mi(sual).com

ThugAngel aka hipholik

Ka thalaipui zingah hian keimah anga Music ngaina hi an tam ve viau niin ka hria a, ka hresual ta a nih pawhin thil pawi a ni lem lovang chu? Music han tihah hian Genre hran hran hi a tam a, kei ka ngaihthlak duh ve zawng chu Hip Hop leh Rock Music lam atanga chhuak a ni tlangpui a. Rock Music hi chu ropui ka tih ber pawl a ni ve tlat thung, Rock Music lamah chuan Pink Floyd, Nirvana, Red Hot Chillipepper, Pearl Jam, G-N-R leh Band dang dang te ka lo tuipui ve tawh thin a. Kum 7/9 vel ka nih lai atanga ngaihthlak nuam ka lo tih ve tawh chu Rap Music hi a ni a, hetih lai vel hi chuan D.J. Jazzy Jeff And The Fresh Prince tih vel kha ka lo ngaithla ve tawh a. Hetih lai vel hi kum 1989/91 chho vel ni tain ka hria, an hla thu chham lam aiin a Music lam rem em em mai kha khatih laia ka tuipui ber niin ka hria. Kum a vei chho zel a, kan ngaithla tam tual tual a rin aiin min chiah hneh ta zek a nih hi.

Hip Hop han tih hian Community/Culture lam akawk zawk daih a, Hip Hop-ah hian thil bet tel tlat pali a awm a. Chungte chu Rapper kan tih M.C an tih bawk hi a pakhatna ni se, a dawt lehah chuan Disc Jockey, D.J tia an koh thin hi a awm leh a, a pathumna chu B.Boy kan tih mai alama lam chi hi a ni leh a, a tawp berah chuan Graphitti kan tih bang vela mi lem awmze nei tak taka ziah rang ang chi hi a ni leh a ni. Hip Hop zinga kan hriat lar ber chu Master of Ceremonies tih alam tawia M.C te hi an ni awm e, thil puanna Mic tihna lam a ni lo ania aw ka unau. Rapper kan tih ho zawng zawng hi M.C pawh tiin ko la i ti sual hauh lovang, mah se Rapper kan tih zawng zawng hi Freestyle-ah an laktlak bik vek lo a nia. Freestyle M.C hi a hranpa deuhin an awm ve a, a tlangpuiin hetiang Freestyle M.C hi chu pakhat leh pakhatin an in Battle(in chham siak) thin. An ni ho ang bawk hian B.Boy ho pawh hi an in Battle (lam siak) thin a, Group-in emaw Single in emaw Two On Two/Three On Three ten an in Battle thin. Hetiang tho hian D.J Battle pawh a awm thin a, hei ve thung hi chu a mala in tihsiak chi a ni ber thung.

Tunlai tak hian Rap Album thar a awm nual a, chung ho chu han thlir kual ve dum ila. Akon-a Album thar Konvict hi rin aiin arawn lar chho phian a, Billboard Singles lamah Snoop Dogg-a a zaipuina ‘I Wanna Love You’ tih arawn che tha hle a. He hla hi American Music Award-ah khan arawn Perform nghe nghe a, a nalh reuh khawp mai. Hemi Album ami tho Eminem a zaipuina ‘Smack That’ pawh a lar leh tawh khawp mai. Senegalese Jazz Musician fapa aw danglam bik tak Akon-a Album thar hi a Hit’s chur chur viau a, US Billboard-a Album Chart leh Single Chart-ah Akon-a hi a che tha chur chur khawp mai. A hla larsa pahnih bakah hian hla nalh dang ‘Shake Down’, ‘Mama Africa’ leh ‘Once In A While’ te ala awm. Akon hi kum 2004 chho vel khan Styles P nena an sak dun ‘Lock Up’ hla atangin arawn lar chhuak ti ila , amahin hla Hit’s Lonely arawn nei zui nghal bawk a. Hemi hnu hian a hla dang ‘Belly Dancer’, ‘Ghetto’, te bakah Young Jeezy a zaipuina ‘Soul Survivor’ te vangin hriat ahlawh chho leh hle a ni.

.
Akon-a zaipui Snoop Dogg pawh hian Album thar ‘The Blue Carpet Treatment’ tih a nei ve tho a, Snoop-a Album hi Album Chart lamah chuan Akon-a’n a pha lo thung. Snoop-a hian a Album tharah hian Producer hrang hrang Dr.Dre, Timbaland, Neptunes te a thawhpui a, B-Real(Cypress Hill), Akon, Damian ‘Jr. Gong’ Marley, R.Kelly te bakah Dr.Dre leh D’Angelo ten an zaipui a ni. Snoop-a Album-a mite duh tur bika rinkaite chu Akon-a zaipuina ‘Boss Life’, Dr.Dre leh D’Angelo a zaipuina ‘Imagine’ te bakah ‘So Special’, ‘Candy’ leh R.Kelly a zaipuina ‘That’s That’ te an ni

Hetihlai hian Def Jam President kum 2003 a Rap chawlhsan tawha ngaih kum 36 a upa Jay Z-a Album thar Kingdom Come pawh arawn che tha chho khawp mai, Billboard Album Chart-ah pakhatna dinhmun arawn hauh leh luah thei mai. Jay Z Album thar hi a Album pakuana a ni tawh a, a Album tharah hian Producer lar tak tak Dr.Dre, Kayne West leh Pharell Williams te a thawhpui. A Album thara nalh deuh bik mi duh fal deuh tur bika ngaih ho chu ’30 Something’, ‘Do You Wanna Ride’ leh ‘Oh My God’ te an ni a, a Album hmingputu Kingdom Come hi a nalh khawp mai. Hei bakah hian hla nalh dang Lost Ones, Trouble te pawh he Album-ah hian a la awm cheu.

Nikum December ni 19 khan Jay Z nena in hmelma thin East Coast lam Rapper lar sawi apianga hmaih theih loh Nas-a Album thar “Hip Hop is Dead…The N’ chu Def Jam label hnuaiah achhuak ve leh a, he Album hian Billboard Chart arawn chiah hneh nghal hle. Nas-a Album Recording Label Def Jam President hi Jay Z a ni tih pawh kan hretlang ang chu maw, nikum lam khan an Fans te hmaah an in hmelma tawh lo tih lan tirin Stage-ah an in lan dun. Nas-a Album tharah pawh hian an zai dun nghe nghe, Nas-a Video thar Hip Hop Is Dead tih chu Youtube lamah pawh a lar vet vet hle.

Hetihlai hian The Documentary Album rawn larchhuahpuitu The Game-a Album thar Doctor’s Advocate chu arawn che tha thei vak lo thung, ani hi G-Unit ho a ngeihloh avanga Dr.Dre-a Recording Label Aftermath chhuahsan kha a ni a. A Album tharah hian Dr.Dre angaihsanzia a chhamchhuak nual a, mahse a Album hming a phuah chhan ve ber Dr.Dre erawhin a aw leh a Music a thawh ve lo thung. Game-a Album hi a Album hmasa angin arawn invawrh thei tlat lo, Album tharah hian hla nalh ve deuh deuh It’s Okay(One Blood), ‘Doctors Advocate’, ‘Let’s Ride’ leh ‘Wouldn’t Get Far’ tih te chu a Album tharah hian a awm ve a ni.

Hetihlai vek hian kum 1996 lama an lo kahhlum tawh 2 Pac hla an la tihchhuahloh thenkhat pawh Album-a siam leh a ni a, he Album-ah hian tunlai Rapper Snoop Dogg, T.I, Ludacris, Lil Scrappy, Young Buck, R& B Star Keyshia Cole leh Ashanti bakah 2 Pac-a’n hla tam tak alo sakpui tawh The Outlawz te pawh an rawn lang ve leh a. Hla Review tu thenkhat chuan fam chang tawh 2 Pac-a hla te tichhuak thin tu anu Afeni Shakur hi sum duh leh um ang deuh zawngin an ziak thin a, mahse a Fan’s te thlirna tarmit lam atang chuan an tichhuak lovang tih hlauhawm zawk tak a ni. Kan hranghlui neih famchang tawh Jeremy Zobiaka te zai tunlaiah te hian han tihchhuah tur awm se tu nge Jeremy-a zai hre tawh lawm lo awm ang le?? lawm lem lo an lo awm palh hlauh anih pawhin an tam tawp long’e. Chutia tih zawngah chuan Beatles ho Album thar Love pawh arawn chhuak leh a, tun sawisel ahnekin an fak leh chiam a nih hi. He Album thar hi U.S Album Chart Top 10-ah a invawrh chho ve leh phak nghal mai a, mah se arawn invawrh chhuak thei tawh tak tak tawh lo a tih theih awm e. Album zinga hla nalh deuh leh mite duh tur deuh chu ‘Playa Cards Right’, ‘Dumpin’ leh ‘Sleep’ te an ni a, hei bakah mahni Mood a zirin he pa hla hi chu a ngaihthlak ve theih zel mai.

Heng bakah hian R&B leh Crunk Music lo larpuitu Ciara-i pawhin Album thar “The Evolution’ atichhuak ve leh a, ani hi hla lam rem tak tak 1,2 Step leh Oh te lo larpui tawhtu kha a ni a. A Album tharah hian a bialpa hlui Bow Wow-a chungchang pawh a hla ‘My Love’-ah a chhamchhuak a, Neptunes ho Produced ‘I Proceed’ tiamin beng fah tur chi hla nalh ‘ C.R.U.S.H’, ‘Promise’ leh ‘Get Up’ te a awm a ni. Hetihlai vek hian Neptunes hovin kum 2002-a ‘Lord Willin’ tih Album an lo produced sak tawh The Clipse te pawhin Album thar ‘Hell Hath No Fury’ tih an rawn tichhuak ve leh a, he Album tharah hian Neptune te thawhpui lehin hla 12 a awm a ni.

(He thu hi nikum kum tawp lama ka ziah a ni a, ziak thiam in tih vanga ziak ka ni lova, ka tuipui vang leh nuam ka tih ve vanga ziak ka ni e. Tun hnai mai khan Aizawl lam chanchinbu ho ka han thawn a, lo chhuah duh hlawm tak maw? A chhiar duhin chhiar a, a chhiar peih lovin melh loh maiah kan ti aniang ch’u:-))

Similar Posts:

• Mizo rapper te : Enge i ngaihdan?
• Daduhi video album released
• End of the world – the invention of the MP3
• Mimi Renthlei to release her debut album (updated 21/5)
• Album chhuah run pui

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, January 28th, 2007 at 11:47 pm and is filed under More than words, Whatever. You can follow any responses to this entry through the RSS 2.0 feed. You can leave a response, or trackback from your own site.