Border Security Force-in Bangladesh Ramri-ah Ram Dang Mi 33, Misual 45, Bungrua Tamtak Man
Aizawl, Dec 02 : Nimin kha ram dang nena India ramri vengtu sipai Border Security Force din champha vawi 41-na a ni a, he ni-ah hian Mizoram-Cachar Frontier Deputy Inspector General Pu M.A.Khan chuan Thuampui Veng Aizawla a pisaah chanchinmite kawmin nikum tun ang hun atanga hna thawk tan BSF Sector HQ Aizawl chuan India leh Bangladesh ramri kilometre 337 venhimna hna a thawhnaah Bangladesh mi 29, Myanmar mi 4 leh India mi thin ramri kantawn a, thil sual ti thin 45 an manin police hnenah an hlan a ni a ti. Chawchhun buatsaihsak an ei hmaa chanchinmite a kawmnaah hian Pu Khan chuan ramri vengtute chuan danin a phal loh bungrua (contraband goods) ram pawn lama chhuak tur leh lut tur Rs.16,77,264/- hu an man a, customs thuneitute hnenah an hlan a ni a ti a, ruihhloin chhiatna a thlen dona kawngah BSF te chuan a bik taka tan lakna (special drive) neiin drugs hmanga sumdawng (smuggler/peddlers) 5 leh ganja kg.67 an man a ni a ti a. Ram laka hel ramri pela kal hnen atangin BSF te chuan China siam rifle 3 leh granade an man bawk a ni a ti. BSF ten kum khat chhunga Mizoram leh Bangladesh ramri an vennaah hian ramri kana kal vel thin mi sualte hnen atangin Bangladesh pawisa Tk.3,39,902 an man an India pawisa pawh Rs. 42,930 an man bawk a ni a ti.
DIG Pu Khan chuan Mizoram leh Bangladesh inrina hi ram pilril tak mai, awi pang, ram chhengchhia, sikserh lenna a ni tih sawiin lui vel leh tlang ramte chu ngaw chhah tak leh ram bawn tak maiin a khuh an ni a, heng kara thil sual tite veng tur hian BSF-te chuan chhun leh zanah, ke leh lirthei hmanga vakvelin Border Outpost atangin an vak chhuak thin a ni a ti a. Lui leh a chhehvelte pawh OBMs/Speed Boat hmangin an veng reng bawk a, hetianga BSF ten an thawhna chhan hi ram leh hnam tana thil sual titute veng tur leh ranri vela awmte tana himna tur a ni a ti a. Tunah hian ramri venna hmun thin pangngai bakah Border Ourpost-te siam belhin chungah chuan BSF battalion pahnih an awm (deployed) an ni a ti.
Pu M.A.Khan chuan ramri hungna siam leh ramri hrula kawng (IBB road) siam hna pawh a kal mek tih sawiin hatinga ramri hung hian ram leh hnam dotu misualte chet velna a khuahkhirh bakah ramri kan tawna mi sualte thilsual tihna lakah ramri bul vela mipuite hnenah himna a pe dawn a ni a ti a. Ramri hung hna thawk chak taka a kal theih nan a thawktute leh an bungruate venhimna hna pawh BSF chuan an thawk bawk a ni a ti.
Mizoram-Cachar Frontiet BSF DIG chuan India leh Bangladesh ramri venhim bakah BSF chuan hmun leh khaw kilkhawr zawka awm mipuite tan tangkai takin hna zeng awmzat a thawk a ni a ti a. Barapansuri, Vaseitlang, Tut,Tuipuibari, Pukzing leh Tuirial-ahte gree medical camp khaw mipui tan an buatsaihsak a, Lunglei district-a ramri hrul khuate hnenah tui in tir an buatsaihsak bawk a, Lunglei District-a ramri bul khuate leh Tuirial hnenah stationery, sports lam thil leh school furniture an pe a, khaw eng emawzata mi retheite hnenah buh sengna atana an mamawhte an pe bawk a ni a ti.
Pu M.A.Khan chuan tual chhung mite nena intaneihna tur leh culture lama inunauna siam turin BSF te chu an tel ve thin a, chutiang programme, entir nan Peace Fest 2006 te, Autumn Festival for Children Affected by Cancer (Nov.4, 2006) leh Lunglei leh Lawngtlaia Public Awarness Campaign-ahte BSF chuan tanpuina an theih ang ang an pe a ni a ti.
Mizorama BSF hotupa ber chuan BSF sipai atan Mizoram chhung hmun hrang hrangah sipai lakna neiin Mizo tlangval 20 lakluh tawh an ni a ti a, hetianga Mizorama BSF hmunpuite a lo awm ve takah hian BSF-a Mizo tlangval tam zawk lak theihna tur sawrkar laipuiah thlen mek a ni a ti. BSF sipai Mizorama thawk tur hian tual chhung tawng thiam leh ram leilung hriate chu an tangkai leh zual dawn a ni a ti.
Chhiatna eng emaw a lo thlen thulha do tur leh tuartute hnena tanpuina pe thei turin BSF chuan Disaster Management Battalion pahnih a din tawh a. Tun hnaiah BSF Disaster Management Battalion mite chuan chhiatna lo thlen thulha tanpuina mamawh ang mipuite hnena an pek theih nan Mizoram district hrang hrang enfiahna (reconaissance) pawh an nei tawh a ni a ti.
Chanchinmiten Mizoramah Pakistan ISI mi tirh Jihadi pawl ang chite an lo putluh ve mai theih dan a awm ang em tia an zawhna chhangin Pu Khan chuan a awm lovang tih a sawi theih loh thu a sawi a, mahse, chutiang a lo awm a nih pawhin amah leha hote chu an inpeih a, an lo rek chhuak mai dawn a ni a ti.
Mizorama BSF sipaite hian sikserh an tuar ve hle a, nikum khan sikserh vangin Mizoramah pakhat a thi a, 2 chu an chawlh lak laiin an thi a ni. Sikserh vei case hi 2,411 a awm tawh a, sikserh chuan an commander pawh a zuah lo a, BSF sipaite hian vawi eng emawzat an vei nawn a ni.
India leh Bangladesh ramri hungna hi a kal mek a, hung tawh sa eng emaw leimin leh tlahniam leh vanduaina dang avanga chheleh te a awm a, ramri hungna hrulah hian lamlian sial hna thawh nghal zel a ni bawk a. Ramri hung leh lamlian sial hna hi NBCC leh Engineering Projects India Limited (EPIL) ten an thawk mek a, ruat lawk ang chuan nakkum tawp lama zawh hman tur a ni.
Chanchinmite zawhna chhangin BSF DIG chuan ramri hung avanga a huam chhunga harsatna tawkte chu sawrkar laipuia Home Ministry chuan zangnadawmna tha tawk a pe dawn a ni a ti a. Tunah hian ramri hung hna chu Mizoram leh Bangladesh ramri-ah chuan NBCC ten kilometre 40 chhung an thawk mek a, EPI:L chuan an thawh tur Kilometre 93 huan chhungah an thawk mek bawk a ni a ti.
Picnic Bus Chesual Mi 3 Thi
Nizan hmasa thim hlim (30.11.2006 zan) khan Tuirial atanga bus te chi Aizawl pana tlan a chesual a, mi 2 a hmunah an thi a, hliam zinga pakhat chu Aizawl Civil Hospital thlenpui hnuah a thi. He bus chesual hi City Ride bus, Ebenezar Boarding School-a thawkten Tuiriala picnic nana an hman a ni a, thite hi bus khalhtu leh neitu ni bawk Lalchhanhima leh Hmingchungnunga, Zemabawk ve ve leh damdawi ina thi Lalhmingsanga Zemabawk an ni. He bus-ah hian mi 15 an chuang a, mi 2 na lovin an him a, mi dang zawng chu damdawi inah kalpuiin an zingah 4 chu damdawi inah enkawl zui an ni a, thih hlauhthawnawm an ni loa sawi a ni.
Champhai leh Lunglei Champion
Mizoram pum huap Mizoram Volleyball Association leh Lunglei District Volleyball Association buatsaih Inter District Championship nimin piaha Lunglei LDSC Ground No.2-a khelh zawh takah chuan mipaah Champhai team an champion a, hmeichhiaah Lunglei team an champion. Nimin piah chawhnua final khelhah Champhai hmeichhe team chuan Lunglei game 3-1-in an hneh a, trophy leh Rs.10,000 an dawng a, Lunglei hmeichhe team chuan trophy leh Rs.7,000 an dawng. Hmeichhe finalah Lunglei team chuan game 3-0-in Serchhip an hneh a, trophy leh Rs.7, 000 an dawnga, Serchhip hmeichhe team chuan trophy leh Rs.3,000 an dawng.
Lecturers 27 Tuaihriam
Mizoram University hnuaia Mizo department buatsaih, College-a Mizo subject zirtirtute (lecturers) tuaitharna (Refresher course) ni 21 chhung neih chu nimin khan zawh a ni a, kharna inkhawm Mizoram University Vice Chancellor Prof. A.N.Rai chuan hmanpuiin lecturer 27 hlawhtling taka hruaihriam an nih avanga lawmthu a sawi. Course Coordinator Prof. Laltluangliana Khiangte chuan hetiang course hi vawi lio neih tawh a niin University Grants Commission huaihawt ni lo tum hnih Mizo Lecturers-ten an lo buatsaih tawh a ni a ti a. Dr. LT Khiangte hi Mizo Refreshers Course neih chungchangah a sulsutu leh resource person lo ni fo tawh a ni. He Refresher Course-ah hian Aizawl khawpui atangin lecturer 14 leh a pawn atangin 13 an tel a, mi thiam 17-ten an ziritir a ni.
Saitual MLA-in Tukthuan Kilpui
Saitual bialtu MLA leh MPCC Treasurer Pu R.Lalzirliana chuan a bial chhung khua atanga tun laia LPS Icon 2006 thlanna top 10-a tel K.Lalremmawia s/o K.Lalrintluanga, Rulchawm leh K.Lalhmingliani d/o K.Lalramnghaka, Saitual pualin nimin khan tukthuan a buatsaih a, Lalremmawia hnenah bag, Lalhmingliani hnenah suitcase leh an kalzekna atana duhsakna a hlan. Heng Saitual bial atanga zaithiamte hi an nu leh paten an tawiawm a, Pu Zira hi Congress thalaiten an tawiawm.
Synod Inkhawmpui Hnai
Mizoram Presbyterian Kohhran thuneitu sang Synod Inkhawmpui chu December ni 6 atanga ni 10 chhung hian Bungkawn Kohhran Biak Inah nghah a ni dawn a, Dec. ni 4 leh 5-ah Pastoral Committee inkhawm a ni ang a, Decemver ni 6-ah Nomination Committee inkhawmin hemi zan dar 6:00 atangin Pathian Biak Inkhawm a awm ang a, inlawmna leh report atan a ni. Dec. ni 7-9 chhungin rorel a ni ang a, zantinh Pathian Biak Inkhawm a awm thin ang. (to be continued).
3rd.Bn.MAP Hqrr.-ah Rural Sports Meet
Mizoramin a thlen tur All India Rural Sports Meet nakkum March ni 16 atanga neih tur chu 3rd. Bn.MAP hmunpui, Mualpuiah neih a ni ang a, infiammite thlenna tur pawh 3rd. Bn.MAP hmunah hian awm thei tura beisei a ni.All India Rural Sports Meet-ah hian mipa tan football, tug of war, mipa leh hmeichhe tan volleyball leh weightlifting-ahte inelna neih a ni ang. Mizoram atanga tel turte chu nakkum January ni 3 atangin Residential Coaching neih a ni dawn a ni.
Baptist Christmas Carol Service
Naktuk Pathianni dar 1:00 p.m-ah Christmas Carol Service Aizawl Town Baptist Church, Upper Republic-ah neih a ni dawn a, carol thupui chu “A time for joy†a ni. Hetah hian Nl.Nancy Zothanmawii, Nl.Maggie, Nl.Esther Lalruatsangi, Pensy, Tv.C.Lalramchhana, Tv.C.Lalruatkima, S.A.Central Division Choir, BCM Choir,etc. an zai ang. Baptist English Fellowship chuan Mizo thalaiten saptawng nak taka an tawng theih a, khawvel ram khawi hmunah pawh Krista thuhretu an nih theih nan leh eizawnna hna an hmuh/thawh theih nan kumin June thla atang khan Pathianni apiang dar 3:00 p.m.-ah English Service an buatsaih thin a. Heta kal thin thalaite chuan hun rei lo te chhungin saptawng leh sap hla sak nuam an ti tawh hle.
UCC Governing Board-ah
Rev. Dr. R.Lalbiakmawia, Synod Executive Secretary chu Union Christian College (UCC) Governing Board Member kum 2006-08 chhung atan ruat a ni.
Naktuk Bible Sunday
Naktuk Dec. ni 3 Pathianni hi Bible Sunday a ni a, Mizoram Presbyterian Kohhran chuan inkhawmpui thupui 2 “Pathian thu hi hnehtu a ni†(Tirh.19:20) leh “Bible hi kan inremna a ni†(Eph.2:14) an thlang a, thupui hi inkhawm tumkhat chauh atan pawh hman theih a ni. Bible Sunday puala thawhlawm chu BSI Auxiliary-ah pek tur a ni a, mahni telna branch-ah pawh pek theih a ni.
PLus Two Students JAC Din
Mizorama Plus Two zirlaite harsatna hrang hrang tawh mekte sut kian a nih theih nan nimina Mizo Students Union (MSU) pisapuia zirlai inhmukhawmte chuan Plus Tow Students Joint Action Committee an din a, Offfice Bearers 8 leh Advisers 2 an ruat. Chung zingah chuan Chairman K.Zomuanthanga, Govt. Central HSS, General Secretary C.Lalramthianghlima, Govt. JL HSS, Treasurer Lalthabika, Govt. Republic HSS an ni.
ZOFEST 2006 Thlirlawk
Nimin khan MZP Gen.Hqrs. Executive Committee an pisapuia inkhawm chuan Dec.ni 13 leh 14-a Aizawl; lammuala Zofest 2006 an buatsaih tur atan kawng hrang hranga mawhphurhna nei tur Committee an siam. MZP hruaitute chu he ZOFEST hi a hlawhtlin theihna tura Manipur leh Tripura-a Zo hnahthlakte lo thawt lawkin an zin mek. MZP chuan Zofest 2006 a hlawhtlin theih nan mipui zawng zawng tawiawmna an ngen.
Johnson College Hmasawn
Johnson College Aizawl chuan hma an sawn zel a, July ni 1, 2006 khan Mizoram University atangin ‘permanent affiliation’ an hmu a, Nov. ni 17, 2006-ah University Grants Commission grant hmu thei turin register a ni bawk. He College zirtirtute leh zirlaite thawhlawmin xerox khawl an lei a, an college building-ah hall thar an siam bawk.
Jenny Lawmna Naktukah
Naktuk Pathianni dar 10:00 a.m.ah hian Dinthar Veng Salvation Army Corps chuan boxer Jenny R.Lalremliani lawmpuina inkhawm an nei dawn a, a duh apiang tel turin an sawm.
Chite-ah Ruang Chhar
Nimin khan Aizawl chhuah lam Chite lui ruama Horticulture department thlai huan bulah ruang chhar a ni a, a kekawr iptea lehkha hmuhah chuan C.Zahauva s/o C.Sangliana a ni a, he lehkha hmuh hi conductor’s licence nia sawi a ni. Police-ten he ruang chhar chungchanga an tih tur an tih hnuah pawh he ruang hlawmtu hi an la awm lo nia hriat a ni.
Thisen Unit 183 Pe
Nimin khan Govt. Mizo Higher Secondary School-a NSS volunteer leh Aizawl West II biala MNF thalaite chuan Aizawl Civil Hospital-ah damlo mamawh apiang tan thisen an pe a, Govt. Mizo Higher SS NSS Volunteeer mipa 73 leh hmeichhia 24 ten thisen unit 107 an pe a, Aizawl West II bial MNF thalai mipa 57 leh hmeichhia 19 ten thisen unit 76 an pe.
