mi(sual).com

Loch House Mizofed Gas Opposite Treasury

Ka thutna bul tukverh atang chuan thlasik tlai ni tla tur mawizia chu sawifiah thiam mai chi pawh a ni lo. Thlasik rim chuan lung a ti leng veng veng a, mit thim tlin tawk chu chhum sen leh tlai ni tla tur innek vel chuan a khat a ni ber mai.

Hetia ngaihtuahna hmang mumal lova khuanu siam mawi tak takte ka lo thlir reng lai chuan a aia ka mit la tu ka hmu ta thut mai.

Chu tukverh atang chuan khawvel thil hlu tak tak hi a hmuh theih tih ka hre chhuak a, lirthei inzui kawi nguah nguah te, in ropui tak takte chu a maktaduai tel man a ni ngei ang, mahse chu’ng zawng zawng chu melh kanin head hunter’s den loch house 1890 tih inziak in chuan ka rilru a luah ta hle mai.

Mizorama Kristianna a rawn luh kum chu 1894 kha a ni ngei e, khatih hunlaia sap missionary-te’n kan hnam la mawlman zia an sawi pawh kha a dik fu ang. Civilization pianna tura hun inchherchhuan pakhatmah zawh tlang hman lo, vikings hunlai ang maia mahni mihring puite lu tan hmawk hmawk hnam kha kan la ni.

Mahse, Missionary rawn kal hma khan tun century thlenga in zahpuiawm ni ngai lo tur kha kum 1890 khan Aizawl khawpui ngeiah mai hian a lo ding luah tawh mai si.

Ka camera tha lemlo chuan chu in thla chu zuk lak mai ka’n tum a, mahse tum ang ngawt a ni hauh lo. Vai sipaite chuan kum za chuang kan lo enkawl tawh a nih hi ti niawm tak hian riak nawk nawk chungin thlalak an phal loh zia chu an hmel enin a hriat theih.

Chu tukverh pahnih atang chuan Loch House, Mizorama In upa ber ni ngei tur chu kan thlir kan thlir ta ringawt mai a.

“He in hian chanchin a ngah tawh viau ang, a chhunga chengte hi chuan an hrechiang viau ang,” tiin kan sawi leh ringawt thin.

Kan thianpa pakhat tlawmngai chuan a thla zuk lak a’n tum ve leh ngial a, mahse an phal lo. A hlawhchham fithla thak.

He In kan hmuh apiang hian a chanchin tlema zawng kan hriat belh theih kan inbeisei thin. Mahse chu beiseina chu tiau chhum ang maiin khua a rei hnuah a thamral leh mai thin zawng a nih hi.

Thla kan la ta!
Tun hnai mai khan chanchinbumite leh Assam Rifles-te’n inkawmna an nei a, he an inkawmnaah hian engtinnge Mizo mipuite nen hian kan inpawh zawk ang tih lam hawiin senior journalist-te thurawn chu an la a, he an thurawn laknaah hian Zalen Editor Marema chuan Loch House, Mizofed Gas semna opposite hi Mizorama in upa ber a ni tawh mai thei a, heritage-ah i puang ang u tiin a rawt ta nge nge a, Zalen office atanga kan lo thlir fo thin chu kan hnam ro a tling dawn ta em?

A tukah chuan thlalakna kawng pawh a inhawng ta, hei hi pawn lam miin tun hnaia a thla an lak hmasak ber te pawh a ni a rinawm hial.

Aizawl khawpui lun lai takah chuan Mizoram ro hlu tak a inphum reng a, hun rei tak chhung haichhuah lohin a awm, tunah chuan mipui lam pawhin kan belchiang thei tawh ang.

Mizoram sawrkar chuan tourism lamah hma nasa taka lak a tum a ni awm a, Chalfilh tlang ngaw tha tak takte chu an rawt chiam niin tun hnaiah thawm a awm, hmun thenkhatah tourist hipna tur sak tumin an buai mek lai hian kan khawpuia kan hnam rohlu, Mizorama building hmasa ber ni ngei tur tha tak la awm hi an hmu ve si lo.

England-ah khuan Di In, khawvela Di In zawng zawng zinga upa ber an la vawng tha kiau a, Mizo hnamin kan chanchin kan chhuih theih kum aia upa a ni hial tawh a rinawm. Chu In chu Pu PL Liandinga’n UK-a a zuk zin tum khan a thla a rawn la nghe nghe a, mi tam takin an hlut hle a ni awm e.

Di In mai maia kan la chen laia hetiang In mawi tak an lo sak tawh, Kristianna ai pawha Mizorama lo thleng hmasa zawk hi kum khatah tum hnih thum Mizo mipui tan tlawh theiha hawn theihte han ni tehreng se. Mi pakhat tlawh man Rs 10 pawh nise kan tourist department te hian sum tam tak an hailut ve ngeiin a rinawm. Chuti ni lova ngawpui kan rawt zel dawn a nih chuan a chhuanmang rorel tlatin a lang. Ngaihtuahna hi i hmang tlang teh ang u khai.

Similar Posts:

• Scotland-Scottish Highlands leh Loch Ness
• Mizoram In Dinglai Upa ber ‘Loch House’ !
• Luseiho chauh hi em ni Mizo?
• CYMA-in dan loa sumdawngte hming Home Minister hnenah an hlan
• Mizoram House stinks

Recent Posts:

• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :

This entry was posted on Monday, June 11th, 2007 at 8:52 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.