Click here for full size picture
Thla chu hampuar theih tawpa hampuar ni awm fahran hian a puar pup mai a, van boruak lah chu tu pawi mah sawi lo in a thiang em em mai a, chu zan mawitak mai chu a partlan lova liam leh mai tur atan chuan a uihawm tih hretu ka thiannu chuan durtlanga an huan a kal turin min sawm a, engtiang chiah a zan nuam leh hriatreng tlak nge a nih hrelawk miah lo chuan ka kal ta a.
A hma pawha kan lo kal dun tawh thinna hmun ani a, huan ah chuan thilthar hmuh tur em em a awm lo, Mahse hemi zan hi chuan thilsiam zawngte chuan min lo lawm emaw tih tur khawpin an lo awm a, engkim maite chu siamtu’n a siam ang anga lo awmin an chan turah lungawi tak leh an mawina zawn theuh a mawina tinreng an neih te chu hmuh theihin a awm. ‘I see trees of green, red roses too, i see them bloom for me and you and i think to myself what a wonderful world’ tih hla te kha hetiang huna an phuah emaw tih ava han awl em.
Kut inkai chung chuan chu hmun chu ka thiannu nen chuan kan fang dun a, vanboruak kan en a, thla bial kulh mai chuan a theihtawp a mawina chhuah tumin Aizawl khawpui chungah chuan an eng pum mai a ni. Thingkung hnuaia thutna an siama kan thut lai chuan chungsiar te chuan kan chunga mal min sawm tum ni awma mawi hian an lo tle seuh seuh a, ka kianga thu ka thiannu chu ka han en a, a hmelmawina leh a kimtlang mawina chuan chu zan thiangreh chu a ti mawi leh zual a, chhailai di mah nilo se, hemi zan hi chuan hmangaih biahthu hlan a chakawm ngei mai.
Kan thutna atang chuan chu zan thla eng lawm lanu valrualte tual an chai lai te han hmuh chuan chu zan tifamkim tute zing ami an ni ngei mai. Hemi zan hi chu ‘The Moon is my witness and the stars will agree’ tih hla ang vel kha a ni e. “A mawi nge mai tiraw.. “ tiin ka beng bula an rawn sawi sep a, ni e ti pah a, kan vela tlangte mahni ziarang zahpui miah lova an lan ang anga lo sawivel te pawh chuan chu zan thla eng chu an lawm tih a chiang mang teh e. Thingkung buk deuh te chu a mawi a, mahse hemi zan hi chuan thingkung kawlh deuh pawh a mawilo chuang lo.
‘Zantiang hi kohkir theih se kumsang atan ka au mai tur… mahse chung khuanu rorel danrual ni silo..’ tia chu zan duhawm tak mai a mawina kan chen mek chu HUN (Time) in kan chunga ro a rel leh si avang chuan Ui tak chungin kan tinsan a tul leh ta si…..
