Blue Corn Felicia-i A Lungawi Lo : Police-ah FIR An Thehlut
Thupui sawi hma in thuhma tlem in nei teh ang. Mizote anga mipa leh hmeichhia, nula leh tlangval ngampa taka inkawm a, tawngka mai ni lo kut thawh meuh a khawlai puipunna hmun pawh sawi lova infiam ching hi hnam dang an awm lo maithei.
Mipa/tlangval tawngkam mai ni lo kut thawh meuh a khawlaia nula/hmeichhia fiam zuk zuk ching kan awm teuh rual hian nula/hmeichhia mipa in khawlaia kut thawh a an fiam pawh a thil zahthlak leh hnamdangte mithmuh a thil mawi lo ani tih hre miah lo, lawm zawk niawm fahrana nui uar uar mai an awm teuh bawk. Heng avangte hian hnamdangten kan nula/hmeichhiate an zuam phah fo thin niawmin a hriaten an sawi a. He thilah hian mipa/hmeichhia tia insawisel theih bik erawh a ni lo. A hmei a pa a kan zavaia insiam that kan ngaihna lai tak a ni.
Khawvel a changkang chho zel a, hmeichhiaten danin an chanvo a humhalhna an hre tam chho zel a. An zahawmna huaisen taka vawnghimtu hmeichhia an tam zel bawk. Hei hian zawi zawiin Mizo mipa leh hmeichhiate kan infiam dan hrang hrangah nghawng a nei chho zel dawn a. Mipa tan hmeichhe chhaih mai mai leh auh nawmnah mai maite chu thilsual tih (crime) a tling a ni tih kan hriat loh chuan ‘Mizo zingahte chuan….’ tia ngaihdan kan neih lai hian dan hmangin thiamloh kan chang fo thei a ni tih mipate pawhin kan hriat ve zel a tha bawk ang.
Mizo hmeichhe zinga zaithiam pawl/group anga lar ber pawl Blue Corn member Felicia-i chuan amah aunawmnah a mawilo taka chhaihtu nia a puh lakah kar liamta nilaini khan police hnenah FIR a thehlut.
Zozam Studio Vaivakawn-ah Felicia-i hian kar hmasa thawhleh zan khan hla a record a. Hemi zan hian dar 10:00 velah hla record zovin a pute-an Zozam studio-ah hian motorin a zuk lama. An hawn kawngah Chaltlang Dawrkawn an thlenin Felicia-i riltam chuan kawngsir dawrah nepnawi ei tur lei a duh vangin an ding zawk a, Hetia dawra thil a leina-ah hian kawngsira awm tlangval thenkhat chuan lo chhaihin tawngkam mawi vaklo hmangin an lo fiam niawmin kan thudawnna chuan a sawi a. An lo chhaihna tawngkam vanga lungawi lovin a tuk nilaini-ah Felicia-i te chuan police-ah FIR an thehlut ta a ni.
Ngaihdam an dil vangin he an thubuai hi kalpui zel lova inngaihdamna hmanga Felicia-i te lam hian tih tawp an hreh lo niawmin kan thudawnna chuan a sawi bawk a. Thubuai hlabuai zawngin Felicia-i te hian kalpui zel an tum bik lo.
Mipui Ngaihven Youth Icon 2006 Tur I Thlang Duh Em ?
Mizo thalai kum 25 hnuai lam, an zaithiam tih tukhaw kha in kan hriat lem loh, zai lama an talent in phumru haichhuah sak nana LPS leh UNODC CHARCA te huaihawt zaithiam zawnna Youth Icon 2006 top 10 atanga a thazual pathumte thlan chhuahna inelna chu neih mek zel a ni a. Kar liamta Inrinni zan thleng khan mi pathum top 10 atang hian an tla tawh a. Zan in hian inelna hi chhunzawmleh a ni anga. Anmahni i hrechiang duh anih chuan LPS lo thlir mai rawh.
Tan zawng leh thiam tih zawng neite tan vote a thlak theih tawh bawk a. Mahni tan zawngte vote pui tura sawmna pawh a nasa hle niin Teen Box chuan thu a dawng. A nitel in he Icon 2006 thlanna hian mipui ngaihhlut a hlawh chho mek zel a, telephone (Landline) leh SMS hmanga duhzawngte vote nan pawh line chan a har em em bawk. Ngaihven leh ngaihlut a hlawh em vang hian he Youth Icon 2006 mipui hmuh theih a Television hmanga pe chhuaktu LPS local channel pawh entu leh thlirtu an tam phah hle a. He Icon thlanna host (tu) Malin zei tak maiin hun a hmang reng bawk nen thlir a man hla thei hle.
Youth Icon 2006 top 10-te thlitfimna-ah hian mi pathum – mipa pakhat leh hmeichhia pahnih an tla tawh a. I tan zawng leh thiam i tihzawngte kha a thiamna tawngka a fak mai a tawk lo, phone emaw SMS emaw hmangin thiam i ti ngei a chuvang chuan Icon atan i duh chiang a ni tih lantir nan vote pe ve hmiah mai rawh. Mahni an inhai vur theih nana bawl thintu che Politician ho hnena vote pek ngawt ai chuan i thalai pui, talent nei tha tak takte an talent i ngaihsan saka vote i pek kha a hlu fe zawk.
Vawiin chawhma dar 11:00 atanga chawhnu dar 2:00 thleng hian heng a hnuaia mite hi Youth Icon 2006 atan i thlang thei. Anmahni mobile phone number ah hian SMS emaw tawngka emaw hmanga an hming emaw an number sawi emaw chhut (type) emaw hmanga thlan mai kha a ni a thil harsa a ni lo.
Naktukah ‘Adventures of Dindin No.3’ Kan Hmu Dawn Ta
Kan chanchinbu-ah pawh kan rawn thailang zauh tawh a, Dindin Lehkhabu ngainatute chuan a chhunzawmna chhuahleh hun nghakin an ngaihven deuh reng a ni. Ni e, kuminah Sena hian lehkhabu pakhatmah a la tichhuak lova, hei vang hian mi tam tak chu an beidawng hman hle a. Hei, tunah chuan Mizo te zinga ziaktu kan neih naupangte zing ami Sena Bungkawn Venga awm chuan Mizo Detective thawnthu ngaihnawm tak ‘Adventures of Dindin No.3’ (Hmel Inthup) tih chu a tichhuak dawn ta. Naktuk, December 5, 2006, thawhlehni chawhnu dar 1:00-ah hian ZALEN office, Treasury Square-ah Zalen chanchinbu Editor, Marema chuan a tlangzarh dawn a ni.
Tun tuma a lehkhabu chhuak tur chungchangah Sena chuan, “Ka tichhuak thei tur hi ka lawm takzet a ni. ‘Dindin No.3′ hi a kalphung ka thlak danglam nasa hle a, hun leh ngaihtuahna pawh a heh hle a ni. Detective thawnthu-ah hi chuan a chhiartu te kan bum loh chuan ahlawhtling thei tak tak si lova, a buaithlak khawp mai. Tin, a Cover pawh hi bu dang anglo takin ka thlak danglam vek a ni,’ tiin a sawi.
Dindin No.3 hi kumin January 13 atanga ziah tan a ni a, tunah a zo ve thei ta hram a, mi tam tak sawi a kai leh ngei dawnin a lang a, a nep hlawl lovang tih keini pawhin kan sawi ngam a ni. Kan hriat angin Dindin 1 & 2 kha Book of the year Top-10 & 20-ah an lang ve ve a, tun ami pawh hi a nep vak ring duh suh.
‘Adventures of Dindin No.3’ hi Rs.100/- man tur a ni a. TM Pess chhut niin, a ziaktu Sena’n a Published ve thung tawh ang. Tlangzarh ni hian ZALEN Office-ah Rs.80/- chauhin lei theih a ni dawn a, chim deuh huk tur tihna a nih chu. Tin, Thingtlang lama kan unaute rawn fuankhawm lai a nih avangin muan sawr sawr chi a nih loh hmel hle.
Tualchhung Lawrkhawm
MPCC-in Ral Dawn
Mizoram Congress (MPCC) chuan vawiin dar 2:00 p.m.-ah Pu S.Rotluanga, Electric Veng thiannu tun hnaia boral Pi Kawlthuami an ral dawn a, Office Bearers leh Executive committee memberte kim taka kal tur an ti.
Sangthuama’n Hawng Ang
Aibawk Games & Sports Association chuan Mizoram State Speaker hmasa ber Pu J.Thanghuama Memorial Football Tournament an buatsaih vawiin dar 1:00 p.m.-ah hian Aibawk Public Playground-ah Supples Minister Pu K.Sangthuama’n a hawng dawn. Minister hian he tlang dunga a department enkawl supply kudama buihfai dinhmun enin sericulture farmer-te a kawm bawk ang.
Taxi Intlanchhawk
Vawiin hi Mizoram sawrkarin Aizawl khawpuia taxi-te intlanchhawk tuura a tih tanna ni a ni a, vawiinah number inkawpkim lo an tlan ang a, naktukah inkawpkimho an tlan ang a, mahse, office chawlhni, inrinni leh Pathianni-ah chuan an vaiin an tlan thei ang.
Hnam Pual Zitrlaite Intawhkhawmna
Hnam puala Zirlai Inzawmkhawm Pawl HSA, LSA, MBSA, MSO, RSU, SSPP, TKSU chuan December ni 9 inrinni-ah Vana Pa Hallah hnam inpumkhatna chungchanga inkhawmna an nei dawn a, Chawngte, Lawngtlai, Saiha, Sialkal tlangdung, Sakawrdai, Tripura leh Assam atangte pawhin tel tuira beisei an ni a, hnam inpumkhatna chungchanga tuina neite chu a duh apiang tel turin an sawm.
Handset Nuai 5 Man Rubo
Kar kal ta ningani zana Thanchhingi & Son dawr, Dawrpoui Vijaya Bank bul mi sualin an rawknaah chuan mobile handset thar hlak (zawrh lai) 70 vel an la a, heng hi hralh (zawrhna) ang chuan cheng nuai 4 atanga nuai 5 hu a ni. Misualte hian handset thar bakah a chhia siam mek lai eng emawzat pawh an la tel a ni.
S.A.Democracy Zirhona
Vawiin hian New Delhi Hotel Ambassador-ah Centre for Study for Developing Societies (CSDS) bul tumin South Asia-a democracy dinhmun zirhona neih a ni dawn a, zan lamah “State of Democracy in South Asia Report” tlangzath a ni ang. Mizoram atangin Mizorama CSDS Coordinator Pu Lallianchhunga, Lecturer, Department of Political Science, Mizoram University pawh a tel ang.
FLAM-in MPF An Fak
Former Legislators Association of Mizoram (FLAM) chuan October thlaa Tlungvel bye election-a Mizoram People Forum hnathawh an fak a, an hnathawh avangin sum hmanga inlei, party miten sum ngiata candidate vaubeh, langsar taka zu leh ruihhlo hman, house to house campaign, voter-te chawpchilh mamawh hrang hrang pek, buh ophurhsak, dam lo kan, mitthi ral,etc. a bo duak a ni an ti. MPF hma lakna atangin kha inthlanah khan candidate-te pawhin sum an sen tlem ngei an rin thu sawiin Mizoramah political chapter thar hawn ni ta bera an ngaih thu an sawi a, hun lo kal zel turah dodalna leh sawiselna karah pawh huaisen taka an hna thawk zel a, hma an lakna pawh zauh zel tura an beisei thu sawiin FLAM pawhin hetianga MPF tenan thawhna kawngah an theih ang tawka thawk ve tura an inpeih thu leh MPF thil tih dan an thlawp tlat thu ziakin FLAM chuan MPF an hriattir.
MULCO En Turin Sawm
Mizoram Multi-Commodity Producers Cooperative Union Ltd. (MULCO Ltd) bawnghnute sawngbawlna hmun Thuampui enpui turin tukin dar 8:00 hian chanchinmite an sawm a, tukthuan an lo buatsaihsak dawn a ni.
Lalroutmawi Programme
An programme ang chuan Mizoram Crusade for Christ Crusade Team chuan zanin hian Aizawl Temple-ah crusade an nei ang. He crusade-a an leklam ber chu zaithiam Lalruotmawi a ni.
