Judiciary – ah Sawrkar Leh High Court Inrem : Dec. 15 Hmain Gazette-ah Chhuah Beisei
Aizawl, Dec 08 : Mizoram sawrkar leh Guwahati High Court chu Mizoram Judicial Service Rules chungchangah an inberem ta a, December ni 15 hmain he Rules hi hman turin Mizoram Gazette-ah a chhuah hman beisei a ni. Kar kal ta tawp lam khan Chief Minister Pu Zoramthanga leh Law Minister Pu H.Rammawi chu Mizoram sawrkar Official thenkhatte nen Guwahati-ah Chief Justice B.Sudershan Reddy hmu turin hmanhmawh takin an kal a, Dec. ni 1 zingah khan CJ chuan tukthuan a chenna bungalow-ah lo buatsaihin Judge dangte nen Mizoram Judicial Service Rules chungchanga an inbahnate hmaichhanah an sawiho. Kan thu dawnin a sawi danin Guwahati High Court hian MJS Rules 2002 an kar a, Mizoram sawrkar hotute hian MJS Rules 2006 an kar thung a, an inbahna laite chu an siamrem thei ta a ni. He MJS Rules hi High Court Full Sitting chuan a pawmpui a ngai a, chumi hnuah hman turin Mizoram Gazette-ah chhuah a ngai a ni. Guwahati High Court CJ leh Judge dangte chuan Mizorama Judiciary tihpuitlin chungchangah inpuhmawhna siam tawh loh ni se an ti a, Mizoram sawrkarin High Court an puhnate chu an lo hre ve vek a ni.
He chanchinbua kan rawn ziah tawh thin ang khan Mizoram sawrkar (executive) atanga court rorelna (judiciary) a hranga dah chungchangah hian Supreme Court chuan a hranga dah turin thupek eng emawzat a lo siam tawh a. Mizoram sawrkar chuan judiciary dah hranna tur hian ni 16.6.2005 khan thupek a lo siam tawh a, a chhan sawrkarin a sawi dan chuan MJS officer-te chu enkawltu nei lova an awm vangin he thupek hi Nov.ni 10, 2006 khan a chawlhtir (keep in abeyance) leh ta a ni.
Mizoram sawrkarin Judiciary dah hranna thupek a chawlhtirah hian thu leh hla a tam a, sawi dan hrang hrang a awm a. Thu tun lai berah chuan ni ni 20.7.2007 khan Supreme Court chuan kumin court puja chawlh hma ngeia Mizorama judiciary dah hranna hi tipuitling turin thupek a siam leh a, mawhphurhna chu Guwahati High Court Chief Justice hnenah a pe a, hemi chungchangah hian Guwahati High Court Chief Justice chuan ni 26.7.2006 khan Mizoram Chief Minister hnenah Supreme Court-in hun a pek chhung ngeia la tih hmabakte tih a nih theih nan Mizorama judiciary dah hranna chungchang dinhmun hrilh turin lehkha a thawn a, inhmuhna hun tur rawt turin a ngen bawk a.
Mizorama judiciary dah hran chungchang hi tun Nov. ni 21 khan Supreme Court chuan a ngaihtuah leh ta a. Hetah hian a chunga Guwahati High Court CJ lehkha hi Mizoram Chief Minister-in a chhan loh thu sawi chhuah a niin CJ lehkha hi phawrh chhuah a ni a. Mizoram sawrkar aiawha ukil chuan CJ lehkha chu CM-in a chhan ngei tur a tiam ta a ni. CJ lehkha chhanna atan hian Mizoram sawrkar ukil chuan chawlhkar ruk a dil a, mahse, Supreme Court chuan a hnawlsak a; thupek a siam ta a : The Chief Minister, if not already responded, shall respond to the letter of the Chief Justice dated 26.7.2006 and without any further delay separation will be carried out by issueing necessary notifications including the Rules. The Court also directed the State as well as the High Court to file the compliance Affidavit on nor before 15th December 2006†tiin. Hetianga Supreme Court-in thupek a siam avang hian Mizoram sawrkar ukil (Supreme court ami) chuan Mizoram sawrkar chu rang taka tan la turin a rawn hrilh a ni.
Hetiang a nih lai hian Mizoram sawrkar chuan judiciary a dah hranna thupek chu a lo chawlhtir leh bawk si a, kar kal taa Chief Minister Champhai pawh hahchawl hman hauh lovin Guwahati lamah a phe thla ta a. MJS Rules chungchangah chuan High Court nen chuan inremna an nei thei ta a ni.
Hemi chungchang Mizoram sawrkara official pakhat Mizo Aw-in a zawhna chu Official chuan a chunga saptawnga ziak hi judiciary dah hran Dec. ni 15 hmaa tipuitling tura tihna ni lovin he ni hmaa Mizoram sawrkarin judiciary dah hrang tura tan a lak dan zawhna (report tura tihna) mai a ni a ti a. Chief Minister leh Guwahati High Court CJ chuan inbiakna an nei tawh a, MJS Rules chungchangah inremna neih a ni tawh bawk a, chuvangin December ni 15 hmaa Supreme Court hnena report (compliance affidavit) thehluh tur chu Mizoram sawrkar chuan a nei hrim hrim tawh a ni a ti.
Mizoram Bar Association-in MJS Rules chungchangah Mizoram sawrkarin High Court chu Mizoram sawrkar thawhpui lova an puh laiin Mizoram sawrkar pawhin Mizoram Civil Courts Act 2005 a tipuitling bik lo an tih chungchangah Mizoram sawrkar official chuan hei hi chu Mizoram sawrkar tihpuitlin tur a ni lova, High Court tihpuitlin tur a ni a ti.
Mizorama Nawhchizuar Punna Chhan Mi Rethei leh Mi Hausa Inkar Zauh Vang
Mizoram Congress (MPCC) chuan MNF sawrkar Pu Zoramthanga Chief Minister kaihhruai hnuaiah mi rethei leh mi hausate inkar a zau zelin Mizoram mipuite tawrhna a nasa tih an sawi a, hei hi Dec. ni 5-a Social Welfare Department leh Human Rights & Law Network-in I&PR Conference Hall-a Mizorama Nawhchizawrh leh a kaihhnawih chungchang sawihona an buatsaiha Mizoramah nawrchizuar 1500 vel lai mai awm tawha puan a ni khan a tichiang a ni an ti. Kha seminarah khan Mizorama nawhchizuar an lo tam tak chhante zingah rethei leh hausa kar a zau zel vang tih au chhuahpui a ni an ti a, lung a tichhe tak zet a ni an ti.
MPCC Media deparment chuan press relase chhuahin Chief Minister-in beng muka liam zawih zawih sum hailut chur chur anga a insawi laia Mizoram hotu thil hrechiang berten hetianga thu an sawi a ngai leh si a ni an ti a, lungchhiatthlak takzet an tih thu an sawi. MNF sawrkarna hun chhung hi mi hausate hausak zualna hun, retheite retheih lehzualna hun mai a lo ni an tih here nawn leh turin mipui an ngen a, an tana chhanchhuahna kawl eng mek MPCC lo let hun chu beiseina nen lo thlir fan fan turin an chah.
Mara Autonomous District Council Engtinnge
Nakkum January ni 8-ah hian Mara Autonomous District Council MNF sawrkar chu fiah turin Mizoram Governor chuan thu a pe a. Governor kal ta (Mizoram sawrkar)-in dan kalha nominated member-te ruat a, MNF sawrkar a siamtir chuan member tam zawk thlawptu a nei em tih Council chhuatah fiah a ni dawn ta a ni. He Council tana inthlan hnuhnung berah khan MNF chuan seat 10, MDF-in seat 7, Congress-in seat 4 leh independent-in seat 1 an chang a, MDF, Congress leh Independent member 12 chuan Independent member Pu N.Viakhu chu Chief Executive Member-ah dahin he Council hi an kalpui a. Hun eng emawti hnuah Independent member CEM ni bawk chu MNF lamah a peng ta a, tichuan member 11 ve vein an inthen ta a. Hetiang a nih lai hian Mara Autonomous District Council Constitution and Conduct of Business Rules 2003 No.22 section 2 kalhin Mizoram sawrkar chuan CEM-ah Pu N.Viakhu dahin MNF a sawrkartir a, nominated member ruatin chu sawrkar chu a tingelnghet ta a ni.
Mizoram Governor thar kumin July thlaa a hna zawm Lt.Ge.M.M. Lakhera chuan MNF sawrkar chu house-ah member tam zawk a neih leh neih loh fian turin a ti a, nominated member 4 dan kalha ruatte chuan vote an neih theih dawn loh avang leh Chairman Pu Lalmalsawma Zasai chu he Council sawrkar fiahna huaihawttu tur a nih bawk avangin MNF sawrkar chuan majority a nei zo dawnin a lang lo a. Hetiang karah hian Chairman leh Deputy Chairman chu an bang dawn nia thu dawn a ni a. Tunge Council sawrkar fiahna inkhawm chu hruai ta ang ? Council sawrkar fiahna inkhawm pawh chu neih theih a ni lo mai thei a, theih pawh lo ni se, vote lakna lo awm ta se, MNF thlawp lam chu 11, a lehlamah MDF leh Congress 11 an ni dawn a. A khawlh zo dawn ta a, Council chu thiat a, inthlan thatna an neih mai a ngai dawn a ang khawp mai.
Chief Minister Delhi-ah
Chief Minister Pu Zoramthanga chuan nimin khan New Delhi a pan a, naktuka National Development Council inkhawmah a tel ang a, zan lamah National Integretion Council inkhawmah a tel leh ang. CM hian Delhi a cham chhungin Mizoram mamawh hrang hrang buaipuiin sawrkar laipui hotute a dawr ang. Nimina Delhi pana a thlawh chhuah hmain Lengpui Airport tana tui lak dan tur PHE department hotute nen an en.
Lucky Ticket Vawiinah Vawr
Chief Minister’s Office Staff Welfare Committee-in CM Relief Fund tuak nana Lucky Ticket an buatsaih chu vawiin dar 3:00 p.m.-ah CM Office-ah an vawr dawn a, concert nena Vana Pa Halla vawr tura lo ruahman chu rokhawlhna avangin CM Office-ah sawn a ni a, ticket leitute hriat thiamna an ngen.
Ph.D. Hmu Thar
Pi Laltanpuii Ralte, Mizoram University Public Administration department ami chu Mizoram University chuan doctor of phylosophy nihna (Ph.D) a pe a, a thuziak thupui chu ‘Agriculture Development Administration in Mizoram’ a ni.
MHIP-in Jenny Lawmpui
MHIP Gen.Hqrs. chuan nimin chhun khan an pisaah Boxer Jenny R.Lalremliani 4th.World Women Boxing Champion a nih lawmpuina an pisaah thingpui inhona an nei a, lawmpuina certificate mawi tak an hlan.
MAASA Annual Conference
Mizoram Audit & Account Service Association chuan Holiday Palace, Sihhmui-ah vawiin hian Annual Conference an nei dawn a, member zawng zawngte dar 9:30 a.m.-ah Directorate of Accounts & Treasuries Office kawtah kim vek tur a ni an ti. Sawrkarin Special Casual Leave a pe a ni. MAASA hian Dec.ni 5 khan kum 2007 chhunga an hruaitu turte an inthlang a, President Pu A.H.Lalbiaktluanga, Vice President Pi Lalbiakchhawni, Secretary Pu Thara Lungtau, Asstt.Secretary Pu Lalchhanhima Zote, Treasurer Pi Lalremtluangi, Fin.Secretary Pu C.Vanlalsiama, Secretary i/c Information & Publicity Pu Lalchhuanawma Hrahsel an ni.
Power Supply Mumal Lo
Tun laiin Aizawl khawpuiah electric supply a mumal lo a, load shedding an ti thin. Sawi lawk awm lova current tihtawp thut thut a tam a, current hmanga hnathawkte tan a buaithlak thei hle. Electric bill erawh a tlem phah chuang lo.
Human Rights Day
Human Rights Day Dec.ni 10 chu Pathianni a nih avangin Dec.ni 11 thawhtanni dar 11:30 a.m.-ah Chhinlung Israel People’s Convention (CIPC) chuan an General Headquarters Aizawlah an hmang dawn a, UN Secretary General Kifi Annan thuchah chhiarchhuah a ni ang.
AMGUA-in Hma La Dawn
All Mizo Graduate Unemployed Association chuan Mizorama mau mahalder-te chu Mizo eizawnna (firm) hming vek, vaiho contract-na hnuaia awm ngei niin an hria a, ram leilung faten chanvo leh hlawkna mumal an tel lo a ni an ti. Hemi chungchangah a tul anga hma lak tan leh a tul chen chen kal an tum tih an sawi a, mau mahal chungchanga Mizoram Syndicate Union hma lakna tha an tih leh thlawp thu an sawi.
Awmlai
¨ Pu John Paul, 59 Circuit House-a Assistant Liaison Officer chu nimin dar 10:50 khan zunthlum leh lung nain a boral a, vawiin chhun dar 12:00-ah vuina inkhawm neiin a zawhah Khatla thlanmualah vui liam a ni ang. Pu John Paul hian a thiannu Pi Thachhungi leh a fate 4 leh tu 1 a kalsan.
¨ Pu Lalpuiliana Sailo, 74, Mizo zinga Bachelor of Law pass hmasa pathumna nia hriat chu nimin piah tlai dar 5:00 vel khan chuap cancer vangin a boral a, nimin khan Ramthar Veng thlanmualah vui liam a ni. Pu Lalpuiliana, Republic HS School zirtirtu atanga kum 1995-a pension hian a thiannu Pi Lalliannguri, fa 7 leh tu 11 a kalsan a, Mizorama pa lar tak thin a ni.
