mi(sual).com

(Zalen March ni 11, 2007 chhuaka tihchhuah a ni)

Hei hi nikum khan ka ziak ve mai mai a, Zoram Ni-a Souvineer an siamah tarlan a ni ve a, chu lehkhabu chu “Zawlkhawpui Senmei Chan Ni Kha” a ni.
Ka tan chuan kum 41 liam ta chu thil hlui a ni lo thei lo, thalai tam tak pian kum let thawk liam taah khan Aizawl khawpui chu Pi Indira gandhi-i’n bomn chimit vek a tum a, mipui ni lovin, a ram leilung an duh vangin India rama a vawikhatna atan India mipui (civil mi) chu bomb-a beih kan lo ni tawh si a…

Aizawl March 4, 1966:
MNF movement avangin boruak a muanawm lohhle a, India sipai hmalakna ngaichangin mipui an titi luai luai a. Engtinnge India sipaite chu an chet ang tia mipuiin an inrinsiak luai luai lai chuan thlawhna nen India sipai chu an rawn che ta a, machine gun hmangin Aizawl khawpui mawi tak chu an rawn kap ta chiam mai a ni.

“Khatih hunlai kha chuan kan la changkang lo a, kan tan chuan India-in khatiang taka min rawn bei ta mai kha chu mumang ang mai a ni, a rapthlak lutuk. Mahse khawvel hriat tura sawi chhuah nachang kan hre lo,” tiin India-in Mizoram a beilai hmutu chuan a sawi a.

Nia, kum 1966-a thil thlengte chu kan la hre reng a, tunah kum 2007 lo inherchhuak tawh mah se, kum 41 liam taa thil thleng avang hian India sawrkar chet dan hi kan theihnghilh thei tawh dawn lo a ni. |hangtharte’n kan theihnghilh lo mai a ni lo ang a, India sawrkar hian ngaihdam a dil tur a ni tiin kan la auchhuak ang.

Aizawl March 5, 1966:
India-in Mizoram a beih ni hnihna a ni a, hemi ni hian mipuite chuan beiseina sang zawk an nei. Mahse chu beiseina chu Pi Gandhi chuan a thlendiktir dawn si lo, tlawhna chu vung tak takin a rawn thlawk a, Aizawl mipuite tan bihruk mai loh chu tih tur a awm lo, dan an la duh tlat a.

“In hnuaiah banker kan siam a, kan zuang lut a, kan boru nghal a,” tiin Aizawl bomb lai hretu chun a sawi a. “Keini chuan ralkhat atangin kan thlir a, kan tlanchhia a. Aizawl chu a alhin a alh hluah hluah mai a ni, a ni hnihnaah chuan,” tiin Pi Lalhmangaihi, Laipuitlanga cheng hlun tak chuan a sawi.

Hemi ni hian bomb chu maipawl tiat tiat a tla a, mipui tan tawrh a har.

Pi Gandhi a rapthlak:
Sawichhiat tur pawh a ni lo a, sawi mawi theih pawh a ni hek lo. Kum 1966 kum hian Indira Gandhi chuan Mizoram chu vaivuta chantir pawi a ti lo. Burma leh Bangladesh inkar cheha awm Mizoram hi a ram chiah hi Gandhi chuan a duh niin an sawi thin, chuvangchuan a mipuite chu tih chimih vek duhin kan khawpui ber Aiawl chu a bomb ta a nih kha. US-in Japan khawpui pahnih a bomb ang mai khan Mizo mipui hian he thil lungchhiatthlak tak thleng hi kan theihnghilh thei mai dawn em ni?

“Aizawl khawpui chu India sawrkar chuan a chhe thei ang bera chhuah a hreh lo, Champhaite leh Saitualte chu MNF kutah hetihlai hian a awm tawh si a. Hei vang hian India sawrkar chuan Aizawl chu vaivuta chantir a tum a ni,” tiin Col. Vanthagna, ram buai laia MNF tana lo fehchhuak thin chuan a sawi.

Hunter and Toofani:
Assam hmun pawimawh pakhat Tezpur atangin Hunter leh Toofani thlawhnate chuan Mizoram khawpui an rawn pan a, heng thlawhna khalhtute hian Aizawl khawpui chu dim baksak lovin an rawn bomb ta chiam chiam mai a ni.

Vanneihthlak takin Mizo mipu te chuan he thil thleng hi kan theihnghilh ta a, tunah dinhmun tha kan chan tawh avangin kha’ng hun laia thil thlengte kha kan hre reng ta lo. Mahse thangtharte chuan India sawrkarin min hmuh dan leh min hriat dan hi kan hriat reng a that a rinawm. Joe Lalhmingliana Wing Commander India Air Force hlui chuan, “Tezpur Air Force Base atangin Mizorm hi beih a ni,” tiin a sawi a, Tezpur hi tunah hian MIG 21 thlawh zirna atan an hmang mek a ni.

“Hemi tum hian India hian a ram mipuite lakah a vawikhatna atan air force hi a hmang a, a rapthlak takzet a ni. Goa beih kha chu Portuguese rikrapna a ni,” tiin Wing Commander hlui chuan a sawi.

Tun thlengin India sawkar hian Mizoram a beih chhan hi a la sawifiah thei lo a, engvanga thlawhna hmang hiala bei nge a nih tih a sawi hek lo. Hei hi India chuan thurukah a dah a, a sawichhuak lo ni mai lovin Mizoram thlawhna hmanga a bomb hi a zap tlat ma a ni, Mizo ipui tam takin kan la hria a, hetianga dawt hmanga India-in thu a thup duh hi a mak kan ti lo thei lo vang.

Khasi valin Mizo thlavang hauh:
Mizoram buai lai khan thlavang hauhtu kan mamawh a, ziak leh thlalak document reng reng a awm lo. India sawrkar chuan document dah a phal lo niin an sawi a, tun thlengin hard facts hi hmuh tur a vang hle, Mizote tana thil pawimawh tak chu Khali MLA-in kan thlavang an lo hauh kha a ni.

Hoover H Hynniewta leh Stanley DD Nichols Roy, hetih hunlaia Assamn MLA (Mizoram kha Assam a la ni a, District chauh a la ni) te chuan Mizoram an bomb hnu lawk hian Aizawl hi an rawn tlawh a, an thil hmuhte chuan an rilru a tina hle a ni.

JV Hluna, Aizawl bomb chungchang chhuiletnaa sulsutu ber chuan hemite pahnih thusawi hi a tarlang a, “A rapthlak a ni, Aijal tlawhna hmanga beih tum hian MNF leh MNF lo thliar hran a ni lo a, mipui kha an bei tawp mai a ni,” tiin Roy chuan a sawi.

Indira a daw thei:
Hei hian Aizawl bomb a ti rapthlak leh zual, Hindustan Standard chanchinbu chuan kum 1966 March ni 9 khan Aizawl bomb chungchang hi a tarlang a. Indira Gandhi chu hemi chungchangah hian zawhna zawtin Indira chuan, “Keini chuan chaw leh mihring dahbelh turin kan tir,” tiin zuk han sawi a. Hetih hunlai hian Nicolas Roy chuan Indira chu zawhna zawtin, “Hetiang ration hi engtinnge mipuiin an chhum ang,” tiin a zawt let niin JV Hluna chuan a ziak a, hei hian Mizo mipuite min hmuhsit zia a tarlang chiang hle.

Chuan…
Kum tin Aizawl bomb hun hi a inherchhuak dawn a, hetih hunah hian thangtharte hian Aizawl bomb chungchang hi khawvel hriat khawpin kan tlangthantir thei dawn lawm ni. India sawrkar hian ngaihdam min dil ve se, compensation pakhatmah kan la lo. Min tihduhdah a, min diriam hle si a, ngati nge kum 41 chhung kan ngaih theih. Nakkumah eng nge thleng ang.

Similar Posts:

• Aizawl a bomb an ti…
• Mizo = Indian
• Mizote thlawhna hmanga min beih lai in Naxal te erawh beih an ni ve dawn lo!!!!
• Zirtirna diklo a nih kan hre lo : MZP
• MIZORAM CHU AIZAWL (Aizawl Khawpui zauh a tul kher em?)

Recent Posts:

• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :

This entry was posted on Friday, March 7th, 2008 at 6:26 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.