mi(sual).com

MSU Versus MSIC : MSU-in CM Hnen An Thlen Dawn
Aizawl, Jan 22 : India ram puma hman tur Right to Information Act 2005, hemi kum October ni 12 hmaa tihpuitlin tura sawrkar laipuiin a tih Mizoram sawrkarin tla 10 hnu vela a tihpuitlin, chumi hnu thla 6 vela Mizoram State Information Commssion-in thil a ti dik lo nia an hriat Mizo Students Union (MSU) ten kar kal taa Aizawl Press Club-a press conference neia an sawi leh State Information Commssion chhanna chu mipui bengah a riring hle a. Inrinnia Evening Post chanchinbu chuan hemi chungchangah hian phek hma thupuiah ‘Hmalak Dik Lo Nia Sawi Thuah MSU leh SCIC Hotute an Inrem” a ti a, “MSU hruaitute chuan thil awm dan engkim hrilhfiah an nih hnuah an thil lo tih tawhte chu Information Commisssion hotute thil awm dan zawtfiah hmasa lo a ti an nih avangin, sut leh a, tihdikna siam leh an remtih avangin tluang takin an inthen ta a ni” tiin a report a. Hetih lai hian nimin khan Pathianni (sunday) chanchinbu chhuak awm chhun Zalen chuan phek hmaah “MSU Tlanchhiat Tum Lo, CM-ah an zualko dawn” a rawn ti veleh ta a ni.
Evening Post hian MSU General Secretary thusawi “Hna lak chungchangah hian Chief Information Commissioner vuavangte an awm avangin an ngaih a tha thei lo a ni” a ti a.

Hetiang hi hil awm dan a nih laiin kar kal taa MSU press conference-a chuan chanchinbumite ngawl taka an zawhna chhangin MSU hotute chuan MSIC-in an hnathawktute an lak tawh leh an hotute inlaichin dan chu hetiang hi niin an sawi.
John L.C.Chhangte, Zonuam, UDC, Rs.5,000 hlawh chu Mizoram State Chief Information Commissionr (MSCIC) fanu fa, Lalduhawma, UDC.Aizawl Venglai chu MSIC-a Sr.PPS R.Vanlalduha fapa, Vanlalthlana, LDC, (Rs.4,000 hlawh) Ramhlun North chu MSIC-a Stenographer Grade I Pi Rintluangi fapa, Gracy Lalsangzuali. LDC chu College Veng chu MSCIC hnai vai, B.Zothansangi, LDC, Zonuam chu MSCIC tunu, Lalhmingliana, driver, (hlawh Rs.3,050) chu MSCIC hnaivai, H.Ramdinthara, driver chu MSCIC hnai vai, P.C. Zohmingliana, Despatch driver chu office ruat,Rs.2,650 hlawh Peon Laltanpuia chu PS to Secretary (MSIC) fapa, Lalremruata, (MSIC-a Assistant Pi Thanchhingi fapa), Remruatsaka, PPS to MSCIC candidate, John Lalnunzira, MSCIC tupa, K.L.Biakthuama, MSCIC unaupa fapa, Lalhruaitluanga, MSCIC unaupa tupa an ni an ti.
Kar kal ta MSU ten Aizawl Press Cub-a chanchinmite an kawmnaah hian Mizoram State Information Commissin kal dan dik lo nia an hriatte hi Mizoram sawrkar (Chief Minister) hnenah an thlen ang a, an beisei anga siamthat a nih loh chuan an thiam dan ang anga tan an lak zel tur thu an sawi.

Sonapur Kawng Sumo Chesualah Mi 7 Thi, Mi Dang 7 Hliam
Shillong kawng Silchar lam atanga Meghalaya Sonapur thlen hmaa inrinni zana sumo chesualah mi 7 an thi a, mi dang 7 an hliam. He sumo Dholai mi ta hi inrinni chawhnu lama Vairengte atanga chhuak, Guwahtia pan a ni a, inrinni zan (Pathianni zing lam) dar 1:30 a.m. velah Sonapur lei thlen hma, mandir atanga kilometre khat velah chesualin kawng thlangah a tlan liam a, feet 300 atanga 400 chuang a lum. He sumo-ah hian mi 14 an chuang niin a lang a, an zinga 7 an thi a, a dang 7 an hliam. Heng thi leh hliamte hi Silchar leh Shillong Liason Officer te, Mizo Welfare Committee te leh mi tlawmngaiten an buaipui a. Hriat dik loh palh pawh a awm mai thei a, thite hi Vanlalpeka (Vunga tia koh), Kolasib Tumpui veng, T.Vanlalliana, Kolasib Venglai, Michael Lalrinliana, Kolasib Bawktlang, Lalduhawma, Bilkhawthlir, Niky Lalchhandama, Armed Veng, G.Lalnunthara, Lengpui Airport leh driver Asaf Hussain, Bagha Bazar, Silchar an ni.
Hliamte hi Lallawmkima, Vairengte, Lalhnehzela, Vairengte, Lalhriatzela, Lunglei Luangmual, Lalnunthara, Kolasib Dinthar, Henry Lalnunpuia, Aizawl Ramthar leh vai pahnih an ni. Thite ruang hi nimin khan Khleiriat damdawi inah post mortem an ni a, an khua theuh panpui tum a ni. Hliamte zinga Lallawmkima chu Vairengte thlenpui tawh a ni a, a dangte hi Silchar Medical College Hospital-ah dah an ni.
He sumo-a chuang tam ber hi Assam Regiment Rhino company-a security agent-a thawk tura, training turte an ni.

Lehkhathiam Rualin Congress An Zawm : Congress-in Rintlak Hruaitu A Nei An Ti
Kar kal ta zirtawpni khan Mizoram Congress (MPCC)-a lut mi 11, an zinga 7 chu B.A. chung lamte chu Congress Bhavan-a inkhawmah MPCC Senior Vice President Pu R.Lalzirliana’n a lawmlut. Zirtawpni apianga an neih thin political session Pu H.Liansailova, Treasurer, MPCC kaihhruaiah thu sawiin Pu Zira chuan Congress chu mite tana belhfakawm a nihzia hmu thiama thalai lehkhathiam rualte chuan zawm thar nia sawiin lawmawm a tih thu a sawi a. Congress-in Pathian malsawmna a tak taka a dawn a ni tiin ropui a tih thu a sawi.
Pu Zira chuan Pathianin Mizoram leh hnam tan malsawmna thlentir lehna hmanruaa hmang leh turin Congress chu a buatsaih chho zel mek nia sawiin chutianga Pathian leh mipu zara an sawrkar leh hunah chuan thalaite hmakhua ngaih pawimawh a ni dawn a ni a ti a. Mi rethei, kut hnathawktute, hmeithai leh fahrah chanhaite chhanchhuahna jubilee dar an vua ang a, vawiina rahbeh leh hnehchhiaha awmte hi chhanchhuah an ni dawn a ni a ti. Dikna tundin leh a ni ang a, MNF sawrkarin Mizoram a tihchhiat zawng zawngte tundin leh a ni ang a, mi retheiten an chanvo dik tak an chang ang a ti.
Congress chuan Pathian hnenah rinna leh beiseina a nghat tlat zel dawn tih sawiin Pu Zira chuan Congress chuan inbumna politics a khel ve ngai lova, hun lo kal zel turah pawh a khek ngai dawn bawk lo a ti.
Lawmluhte aiawha thusawitute chuan vawiina ding mek MNF sawrkarah thalaite leh mi retheite huapzo thil tha beisei tur engmah a awm lo tih an hmu chian thute, chutih lai mekin Congress party chu a tak taka Mizoram leh hnam hmasawn nana thawk a, tungding thintu a ni an ti a. Thalaite leh mi retheite tana belhfakawm, rintlak hruaitu Congress chuan a nei a ni tiin beiseina sang tak nen an luhchilh a ni an ti. Congress party huang chhung atanga theihtawpa Mizoram leh hnam tana thawk turin an an zwm a ni an ti.
Congress-a lawmluhte hi Laldawngliana, M.A. (Eng), Kolasib, Lalhlimpuia, MA (RD), Venghlui, Ngursailova, MA (RD), Ramhlun Vengthar, Vanhmunmawia, MA/MBA, Tuikual North, Albert Lalawmpuia, MA (Pol), Bethlehem, T.Lalramliana, BA, Tuikual South (MNF Unit Secretary), Kawlchhuana, Bethlehem Vengthlang, Hmingthanpuii, Bethlehem Vengthlang, Landinpari, Tuikual North, H.Lalrammawia, Khatla, Vanlalrawna, BA, Ramthar an ni.

Vanrumi Thih Danah Thu Thar La Awm Lo
Kar kal ta zirtawpni chun khan Pi Vanrumi, 60, Zemabawk High School Veng chu Tuirial Airfild bul Muthi ram hnaiha a thlam chhungah thia hmuh a ni a, Pi Vanrumi thih chungchangah hian Bawngkawn Police chuan mi 5 vel an la a, an zingah hian Pu Vanrumi fanu neih chhun pawh a tel. Nimin thleng kha chuan police-te hian thu hmuh chhuah belh an nei lo.
Tual chhung chanchinbute leh local TV ten an report danin Pi Vanrumi hian Tuirial Airfield bulah hian chingit hmun siamin lo bing a nei a. Zemabawka a in kawngkapui a inkalh loh avangin a chhungte ngaih tha lo chuan a thlam hi an en a, chhuatlaiah thiin zangthalin an hmu a ni. Pi Vanrumi chhip dinglam, a chal chung chiahah vuakna ni awm tak hnuhma a awm a, a hrawkah chemte lian vak loah vihna niawm tak hnuhma a awm bawk. A khawihtu/te hian a/an pawl em tih erawh hriat a ni lo. Pi Vanrumi hi post mortem a ni.
Pi Vanrumi hian englai pawha a pawnfena a pai thin chu amah khawihtute hian lain, Zemabawka a in chu an rawk nghal nia rin a ni a, steel ilmirah kalhna chu inhawngin safe chhunga a pawisate pawh a awm lo a ni. Pi Vanrumi hian a safe-ah hian englai pawhin Rs.10,000 vel chu a nei reng thin niin sawi a ni a, a ruang atang hi chuan Pi Vanrumi thih/thah hun hi kar kal ta zirtawpni atanga hma lam ni hnih vel a nih rin a ni a, a thattu/te hian a/an thah zanah a in hi an rawk nghal a ni mai thei.

Chawnghlut Bus Brake Fail
Inrinni zan dar 10:00 pelh hnu velah khan Aizawl atanga Lunglei pana tlan Chawnghlut Bus chu a brake fail avangin Khumtunga State Bank bulah a let a, hei hian kawngpui a dan avangin nimin tlai thleng khan kawngpuiah motor lian an tlan tlang thei lo. Motor tete chuan Baktawng khaw lamah kualin an tlantlang. He bus tluk vang hian Vanlalchhunga,Aizawl Armed Veng a hliam a, inrinni zan vekah Aizawl Civil Hospital thlen a ni. Pushpak labour pahnih pawh na vak lovin an hliam.

MNF Hruaitute Hlanna
MNF Gen.Hqrs. hruaitu mipui thlan pathumte chu chuhtu an awm loh avangin vawiin dar 11:00 a.m.-ah hian Mizo Hnam Runah thlan tlin an nih puan a ni dawn a, Pute Zoramthanga, President, Pu Tawnluia, Vice President leh Treasurer Pu R.Tlanghmingthanga an ni. Inkhawm Pu K.Vanlauva, Principal Secretary chuan a kahruai ang a, Returning Officer-in inthlan result a puang ang. Ramhlun S Pastor Rev.R. Lalnuntluanga’n hruaitu thlan tharte Pathian hnena hlanna leh tawngtaisakna a nei ang a, thlan tharte hian thu an sawi ang.

Mirethei An Lawm
Mizoram Mirethei Inzawmkhawm chuan Zarkawt leh Dawrpui Veng V/C-ten an veng chhunga tanpuina khawn an phalsak avanga lawmthu an sawi a, heng veng chhunga tanpuina an khawna, Rs.5 atanga Rs.1,000 inkar lo petute hnenah lawmthu an sawi bawk. Mizoram Mirethei Inzawmkham hian March 2007-ah Assemby Vana Pa Hall-ah neih an tum a, kawng zawh pawh buatsaih an tum.

MNF-in Sun
Pu Chalkunga, President, MNF Senior Front Hqrs,.chu kar kal ta zirtawpni khan cancer natna vangin a boral a, MNF gen.Hqrs. chuan an ui takzet thu leh a kalsan tak a chhungte Pathianin hnem se an duh thu an sawi.

Truck Chil Hlum Chhui Mek
Zirtawpni zan dar 9:30 vel khan Rangvamual Sericulture Farm bul kawng kualah Tv.Lalhlimpuia, 21 s/o Pu Lalbiaksanga, Chawnpui chu Sairang lam atanga Aizawl pan truck-in a chil a, ka chhawn lohlin a boral. A lu a chil per nia sawi a ni.Truck chiltu hi police ten an chhui mek.

Heroin Hawng 5 Man
Kar kal ta zirtawpni khan SRS, YMA, Excise department leh Sarawn veng Branch YMA tangrual chuan Sarawn veng Police Run bulah heroin (No.4) hawng 5 an man a, aneitu nia sawi Thawngkhen 32, Myanmar an man a, Sangteii, Dinthar veng hnena awm niin a insawi. Thawngkhen hi Excise kutah hlan nghal a ni.

In Kang Ral Vek
Zirtawpni chhun dar 12:00 vel khan Aizawl Edenthar Venga Pi Raltawni Assam type in chu a kang a, bungrua engmah an chuh hman lo. He in hi chhungkaw pahnihin an luah a ni a, a kan lai hian a hnuai zawk luahtu Pu Biaknia-te an awm lo a,.a chung zawk luahtu Pu Vanlalawia nupui chuan Fire Service a hriattir a, anni an kal a, tui neihin a daih lo a, an chawichawp a ni. In kan chhiat hriat a ni lo a, electric curren short a nih rin a ni.

Literature Workshop
The Salvation Army Youth, Central Division chuan inrinni khan Aizawl Press Club Conference Hall-ah ‘Literature Workshop 2007 an nei a, Corps hrang hrang atangin Editorial Board an kalkhawm a, thu leh hla te, chanchinbu vawn fel dan te an zirho a, Pu Ramchuana, Khatla Corps chu resource person a ni.

Thisen An Pe
Inrinni khan Presbyterian Kohhran Dawrpui Pastor bial KTP chuan an golden jubilee lawm nan Durtlang damdawi inah mamawh apiang tan thisen an pe a, unit 70 an pe. Dawrpui bial KTP chuan January ni 26 atanga 28 chhung hian Dawrpui Biak Inah golden jubilee lawmna an nei dawn a, he bial hruaitu lo ni tawhte leh Pastor leh Pro Pastor lo ni tawh zawngte chu hmanpui turin an sawm.

Awk Hlum
Tv.Lalmalsawma, 20 s/o Tawnglawma, Manipur chu kar kal ta zirtawpni zan khan a awmna a u Paucha, Dawrpui Vengthar inah inawkhluma hmuh a ni.

Awmlai
Pu Lalhmingliana (Hming Roya), 60 chu cancer natna-in inrinni zan dar 12:40 khan anmahni inah a boral a, nimin khan Dawrpui thlanmualah vui liam a ni. Pu Hming Roya hian a fate 7 leh tu 1 a kalsan a, Dr. Chawnglungmuana pa a ni. Pu Hming Roy-a hi football a khelh lai chuan Dawrpui team-ahte khelin lammual diak em em mai pal chakah pawh sawi hat hat tham a tling a ni.

Similar Posts:

• Congress-a let turin MCP an lungrual lo
• A cousin a vit hlum!
• CM in Dawrpui Veng a lo tiam em?
• Dawrpui vengah vai naupang ruang chhar ani ..
• MZP leh Congress thalai inkarah buaina a chhuak

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Monday, January 22nd, 2007 at 1:44 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.