Tunlai khawvel hi thalaite khawvel an ti tawh a, Mizoram pawh hi kawng thenkhatah chuan thalaite khawvel a ni ta. Amaherawhchu ram rorelnaah thalaite’n hmun kan chang tlem a, tu huatthu ni lo se, kum upa tawh tak tak, rorel tura tling tawh lo (elegible) lote’n ro an rel mek a. Khawvel thang zel milin Mizoram an kaihhruai thiam tawh lo a ni tih hi ka pawm dan a ni.
Tin, Mizoramah hian ruk ruk te, drugs hman sual te, zu in thiam lohna te, eirukna te, chhungkaw induhsakna hleihluak te, sumdawngte duham tawlh tawlhna te, mihausa chapo em emna te, mi retheite retheihna te, thalaite hna neih lohna te, kuthnathawktute harsatna te, tualthahna te, naupang pawngsual thlengin a nasa em em a, pastor-te meuh pawh an quarters-ah rapthlak takin an thi ta nawlh nawlh mai a nih hi. Lehkhathiam tan pawh duhsaktu neih that a ngai a, party leh chhungkua induhsakna avangin Mizoram chhungah thalaite tan hna thawh tur pawh a awm ve bar lo. Aizawl leh khawpui danga mi hausate lah chuan kan dinhmun hi ngaihsak loin nuam an tawl mai mai a, hetih lai hian thingtlang lamah chuan kuthnathawktute an harsa em em a, pawl lianpui, ZKP dinin rorelna dik tundin tumin an hmanhlel ta.
Mi retheite khaichhuak tur te, thalaite harsatna sukiang tur te, Mizoram hi chenna nuam zawka siam tur te, mi dik leh mi thain Mizorama ro an rel theihna turin thalaite kan penchhuah a va tul em! Lunglei-ah chuan thalai rual intelkhawmin, Youth For Mizoram an din a, Serchhip-ah pawh thalai rual intelkhawmin Serchhip District Youth Convention an din bawk a, Kawnpuiah pawh Kawnpui Youth Association an din a, Aizawl-ah pawh Youth Movement For Mizoram din a ni ta.
Mizoram history hi chhutin, nu leh paten an thlawp emaw thlawp lo emaw, sorkar hnathawkten an duh emaw duh lo emaw, a sorkar laiin an ngaithei emaw ngaithei lo emaw, thalai inhlawmkhawm, thalai movement hian ram dinhmun a tidanglam tho tho thin. Entirnan: Mizo Union pawh kha thalai rual intelkhawm an ni a, lal leh a upate rorelna duh lo an ni a, an hlawhtling hle. MNF pawh kha an hotute chu thalai lehkhathiam rual vek an ni a, Mizo tlangval lehkhathiam zawng zawng deuhthaw chu an lut vek a, Mizoram tidanglamtu an ni.
Tun dinhmunah pawh hian thalaite hi kan harha kan insuihkhawm chuan Mizoram dinhmun hi kan tidanglam thei a ni. Tute party-in emaw pawisa an ngah avangin thalai movement hi hmehmih theih a ni dawn lo va, member rinawm lo an lo awm a nih pawhin a tichhe tur khawpin chakna an nei dawn lo va, vauna leh thlemna pawh tawk ila, thalai zawng zawng hi vau leh thlem sen kan ni dawn lo. Thalaite intelkhawm zel ila, kan ram hi siamthat a ngai e. Kan ram hian harsatna a tawh lai hian a mamawh che a, Mizo nula emaw, tlangval emaw i nih ve phawt chuan i ram hian a ko che a ni. Y4M-ah emaw, SDYC ah emaw, YMM-ah emaw, KYA-ah emaw, i theih chuan tel ve la, i awmna hmunah hetiang thalai pawl hi a la awm lo a nih chuan Branch din ve ang che.
Thalai Rualte’n Mizoram Kan Siam Tha Thei? Kan siam lohin tunge siamtha chuang ang? YMA-in maw? YMA-ah chuan hruaituah sorkar hnathawk tam tak an awm a, ram siamthat hna thawk turin rorelna chungchang sawi a ngai si a, an sorkar hnathawhin a phuar tlat a, dem theih pawh an ni lo. Hei vang hian alawm corruption-te pawh YMA atang chuan a do theih loh? Office-a an pute, an Minister-te eirukna haichhuah hi YMA hruaitute tan thil theih a ni lo a ni. I hrethiam ang u.
Kohhranin maw? Kohhran hian mipui rilrua politics atchilhna thlipui tleh thin kha theihtawpa tihreh tumin a bei mek a ni. Mahse, kohhran hruaitute tan inthlana din ve emaw, political party pakhat lo tan bik emaw a rem lo va, mipui rilru siamthat bak tihtheih an nei thui loin a lang. Mipui rilru siamthat hi hna ropui leh pawimawh tak a ni a, hemi chin an ti pawh hi a lawmawm em em a ni. Kan Minister, MLA leh Officer rual eirute pawh hi kohhran member vek an ni a, Kohhran chu counselling hna thawktu a ni. Presbyterian-a thalai pawl, KTP-in kumpuan atana ‘Rorelna Dik’ an tihte hi a lawmawm a, kumpuana hmana mi tha thlangchhuak thei tura politics tui nu bansan tura inzirtir bak hi chu pelh a har ve hle ang.
Thalaite inhlawmkhawm erawh chuan kan mi duhzawngte kan sawi thiang a, kan mi duhzawngte pawh kan sawi thiang a, tih tak takah chuan kan thalaipuite kan duh a nih pawhin a thiang tho. Democracy rama cheng kan nih avangin a tupawh rorel tura thaa kan hriat, mi dik nia kan hriat kan vawrhchhuah hi a thiang a ni.
Kan duh a nih chuan political party din kher loin independent candidate-te kan dintir vek thei a, thalai zawng zawngin chung mite kan thlawp chuan an tlin loh chhan tur a awm lo.
Mizoram kan siamthat leh siamthat loh tur hi thalaite tanrual leh tanrual lohah a innghat a, kan tanrual phawt chuan kan ram hi siam theih a ni tih i pawm theuh ang u. Mizoram siam that theih tawh loha ngaite hi mi beidawng an ni a, Mizo thalaite kan beidawng lo a ni tih hi Mizoram mipuite hian hriat an mamawh e. Thalai pawl hrang hrang hmangin pen chhuak ve rawh le. Thalai Rualte’n Mizoram kan siamtha thei e.
Similar Posts:
- Thalai Movement Leh Kei
- Thalai Intawkkhawm
- Thalaite I tangrual ang u
- Youth For Christ (Mizo Thalaite Lal Isua Tan)
- YMM website peihfel tep a ni
April 14th, 2008 at 5:00 pm
e… Anthony i ziak tha khawp e. Ka lo vei ve fo tawh thil ani. Tin,Internet kal tlang hian engtin nge… Mizo Thalai rual hi kan tan rual theih ang aw?tih hi ngaihtuah a ngai viau tawh in ka hria….. Internet kal tlangin, comment,ideas,te leh thu rawn tha tak tak kan pe hlawm a… atha in a fin thlak hle ani. Mahse, tun ah erawh chuan ACTION a kan lantir hi angai ta viau ni in ka hre ve ani. Chu vangin Mizo Thalai ho zawng zawng hi THU KHAT VUAN in ….. Tangrual in ACTION in ti ilang ila , cutah zet chuan theihloh thil kan neih ka ring lo! Action lantir nan a kan tih mak mawh tur a chu kan VOTE hlu tak te hi ………. mi dik, mi tha, mi huaisen, mi taima… hnen ah Huaisen takin i pe ngam ang u!
Report this comment
April 14th, 2008 at 5:10 pm
Lunglei District tan Youth For Mizoram a ding tawh a, Aizawl leh Mizoram pum tan Youth Movement For Mizoram a ding tawh a, Serchhip District tan Serchhip District Youth Convention a ding tawh a, heng pawlte hi donation khawn tum lo, Pathian tih mi thalaite pawl, rorelna dik duha ding an ni. Hetah hian member a nih theih reng a, mahni veng theuhah Branch a din theih bawk. Hma lo la ve ta che.
Report this comment
April 14th, 2008 at 6:02 pm
misual site hi ka chhiar fo va, hun neih tlem vangin ka login khat khop mai. Mizoram politics hi ka vei ve hle thin a. Mizoram hnuaia sorkar hnathok ka nihve avangin hlemhletna te hi a langapau nilo mahni tok2 chuan ka vei ve hle thin. Tumah hi i va eiru e chu kan tilo nachungin kan source of income leh kan thil neih inmil dan leh kan in chet len hleihdan hian a hril mai a. Sawi tam vak poh a ngai awmlo e. Kan assets lang thei chin atang ringawt poh hian CBI koh luh te chu hlau tur hi kan ni reng a.Kan sorkar chak tak hian a kolut lo hi chu an tih tur hluah2 a ni e.Kan ministers,etc. ringawt ka demlo, kan officers zingah poh hian a tam zawk hi chu mi hlemhle niin ka hmu a. A dem2 a kan inhrual chuan in hruai fel chi ziazang kan ni tohlo a ni. Ka ngaihdan chuan ram hruaitu , tah poh chuan a lu ber C.M. a poimawh ber , te hi midik leh diklohna haw ngam annih chauhin rampuma corruption zual za pui chu tih reh theih a ni ang. Tunah hi chuan kristian ram kanni tih hian awmzia a nei ta lova, kan moral leh kan image pawh tihchhiatin a awm zo ta.
Tuna kan sorkar hi a that loh chuan thlak chu kan tih tur a ni phawt mai.Mithalo an awm chuan an that hun nghah tihvel emaw, midang poh an tha chuanglo tih lam ai chuan thlak phot hi kei ka ngaih dan chu ani . Pathian chuan misual a ngaidam thin a, mahse khawvel ram rorelna ah chuan apply ve chi ah ka ngailo.Mahse tuna kan kaldan atang hi chuan bei chu a dawng deuh. Ka bei a dawn deuh avangin ka rilru chu ka sawh sawn chuang lovang. Kan in zirtir thiam fe loh chuan tuna mipui tam zawk te hi chu ram hruaitu tha thlang chhuak zia zang kan nilo hi a buaithlakna lai tak chu a ni. Engtinnge mipui nawlpui , a dik leh diklo poh thliar hrang thiam manglo leh retheihna avanga party system politics a kal vung na ah hian beisei a san viau theih ang le tih hi.
Report this comment
April 14th, 2008 at 6:40 pm
tmapa, i ti lawmawm khawp mai. Mi rinawm tak i ni tih a hriat theih. Tikhan lo awm tawp la, nangmah chhan thei khawpa kan awm hunah i hun a la thleng ang. Tun ang hunah chuan inthup tlat a ngai, an hriat chhuah che chuan i tan a pawi thei.
“Pathian chuan misual a ngaidam thin a, mahse khawvel ram rorelna ah chuan apply ve chi ah ka ngailo” i tih atang ringawt pawhin Mizoramah sorkar leh sakhua dah hran pawimawh zia i hre tlat. Hemi hre lo hi 99 % kan la awm.
Rinawm takin lo awm la, officer sual zual lo chhinchhiah kiau la, kan la hrem tawk tawk dawn nia. Nangmah leh i chhungte chuan chanthatna in hmu ang. Tunah chuan a risky lutuk. Misual rorelna a nih hi.
Report this comment
April 14th, 2008 at 11:51 pm
A chhe lai siamthatu Thalaite
https://misual.life/2008/03/07/a-chhe-lai-siamthatu/
Report this comment
April 15th, 2008 at 12:24 am
Zawlbuk hun lai a ta tawh Mizo thalai te khan ram ven him leh mi rethei thawk mawhte khai chhuah hna kha Mizo Thalai te mawh a ni a. Hmanlai atang Thalai te khan kan mizo nun pumpuiah hian a bu lum lai an luah reng thin a, tuhah kan thang harh leh tan ta hi a lawm awm hle a ni.
Report this comment
April 15th, 2008 at 12:41 am
Mizoram a siamthat ngai ber chu kan MORAL hi niin ka hria a, THALAI ten kan MORAL/ VALUES hi kan siamthat theih chuan kan ram chu kan dingchhuak in ka ring. Moral Reconstruction mawlh hi a tul hmasa a nih hi…
Report this comment
April 17th, 2008 at 7:11 pm
Kan ram thanmawhbawk pakhat chu thalaite kan ho lutuk hi a ni. Tunah hian thalaite kan tanruala, rorelna tha kan neih a tul ta takzet ta. Thingtlang pa thinrimin Aizawl-ah bahra laih an tum ut ut tawh a, Aizawl mihausate inah sawhthing a tak an ring ta. Hei hi thalaite hian kan va hrethiam lo ve.
Thalaite hian thutak ngaihtuah tlang ila, Mizoram siamthat tum thalai pawl lo ding thar hrang hrangah hian i tel theuh teh ang u. Aizawl mite tan Youth Movement For Mizoram-ah, Lunglei lama mite tan Youth For Mizoram-ah, Serchhip lama mite tan Serchhip District Youth Convention-ah, Kolasib tlang dung leh Champhai-a mite pawh insuihkhawm thuai rawh se.
Heng zinga mi, YMM hi Aizawl lamah vung takin an kal mek a, website pawh an siam a, https://www.ymm.co.in lo tlawh ve la, member-ah lo inpe ve ang che.
Report this comment