mi(sual).com

Kum 2003 Mizoram Assembly bial 40 inthlanpui vote thlak hma ni chiah, November ni 19, 2003-a Phullen khua atanga Party lian pathum MLA candidate-te rukbo anga thuthang chu thudik nge lemchan tih Zozam Weekly chuan a chhui chiang a.

Kum 2003 Mizoram Assembly bial 40 inthlanpui vote thlak hma ni chiah, November ni 19, 2003-a Phullen khua atanga Party lian pathum MLA candidate-te rukbo anga thuthang, Mizoram mipuite barakhaih em emtu kha inrukbo lem ni a a lan thu hemi chungchang chhui chiangtu khatihlaia Depty Inspector General of Police (Training) Lalsangzuala Sailo Inquiry Report chuan a tarlang.DIG (Training) Inquiry report hi ZOZAM chuan RTI Act hmangin a dil chhuak a. Heta a lan dan chuan Suangpuilawn bial MLA candidate pathum – Vaninmawia (MNF), H. Laltanpuia (MPC) leh Ngurdingliana (INC) te hi hel pawl emaw misual tute’n emaw an rukbo niin a lang lova. A chhunglam atanga thiltih (an act done from within) niin a lang zawk a ni. Rubotute’n mi an rukbona atana an motor (gypsy) hman pawh hi rukbo inti zinga mi Vaninmawia motor (MZ01-B 7776) a ni. He thil a chhui chiannaah hian DIG (Traning) hian Suangpuilawn bial MLA candidate 5-te tiamin mi 22 thu a zawt fiah a. YMA, VDP, Political Party leh tlawmngai pawl dang hruaitu engemawzat a kawm kual bawk a. Hei bakah hian inrukbona hmun BDO, Phullen chenna in leh a chheh velte, rubotute’n an rukbote an hruaina nia sawi kawngte a tlawh bawk a ni.

A chhuitu Police Officer-in mi hrang hrang a kawm kualte sawi dan atanga han khai khawm chuan inrukbo ni awma sawi kha a lemchan chawp mai mai a ni tih phat rual a ni lo. A changtute lah khan an chang thiam lo hle leh nghal, lemchan hrim hrim hi an thiam loh zawng tak pawh a ni maithei.

Kan la hre theuh anga inthlan dawn hnai, campaign in a vawr tawp a thlen chhoh lai khan Suangpuilawn bial-ah hian HPC’D’ hoin H.Lalsangzuala, Independent Candidate vote turin mi thenkhat an rikrap ni a sawi a ni a. Mi thenkhat hnenah silaimu thawnin Independent Candidate chu thlang ngei turin an hrilh niin an sawi a. HPC ‘D’ mi leh sate chet danah hian party hrang hrang (JDU, MPC, INC leh MNF) candidate-te an lungawi lo viau a ni.

HPC ‘D’ chet dan chungchang sawiho tur hian ni 19.11.2003 khan MLA Candidate-te hi Phullen Diakkawn a Lalvuana inah an inhmukhawm a. Independent Candidate H.Lalsangzuala chuan party hruaitu thenkhat hnena silaimu sem chungchanga a inhnamhnawih loh thu leh HPC ‘D’ te chet dan a hriatpui loh thu a sawi a. H.Lalsangzuala lo luh hma hian inrukbo chungchang hi sawi lan a ni a, C.Ramkinlova, JDU candidate chuan a hnial nghal nghe nghe a. An vaia an rem tih angin Ngurdingliana’n election commission hnena thawn tur complaint a buatsaih a. Chu lehkha a hming a ziah zawhah C.Ramkinlova hian in hi a chhuah san ta a, thil duhawm lo thleng thei a a lan tak avang hian Aizawl panin taxi a chhuak zui ta a. Chumi hnuah Tuivawl lei bula an chawlh laiin Gypsy pahnih leh Maxi cab pakhat Saitual lam pana chak taka tlan a hmuh thu he thil thleng chhuitu Police Officer a hrilh nghe nghe.

Hetianga uluk taka a chhuitu Police Officer chuan a thil hmuhchhuahte a khaikhawma a chip dan chu hetiang hi a ni:-

MLA candidate 3 – Vaninmawia, H. Laltanpuia leh Ngurdingliana te hi rei tak inkharkhipin thil an rel hova, MLA rukbo anga ruahmanna tur hian hun tam tawk an nei a ni. MLA candidate zinga pakhat C. Ramkinlova (JDU) chuan MLA candidate-te hian inrukbo lemchan chungchang hi an sawiho tih a sawi chhuak a. Ngurdingliana’n rawtna a siam a kum 1998 MLA inthlan a A.Siama’n rukbo lem a chan chungchang a sawi zauh chu hnialin C.Ramkinlova chuan, “Kum 1998 pawh khan Suangpuilawn bialah hian A. Siama khan rukbo lem a chang a, mahse inthlanna chu ruahman lawk angin kal tlangpui tho a nih kha,” tiin a chhang let niin Inquiry Officer hi a hrilh a ni.

Suangpuilawn bial Phullen khaw Polling Station-a Presiding Officer Pu K. Lalrammuana pawhin MLA candidate-te titi hmawr lam a hriat ruk thu a sawi a. Chutah chuan Pu C. Ramkinlova hian “Rukbo in ni ve si lova,” a ti a, Pu H. Laltanpuia chuan “Min rubo dawn a lawm,” ti a a sawi a hriat thu Inquiry Officer a hrilh a ni. NSUI General Secretary Pu Lalpekliana (Congress candidate Pu Ngurdingliana campaign puitu) sawi danah pawh Pu Ngurdingliana motor Maxicab MZ01-B7910 khalhtupa Laltanpuia’n an party candidate Pu Ngurdingliana rukbo a nih tur thu leh YMA Park hmuna lo nghah tur a nih thu a hrilh niin a sawi. Pu H. Laltanpuia driver, MZ01-A8483 (Gupsy) khalhtu Lalduhawma pawhin ti tura hrilh a nih angin chawhma dar 11 velah YMA Park a pan a, chutah chuan a lo ding tih a sawi a. Pu Ngurdingliana motor Maxicab MZ01-B7910 khalhtupa Laltanpuia pawhin hrilh a nih angin YMA Park hi dar 12 velah a va thleng a, Gypsy pahnih lo ding tawh chu a hmu niin a sawi. Gypsy pakhat zawk chu Pu H. Laltanpuia ta a ni a, pakhat zawk erawh chu tu ta nge a hre thei ta lo a ni.

Pu Vaninmawia hian amah vengtu PSO (Personal Security Officer) Constable Lalhmingliana, 2nd Bn. IRP chu November ni 18 (rukbo hma ni) khan Phuaibuang khuaah a kalsan a. Vote thlak ni (Nov. 20)-ah a vote thlak thlenga lo awm turin a hnutchhiah a ni. Pu Ngurdingliana pawhin a PSO Constable Laltlankima, 1st Bn. MAP chu Thanglailung khuaa a bag leh bungrua la turin a tir a, Aizawl lama haw tura inpeih turin a hrilh a. Hetiang bawk hian Pu H. Laltanpuia chuan a PSO pahnih – Constable Lalthanliana, 1st Bn. MAP leh Const. H Lalrammawia, 2nd Bn. IRP te chu chaw ei turin a tir bova, Phuaibuang lam pana kal tura inpeih turin a hrilh. Hetianga anmahni venghimtu tur PSO te an tirh bo vek hunlaia inrukbona a thleng ta hi rukbo lemchanna tura ruahman lawk a ni tih ti langtu a ni.

Pu Vaninmawia motor Gypsy No. MZ01-B7776 driver Zohmingthanga chu Saituala kala mi va hruai turin tirh a ni a. Saitual pana kilometre chanve vel a kal tawh tihin kawngsira awm mi 3- chuan ding turin an lo vai a. A din hnu chuan inher tura an hrilh angin a inher a; a motor number thup tura an tih angin a thup bawk a, tichuan Phullen BDO chenna in lam panin an let leh ta a ni. Mi pathumte hian an hmai an tuam a, driver pawh chu hmai tuamna an pe nghal a. MLA candidate 3 te hi phurin Saitual an pan ta a ni. Pu Vaninmawia Gypsy hmanga MLA candidate te rukbo an ni hian ruahman lawka thiltih a ni tih a tilang a ni.

Pu Vaninmawia, Pu H. Laltanpuia leh Pu Ngurdingliana te’n rukbo an nih hnu-a anmahni rubotute’n an chhuah lehna hmun an sawi dan hi a inang lova. Pu Ngurdingliana chuan Tamdil kawngpeng-ah an chhuah niin a sawi a, a thiante pahnih erawh chuan Tuivawl lui/lei bulah an chhuah niin an sawi thung. Pu Vaninmawia leh Pu H. Laltanpuia te pahnih chuan Tuivawl lei bulah Police nen an intawka an chhan chhuak niin an sawi a, Pu Ngurdingliana erawh chuan Tamdil peng bulah Police nen an intawk niin a sawi thung.

Inrukbo thu chhuia buaipui tura Saitual lam atanga Phullen pana Police party kal hmasa ber chu Pu Lalzahngoa, Dy.SP, Saitual bial viltu Zonal Police Officer a ni a. Pu Lalzahngoa’n Inquiry Officer hnena a sawi danin kal kawngah hian motor pathum – MZ01-A8483, MZ01-B7776 leh MZ01-B7910 te a hmu a, driver Laltanpuia leh Pu Ngurdingliana te chu Tamdil peng bulah a hmu leh bawk a. Hetah hian Commandant 1st bn. MAP, Aizawl lam atanga lokal leh a hote nen an inhmu ta a ni.

MLA candidate 3-te hian YMA Park-ah an chawl lo niin an sawi a, rubotute hian BDO chenna in atang hian Tuivawl/Tamdil peng lamah an hruai niin an sawi bawk. Mahse, an driver theuhte’n Inquiry Officer hnena an sawi dan chu a dang thung. Driver ho hi chuan YMA Park-a an kal thu an sawi a, YMA Park-ah hian MLA candidate 3-te hi anmahni motor theuhvah an lawn a Saitual an pan niin an sawi a ni.

Pu Ngurdingliana sawi dan chuan a motor leh candidate dangte motor hi Tuivawl lei bula tipper lo tangin a dang a. Candidate dangte erawh chuan Tuivawl lei bulah an tang lo nia an sawi bakah kawng ping a awmlo niin an sawi thung. An driver pathumte hian Pu Ngurdingliana sawi dan hi an thlawp a. Pu C. Ramkinlova taxi-a chuang ve Phullen khua Pi Thangsangzuali chuan kawng pinna hmunah hian Pu H. Laltanpuia hi a hmu niin a sawi.

Candidate 3-te’n Tamdil Tourist Spot-ah an kallo nia an sawi hi Pu Tanpuia driver Lalduhawma sawi dan nen a inang lova. Tamdil Rest House-ah hian candidate 3-te hi a thlenpui tih a sawi. Pu Vaninmawia motor khalhtu Zohmingthanga chuan candidate 3-te hian chaw an ei zawhah Tamdil chhuahsanin Saitual an pan tih a sawi a. Tamdil Tourist Lodge enkawltu Sailesh Deb, Chowkider pawhin Driver Zohmingthanga thusawi hi a tawmpui a. Mi 4 Gypsy a an lokal thu leh a hnu-a chaw ei tur phur Gypsy dang a lokal leh thu leh chaw an ei zawh hnu-a an kal leh tak thu a sawi a ni.

Rubotute’n Tuivawl thlen hmaa an hruai dan hi an sawi dan a inanglo leh bawk a. Pu Vaninmawia chuan kawngpui thlen hma-in ramhnuaiah furlong chanve vel an hruai niin a sawi a. Pu H. Laltanpuia erawh chuan kawngpui-ah hian Saitual panin ke-in an kalpui a ni a ti thung.

Inquiry Officer-in a thil hmuh dan report a khaikhawmnaah chuan Suangpuilawn MLA candidate 3-te November ni 19, 2003-a rukbo an nih chungchangah hian hel emaw misual emaw an inrawlh lova, a chhung atanga thiltih niin a lang a ni a ti a. Rubotu nia an sawi hmai tuam pathumte hi tutenge an ni tih erawh chu chhui hun chhung a reiloh avangin hriat chhuah theih a ni ta lo a ni, a ti a ni.

He inquiry report atanga a lan dan leh thil awmdan han chhui zawn ta ila. Suangpuilawn bial hi HPC hel pawlte chet hluarna a ni chungin sorkar chuan Police operation a chawlhtir a (Vide No. D-32020/138/2003-HMP/pt dated 23rd Oct.2003 leh D-32020/138/2003-HMP/pt dated 3rd Nov. 2003). Police kut phuar a nih denchhen hian HPC helhote chuan duhtawkin an candidate duh ber Pu H. Lalsangzuala (Sangnova) chu an campaign pui a. Mite vauin silaimute an sem ta a ni tiin Inquiry Report-ah ziahlan a ni. Hetianga mipui vaubeh an nih takah hian Party hrang hrang unit hruaitute pawh an party candidate tan an campaign ngam ta lova. An khuaa Pu H. Lalsangzuala vote zaa za a hmuh loh chuan an nunna-in a tuar dawn tia silaimu sem lakkhawm leh tuma vautu helho an hlauh avangin an che ngam lo a ni.

Hetianga boruak chhe tak mai, campaign pawh awmze nei talo leh fair taka inkhina tlin theih a nih tak loh dan tur an hriat chian em avang hian Political party lian aiawh MLA cadidate pathumte hian inrukbo lem chan mai hi an rel ta niin a rin theih a. Candidate 3 ngawt rukbo an nih chuan inthlanna hi thiata inthlan that neih leh theih an beisei a. Bial khat chauh a nih chuan venhimna tha tawk nena inthlan theih a nih ringin inthlan that sual chhuah theih beiseina nen inrukbo lem hi an chang ta niin a lang. Mahse, he kidnap drama hi a lemchan thu (script) ziaktu leh a changtute’n an thiam vak lova, Inquiry Officer hian a lem a nihna a hmuchhuak ta mai niin a lang bawk.

Zozam News Service

A CHHUITU POLICE HNENA MI HRANG HRANG THUSAWI

“November 19,2003 zing dar 10:30 velah party hrang hrang worker-te min kohna angin Phullen a Diakkawn veng in pakhatah ka kal a. Hetah hian Pu Ngurdingliana, Pu Laltanpuia, Pu Vaninmawia leh Pu Ramkinlova te an lo awm a. Pu Ngurdingliana chuan inthlanna chu free and fair a ni thei lo a ni tiin P&E Department wireless hmanga thu thawn turin min ti a. Hetah hian Pu C.Ramkinlova’n “Rukbo pawh in la ni lo,” a tih leh Pu H.Laltanpuia chuan,

“Min rubo dawn alawm,” ti a a chhan thu ka hria.”
– K.Lalrammuana, Presiding Officer, Phullen

“Hei (inrukbo) hi HPC ‘D’ mi leh sa emaw tualchhung mi awm tha duh lote thiltih emaw a ni theiin ka hre lo”
– M.S. Dawngliana, President, MNF
Suangpuilawn Block II

“Zan dar 8 velah Gypsy pakhat mi pali vel phurin a lo thleng a, chaw a awm leh awm loh min zawt a. Chumi hnuah Gypsy dang pakhatin an ei tur a rawn phur a, an ei a. Hemi hnu lawk hian police motor a lo thleng ta.”
– Sailesh Deb, Chowkider,
Tourist Lodge, Tamdil

“Ni 19 November,2003 chawhnu dar 2:20 vel khan mi pakhatin Saitual a kal turin min ti a. Diakkawn atanga Km chanve vel ka thlen chuan mi pathumin min lo tiding a. Ka pu chu BDO quarters ah a awm tih min hrilh a, ka motor number plate chu puanchhia min tuamtir a. Motor chhunga kan luh hnuah an hmai an tuam a, kei pawh chu hmai tuam ve turin min ti a. BDO in panin chak deuhin min tlantir a. Kawtah chuan ka ding a, pakhat chuan silai kengin inchhungah a lut a, candidate pathumte chu a hruai chhuak a. YMA park kan thleng a, Gypsy pahnih leh Maxi cab pakhatin min lo nghak a. Hmaituamte leh Pu Ngurdingliana leh Pu Laltanpuia te chu an chhuk a. Pu Vaninmawia pawh chu a hmaah a rawn chuang a. Pu Laltanpuia leh Pu Ngurdinglianate pawh chu an motor (lo ding sa) ah chuan an chuang ve ve a, Tuivawl lam kan pan ta a ni.”

– Zohmingthanga, Vaninmawia driver

Similar Posts:

• Laltanpuia Awmna Veng Nih Duh Lo
• ABCI Proj. Manager, Meidum Camp atanga Kidnap an ni
• Kawnpui-a Gypsy Chesual-ah 2 hliam,thi awmlo
• Pu Hminga’n Model Code of Conduct a bawhchhia
• Inrukbo rawtchhuaktu puang

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Friday, October 12th, 2007 at 4:29 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.