Homogeniser Khawl Hmanga Bawnghnute Sawngbawl Mipuiin An Hriatthiam Loh Vangin Khawl Chawlhtir A Ni
Aizawl, Dec 05 : Aizawl khawpuia bawnghnute mipui hnena supply-tu bulpui ber pakhat Mizoram Multicommodity Producers Coop. Union Ltd. (MULCO) hotute chuan Thuampuia an hmunpuia bawnghnute sawngbawlna khawl changkang (homogeniser) an bun thar chu mipuiin an hriat thiam loh vangin an dintir ringawt mai a ni an ti a. Homogeniser hi bawnghnute mihringin an pai tawih awlsam zawkna tura damdawi hmanga sawngbawlna leh bawnghnute-a a thau leh chakna awm (fat) semrualna a ni a, he khawl hmanga bawnghnute sawngbawl a nih hian a thar (khar) chu sem rual a nih avangin a khar a awm hlang lova, mipuiin a dal ta emaw an ti a ni an ti. Hemi vang hian an bawnghnute hralh chhuah a tlem phah a, chuvang chuan an khawl chu an hmang lo (dintir) ta ringawt mai a ni an ti. Nimin zing khan MULCO hotute chuan chanchinmite an hmunpuiah hian lengah sawmin khawl changkang tak tak hmanga, thianghlim taka bawnghnute an sawngbawl dan te, bawng natna avang emaw bawnghnute atang emawa natna hrik awm theite a sawngbawlnaa tihhlum a nih dan te an entir a, he bawnghnute sawngbawlnaah hian an tui hman tur te, bawnghnute sawngbawlna atana an bungbel hman te tuiso hu (steam) tihthianghlim a nih dan te, bawng hnute sawngbawl tura an lei tui pawlh a nih leh nih loh, thau (fat) leh protein awm zat leh pawlh bawlhhlawh a nih leh nih loh enna te chanchinmite hi an entir a ni.
kum 1983 atang din, Cooperatives Society 32-ten an kalpui mek, mahnia intodelh MULCO hian an memberte hnen atangin bawnghnute an leisak a, chu chu mihring tana hrisel tur zawkin an sawngbawl ta a ni. Bawnghnute sawngbawl chauh ni lovin rosagulla, rasmalai, gulapjamun, dahi(dhoi), paneer, ghee leh lassi pawh an siam chhuak a, tunah hian Ice Cream siamna (plant) bun tumin hma an la mek a ni.Ice Cream Plant hi an peih hunah chuan nitin bawnghnute litre 10,000 vel hralh chhuah theih an inbeisei.
MULCO hian an Society memberte atangin kum 2005-06 khan bawnghnute litre 21,10,500 an leisak a, hemi atan hian Rs.371,97,014/- an hmang a, an hmuh let chu Rs. 459, 40,832/- a ni. An member bawng vulhte tan bawng chaw an ngaihtuahsak a, kum 2005-06 khan bawng chaw lei nan Rs.94,43,541/- an hmang a, subsidy-ah Rs.1,40,000 an sem chhuak bawk. Society memberte hnen atangin bawnghnute tha chu litre 1 Rs.18.25-in an leisak a, Rs.22/-in an hralh chhuak a, Rs.21 an chang a, Re. 1 chu agent ten an chang a ni. MULCO hian an bawnghnute leina bawng hriselna atan damdawi hleo awm mang lovin an ngaihtuahsak bawk.
Aizawlah hetianga bawnghnute hralh chhuahna hmun hi 320 vel an nei a, nitin litre 7,000 atanga 7,500 vel an sem chhuak thin a, an supply-na pui deuh deuh chu Aizawl Civil Hospital, TB Hospital, Sports Authority of India (SAI), ICDS Sopecial Nutrition Programme-ah Anganwadi Centre te an ni a, hnathawktu a nghet 18 leh a nghet lo 35 an awm. MULCO hian kum 2005-06 chhung khan hlawkna (net profit) Rs.38,830/- an nei a, mahse, kum ruk kal taa an hlep (net profit) tlem ber tum a ni a, kum 2004-05 khan net profit Rs.8,21,180.49 an nei a, hei hi kum ruk chhunga an hlawk ber kum a ni. An hlawkna hi an bawnghnute sawngbawlna tihchangkan leh tihphuisui nan an hmang thin a, an hlawkna 25% hi an insem thei nain insem lovin an share-ah an dah thin a ni. Board of Directors Chairman leh Memberte an hautak ve lova, sitting allowance leh pawimawha an zina TA bak hamthatna an nei lo a, hei hi an hlawk/an intodelh theihna thuruk pakhat chu niin a lang. Hleo em em tura beisei an ni lo a, mahni inenkawl tura beisei an nih angin anmahni an inenkawl thei a. Thil an tih reng rengin tender an ko ve ngai lo a, an thil mamawh chu khawl a ni emaw, thil dang pawh anmahni kalin an lei mai a ni.
MULCO hian NLUP atanga bawng vulh chhote leh Vety Department-in bawng vulh tanpuina a pekte chu an bawnghnute leina hnar ber an ni tih an sawi a, tunah hian NABARD atanga pawisa cheng nuai 309 vel pukin heta tang hian 50% pung awm lovin cheng nuai thum zelin bawng vulhtute hnenah loan an pe a ni.
Bawnghnute dal chungchang zawhna chhangin MULCO hotute chuan bawnghnute dahkhawm tamah a chunglam apiang a tak thei a, a hnuai lam a tak loh theihna a awm a ni an ti a. Mahse, an bawnghnute chu Mizoramah a tluka tha awm thei lo a ni an ti a, an hnen atanga leia mahni sawr chhuah anga hralh leh te pawh an awm a ni an ti.
Tuna an hotute chu Chairman Pu H.Lalchhuanawma, Board of Directors te Pute VL Hmuaka, Lalramzauva, Lalhmangaiha, Zahaia Hmar, Dr.Dailo David Varte-Member Secretary * Managing Director, Registrar, Voop. Societies, Mizoram, Director, AH & Vety. Deptt. Mizoram leh National Dairy Development board atangin aiawh pakhat an ni.
Chanchinmite hi an MD hovin Manager Dr.Sawma leh thawktu dangten hneh takin an lo chiau-au a ni.
Assam Minister-in Mizoram Nen Ramri Buai Neih A Puang
Hun Remchanga Hmang Turin MPC-in Sawrkar An Ngen
Mizoram People’s Conference (MPC) party chuan tun hnaia Assam Revenue Minister Pu Bhumindra Barman’an Mizoram-in Assam ram a nek a tih leh Assam chuan Mizoram, Nagaland leh Arunchal Pradesh nen ramri buai a nei a tih leh hun rei tak ata tawh heng ramri buai chingfel tur hian heng state Chief Minister-te inbiakna neih a rawt leh Assam Chief Minister Tarun Gogoi chuan heng ramri buai chinfelna nghet neih a duh tih a sawite chu remchangah la a, Mizoram leh Assam state ramri buai chingfel tura inbiakna atan hma la vat turin Mizoram sawrkar an ngen.
Chief Minister hnenah memorandum nimin khan thehlutin MPC party chuan Assam Revenue Minister hian Nov. ni 24 , 2006 khan Mizoram leh Assam inrina lai vel a tlawhin Hailakandi-a chanchinmite hnenah Mizoram chuan Assam ram Barak-ah ram hectare 1,000 a rawn nek (encroached) a, hei hi tun hnai mai thil a ni lo a, kum 1970 chho atang tawh khan a ni a ti a ni an ti. MPC memorandum chuan Assam “Minister hian Mizoram leh Assam ramri-a ngaw chhah tak awm chuan state pahnih thenhrangtu ram leilunga ramri chu a tichiang lo zo†a ti a, chutih rual chuan “Assam state chuan Mizoram, Nagaland leh Arunchal Pradesh chuan ramri buai an nei tih a pawm†bawk a ni an ti..MPC memorandum chuan Pu Bhumindra Barman hian heng state Chief Minister-te hi hun rei tak ramri buaina chingfel tur hian thukhawm se tiin a rawt a, fiahfai takin “Assam Chief Minister Tarun Gogoi chuan remri chinfelna nghet neih a duh a ni†a ti bawk a ni an ti.
MPC memorandum chuan “Assam sawrkar aiawh, chutih laia Chief Commissioner of Assam leh Lushai (Mizo) aiawh chutih laia lal Suakpuilala Sailo ten ramri chungchang kum 1875-a an ziak ramri chungchang rinfelna rintlak (officially demarcated) chu ngai pawimawh lovin Assam chuan Mizoram sq.kilometre 880 a nek (encroached) zawk a ni tia Mizo mipuiin pawm dan thi thei lo an neih lai leh helai vela Mizo leilet neitute Assam Police-ten an rawn tihthlabar reng lai hian†Mizoram sawrkar chu Mizoram leh Assam ramri buai chinfel hlenna atana Assam sawrkar nena inbiakna tura hma la thuai turin an ngen a ni.
MPC chuan political party-te leh tlawmngai pawlten Mizoram leh Assam ramri chungchang an sawi chhuah apiangin Mizoram sawrkar chuan hruaitute chu sawrkarin hma a la ang tiin an nawrhnate titawp turin a thlem thin a,. Mahse, sawi chhuah thar leh a nih loh chuan sawrkar level-ah ramri chungchang thu hi a thi chawpchilhin hlam chhiah a ni leh thin a ni an ti.
MPC chuan tunah hian Assam Minister mawhphurhna nei ngeiin tute mah tur vang pawh ni lo a ramri chungchang a rawns awi chhuah hian inbiakna kawng a rawn hawng ta a ni tiin Mizoram sawrkar chu he hun remchang tak meuh hi thelh (miss) lova a sang ber, chu chu Chief Minister levelah Assam nena inbiakna awmze nei atan hma la a, Mizoram mipuiin mutmawh hnarmawha an neih atana tan la turin an ngen a ni.
MPC party hian an memorandum-ah hian Nov. ni 26, 2006 ‘The Times of India†chanchinbu Pathiannia chhuak (Sunday Times Of India) chehthlak (clipping) an thil tel a, hetah hian Assam Revenue Minister Bhumidhar Barman thu sawi hi a chuang a ni.
ZNP Chuan Court-a Pu Zira Thiam Changin Tuikuk Helte Hnenah Pawh Pawisa Pek Tirinhlelhawm An Ti
Zoram Nationalist Party (ZNP) chuan NEEPCO hnathawk mi 6 HPC-ten an rukbo tlan nan sawrkarin cheng nuai 50 HPC helte hnena a pek chungchang thubuaiah Court-in Pu R.Lalzirliana, MLA thiam a chantir atang hian Tuikuk helho hnenah pawh Mizoram sawrkar chuan sum eng emawzat a pek ngei a rinawm (rinhlelhawm) takzet a ni an ti. Nimin khan press release chhuahin nimina ZNP Office Bearers leh Executive Committee joint meeting chuan HPC helhote hnenah an mi rukbote tlan chhuah nan mipui sum Mizoram sawrkar-in a pe tih Pu Lalzirliana’n a puan zar chu thu dik lo a ni tia Mizoram sawrkarin a khinna chu court-in ngun taka thuhretute a ngaihthlak hnuah Pu Zira thiam a chantir ta a ni an ti a. Hei hian helho hnenah MNF sawrkarin mipui sum tling khawp cheng nuai 50 lai mai chu HPC helho hnenah a pe tih a tichiang ta a ni an ti. Pu Zira chu thu dik huaisen taka puang chhuak leh a tulna apianga thu dik tan tlattu a ni tiin fakawm an ti a, MNF sawrkar chu mipui sum a tichingpen thin leh helho a puih thinna sim hmak turin an phut. ZNP chuan Tuikuk helhoten mi an rukbo tlan chhuah nan Mizoram sawrkarin pawisa eng emawzat a pe ngei nia sawi thinte kha MNF sawrkar chuan cheng khat mah “Kan pe lo†a lo tih liam mai mai kha Pu Zira court-in thiam a chantir takah hian a tirinhlelhawm leh zual ta a ni an ti.
Hetih lai hian National Students Union of India Mizoram State chuan Congress MLA Pu R.Lalzirliana’n thiam a chang chu lawmawm an ti a, ADM(J) court chu dikna tana huaisen taka rorel a ni tiin chhuanawm an tih thu an sawi. Nimin khan press release chhuahin Pu R.Lalzirliana chu huaisen taka thudik a tan avang leh chutianga a kal zel theih nan chawimawina pangparthi an awrhtir dawn tih an puang a, a hun atan Dec. ni 8-ah Congress Bhavan an ruat a, a thei apiang tel turin an sawm.
Taekwando Thiam Mi 23 Interview
Sahara India Commercial Corporation Ltd. atangin Col. (retd) John de Britto chu tun hnaiah Aizawl lo kalin Security Body Guard tur lakna a nei a, hetah hian taekwando thiam Mizo mipa leh hmeichhia 23 an interview a, an result chu ni 15 chhunga hriat beisei a niin a tlingte chuan nakkum January thla chawhnu lamah an hna Pune-ah an zawm dawn a ni. Tlingte chu VIP security te, emergency-a chet dan tur te special training pek an ni ang a, an hlawhpui thlatin Rs.7,000-ah tanin an thawh that dana zira san zel a ni dawn a ni dawn a ni. Heng bakah hian quarters, mess leh uniform free-a pek an ni ang a, an thawh that dan a zirin tihngheh an ni ang.
Sahara India Commercial Corporation chuan security guard mi 200 vel an chhawr mek a, officer rank-te pawh an awm. Mizorama security guard tur an lak hma hian Himachal Pradesh, Assam, Manipur, Nagaland, Arunachal Pradesh leh Sikkim-ahte kalin security guard tur an zawng bawk a, tuna mi 200 an chhawr mekte pawh hi a tam ber chu tlangmi an ni. Mizoramah taekwando thiam leh lehkhathiamte lak leh thuai an tum.
ZDU-in Driver Leh Mipui An Ngen
Zoram Drivers Union chuan November ni 28 atanga Dec.ni 6 thlenga ‘Fimkhurna Hapta’ an hman mek chhung leh a tawp hunah pawh lirthei chetsualna pumpelh a nih theih nan a khalhtu zawng zawng fimkhur zui zel turin, zu leh ruihhlo dangte rui chunga lirthei khalh lo tur leh motor zawh tawk baka rit bungrua leh mihring phur lo turin an ngen. Thu chhuahin mipuite pawh lirthei khalhtute phurh theih bak phurhluihtir lo turin an ngen a. Kea kalte pawh lirthei khalhtute tibuai zawnga awm lo tur leh lirthei khalhtute pawh khawpui chhunga mihring an him theih nan traffic police-te thu zawm hram hram turin an ngen.ZDU hian naktuk Dec.ni 6-ah an Headquarters office, Bawngkawnah Assembly neiin hruaitu thar thlanna an nei nghal ang.
MUP Member Hnenah Tanpuina
Vawiin dar 11:00 a.m.-ah MUP Gen.Hqrs. Office-ah AAG dawngtute hnenah tanpuina sem a ni dawn a, hemi rual hian ‘Kangmei Ven’ article inziahsiak lawmman hlan a ni ang a, Pu C.Ramhluna, Secretary, PCCF chuan a sem ang. MUP memberte tan Grace Nursing Home & Research Centre, Zarkawt, Aizawl chuan a thlawna ruh no leh no loh ensakna Dec.ni 6 leh ni 7-ah a nei leh dawn a, dar 9:00 a.m. atanga dar 5:00 p.m. chhungin a ni ang a, MUP member zawng zawng tan a ni.
MWA Annual Meeting
Mizo Writers Association chuan vawiin dar 11:00 a.m.-ah PIB Media Centre, Tuikhuahtlangah Annual Meeting an nei dawn a, Pu R.Khawpuithanga, Adviser to Chief Minister khual lian a ni ang. MWA hian an member boral tate Pu R.Vanlawma, Pi Lalsangzuali Sailo leh Pu C.Lalbiaknema sunna an nei ang a, an member Pu Lalengmawia Ralte-an National Award for Teacher 2004 leh Pi Thankhumi’n Translation Book Award 2005 an dawn lawmpuina an nei bawk ang.
TCZP General Assembly
Tuichangral Zirlai Pawl (TCZP) chuan Dec.ni 9 dar 9:30 a.m.-ah Central Hall Venghlui-ah General Assembly neiinTuichangral atanga mi chhuanawmte chawimawina neih an tum a, Tuichangral mi, zirlai, zirtirtu, nu leh pate a thei apiang an sawm. TCZP hian University Grants Commission-in Junior Research Fellowship mi 7 a pek zingah an member Lalngaihmawia Zote, Khawlailing leh Lalbiakkila, Bawktlang tel veta an chhuan thu an sawi.
Nawhchizuar Buaipui Dawn
Human Rights & Law Network huaihawt, a senso Social Welfare Department (GoM) bultumin vawiin dar 11:00 a.m. atangin I&PR Conference Hall-ah “Nawrchizawrh leh a kaihhnawih sawihona’ neih a ni dawn a, Chief Secretary (GoM) Pu Haukhum Hauzel khual lian a ni ang. Sawiho tur hian thupui thlan chhuah a ni a, 1. Mizorama nawhchizuarte dinhmun tlangpui, 2. Mizorama nawhchizuar an tam chhan, 3. A sutkianna, nawhchizawrhna sala tang mekte chhanchhuah leh chhawmdawl kawnga khawtlanga tlawmngai pawl, kohhran leh sawrkar hma lakna that tawk leh tawk loh; 4. Nawhchizawrhna hmun siam chungchang te an ni.
JACIT Hminga Pawisa Khawn
Joint Action Committee on Illegal Tradesrs chuan an pawl hminga vaiho hnena sum lo khawn thin an awm tih sawiin chutiang hria chuan a rang thei ang bera Phone 9436193845/9436383326-ah hhriattir turin an ngen a, action an la dawn a ni. JACIT hian dan lo anga sum dawng hnam dang an chhui zel dawn tih sawiin mipuite tanpuina leh thlawpna an ngen.
Khankawn V/C MNF-ah
MNFGen.Hqrs. press release chuan Khankhawn Congress V/C ni thin chu Dec.ni 1, 2006 khan MNF Gen.Secretary Pu C.Lalrammawia chuan MNF-ah a lawmlut a ti.VCP Pu C.Lalnghilhlova chuan MNF sawrkarah hian ram leh khawtlangin hma a sawn nasa a, an khawtlang hmasawnna turin a dawnthleng dawh dik zawnga her rem a tha bera hriatna avangin MNF-ah an lut tih a sawi.
MISSTA-in Warning Hnuhkir Ngiat
Mizoram sawrkarin zirtirtute saptawng zirna atana ‘Placement Test’ nimina a buatsaih chu Mizoram Secondary School Teachers Association chuan sawrkara an thu kal mekte avangin an boycott a, thu chhuahin an President Pu Lalrammawia sawrkarin warning a pek a hnuhkir hma chuan Mizoranm sawrkarin training, seminar, committee,etc. a kohah kal loh an ti a. An thu kal lai mek avanga Mizoram sawrkarin English zirna atana Placement Test a buatsaih pawh hi an tel thei lo a ni an ti. Mizoram sawrkar thu thil hriat dik tawk loh vanga an President warning peka puhin he warning hi a hnuhkir an beisei thu an sawi.
