‘Nupa tangthen chu dar lehlam sahthlak ang a ni’ upa ten an lo ti hi alo va han dik hmel em! Kei tlangval hnahkhat, mut hun leh thawh hun pawh hrelo, val lungmawl ve tak, tangthen chu sawiloh tangbelh tur tak ngial pawh la hmu velo tan pawh hian he thu hi chu Tirhkoh Pawla ziak tlukin ka pawmpui a. Engvangin maw? Elee… an sawi tlat alawm. Ni e, nupa kara thihna in ro alo rel tawh hi chuan a lungngaihthlak dan tur chu sawi ve thiamlo mah ila a hrehawm tur zia leh a khawharthlak tur zia hi chu ka hrethiam ve tawkin ka in hria. Ka naupan laia kan thenawmte parva vulh a nu zawkin a thihsan avanga a pa lunglen zia te kha aw… rei pawh dam lovin a thi ve ta mai reng a nih kha maw!
Shah Jahan-a khan a hmangaih em em mai, a nupui Mumtaz Mahal-in a thihsan hnu khan engtiang takin nge a nupui hi a sun tih chu hriatpui vek lo mah ila, amah chauh a khawhar taka hun a hman chang chu a tam ngei ang le. Chu a khawharna leh a lunglenna te chu thu leh hla hmangin puangchhuak lo mahse a hmangaih a nupui, a duh leh a ngaih em em mai chu khawvela thil ropui ber zing ami ni hlen tawh tur, a nupui hming chawia kum 16 chhung ngawt mai an sak Taj Mahal chu a din ta a ni kha. Nulat tlangval laia hmangaih ber chanloh avang ringawt pawhin kan hla phuahthiam Lalzova te chuan ‘Aw! kan nun khua hrui angin, A la sei dawn si a lungrun; A riang val ka tahna tur renga’n, I piang Khuanu leng hualin’ tiin a lo kiu pui vawng vawng thin a ni. Heti khawpa lungleng leh khawhara hun hmang thin hi a awm reng a ni. Dallas Frazier ngei pawhin a thiante nupa inthen chu lo tawrh puiin 1964 khan ‘There Goes My Everything’ tih hla chu a rawn siam chhuak a, Jack Greene chuan 1966 ah a rawn larpui ta a ni.
He khawvela inhmu leh tawh ngai reng renglo tura han inthen chu a lunglen thlak bawk a ni ngei ang, There goes my everything tih hla hian hetiang lam kawnga lo kal tawhte rilru a phawrh chhuakin an dinhmun a sawi chhuak thiam hle a ni ang. Zofate zinga ziakmi ropui, hla thu sawifiah lama a ber anga ka lo ngaih thin leh ka mi ngaihsan em em mai Pu Tluangte Hnamte (Fam) ngei pawh khan hring a chan lai khan he hla hian a lung a kuai in, an nuin a boralsan hnu phei kha chuan a lungleng khawhar lutuk si khan ‘there goes my everything’ hla hi ama tan liau liau a an phuah emaw tih chang a ngah thin hle a ni. Theih nise a hringnun kha liamlo tura chelh dingin he hla lungrun em em mai hi han sawifiah tir ka va han chak em!
A tan kha chuan ni e, he leia a hmangaih ber mai a nupui a boral a, a ruang bula a thut laite khan “A her liam ta maw, ka dam chhan ber mai kha, ka thinlai luahtu, ka enchim loh khan, min dawnlo tein a her liam pui ta e, engkima ka engkim mai chu.” “There goes my reason for living, there goes the one of my dreams, there goes my only possession, there goes my ev’rything” tia a hmangaih ber mual liam tur chu han thlah a, “chatuana chawl tawh tur leh kir zai reng rello a an lawina run riang tak chu hnuchhawn a, mual a liam tur thawm leh, a anka nem damdiai a, “duhlai tunah chuan kumtluang atan mangtha aw”, tia inthlahna aw-ka chu tun thleng hian a lo tuar tawh tute leh he hla lo ngaithla thinte bengah chuan a cham reng si a ni. A phuahtu hian a takin tawng velo mahse hetiang dinhmun a awmte rilru chu a tawmpui hle tih a chiang a. Hun alo in her zel anga, thenrual thate leh amah sun pui tute pawh an tlem telh telh ngei ang a, tah chuan a hmangaih ber leh a duh ber mai nena an khawsak na hmuh ngei maiah chuan amah chauhva damlai hun a chhiar alo tul tawh ngei awm si. chutih hunah chuan he hlaa a chang tawpna hian chu khawharna dinhmun chu a ti chiang a, “Tinkim dawna kan hun liam ta te ka chhui kir changin, alo thar leh thin kan hlimlai leh lawmlai ni zawng te kha. Kan kara hmangaihna chuai thei ngailo leh min hruai kal tu thin kha, rihsangmual kai in zamual i liampui ta si”. As my mem’ry turns back the pages i can see the happy years we had before, now the love that kept this old heart beating has been shattered by the closing of the door, tia an vanglai hun hlimawm leh tudang ngailo tea an pahnih chauhva damlai par an tlan lai te chu a mitthla ah chuan alo thar leh thin ngei ang. Chumi chu atak rama chantir tumin beiseina bo tawh hnu karah mahni a beiseina eng siam chawpin, a hmangaih tak damlai hlimthla te chu awmkhawhar changin a thlir thin ang a. Mahse, chutah chuan a beidawnthlak zia nemnghet turin “A her liam ta maw, ka dam chhan ber mai kha, ka thinlai luahtu, ka enchim loh khan, min dawnlo tein a her liam pui ta e, engkima ka engkim mai chu.” tih thu hian a hmangaih ber chu ui tak chunga a thlah a tul leh thin si. “There goes my reason for living, there goes the one of my dreams, there goes my only possession, there goes my ev’rything.”
