“Rock music ngialngan a ni dawn†an tih avangin a hmaa an hla lo sak tawhte nena inpersan viau turah ka ngai ngawt a. Mahse, Tluanga (drummer)-in nimin tlai (July 16) khan office-ah cassette min rawn pe nawlh mai a. In ka thlen veleh ka ngaithla nghal a, ka rin ang a lo ni hauh lo mai!
Cassette ka lei emaw mi min pêk emaw hi vawikhata ngaihthlâk chhuah nghal hi ka nei tlem khawp; mahse, T-Melody album thar ‘Thinlung Thawnthu’ hi chu ka vawikhat ngaithlâkna-ah ka ngaihthla chhuak nghal vek! He album-a hla awmte hi Rock music chu a ni tehmeuh mai; mahse, ka chân ang chu a ni hauh lo thung! Heavy metal deuh hlîr an sak ka rin laiin an hla dahho hi a ‘variety’ hlawm hle.
Tang zetin hard rock tia sawi theih tur – ‘Dawn la’ (written by – VL Awia) in bul an tan a, ‘Ani lo chu’ (written by – Rengpuia) hla hi chuan heavy metal music rawng a kai deuh, mahse, Zaithanmawia ‘aw’ leh a thlûk kal hmang hi chu a melodious ruih thung! Album title ‘Thinlung Thawnthu’ (written by – Rengpuia) hi a fuh thlâwt – ‘thawnthu’ ngaihnawm tak a ni. A intro mawlh hi – han ngaihthla la, i rilru-ah Nirvana Unplugged kha i ngaihtuah chhuak ve mai thei! A bikin a chorus hi a fuh zualin ka hria. He hla hi country rock ni chiah si lo, blues rawngkai lek lek karah ka khung ve ngawt a. A lyric a tha em em a, guitar works leh voice mawlh hi a mawi.
T-Melody album-a hla ropui bera ka dah chu ‘A Leng An Ti’ (written by – Rengpuia) tih, A-Side 5-na hi a ni. A Intro’ a fuh lehpek hle, keyboard strings ri ruai ruai kara accoustic guitar plugged atanga bul tanin sentimental rock music ropui tak mai-ah an lût a, a music ‘hausakna’ hian he hla hi ‘khî tah’ a vawrh a, vuak ruk (a changa vuak thuma an thleh) hla ropui em em, ‘A Leng An Ti’ tih ringawt pawh hi he album lei chhan a tlingin ka hria. Hemi dawt chiah, A side tawp ber – ‘Pathlawi Lunglêng’ (written by – Rengpuia) pawh hian fak mawlh mawlh a phû. Eng music genre-a han khung tur nge tih lam chu ka music hriatna-in a pha ve lo – drums leh bass guitar work a ropuiin Nunsanga zai hian a ti ropui zual – a lyric milin a zai a, a lung a lêng ngawih ngawih a, a tap mai dawn emaw tih mai tura a aw a’n ti tial vel hian ‘zaithiam’ a nihna a pholang. Tin, he hla hi kan Mizo music tihausatu a nihna hi hai phal chi a ni lovang. A music khahzia hi – Guitar slide i hria ang a, Sitar ri hriattur a awm bawk. He hla ka duhna tizualtu chu a ‘finishing’ hi a ni – Khuang pui leh khuang te bengin ‘…Ka hawi ngam dawn em ni Vangkhawpui sum tualah? Ka sakhming an sêl e Pathlawi Lunglêng min ti…’ tia an zai rual thap thap mai hi phat rual lova mizo musi tihausatu a ni.
B-Side hla hmasa pahnih, VL Awia hlate hi a kalphung a inzûl deuh – Soft rock pangngai takah ka ngai. Mak ve deuh chu T-Melody te hi rock hla têng tha tak pawh sa se, an ‘trademark’ – accoustic nena Mizo-sentiment hla-ah bawk an lût leh thin.
Thinlai Thawnthu album-a mawi ka tih ber zinga mi chu ‘Inpuanna’ (written by – Rengpuia) hi a ni. He hla hi Blues music ngailngan chu ni chiah lo mah se, a blues em em mai. Guitar works a khat tha hle a, guitar khawih hi a mawi em em a, ngaihthlâk nawn awn awn tlâk, music ropui, he hla-ah hian an dah. Ka duh lai tak chu a lyric hi a ni – Hla chang hnih lekah hian philosophy ropui lutuk an phûm a ni – “Naupang lungmawl ka nih laiin/ Duhthu ka sâm thin/ Khawvel zawng hi thianghlimin ralmuang se/ Mahse, thianghlim famkim nih ka châk chângin/ Darthlalanga’n ka inen a/ Silfai leh theih rual loh sual bawlhhlawh kai/ Mi pakhatin nuihzatin min lo thlir reng thin†tih hi han chhût han chhût ve teh… A ril asin! A music mil turin a lyric-ah hian hla-thu (poetical words) an hmang lo ngam. He hla hi ka ngaihthlâk zin ber a ni.
A tâwp ber dawttu – ‘Hringnun hi’ (written by – VL Awia) tihb hi han ngaithla la, ‘a Iron Maiden’ khawp mai! A tâwp ber, ‘Nun Khawhar’ hi he album-a an hla dah zawng zawng zingah a music a ‘tûnlai’ berin ka hria. Zaia aw leh music arrangement hi a fuh thlâwt!
‘Thinlung Luahtu’ album-a hla zawng zawng hi Rock music vek an ni nâ a, a chi hrang (variety) em em a – Hard rock, Heavy metal, Soft rock (late 80s – 90s pure rock) ka’n tideuh kher a), blues music rawngkai leh progressive lek lek, he album-ah hian T-Melody hian an khungkhâwm a ni. Sawi leh sawi hnu, T-Melody album tharah hian eng ang paw’n han rock-in han tê thin mah se, an ‘trademark’ – Mizo sentimental rock music-ah an lût leh châwk thin niin ka hria.
Mizo rock band tha kan ngah ang hû-in mizo hla ngei, rock music tha kan nei tlem hle. Hetiang dinhmuna kan awm laia T-Melody ten ‘Thinlung Thawnthu’ min hrilh hi a vanneihthlâk takzet zet a ni. He cassette hi lo lei ve la, han ngaithla ve mah teh… hre mai ang.
