Congress-in Sawrkar An Hneh An Lawm “Pathian Nung Kan Hnenah A Inlantir” An Ti
Aizawl, Dec 06 : Congress MLA Pu R.Lalzirliana chuan sawrkarin a thusawi a khinnaa thiama channa chu “Kan Pathian chu nung kan hnenah a inlantir zel a ni” tiin a hrilhfiah a, hnehna a channaah hian Congress party chuan “Pathian ropui ber se an ti a ni” a ti. Mizoram sawrkarin helhote hnenah an mi rukbo tlan chhuah nan cheng nuai 50 a pe tih a puan chhuah avanga Mizoram MNF sawrkarin court-a a khinnaa Pu Zira’n tun hnaia thiam a chan lawmna inkhawm nimina Congress Bhavan Golden Hall-a neihah thu sawiin Pu Zira chuan Mizoram sawrkar tawng tak hnuaia hel chi hrang hrang zalen leh inlulin thin dan, pawisawi lote rubo a, anmahni tlan chhuah nan pawisa tamtak tak helten an phut thin leh Mizoram sawrkarin rukbote tlan chhuahna atana mipui pawisa a pek thin dan a lo puan chhuahte sawi nawn lehin court-a Mizoram sawrkar aiawhte nen an inhmachhawn dante a sawi a. Pu Zira chuan mihring nunna hlu tak tlan chhuah nan hian pawisa tamtak sawrkarin a seng a nih chuan mipuiin an hrethiam thei a, mahse, pawisa sen pawh seng lo anga a insawi thin chu a dik loh a party chuan an tih em avanga sawi chhuak a ni tih a sawi.
He Congress Bhavan Golden Hall-a inkhawmah hian MPCC President Pu Lal Thanhawla pawhin thu sawiin Pu Zira hnehna lawmna ni chu Congress tan ni lawmawm tak a ni a ti a, Pathian pek niin a sawi. Pu Hawla chuan MNF sawrkar tihduhdanna hnuaia Congress-te an ngui Pathianin a phal lo a, “Dik lo taka ti thintute avanga an lungngaih a phal bawk lo” a ni tiin Congress-te chu thu dik tana an huaisenna lantir zel turin a fuih a. ‘Thudika inbeihnaah chuan kan zam dawn lo va, kan beihteho hi an tlawm zel dawn avangin kan huaisen tur a ni” a ti.
Nimina Congress Bhavan inkhawm hi Aizawl District Congress Committee buatsaih niin an President Pu Lalrinliana Sailo, MLA chuan a kaihruai a. Pu Zira hi thangchhuah puan leh diar leh pangpar an hlan a, Pu Hawla’n tawlhloh puan a bahtir.
Nawhchizawrh Leh A Kaihhnawih Chungchang Hlawhtling Takin Sawiho
Social Welfare department bultuma Human Rights & Law Network buatsaih ‘Nawhchizawrh Leh A Kaihhnawi’ chungchang sawiho-na chu nimin kha I&PR Conference Hall-ah neih a ni a. He hunah hian Mizoram Chief Secretary Pu Haukhum Hauzel chu Khuallian niin kohhran, tlawmngai pawl, police leh a kaihhnawih department aiawhin mi an tel thahnem hle.
Khuallian Pu Haukhum Hauzel chuan nawhchizawrh chungchang hi sawi nge tha sawi loh tih ringawt-ah pawh ngaihdan a phir theih thu leh mahse Mizo khawtlang nunin harsatna lian tak kan tawh mekte zing ami a nih avangin engtin nge chhanchhuah hna chu kan thawh tak ang tih ngaihtuah a tul a ni, a ti. UNAIDS leh World Health Organisation (WHO) ten 2006 AIDS report an tarchhuah ah chuan Asia khawmualpuiah hian mihring nuai 86 in HIV hrik an pai a, chung zinga nuai 57 te chu India mi an ni a; India rama HIV hrik pai 38% te chu hmeichhia an ni. India rama HIV hrik pai hmun thuma thena hmun hnih te hi state 6-ah an awm khawma hriat a ni a, chung state zingah chuan Manipur leh Nagaland pawh telin, Mizoram ngei pawh a awl rei tawh lo mai thei a ni, a ti bawk.
State dangten nawhchizawrh chungchang an lo buaipui tawh dan sawiin Chief Secretary chuan Manipurah phei chuan chanchinbumite pawl lian ber All Manipur Working Journalists Union (AMWJU) chuan political party zawng zawng te sawmin state conference on HIV/AIDS an huaihawt hial a, ram hruaitute hi mipui nena inhnim hnai ber an ni a, mipuite ngaihdan siamtu pawimawh ber an nih avangin khawtlang nun siamthatna turin hma an lak zual a ngaih thu an auchhuahpui hial thu a tarlang a. India Parliament-in Immoral Trafficking (Prevention) Act, 1956 siamthat a tumna ah chuan, nawhchizuar te hi a tuartu (victims) nihna a pek avanga sorkar leh khawtlangin chhanchhuahna lam tun aia uar leh zuala a kalpui theihna tur a nih hmel a. Dan reng reng hlawhtlinna chu mipuite inpek zawhna leh tih tak takna a innghat a nih avangin sorkar, kohhran, tlawmngai pawl leh mitin te tangrualin hmalam pen turin i thawk zel ang u tiin kalkhawm te a fuih.
Pu Lalbiaktluanga Khiangte pawhin thusawiin nawhchizawrh hi kristian ram kan nih avang ringawtin a bo dawn lova, rethei leh hausa kar a zau zel avang te leh ram hmasawn zelin a ken tel reng a nih avangin a awm ngei a ni tih kan pawm ngam hnuah chuan a siamthat hna kan thawk thei tak tak chauh ang, a ti a. Mizoram State AIDS Control Society (MSACS) survey report ah chuan tun kum 2006 chhung hian Mizoramah nawhchizuar 1100 – 1465 an awm a; Mizoram-ah hian HIV thehdarhna lian ber chu ruihhlo ni lovin mipat hmeichhiatna zawk a ni tih hmuhchhuah a ni bawk, a ti.
Tawnluia A Thusawiah A La Ding Nghet
MNF Vice President leh Home Minister Pu Tawnluia chuan Nov. ni 18-a Edenthar Veng Middle School-a MNF Block inkhawma a thusawi “MNF tum ber cchu kum 2008 inthlannaa tlin a ni” tih chu political party dangin a ni lo zawngin an lo vawvung vak mai a ni tiin MNF-te chuan kum 2008 inthlanpuiah chak ngei “kan tum tur a ni” a ti. Nimin piaha Ramhlun Veng Thara MNF Political Training-ah thu sawiin Pu Tawnluia chuan “Kan CM hova kan hma lakna tipuitling tur hian kum 5 dang, a lehpek kum 5 leh a bak zel kum 5 pawh kan mamawh a ni. Rorelna seata thut loh chuan engmah a tih tak tak theih loh, rorelna seat-a thu tur chuan election-a chak ngei a ngai a ni. Hattrick siam ngei kan tum a, a lehpek zelah pawh chak kan tum a ni. Election-a chak tum lo party chu zui tlak an ni lo. Tunah pawh kum 2008 election kan tinzawn vang a ni” a ti.
He MNF Political Trainingah hian Aizawl North II huam chhunga MNF Block hruaitute leh Unit hrang hrang atangin an tel tam hle niin MNF press release chuan a sawi a. Pu Tawnluia chuan MNF party chu party dangte nena patla khata khai chi an ni lo a, MNF tih chu Mizo hnam hmahruaitu, sulsutu, a hma theha tang zar zar tur tihna a ni a ti a. MNF chu hnam martarte thisenin a bual party a ni a, party dangte nen patla khata khaifin theih a ni lo a, martarte rahbi tukah a kal mek a ni a ti. Nihna leh therhlo avanga MNF-a awm an ni lo tih inhre turin MNF mite chu a chah a, MNF chu ‘kan hnam tan a tha bik a ni’ a ti.
W. Lungdar Branch YMA-in Diamond Jubilee Lawm
W.Lungdar Branch YMA chuan an din cham kum 60-na (Diamond Jubilee) lawmna nihnih awh 4th – 5th December 2006 chhung a neiin nimin khan Chief Minister Pu Zoramthangn a hmanpu.Pu Zoramthanga chuan YMA in khawtlang tana a rawngbawlna te hi ngaiah kan neih deuh thaw hiala a hriat thu sawiin hriatchhuah nawn fo tul a tih thu a sawi a. Ramdangmi ten kan khawtlang nun a inthununna tha tak an hmuh a inthunun leh thurual em em a khawtlang tul hrang hrang te kan ti ho te hi mak an ti a, an awt tak meuh a ni a ti. Mizo te nuna YMA leh Tlawmngai Pawl rawngbawlna hi a hluin kan nihlawh phah em em a ni tiin an ni hi lo awm lo ni ta se kan khawtlang nun a chhe hle a a rin thu a sawi bawk.
Pu Zorama chuan W.Lungdar YMA in kum 60 zet khawtlang leh ram tana rawng a bawl lawmna neih a ni thei chu a lawmawm hle a ni, a ti a. Inthurual leh phur taka kan thawhho hian khawtlang leh ram tan a tangkaiin hmasawnna pawh in a chak phah hle a ni tiin khawtlang leh ram rawngbawlna lama tang sauh sauh turin a chah a ni.Chief Minister chuan Lungdar mipui te hnenah chuan keini Mizo te hun hnuhnunga a chanchintha hril tura Pathianin min buatsaih nia a hriat thu sawiin a rawng kan bawl theihna turin Pathian in tunah hian Mizoram chu malsawmna hunbiah a dah a ni a ti a. Hmasawnna tura bulthut pawh theih anga nasa a kalpui a nih thu leh hmasawnna hrang hrang thleng mek te tarlangin sum leh pai dinhmun chawikang tura theihtawp a hmalak mek a nih thu a sawi bawk a. Hmasawnna chu thil thleng phut nilo, hun duh a nih avanga dawhtheihna nena theihtawpa mahni hna theuha rinawmna leh taimakna nena thawk turin W. Lungdar mipuite chu a chah bawk.
NBCC Building Sak Inhlan Dawn
Thuampui Govt. Middle School hmun lei tlak hniam avang leh school kalna kawng naupang tan a hlauhawm avangin NBCC-in Thuampui Bus Terminal kawngah RCC inchhawng thum pindan pathum theuh nei an saksak chu NBCC chuan Urban Development & Poverty Alleviation UD&PA)-ah an hlan tawh a, NBCC-in UD&PA hnena a hlan tawh hi UD&PA chuan an office-ah vawiin dar 1:00 p.m.-ah School Education department hnenah a hlan veleh dawn.
Vawiin Atangin Thalfavang Kut
Vawiin atang hian Kolasib khawpuiah Thalfavang Kut 2006 a ni dawn a, dar 10:30 a.m.ah Supplies Minister Pu K.Sangthuama’n Tumpui Field-ah a hawng ang a, he kut hian naktip thleng a awh dawn a, naktukah Pu K.Lalrinliana, MLA khual lian, naktip a kharna ni-ah Sports Minister Pu Z.H.Ropuia khual lian a ni ang.
Home Guard Rising Day
Vawiin hi 35th Mizoram Home Guard Rising Day a ni a, an headquarters Chawlhmunah he ni hmanna leh Blood Donation Camp an nei dawn a, dar 10:30 a.m.-ah Home Minister Pu Tawnluia’n a hawng ang.
Mimal Library Hawng Dawn
Vawiin dar 11:00 a.m. hian Zirkhumi Universal Library Chandmari-Ramhlun Road chu School Education Minister Dr.R.Lalthangliana’n a hawng dawn a, Pu L.R.Sailo, Director, I&PR chu khuah zahawm a ni ang.
Dindin No.3 Tlangzarh
Nimin khan tun lai thang tharte zinga thu ziah lama hriat hlawh mek Sena, Bungkawn Veng ziah ‘Dindin No.3’ (Hmel Inthup) detective thawnthubu chu Zalen kartin chanchinbu Editor leh a neitu Pu Vanlalrema Vantawl chuan a tlangzarh. He lehkhabu ngaihnawm tak hi Rs.100 man a ni a, lehkhabu zawrhna dawr hrang hrangah lei theih a ni a, bukhat zela Rs.20 hlawha zuar duh tan Zalen office, Treasury Square-ah ngaihven theih a ni.
Samaritan Society-in Award Dawng
Samaritan Society of Mizoram chu UNAIDS India (United Nations Programme on HIV/AIDS) hnuaia HIV/AIDS dona kawngah ‘Migrants Project’ (pemte chungchang bik)-ah India ram puma thawk tha bik thlan chhuah tlawmngai pawl pathum zingah a tel a, December ni 1, 2006 World AIDS Day khan National Stadium, New Delhi-a inkhawm ropui takah UNAIDS Civil Society Award 2006 hlan a ni a, an President Pu Lalhrima Sailo chuan a dawng. Samaritan Society of Mizoram hi kum 1990-a din a niin tunah
Police-in Mipui Him Nan Ngenna An Siam
Aizawl District Police-te chuan krismas leh kum thar lo thleng tur hlim leh thlamuang taka tumah rilru na insiamsak lova hman a nih theih nan ngenna an siam a, dawrkaite chu kangmei leh rukruk laka him zawk nan an dawr riahchilh theuh tur te, mitinin in nghaktu fel tak nei tur te, sawrkar pisa leh zirna inah zanriak fel tak dah tur te, chetsualna pumpelh nan lirthei neitu leh khalhtute fimkhur tur leh ruih theih thil lakah fihlim tur te, ni dang zawng aia motor khalh hawihhawm tur te, hlim leh lawmna avanga mi dang tana tuarna thlen thei halpuah zuar lo, lei lo leh hal lo tur te, damlo leh hrisel lote thlamuanna ngai pawimawh tur te-in mipui an ngen. Police indaih lohna avangin hmun tinah an duty thei dan lo tih sawiin NGO/VDP leh khawtlang hruaitute chu tlawmngaih chhuaha mahni veng chhuh theuha an duty-naah dan palzut si loa hma la theuh turin an ngen bawk.
Synod Inkhawmpui Thlengtu Bungkawn Kohhran Ruahmanna
Synod Inkhawmpui 2006 Dec.ni 6 atanga ni 10 thleng atan a thlengtu Bungkawn Kohhran Traffic & Security Sub Committee chuan lirtheia Khatla atanga Bungkawn pan turte chu Bungkawn Dam Veng (Vety.office) lamah chauh tlan tur te, Mission Vengthlang/Khatla South atanga Nursery Veng kal tlang turte chu Khatla kawng lama tlan kual tur te, inkhawm tura motora kal reng rengin driver hruai tur te, two wheeler-a inkhawm tur-te chuan Bungkawn Dam Venga park tur te, motor ke pali neia kalte chuan Bungkawn Dam Veng, Tuikhur Veng, Venglai, Nikang leh CID Complex-a park tur te,.Maubawk/Lawipui atanga motora Bungkawn paltlang turte chuan Bungkawn Tuikhur veng lama tlan turin an ngen.
