I rauthla tal rawn tir rawh..
{Huiva lenthiam ka tir ang che. Va kal ta la ka di lenna fam khawpui runah
A ngaia ka trah khua sei tur, hrilhin va hlan ang che}
Khawnge hmangaihte hnena hmangaihna lan tir thla (Valentine) a ni bawk a, han ziak ve chawm mai teh ang. Pu Saka thuziah hian rilru a ti thar deuh bawk nen. Thinlai mu hnu kai tho tawk tur lekin, ngaihtuahna kan sawr bing a, kum 6 lai a liam ta. AMAH nena kan in tawnna hmasa ber te ka ngaihtuah chhuak a. Kan unauva kan luah, kan flat-ah Masi laiin ka hmu hmasa ber a, ka nauin min introduce a. A tirah chuan midang ang bawkin ka lo thlir liam ve mai kha a nia. Mahse rei lo te hnua kan bula a rawn khawsak ve takah chuan, a hmel kan en hian mizo mipa ah chuan a hmeltha pawl tak, hleitling tak ani tih chu phat rual a ni lo ang le. Chuchang a ni lo, mihring hian min ngaina tute hi hmuh that a lo awl pawh aniang ka tan phei chuan khawvel mihringah hian a tha ber pawl a lo ni chho ta zel a. Mahse kum in rual lo na na na chu!!! Min ngainatzia lan tir nana, “Ka farnu tal lo ni la ka va ti em!” a tih thin lai te khan kei pawh ka lawm ve thin ngei mai.
Kumpui sul a lo vei hian, Thingtin partin an vul,
Lungrualtea kan thliah hnu par zawngten, min ngaihtir a fam chan ni.
Zan lai thleng thleng a, engnge maw mai mai kan sawi lai te, Pathian thu atanga thu ho te te thlenga kan in hnial fiam lai te khan, min la kalsan dawn ani tih hria ila chuan Chatuan nunna I neih theih nan ka tlaivar pui ang che nga, Pathian awm I rin lohna pawh kha hneh ngei che ka lo tum tur…mahse khua a tlai zo ta! Mihring hian kan hmalam hun tur kan hre lawk si lo a leh…Gujarat lirnghing nasa lutuk tuka, kan khua in a them kan tawrh ve ni te kha…Bike-a sam style chhe ve khawp a, kan khua kan fan kual ni te, rawng kan bawl dun a, I zei lo zia te kha leh kan bazaar ho laite…sawi tur a tam, sawi thui tawh lo mai ang, tunge I nih hi thup ka duh ve bawk si. Bryan Adams hla …….min sak sak lai te kha hriat tur a awm tawh si lo.
I kutchhuak I sul I hnu te, Ka thlir bang dawn nem maw!
Tunah van nun partlan in lengmah la, A cham reng I zun thinlaiah.
Khawvel sualna ruihtheih thilin I nun a khawi buai zo ta. HUN a liam tam lo asin, kan hun hlimawm taka hman dan tur rawn suangtuahna nena Aizawl ka rawn rah ni in, I nunna uihawm tak chu ruihtheih thil avangin I lo thlah liam ta tih ka rawn hre ta. Aizawl min haw san dawn a, kan thu in chah ang ngei khan, leh ka lo tiam ang ngei che in, I chhungte pawh hre chuang lo khan Sunday-ah in inah ka lo leng lut a. I liam san tak I chhungte hnem tura lo kal tam tak zinga pakhat nih mai duh tawk lo in, I unaunu hnenah tunge ka nih ka va sawi a. I nu bulah min hruai a, I nu in, “Nang I ni maw…kan la hmu lo na che in…AMAH khan a sawi nasa che asin, a ngai khawp che asin” tih paha min trah khum kha chuan mittui sum a har duh khawp mai. A piah lawkah I thlalak I nui hmel ngei mai kha hmuh tur an tar bawk si.
Thinlaiah a thar leh thin, khawnge maw ka di ve kha
An sawi pialral fam khawpui runah, Ruahrun a rem an ti.
Tunah chuan kan hlim lai ni liam ta thlir kir a ziah mai leh lunglen mittui tlak bak hi tih theih ka nei ta lo. Ngaiin, uiin au che mah ila ka au kir zo tawh si lo che a. Train station a, I aw ka ka hriat leh ka hmuh che kha, ka hmuh hnuhnun berna tur che tih hria ilang chuan, I haw loh nan ka theih tawpin ka dang tur che a nia. Mahse mihring hian kan hmalam hun second khat pawh hi kan hre lawk si lo. February thla a lo thlen hian lunglen a thar a, Valetine card min thawn leh Beneton Tshirt a hring perfect shape tih in ziah na ngei mai te kha, ha ngam tawh lo mah ila ka la dah tha vek asin.
Vanduai trah khua sei tur hi aw, Han dawn ve la ngaihlungrun
I sakruang hring ang ka tawng lo mah ila, I rau I thla tal rawn tir rawh…
