“Zu Zu Zu…!!!” tiin Zu zawngin ‘a ngaite’ chuan an tuanna ngai, Rangvamual leh Phunchawng panin an tlân thla leh a; mahse, RV pawh a lo ‘RV’ tawh lo va, Phunchawng an thlen thlak paw’n Zu vânzia hlir, a zuar thinte paw’n an lo hrilh zel si.
Supply Reduction Service (SRS) duty âwm ang hmel han pu erawh hmuh mai tur vâng an ti hle! Mahse, an beidawng duh lo, Phunchawng veng mawngah, an zawn Zu chu an hmu ta a! Fun khat Rs 50 man ni thin kha Rs 100/- paw’n nâ an ti tawh lo va; hmân ai khan a zu chu a lêtin ‘dal’ mah se, ‘pawi’ an ti thei tawh hek lo.
April thla tir atangin SRS West Zone chuan nitin chhum lo chat lo vin, darkar 24 chhung, helai veng pahnihah hian an lo in-duty chhawk tawh. Society-in a ‘mamawh’ ZU tihrêm hna an thawk muah muah reng a; an hnathawh leh an inpeknaah an fakawm e.
MAHSE…
Zu veh – SRS duty te hian an Zu man sa an in thin tih hi kan hria em aw…? Central YMA hnuai SRS te hian YMA thiltum an hre ta lo nge, tanpui ngaite tanpui tih chu… khawi lamah! Civil mi kutthlâk theihna dan nei lo SRS te hian khuti em ema Rangvamual leh Phunchawng-a kutthlak an chîng ta mai khu chu ngaihtuah zui a ngai kan ti lo nge, kan la ngawih a, kan la ‘support’ reng? Hman zana Phunchawng veng pa, an vuak dan te kha… ‘YMA tih âwm’-ah kan la ngai reng dawn em ni?
Excise paw’n uniform ha lo chuan Zu zuar hi kut an thlak thiang lo a ni a; SRS te, khulai, mirethei awmkhawmna hmuna an duh ang thâla an chetla ta mai khu kan en liamsan leh mai mai dawn em ni? Ngaia neih hian thil tha ber a hring lo fo. Dan palzûta YMA te’n dan kalha an thiltih zawng zawng hi ‘ngai-ah’ kan nei reng dawn em ni ang le…?
Kutthlak leh rukrûk ching SRS
SRS duty zawng zawng ka ti lo; duty thenkhat, zu heh tak tak an awm thu Rangvamual leh Phunchawng venga khawsa, a taka kan kawm ngeite’n an sawi hi a tir chuan ka awih bik lo. Mahse, dâwt a nih ka ring thei ta lo. Hman zan lawka Vanlalthanga an sawisak dan ka sawi dawn; hei hi an thenawm nula, Manuni sawi dan a ni.
SRS ten a Zu an mansak; Vanlalthanga hi thiam ka ti lo. Kut an thlâk a, an sawisak hrep hnuah a kephah-ah vawi 60 an vaw leh bawk. Hei bakah, a CELL PHONE an RUKSAK!! Hetiang hi kan tlawmngai pawlte ‘tlawmngaih chhuah dan tur’ em ni ang? Vanlalthanga hi vawiin thlengin a phone hi a rûksaktu te hian an la pe lo va; hei hi i awih lo a nih chuan, Vanlalthanga phone number ka hrilh ang che – 9862362954.
Man Ngam Dawn Lo Maw?
Zu ruih/zu kawl/zu nam thlengin Mizoram sirakar dan chuan a khap (u/s 8(1)(2)(3) of MLTP Act). Hetianga ti man thei awmchhun chu Excise an ni. Airport atanga Sap Zu rawn phur lut tun tun thin, kan officer leh mi liante pawh check ngam lo va, Rangvamual leh Phunchawng ringawta inlu-ling SRS te hi kan sorkar hian ‘Zu man theihna dan’ emaw ‘Zu zuar hnawhchhuah theihna dan’ emaw, mipuite hriat loh hlanin a lo pe thar ta thut em ni le? A man thei tur Excise aia SRS an hlauhawm chhung chuan MLTP Act hian awmzia pakhat mah a nei lo tihna a ni ang.
Mizo thalaite hian ‘DAN’ hi tlem tal chu kan hriat a ngai a ni. Dan kalha che pawh kan support zel dawn chuan engtikah emaw chuan ‘Dan’ vêk hian min vawlêt dawn…! Dan kalha che thin hi kan police te hian an man thin a nih ngai chuan SRS te hi an man ngam ve dawn lo em ni?
