Tlaisun Lalnunsiama tih hming i hmuh hian i mitthlaah hman ni lawka Lalniliana a hnek tlu lai i hmu mai thei. Mizoram Heavyweight Boxing Championship title hauh mêktu hian ‘inhnek’ chauh hi a thiamthil neih emaw i ti a nih chuan i tisual let der ang. Thu leh hla tuipui tak a ni satliah lo, lehkhabu hralh har hun lai taka lehkhabu ziak ngam khawpin ‘thuziah âtchilh’ tlat mi a ni.
Nikuma BA IInd Year result a nghah laiin a hun âwl hnawh khah nan thawnthu ngaihnawm tak a ziak a – a thawnthu hming chu, ‘Sisil Hipson leh Kei’ tih a ni. He thawnthu ngaihnawm tak hi nimin (May 14) chawhnu dar 1:30 khan tûna a college kalna, Govt Hrangbana College-ah, an College Principal, Pu R Zatlaia’n a tlangzarh ta.
Boxer a nihna angin Tlaisun Lalnunsiama hi ngaihtuah rih suh. Amah hi a mak ve reng reng – Boxing Ring chhungah chuan pà takin che thin mah se, pawn lamah chuan ‘a kâ pawh zen ila, min seh duh lo vang’ tih tur ang mi, nun zawiawi tak a ni tlat. Heivang hi nge ni, a thiante leh amah hrechiangtu te’n ‘Patê’ tia an koh daih ni!
Phêk 116 a chhah, ‘Sisil Hipson leh Kei’ tih thawnthu hi ni kaw chhung leka Canadian nula hmeltha leh zei nena an inkara eng emaw ‘riau’ awm chanchin a ziahna a ni.
Goa tuipui kama Canadian nula hmeltha leh zei tàwnah Mizo tlangvâl a tlawm mai dawn emaw tihtur hi a ni a. Val zei lo tak pawh chu zei ta riau hian a inhre tlat pek a… mahse, a duh ber chu a hnar duh ber a ni tlat si… Eng vang nge? Eng thil nge December ni 13 atanga December ni 21 chhung hian he Canada nula hmeltha Sisil Hipson nen hian an tawn bîk? Cheng 40/- man lek, thawnthu ngaihnawm ni satliah lo, Mizo tlangval entawn tlâk, thawnthu hmanga pho chhuahna, Mizo Boxing Heavyweight Championship title hauh mêktu kutchhuak hi i lo hmaih palh hlauh ang e.
January 22nd, 2011 at 3:39 am
he lehkha bu zet hi chu ka khawhar min hnem teh a sin aw….