Baffacos Hman Dik Loh Centre-in Hre Tawh : Cong-in Retheite Chhanchhuah Beihpui Thlak Dawn
Aizawl Jan.10 : Mizoram Congress (MPCC) President Pu Lal Thanhawla chuan mautam avanga tuar tur mi retheite hminga sawrkar laipui atanga sum dil chhuahte Mizoram sawrkarin a hman dik loh dan chu a petu sawrkar laipui chuan an hre tawh a ni a ti. Nimina kum thar hnua Congress Bhavan hawnna inkhawm MPCC Treasurer Pu R.Lalzirliana kaihhruaiah thu sawiin Pu Lal Thanhawla chuan MNF chu mautam hmasa atanga Zoram tichhe tura lo ding chhuak a ni tiin tun mautam leh dawnah hian Zoram an tichhe leh mek a ni a ti a. MNF sawrkar hnuaiah mi retheite an rum tak avangin kum tharah hian Congress chuan hnam chhanchhuahna beihpui leh Corruption dopui kum a thlak dawn a ni a ti. Hetianga retheite chhanchhuah beihpui leh corruption dopui kum an thlaknaah hian Congress mipuite chuan an nun siamthat tura Pathian hnena an pek chuan Pathian chuan a hmang dawn a ni a ti a. Thinlung leh tihtakzeta inpekna leh thil phalna thuk zawk nen Lalpa tanpuina dil turin Congress mipuite a fuih. Pu Hawla chuan mipuiten anmahni chhantu tlaka Congress chu an hmuh a pawimawh a ni a ti a. Mi retheite chhanchhuahna leh corruption dona kawngah hian an huat vang ni lovin MNF sawrkar chu paihthlak a ngai a ni tiin Congress chuan ram leh mipui tan tangkai takin eptu hna an thawk a, chutianga mi retheite chhanchhuahna hna an thawhna kawngah chuan sawrkarna chu Congress chuan an chhar mai zawk dawn a ni a ti. Hetianga thawhpui atan hian Congress chhuahsan tawhte, political party hrang hrang amite MPCC President chuan a sawm.
Congress-in MNF an lo tanpui tawh dante sawiin Pu Hawla chuan Pu Laldenga chu Mizo pakhat mahin an ngam loh laiin Congress mipui tirhin Pu Sainghaka (L) nen a lungin tang an bail chhuak a, tuna Chief Minister ngei hian ram hnuai atanga an lo chhuah dawnin cheng nuairuk a dil chu engtintin emaw Congress chuan an pe a ni a ti. Heng avangte hian MNF sawrkar chu Congress-te laka inluling a, Congress-te chu raphrual mai tur an ni lo a ti.
Pu Hawla chuan Mizorama rethei leh hausate inkar lo zauna chhan leh retheite retheihna a zual zelna chhan chu kut tling lova sum lakluh a tam vang a ni a ti a. Corruption tamzia sawiin SSA lampum chu Sum Siamna Awlsam a ni a ti a. Mizoram chu CBI luh theih lohna state awm chhun a niin corruption a tam tih an hriat avangin CBI chuan lo luh an duh a, nikum hmasa lamah khan an Director leh Joint Director-te lokalin Chief Minister an rawn be tawh a, an haw hnuah pawh Silchara CBI SP chu a khat tawka Mizoram sawrkar dawr turin an ti a, mahse, vawiin thlengin Mizoram sawrkar chuan CBI lo luh chu a la phalsak lo a ni a ti.
Pu Hawla chuan eirua puh chungchang sawiin an duh changa thubuai a nei alawm tih nan MNF sawrkar chuan amah an puhna chu kal chakpui duh loah a puh a, MNF sawrkar chuan an thuhnuaia an dahleh tak magistrate hote chu thu pe se, a eirukna an hmuh chuan amah chu tantir se rawh se a ti.
MPCC President chuan MNF sawrkarin an hruaitu Pu R.Lalzirliana, MLA an khinna Pu Zira’n a hnehna chu Pu Zira kaltlanga kum 2006 tawp lama Congress-in Pathian malsawmna a dawn a ni a ti a, kum tharah MNF sawrkarin Mara District Council dik lo taka an sawp thin chungchangah hnehna changin Congress chuan bul an tan a ni a ti.
Pathian thuchah sawitu Rev.Dr.Vanlalchhuanawma, Vice Principal, Aizawl Theological College chuan Pathian thuchah sawiin Ephesi 5:12 leh Rome 12 a chhiar a, Congress hruaitu leh mipuite chu Pathian duhzawng leh lawmtlak ni tura an awm dana fimkhur tur leh Lalpa tih a, a thupek vawng turin a chah. Congress-in beihpui an thlak tur chu Synod pawhin retheite leh pachhiate chhanchhuah hi a vei a ni a ti. Mizoramin a mamawh chu Pathian ram dintu tur politician a ni a, politics hi Pathian thu nen a inkalh lova, a inrem thlap zawk a, a hmang dik loten an tibawrhbang mai zawk a ni a ti. Sawithiam aiin a tiha tithiam Mizoramin a mamawh a, kum 2007 mautam kumahj hian sazu aiin a eirutu an tam zawk em tih ngaihtuah a tul a ni a ti. Mahni party thatna tan chauha thawktute chu bang ngam se Zoram chuan a thatpui zawk ngei ang a ti.
IR Battalion Sawrkarin Ngaihven Zui
Home Minister Pu Tawnluia chuan Chhatisgarh-a awm ta Mizoram 2nd IR Battalion chu Mizoram sawrkar chuan a ngaihsak zui zel tih sawiin kum thar dawn leh kum thar ni khan an awmna an tlawh thu a sawi a, Raipur atanga thlawhnaa kalin thlawhna tum theihna hla ber atanga kilometre 120 vel Anhhra Pradesh leh Orissa nena inrina bul velah company 7-ah inthendarhin an awm a, an hmunpui ber Sukma an tlawh a ni. Nimin khan a pisaaah chanchinbumite thingpui inpuiin Pu Tawnluia chuan heng 2nd.IR Battalion-te Mizoram sawrkarin a ngaihven tih an hriat hian anni pawh an lo lawmin Chhatisgarh sawrkar pawhin tha takin a enkawl a ni a ti a. Tunah hian jail hmun hluiah puan inah an la awmin an awmna tur sakna tur hi pawisa Chhatisgarh sawrkar chuan a nei a, mahse, an awmna hmun a raltir deuh avangin contractor an la hmu remchang lo a ni a ti. Heng lai velah hian malaria a tam hle a, civil mite pawhin an vei tho a, IR battalion zinga mi 70-in an vei mek a ni a ti bawk. Mizorama IT battalion zinga pathum chu natna avangin an thi tawh.
Home Minister chuan Mizoram atanga IR battalion-te hian an dawn zawng zawng pawisaa chantirin Mizorama an awma an dawn aia a leta tam an dawng a ni a ti a, IV grade helaia Rs.4500 hu dawng khan Rs.9200 hu an dawng a, Rs.5600 hu dawng khan Rs.10500 hu an dawng a ni a ti a. Home Ministry thu angin hengte hi an awmna state pek tur a ni a, Chhatisgarh sawrkar hnen atangin Mizoramin a lo pek tawhte chu hmuhlet (reimburse) a ni dawn a, hengte hi Chhatisgarh sawrkarin an pek duh loh chuan Mizoram sawrkar chuan a pe tho ang a ti. Chhatisgarh sawrkar chuan hel kuta police-te chu tanpuina cheng nuai 10 a pe a ni a ti bawk.
IR Battalion-te chuan Chhatisgarh an thlen tirhin Induction Training thlakhat chhung an nei a, chumi hnuah chuan thlahnih vel chauh an la awm a, thlaruk an awm hnuah 10% zel chu chawlh lain an inkal chhawk dawn a, pastor (chaplain) mamawh an intih pawh Mizoram sawrkar chuan a ngaihtuahsak dawn a ni. IR Battalion zinga bomb khawih puak palh vanga kut veilam hliam Lalthanzama, Darlawn (Ex-MNA) chu damdawi inah Home Minister leh a kalpuiten an tlawh a, Pu Vanlalzawma, MP, AIG Pu Zorammawia leh a PS Pu Rosanglura ten an tawiawm a ni. Mizoram atanga IB Battalion te hian an thawh ber chu helte laka kawngpui thenfai a ni.
Mautam Tam Ven Nan Pangang Vulh La Tlai Lo
Sericulture Minister Pu K.Sangthuama chuan tunah hian chhungkaw sang chuangin eizawn nan an hmang mek a ni tiin Mizoram-in mautam a hma chhawn mekah pangang vulha eizawnna atan hun a la tlai lo a ti. Nimina Sericulture Directorate Conference Hall-a he department hna thawkten kum thar atana inhlanna programme an hman chu hmanpuiin kum tharah rilru thar pua kum kal ta lama an tihsual leh mi rilru an tihnat palh a awm pawha theihnghilh a, ngaihdamna nen thawk turin a fuih a. Sericulture department chu mi retheite thleng phak hnathawktu a nih hrereng turin a chah. Minister chuan Sericulture department kaltlangin chhungkaw sing chuang tan eizawnna kawng dap mek a ni a ti a, hnathawktute chu an thawhhonaah lungrualna, taimakna leh Pathian tih a tul thu thahnem ngai takin a chah bawk.
He Sericulture department-a thawkte kum thar atana inhlanna inkhawmah hian hnathawktute an kal tha hle a, Director Pu Rosanga Colney chuan inkhawm a kaihruai a, Pu D.Enga, Dy.Director, Pi Thangzuali, Under Secretary leh mi dangten kum thar thuchah an sawi.
Pu Rosanga Colney chuan a department chuan ACP scheme angin hnathawktu LDC 9, Demonstrator 22 leh Rearer 38 pay scale chinfel a ni tawh a ni a ti a, India hmar chhaka a hmasa ber atan pangang vulhtute chawikan nan Khawvang khua tan ram acre 100 ruahmanin Central Silk Board chuan Cluster Development Centre a buatsaih mek a ni a ti a. A department chuan cacoon lei nan ruahmanna fel tak a siam a ni a ti.
Deptt. Lute Kokhawm Dawn
Chanchinbumite harsatna leh mamawhte, a bikin advertisement chungchangah Information & Public Relations Ministers Dr.R.Lalthangliana chuan Mizoram sawrkar department hrang hrang luberte inkhawm a ko thuai dawn a, chutah chuan MJA aiawhte pawh an tel ve ang. Nimin khan Dr.R.Lalthangliana chuan ama pisaah chanchinmite kum thar thingpui inpuiin chanchinbumite atangin harsatna an tawhte a ngaithla a, I&PR Secretary Pu TBC Rozara, I&PR Director Pu L.R.Sailo leh Deputy Director General, All India Radio Pu C.Lalrosanga, Station Director, DDK ni bawk leh Pu Lalthansanga, Station Director, All India Radio ten Minister hi an tawiawm. MJA President Pu K.Sapdanga, Gen.Secretary Pu Zonunsanga Khiangte, Pute C.Vulluaia, Pu D.R.Zirliana, Pu Robert Lalchhuana, Pu A.Zotinkhuma, Pu T.Lalhmachhuana, Pu Remsiama ten chanchinbute harsatna hrang hrang an sawite chu Minister hian ngaithlaa chhinchhiahin department lute a sawipui dawn a ni.
Nitin Inhlawhfa Hlawh Pung Dawn
Mizoram sawrkar ruat State Level Committee on Minimum Wages chuan a thuphungin nitin inhlawhfate hlawh (minimum wage) tihpun tha an ti a, ngun leh zuala Labour & Employment department-in lo zir chiang a, Finance leh Planning department-te pawhin sawrkarin pawisa a neih theih dante an chhut hnuah inkhawm leh hunah thutlukna siam ni se an ti a. Inkhawmna chu neih leh thuai ni se an ti. Nimin khan he Committee hi a hovin Pu TBC Rozara, Commissioner, Labour & Employment pisaah an inkhawm a, thil man sang chho zel avang leh Minimum Wages Act-in a phut angin minimum wages an ennawn a, thil man san dan chhutin minimum wages hi tihpun tha an titlang a ni.
He inkhawmah hian Labour & Employment Director, Deputy Secretary, Finance leh Planning department, PWD, PHE leh P&E Department aiawhte an tel a, Trade Union atangin NTUM Presidfent leh Labour Union President an tel bawk.
Mipui Pawl Thar Ding
Mipui mimir dinhmun chhiat luat vang ni maw, sawrkara vuivai pawl an ding deuh reng mai dawn niin a lang. Mizoram kalphung tha lo chi hrang hrang leh siamthat ngai siamthat tum pawl thar ‘Mipui Pawl (MPP)’ a ding leh ta a, January ni 13-ah Aizawl Press Club-ah chanchinmite an kawm dawn.
R. Vanlawma Vullai Nite
Vawiin hi Pu R.Vanlawma (L) kum 92-na a ni a, a faten vawiin dar 1:00-ah hian Synod Conference Centre-ah “R.Vanlawma Vullai Nite’ thlirkirna hun an buatsaih a, chawhlui an buatsaih bawk.
MLA Guwahati-ah
Cain & Bamboo Technology Centre (CBTC) inkhawm naktuka Guwahati-a awm tur hmang turin Pu D.Thangliana, MLA, MIFCO Chairman chuan nimin khan Aizawl a chhuahsan a, inrinni-ah a lokir leh ang.
Thusawi Dawn
MPC leh ZNP chuan kum 2007 kum thara an piasa hawnna vawiin hian dar 11:00 a.m.-ah an nei dawn a, MPC office hawnnaah hian Brig.T.Sailo, Pu K.L.Lianchia leh Pu C.Lalsawivunga-ten thu an sawi ang a, ZNP office hawnna inkhawm chu Vice President Pu C.Vulluaia’n kaihruaiin Pu Lalduhoma’n thu a sawi ang.
Zoram Sangliana Kolkata-ah
MPCC General Secretary leh Ex-Minister Pu P.C.Zoram Sangliana chu naktuk hian Kolkata B.M.Birla Heart Institute-a in-ckeck-up turin a kal dawn. Pu Ramsanga hian Dec. ni 20 khan heart attack na tak a nei thut a, a thi thelh a, January ni 2 khan Aizawl Civil Hospital atangin a chhuak a ni.
PAMRA-in Sawiawm Tak Sawi
MNF hluiho leh MNF sawrkar thlawp tlattu PAMRA-ho chuan an sawi awm tak an sawi a, nimin khan press release chhuahin “Tun hnaiah Mizoram sawrkar chuan mi rubotu helte hnenah an rukbote tlan nan pawisa a pe tih thawm a lian leh ta hle mai” tiin Mizoram sawrkarin helhote hnenah an mi rukbote tlan nan sum a pek an rin theih loh thu an sawi a. A chhan chu, Mizoram sawrkar hian rukbote tlan nan helte hnenah sum pe thin ni se, helhote dinhmun an thlirin vawiin thleng hian inrukbona a hluar hle tur a ni an ti a, helhote hian an tum ram an hlawhtlin loh avangin mi rukbo pawh an sim phah ta a ni an ti.
MCS Officerte Delhi-ah Training
Mizoram Civil Service (MCS) Junior Grade Officers 17 chu January ni 15 atanga tan tur ni 45 chhung awh ‘In-Service Training’nei tura thlan an ni a, he training hi Indian Institute of Public Administration, New Delhi-a neih tur a niin India sawrkar Department of Personnel & Training bul tum a ni. Heng MCS Officer-te hi Lalfela Sailo, David Liansanglura Pachuau, K.Zakhuma, F.Laldingpuia, R/Rohnuna, Alexander V.Chawngthu, Angela Zothanpuii, H.Dolianbuaia, Rita Lalnunmawii Pachuau, H.Lalhmingthanga, Lalnunhlua, Laltanpuia Hnamte, Liansangzuala Chhakchhuak, Chuauhnuna, Donny Lalruatsanga, Pachhunga leh Lalthangkhuma Gangte an ni.
Lunglei R-Day Programme
Nimin khan Lunglei DC Office-ah DC Pu C.Thanchhuma hovin kumin Republic Day hman dan tur an rel a, khual lianah Chief Minister emaw a aiawh emaw sawm ni se an ti. LDSC Ground No.1-ah dar 10:00 a.m.-ah hnam puanzar pawhpharh leh VIP thusawina inkhawm neih a ni ang a, Republic Day Volleyball final mipa leh hmeichhiain an khel ang a, chawhnu dar 1:00-ah DC bungalow compound-ah ‘At Home’ sawmbikte tan neih a ni dawn a ni.
Silchar Thlai Hlauhawm Lo
Silchar atanga thlai lakluh parbawr, zikhlum, alu leh thlai dangte chu an dam lo anga sawi leh a chawmna atana lei tihthat hman leh a sawngbawl dan dik loh avanga a eite an dam lo thin anga chanchinbu thenkhata thu chhuak chungchangah Cachar DC chuan he thil hi enfiah a nih thu leh hetiang thu hi thu dik lo leh belhchian dawl lo a ni tih Aizawl DC a rawn hrilh. (AIR Aizawl).
Fanu Hralh Dawn
Pu Rin Singa, IAS (retd.) chuan a fanu a hralh dawn a; a fanu Lalpeki leh Atiar Singh Dey chu January ni 23 dar 2:00 p.m.-ah Shillongah an innei dawn
