mi(sual).com

-Zoa Tlau

Zanin hian Mimi Renthlei album chu Vana Pa Hall-ah tlangzarh a ni dawn a, C Dinthanga’n mimirenthlei.com a hawng ang a(misualho ta ti mai ang) Ramhluna Hnamte in album a tlangzarh ang, min ruat angin album preview-na hun ka hmang ang a, a write-up hi chanchinbu lamah ka tichhuak tawh a, ka rawn post ve e, in chhiar peih chuan lo chhiar ve ula.

CD write thar tih hriat zet mai chu ka computer-ah chuan ka’n thun lut a, ka rilru te te chuan, hetiang hmeichhe zaithiam leh a kum phu lova hla phuah thiam tehhrep album preview sak chu tihsual palh ava’n hlauhawm awm ve, sawisel loh tur turte ka lo sep rawtui ve chiam ang a, tia ngaihtuah chungin window media player fiah tha takah chuan kan play ta chin a.

Zirsangzela Hnamte hla ngainatu i nih chuan Mimi Renthlei debut album hi itan chuan a nelawm nghal ang tih ka sawi ngam.

Chhingkhualah Ar ang ka vai
Ka tawnglo thinlai hnemtu
Ami zaleng rual zawngte
Kawpte’n an leng e
Kei ka chhailaidi ve kha…

Kar hla di zuna uai chu
Tuar thiam a har ngei ka tan
Dar ang tawn leh ni nghakin
Zanmu reng ka chhing theilo

A hla thu ringawt pawh hian i lung a tileng lo maw? He’ng hlate hi i ngaihthlak hmasak tur zinga mi a ni a, music lam hremite sawi dan chuan Mizo hla hluiho kha tawngkam pangngaia lam rik ringawt pawhin kan sa deuh thaw a, a hla thu leh a thluk a inmil em em a ni tiin an sawi thin. He’ng hla hlui sak nuam tak tak hi Mimi Renthlei pawh hian a rawn tharthawh fuh hle mai.

Tunge Ruati I Ngaihzawng tihte phei chu, he hla hian Mizoram a nghawng nghing nawn ngat a nih kha. Zirsangzela Hnamte tunu (niece) Mimi Renthlei hian Hlim Zan tih ngei mai kha, Zirsangzela Hnamte hla tha lutuk kha a rawn vawrhchhuak bawk.

He hla hi tlangval leh pa lamin an lawm hle ni tur a ni ka ngaihthlak laia lo hrefuh apiang maiin “He hla hi ka duh, a sa elo, ava’n tifuh e!” tiin an rawn comment thei zat hlawm.

Zirsangzela hla tang leh hla thu mawi tak hi sawi nin a har reng a ni, rimawi lam siamtu lah hian a siam fuh hle bawk si nen.

Ningzu dawn chhuihthangvala lenthiama,
Perhkhuang tingtang leh chawmkuang remin
A lam diai e selrun laichhuatah
Muvanlai tlang hrutin phar der der

He hla thu hian tunhma deuha kan Mizo unaute lung len thin zia leh an hringnun a phawrh hlein ka hre thin, khatiang hun nena tun hun tehkhin hi chu thil inhmeh a ni thei tawh lo. Perhkhung tingtang nena tlangval zu kam nam lungleng zaia han vakvel lah hmuhtur an awm tawh lo. Car man to pui puiah tape man to pui pui, thum tak takin an play tawh a, hringnun harsatna leh natural tak mai kha kan pelthui ta deuhte pawh a ni mahna.

Hla 14 awmna album chhenfakawm takah hian rimawi lama kan michhuanvawr PB Lianhminga, LV Dawnga, Michael M Sailo, Marokima(Music Plus) te kuthnu thlak a mawi hlawm hle.

Mimi hian hla thar a sak ai hi chuan a hla hlui, a lo lar pui tawhte kha a thlawh fuh zawk viauin ka hria a. Chu’ng bakah chuan hla hlui a sak tahrte hi a sa fuhin mi tam tak tan he album hi hmaih phal lohna pakhat anih ngei a rinawm.

Mualzapui i lian ni khan e lungrun
Vangkhua zawng a ngui ruai asin
Zatlang rel thang pawh dawn lo hian
I ngai hian lunglen zai ka lo sa

Heng hlate hi i hrechhuak uai uai em? La-i Zun tih Lalbiakdika Hnamte phuah kha a ni a, thangtharin hla hlui mawi leh fiahfai taka an rawn sa nawn leh hian kan Mizo hla hlui tha pui pui, thu leh hla lama ril tak takin an phuahte thamral mai tur a veng ve tlat.

Lunglen album-ah hian hla thar zingah John Mawitea sulhnu a awm nual a, hla 14 zinga 4 ngawt hi John Mawitea hla niin he’ng hlate hi nalh fal han tih tur awm lo mahse a tha tlang hle a. Henry MS Dawngliana hla pakhat a awm bawk a, amah Mimi Renthlei hla 4 a awm bawk, Zalawra Hnamte, Saitluanga leh Duhzuala hla Tunge Ruati I Ngaihzawng bakah, sap hla Mizo hmeichhia Hmangaihzuali phuah Said and Done a awm bawk.

Sawisel tur awm hauh lo se ka ti thin a, mahse fakna ringawt ai chuan sawiselna avang hian hma kan sawn tih hriat a tha. Mimi Renthlei album cover hi a mawi viau rualin a beibuai deuh a, thu inziakte a awn sin bawk si nen chhiar a har khawp mai.

Tin, Mimi phuah Biahthu music hi Michael-a hla “Ka Di Bawihte” (remix) nen khan a inhnaih khawp mai a, music lam ngaihven vaklo pawhin an ngaihbel hma viauin ka ring deuh.

John Mawitea’n hla mawi tak tak a phuah a, amaherawhchu A Nem Mahna tih chang khatna tlar hmasa ber Chhunni a rei, zantiang hrui ang tawi lo tih hi chu peotic license nei pawh nise a ulh deuhin ka’n hre ve ngawt a. Zantiang hrui ang tawi lo tih tak hi, hrui ang sei leh si tih emaw ni ta sela chuan a mam deuh mai thei ka’n ti ve ngawt a.

Mimi album-a hlate hi hmangaih tak te ngaih hla a ni tlangpui a, Michael Learns To Rock hla nen ka tehkhin deuh ber, a lar vanglai pelh hnu, hmin lutuk tawih tawh hnua album tichhuak chauh a nih avangin a hla sak tawhte aia han hit fal tur ka hre lem lo, hla hlui a sak loh chu.

Similar Posts:

• Mimi Renthlei to release her debut album (updated 21/5)
• Coming Soon
• Mimi Renthlei “My Journey”
• Simte music video album
• Mimi website thar (?)

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Friday, June 8th, 2007 at 1:09 pm and is filed under More than words, Music and lyrics. You can follow any responses to this entry through the RSS 2.0 feed. You can leave a response, or trackback from your own site.