Pathian Kut Dinglam {Sunday Pual}

September 8th, 2013 8:00 am by Dr John

1. Kut Dinglam
Hebrai “Yad”leh Greek “Cheir” te chu “Kut” (hand) tia lehlin an ni a. Kut (abik takin kut dinglam) hian chakna leh thiltihtheihna a entir a. Thuthlung Hlui hunah khan, Pathianin “Kut/bân tha chakna/ thiltihtheihnaa mi sualte hneh an nih tur thu” a lo sawi lawk ţhin (Deut.33:2, Josh.8:19, Sam 31:15 cf. Mark. 14:62). Chuvangin, bân uaithla (zawi) chu “chak lo” chhinchhiahna a lo ni a, chak theih nan “ban tihchak” a ngai ţhin a ni (Isai.35:3, Rorel.9:24).

2. Kut Dinglam Pawimawhna Leh Entir
Bible-ah Pathian kut dinglam chungchang kan hmu nual a, “Lal Isua chu, an hnena thu a sawi zawh chuan vana hruai chhohvin a awm a. Pathian ding lamah a han ţhu ta a… Amah ngei kha Pathianin Lalah leh Chhandamtua awm atan a ding lamah a chawimawi ta a… Tuin nge thiam loh chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni… Mihring Fapa hi Thiltihtheihna ding lama ţhu a, van chhum zinga lo kal in la hmu dawn a ni,” etc. (Mark.14:62, 16:19, Tirh.5:31, Rom 8:34).

Thuthlung Hlui-a kan hmuh angin, midangte hnena thuneihna leh thiltihtheihna hlânchhawng tur te, malsawm tur te chuan an kut kha khawihsak a ngai a, kut pahnih chu hmang tho mahse, kut dinglam chu duhthusam zawk a ni (Gen.48:13-14,18, Deut.33:2). Pathian nena inremna atana hâlral thilhlan tur bawngpa lu chunga kut nghah kher a ngaihna chhan nia lang pawh hâlral thilhlan tur nena inzawmna an neihzia entirna a ni (Ex.29:20, Lev.1:4, 8:23-24, Job.40:14, Hab.2:16). Thuthlung Thar hunah chuan Kut nghah rawngbawlna kha Thlarau Thianghlim thlentirtu leh thilmak tihtheihna atan hman a lo ni leh bawk a (Mk.6:5, Tirh.8:17-19, 19:11). Tin, 2Sam.18:18-na thu-a Absaloma hriatrengna Lung Tian (monument) pawh hi Hebrai ţawnga a inziah dan chuan “Absaloma Kut” (Heb.aḇ•šā•lōm yaḏ) tih a ni daih!

3. Thiltihtheihna Thlarau A Entir
Mika 3:7-ah chuan, “Lalpa Thlarau avanga thiltihtheihna te, rorelnate leh chakna-te chuan ka khat tak meuh meuh a ni,” tih kan hmu a. Helai thu aţang hian dinglam, chakna, thiltihtheihna, thuneihna leh rorelna-te hi thil inzawm vek an nihzia a tarlang chiang hle. Chuvangin, Pa ding lama Lal Isua ţhu chu Thiltihtheihna Thlarau a ni a. Pathian kut chak tak leh thiltihtheihna hual vela a awmzia sawina a ni bawk. Zawlnei Isaia hnena Pathian inpuanchhuahna hian a tichiang awm e, “LALPA chuan kut chak takin heti hian ka hnênah a sawi a, he chi te kawngah hian ka kal ve lohna tûrin mi thunun a nih hi!” (Isaia 8:11). Kut chuan thu a sawi thei lo tih kan hria a, he thu hian Pathian Kut Dinglam hian Hmuhtheihloh Thiltihtheihna Thlarau ropui tak a entir a ni.

4. Pathian Chawimawina Leh Krista Thuneihna
Pa Pathian kut dinglama Krista han ţhu ta in a entir nia lang chu, Krista thuneihna (Authority) chungchang hi a ni. Lal Isua Krista chuan Pathian venhimna, duhsakna leh khawngaihna zawng zawng a dawng a. Pa Pathianin a ţan-zia, a rin-zia, thuneihna a pek zia chiang takin a tarlang a ni. Hebrai 1:13 thu angin, Pa Pathian chuan hmelma zawng zawngte chu a kephah nghahchhana a siam hma loh chu, Lal Isua chu a kutdinglamah, a thiltihtheihna hnuaiah awm a, chawl rih turin a ti a ni! Marka 14:62-ah chuan ‘Thiltihtheihna kut dinglam’ tih kherin a dah nghe nghe.

Tirhkohte 5:31-ah chuan Pathian ding lama Lal Isua ţhu awmzia chu, Pathianin a chawimawi zia leh Lalah leh Chhandamtu-ah a ruat zia a tarlanna a ni tih chiang takin min hrilh a ni. Chuvangin, a ngial a ngana lâk a, Pathian chu mihringte anga kut leh ke nei a, a dinglama Lal Isua ţhuttir tak tak ang erawhchu a ni lo deuhvin alang. Chuvangin, Lal Isua chuan Lei leh Vana rorelna leh thuneihna zawng zawng a kutah a keng vek a, mitthi leh minung rorel saktu, Lalber leh thuneitu a nihna sawina atan hman a ni (Mt.26:64, Eph.1:20-22, Heb.10:12, 1Pet.3:22, Thup.3:21).

Charles Hodge chuan, “Lal Isua Pa dinglama ţhu hian khawvel pumpui chunga lalna leh thuneihna a entir a, hetiang chawimawina hi Pathian chauhvin a phu a ni” a ti hial. John Calvin pawhin, “Pa dinglama ţhut hian Pa-in a hnena thiltihtheihna a pek chu a entir a, Lal Isuan ama hminga lei leh van ro a rel theihna tur a ni” a ti bawk. Leia Lalte pawhin chawimawi an duhte chu an dinglamah an bul hnaite-ah an ţhuttir ţhin ang hi a ni. He dinhmun hi Vantirhkohte leh thilsiam dang reng reng-te chungah hetiang duhsakna, chawimawina leh dinhmun sâng hi a pek thu Bible-ah vawi khat mah alang lo.

He Thuneihna leh Chawimawina hi Tlantu ropui ber, Isua Krista chauhvin a phu a, a hnenah ngei pek a ni ta a ni. Chuvangin, Lal Isua chu thilsiam zawng zawng te, boruaka thuneitu, thlarau sual zawng zawngte, hun zawng zawng leh kohhrante chunga thuneitu ni tura Pa-in a chawimawi leh a ruat a ni. Tin, Pa ding lama ţhu satliah mai ni lovin, Pathian ding lama awm, khawnvar dahna pasarih zinga vei vei, a kut dinglama arsi pasarih keng, Pa dinglam aţanga a mite dilsak ţhintu, Thlarau Thianghlim hmanga kohhran leh ringtute enkawla khawvela hna thawk rengtu a ni bawk (Rom 8:34, Thup.2:1, John.14:26, 16:7-15, Heb.7:24-25).