawng chu Jewish Agency ten an tum ang. Heng mite hi Karmel leh Upper Nazareth-ah an awm ang a, Israel sawrkar-in Mizote Israel hnamboa a pawm hnua Israel sawrkar hmalaknaa kir lehna(Aliyah) hmasa ber a ni
Aizawl Khawpui Cheina Tur Pawisa MNF Sawrkarin Virpilh Lo Turin ADCC-in Duh
Aizawl District Congress Committee (ADCC) chuan Aizawl khawpui chei that nana cheng vbc.5,166 ruahman chu sawrkar laipui ngilnei tak ruahmanna a ni tiin MNF sawrkar chuan virpilh lova, khaw eng zah chunga hmang turin an phut. Nimin khan press release chhuahin ADCC chuan kum thum chhunga ei leh bara Mizoram intodelh tiamtu Chief Minister-in Agriculture department a lak khan thu tak hla takah ngaiin beiseina sang tak nen an lo thlir a, mahse, amah leh a laina hnaite tana kum thum chhunga intodelhna programme a lo ni tak zawk a ni an ti a. A duh tawk a ngah hnuah Urban Development & Poverty Alleviation department thar hlak chu a hap leh ta chat mai a ni tiin ngaihngam taka lo thlir chi-ah an ngaih tawh loh thu an sawi. Aizawl khawpui siamthatna tham sum tam tak hi Pu Zoramthanga leh a chhungteah luangral mai tawh tawh lova khawpui thar leh changkan neih ngei a nih theih nan a hmanna tur dik taka hman a nih ngei an beisei thu an sawi.
National Press Day Hmang
Nimin khan I&PR Conference Hall-ah I& PR Department leh Mizoram Journalists Association (MJA) buatsaihin National Press Day, Press Council of India-in hna a thawh tanna ni champha Aizawla chanchinbumiten an hmang a, MJA President K.Pu Sapdanga’n National Press Day lo intan dan leh Aizawla he ni hman dan tura ruahman dante a sawi a, mi sawm bik Pu Lalhmingliana Saiawi, IAS (retd), Pu Denghnuna, IAS (retd) leh Dr. K.Laltluangliana Khiangte ten Mizorama chanchinbute an hmuh dan, an hmasawnna leh tan lak ngaihna lai nia an hriatte leh Mizo tawng chungchang uluk zawka ziak leh a tihausa leh zawnga tan la tura chanchinmite an duhna thute an sawi a, sawihona neih zui a ni.
He National Press Day hmanna hi Pu Khawvelthanga, Joint Director, I&PR chuan kaihruaiin Director Pu L.r.Sailo chuan lawmthu a sawi a, chawlhkar khat chhunga National Press Day chungchanga Editorial ziak tha ber hnenah lawmman Rs.2, 500 pek tur a puang bawk.
Dan Kalha Sumdawng Lakah Pawl 8 Chuang Tangho Dawn
Mizo Students Union (MSU), Mizoram Chamber of Commerce (MCC), All Mizo Graduates Unemployed Association (AMGUA), Peace Accaord MNF Returnees Association (PAMRA), Mizoram Eichawp Zuar Pawl (MEZP), Traders Union, Mizo Panhnah Sellers Association (MPSA) leh Mizo Kuhva Zuar Insuihkhawl Pawl leh pawl dangten inkhawmhona tun hnaiah neiin Mizorama hnam dang dan kalha sumdawngte chungchangah a tul anga hma la turin Joint Action Committee on Illegal Traders an din a, hruaitu (Office Bearers) 8 an inruat a, chung zingah chuan an chairman Pu Lalchhuanawma Sailo, General Secretary Pu Lalnunpuia Kawlni, Treasurer Pu Laldinthara Pachuau an ni.
Music Examna & Pre Missionary Service Training Written Test
November ni 29 leh 30-ah Synod Music Committee buatsaihin Music Elementary Course Examination Music Class Room-ah a awm dawn a, dar 10:00 a.m.-ah tan a ni ang. Staff Notation leh Tonic Solfa exam kawp tur a ni a, class kal lote pawh a duh apiang tan exam theih a ni. Synod Mission Board hnuaia Missionary Pre-Service Training diltuten Nov. ni 21 thawhlehni dar 10:00 a.m.ah Synod Committee Room-ah Written Test neih tur a ni a, mark 100 a pu ang a, diltu zawng zawng chhan turin common question-in mark 50 leh mahni subject-in mark 50 a pu dawn a ni.
Pastor Hnenah Doctorate Degree
Pacific International University, Springfield, MO, USA chuan Academic leh Honorary Degree an hlan thin zingah Rev.Sangkhuma chu Honorary Degree of Doctor of Divinity dawng turin an thlang a, June 2007-ah hlan a ni ang. Rev.Sangkhuma doctorate degree hlan a nihna chhan hi Wales ram kohhran, khawtlang siamthatna leh hmun danga a rawngbawlna vang a ni.
DRDA Office Building
Vawiin dar 11:30 a.m.-ah hian New Capital Complex, Khatlaah DRDA Office Building thar RD Minister Pu Aichhinga’n a hawng dawn, ‘Zokhaw Dingdi’ CD a tlangzarh nghal ang.
MNF Block Inkhawm
Nimin khan Aizawl North III MNF Block Conference Edenthar Middle School-ah an nei a, Home Minister Pu Tawnluia khual lian, Supply Minister Pu K.Sangthuama khual zahawm an ni a, party dang atanga MNF zawm an lawmlut a, tlaiah ruai an thehho nghal.
Week Kharna Inkhawm
53rd All India Cooperative week kharna inkhawm chu thawhtanni khian Vanapa Hallah neih ani ang. Cooperative member zawng zawngte leh Cooperatives a thawktu zawng zawngte chu tel vek turin an in hriattir.
ATC Day Lawm Dawn
Aizawl Theological College chuan vawiin hian an Day an lawm dawn a, dar 10:00 a.m.-ah Sandu Hall-ah professionallecture neiha ni ang a, chawhnu dar 1:00 atangin Day lawmna tak tak an nei ang. Hetih lai hian Aizawl Theaological College-a kum 2007 atanga M.Th. (History of Christianity) leh M.Th. (Missiology) zirna hawn tum chungchanga thil enfiahin mi thiam pathum Serampore leh Shillong atangin an lokal a, Nov. ni 14 atanga nimin thleng khan hmuh tul lek kawm tul te hmu leh kawmin en turte an en.
Gas Sem Hmain Check Hmasa Dawn
Gas (LPG) phurtu driver thenkhatten kawng lakah gas cylinder an phurhte an tichingpen thin tih hriat a nih avangin Gas Agent zawng zawngte chu sawrkarin LPG load lo thleng te showroom leh door delivery an sem hmain Inspector, Local Metrology check hmasak-tir vek turin a hriattir a, he thupek zawm lo Gas Agent chu Essential Commodities Act 1955 section 3 hmangin an chungah action lak a ni ang a ti.
Sipai Bo Zawng
Pu J.B.Kulha s/o Zafe, 4372853 L.Motor Platoon SP Coy 5th Assam Regt.C/O 56 APO chu New Delhi atangin Brahmaputra Mail (rel)-ah Nov. ni 7 Nov. 2006 zan dar 9:00-ah lo chhuakin ni 8.11.2006 zing dar 6:00-ah Allahabad velah a awm tih hriat a ni a. Tunah thuneituten an zawng mek a, a awmna hria chuan Saiha College Venga Pu Nahlo Solo, Executive Member, MADC hnenah hriattir theih ni se.(Phone 03835-222635 (R), 9436149138 (M).
CD Lei Theih
Ram Pum Huap Zaipawl Intihsiak 2006 (Major, Minor Hla leh Lengkhawm Zai) leh KTP Musical Meet, Lawngtlai Video CD (Rs. 25/- per CD) Information & Publicity Department Synod Office Mission Veng-ah lei theih reng a ni.
