mi(sual).com

Source: Zozam Weekly

Sorkar hi thusawi thiam leh tawngkam thata tlingtlak theih ni se chuan Pu Rama hi CM ropui ber a ni thei ang. Rorel thil a ni zawk si. – Lalhmingliana Saiawi

Mizoram Chief Minister ni tawh zinga vannei ber tiin thenkhat chuan an sawi, Zoramthanga hi. Pa tha tak tia sawi thin a ni a. Pa tawng hmang thiam leh tawngkam bungrua nei tha, mi dangte hneh thei tia sawi a ni bawk.

Mizorama thiltithei ber a ni a, thiltithei ber ni tur leh mipuite’n an aiawha rorel tura an thlan lal a ni.

A tawng erawh a umpha lo fo, chuvang chuan sawisel a hlawh fo reng a ni. Tunah pawh awisel a hlawh a, a tawngkam avangin Hnahthial chuan district ngiatin chaw an nghei mek.

Kum zabi 21-a ram hruaitu kan neih chhun leh kan innghahna chu chief minister ni mek Zoramthanga a ni. A hrethiam pha chin leh chin lo pawh, tu te pawh chief minister zahawm tak hmalakna hnuaiah kan awm a ni.

Chief minister thitithei a ni a, Mizo history-a hmun ropui chang thei turin hun tha leh duhawm a nei. Mahse, a hun laiin Mizoram chu economic development lamah eng ruai a ni lo, chu chu phat leh zep chi a ni lo.

Kum 10 dawn sorkarna a chan chhungin ram tana ro a siam hmuh tur a awm lo, chu chu tawngkam na tak a ni thei. Mahse, a nihna tak a ni si.

Chief minister zinga vannei ber tia sawi theih turin a chetsual palh pawha veng theitu tur adviser ngah ber a ni. Khawvel awm tirh ata Mizoram Chief Minister zinga Adviser ngah ber niin panga lai a nei a, chuti chung chuan tawngkam a chhep sual fo thung.

Switzerland of the east tih thu te, Missionary nuai khat tirh thute pawh thangtharte zel titi a la tling ngei ang. Mizorama thiltithei ber Chief Minister tawngkam chhuakte hi a thamral dawn si lo.

Hnahthial leh District

Hnahthial-in thisen far tawp thak thlenga district an ngiat chhan hi chief minister tawngkam vang a tih theih ang. ‘Kan term chhung ngei hian district pek che u kan tum’ a ti miau a.

Chief Minister chuan Hnahthial khawtlang hmaah, “Kei pawh keima mimal ngaihtuahnaah chuan Lunglei District hi a lian lutuk a, chuvangin then a ngai a ni kan ti a. Chuvangin, kei pawhin a tha ka ti a, Hnahthiala a awm ngei hi. Kan term chhung ngei hian district pek che u kan tum. Tin, chu chu a hma thei ang bera kalpui pawh kan duh, kan thawhho a ngai a ni. Chuvangin kan term chhung ngei hian District headquarter pek chu keini pawn kan tum a ni,” tiin a lo sawi tawh. Chu chu Hnahthial khawltangin an hre reng, an bawhzui a, thih ngamin chaw an nghei hial.

Chief minister hian Hnahthial chu a fuih chiang a, “Tun thila pawimawh ber district headquarters pek che u kan duh a ni. Cabinet-ah pawh kan sawi, hman niah pawh, kan tanho a ngai a ni. Lunglei District a lian lutuka a buaithlak, thil sem dawnin district wise-a sem loh theih a ni si lova. A intawmin a tam lutuk Lunglei District hnuaiah Hnahthial hi district hranga a awm dawn chuan Lunglei chan zat chang chiah lo mah se Proportionate a nih chuan nasa takin in chang tam dawn. Khami Hnahthial district-a awm te tan chuan nasa takin inhlawk thei,” a ti. Hnahthial khawtlang tan beiseina duhawm a siamsak a, thawh puiah a sawm hial.

Chu mai a ni lo, a cabinet minister H Vanlalauva chuan chief minister-in a tiam tawh chu a tihlawhtling ngei ang tih a sawi a, “A hun chhunga ka ti ang a tih Chief Minister-in a tiam tawh hi a ti lo a nih chuan next election-ah hian a chhiat phah dawn a ni tih hi a chiang em em a ni,” tiin Hnahthial mipuite a hnem. Chu hun chu 25.10.2002 daih tawh kha a ni.

Beiseina mawi tak chu Hnahthial khawtlangin an hre reng, district neih chu phu an inti a. Mizorama thuneitu sâng berin a tiam tawh chu tihhlawhtlin a nih theihnan hma an la ta a ni.

Hnahthial atangin Aizawl thlengin ‘Long March’ an nei a, chaw ngheiin an ngen zui a, an nghei satliah a ni lo, thisen far ral thak thlenga nghei an huam hial.

Mipuite thlantlin, mipuite aiawha roreltu tawngkam chu rintlak a ni tur a ni a, mi satliah a nih loh avangin a thusawiah pawh a ding ngei tur a ni.

Hnahthial hian District ngiatin hun rei tak chhung chawngheiin an nawr a, damdawi inah an lut pheuh pheuh bawk. Sorkarin ngaihsakna a lantir lova, Central YMA-in palai hna a thawk thung.

Dawrpui khawtlangin Civil Hospital ramah hmun neih an duh. Anni pawhin chief minister an dil a ni. An dilna chu bawhzui theih tur angin thu a thlah a, chu tak chu Dawrpui khawtlang huaisen phahna chu a ni.

Kan Chief Minister hi a nihna leh ram tana a thawhnaah pawh a zahawm, fak phuna tam tak a nei. Ram tan chan pawh a nei teuh ang. Mahse, a tui mah mah thin a ni.

Rev Chanchinmawia chungchang

Chief minister chuan Rev. Chanchinmawia chu mahni intihlum ngei a ni tih a chhungte pawhin an pawm thlap nia sawiin, “Vanduaithlak takin depression a nei a, a rilru a buai em em a, mahni intihhlum a tum a, chhungkuain an veng a, muthilhna damdawi vei khat ei a tum te, a chhung te’n an chhuhsak a. An inveng char char a, pastor te’n councelling an ti a, thenawm khawveng nen tan an la a. Amaherawhchu, vanduaithlak takin tuk khat erawh chu rapthlak taka thiin hmuh a ni a, a nupui leh a chhungte tah hlaah chuan ‘kan inveng zo ta lo a ni maw’ tiin. Ama intihlum ngei a ni tih a chhung te’n an pawm thlap avangin police-in an rawn chhui hmain engkim an lo silfai a, ‘mi hmuh tlakin kan pa hi i lo siam ang’ tiin an lo ching fel vek a ni. Tichuan, a chhung te’n an pawm thlap a,” tiin a sawi.

Khatlla Kohhran leh YMA pawhin mahni intihlum a nih an pawm thlap nia sawiin, mahse, kum 2008-a puitling Sunday School-a a lehkhabu ziak an zir dawn avangin a tlangkawmna siam lova chhui mek ang a kalpui tura tih niin a sawi a, “Tin, Khatla Kohhran pawhin an pawm thlap a, Khatla YMA pawhin an pawm thlap a. Chuvangin, mahni intihlum chu tiin bialin a vui a rem dawn si lova, ‘Pastor Quarters-ah erawh chuan vui min rem tihsak theih chuan a lawmawm khawp ang’ an ti a, a vuitu tur Pastor pawh chutiang ti tura lo inbuatsaih, inring thin fel vek a ni. Amaherawhchu, a hnuah ngun leh zuala ngaihtuahin Kohhran hruaitu te’n a kum leh lawkah a Sunday School ziak zir tur ziak kan zir dawn si a, chuvangin, ngawi teh u, Police hian ngun leh zualin chhui sela, FIR te thehlutin hei hi ngun leh zuala chhui a tha lawm ni, an ti ta a. Tichuan ngun leh zuala chhui turin lehkha pek a ni ta a, a tlangkawmna siam rih lova chhui mek a nih chuan Biak Ina vui a lo rem ta a, tichuan Biak Inah tha takin, mawi takin vui a ni a. Kohhran hotu te’n an tih hi an tih awm reng a ni,” tiin a sawi.

Chu mai ni lovin Rev. Chanchinmawia thihna chu politic inbeihna atana mi vanduaina ball-a hman angah ngaiin, “Chuvangin, heti khawp hian tuallaiah thawm kan lo hre ta a, an sawi pawr duh a, chhui leh tura an duh a nih chuan Magistrate hnenah appeal-na pein min chhui nawnsak leh rawh an ti tur a ni. Hei hi a nih dan tur a ni tiin kan home minister Pu Tawna pawhin House-ah a sawi vek. Mahse, tih tum an awm lo reng reng. A kal dan tur pangngai ang khan tuallaiah ‘sual hrim hrim sual hrim sual hrim Baffacos’ tih ang chiah khan a taka ti duh si lovin ‘mah reng reng se chu pawh a chuti, chu pawh a chuti’ sawi mar ringawt mai te. A nupui fanau ten ‘kan pa chanchin hi political ball-a hmangin hetiang hian min tihsak tawh lo hram rawh u’ an tih lawm lawm lai pawhin an tih luihsak tho. Chuvangin, helaiah hian ka zu sawi duh a chu, miin a ti duh a nih chuan chhui leh tura a appeal theih lai sia ti duh si lo, kan politic inbeihna atana mi vanduaina ball-a hman hi tun hunah chuan kan kalsan a ngai a ni,” tiin a sawi bawk a ni.

Hetihlai hian Khatla Veng V/C Vice President Ramliana Ralte chuan Khatla Veng mipuite’n October 21, 2007 zinga a chenna ina thia hmuh Rev. Chanchinmawia kha mahni inthat a nih an ring lo niin thuchhuah a siam thung.

“Tun hnaia chief minister Zoramthanga’n a bial Champhai leh a chhehvel khuate a fannaah Rev. Chanchinmawia chu mahni inthat ngei a ni tih Khatla Kohhran, Khatla mipui leh Khatla YMA te’n an pawm tawh a. Mahse, Sunday School-ah a thuziak zir tur a nih vangin FIR thehlut a, Biak Ina vui theih chang ni anga a sawi chu Khatla mipui te’n mak kan ti hle a ni,” tiin chief minister thusawi hi a chhang let a ni.

CBI ko lut dawn lo

Khawzawla a thu sawinaah vek hian chief minister chuan CBI chungchang sawiin, “CBI hi phai ram lam police te an ni a, phai ram lam police chuan tih dan an nei a, ka tawng an huatthu suhah phairam lama Thana OC ni tur chuan a nuai telin an inlei duh a ni. Case chhuitu nih hi a hlawk lutuk,” a ti.

Mi pakhat chungchang sawiin, “Mi pakhat chuan phai ram lama awmin cheng nuai thum bo chungchangah CBI min chhui tir a, tahchuan tihlawm an ngai tak tak chu cheng nuai 9 ka seng a, a la fel chuang lo reng reng, a ti.” tia sawiin CBI chu Zoram tih dan thianghlim palchhe tura a ngaih thu a sawi a ni.

“Zoram police erawh chu case sang sing tela intlanchhuaka pawisa pek ngai a awm lo. Tha takin, thianghlim takin Zoram chu kan case chhui pawh a kal mai a ni. Vai ramah erawh chutiang chu a ni lo. ‘CBI koh luh hi Zoram tan thain i hria em?’ ti ila, a hre thang IPS leh IAS te hian lu an thing na na mai ang. Tuman tha an ti lo. Zoram tih dan thianghlim thin rawn pal chhe tura rawn kal hi tuman an duh lo,” tiin a sawi bawk.

CBI ko luttu nih chu a duh loh thu sawiin, “Chuvangin Zoram hi humhalh a tul a, ILP….. an tum a, kan phal lo a ni. Chutiang chiah chuan kan Judiciary, Custom pawh a ni. Chuvangin, hei zawng zawng hi hria tin Pu Ch. Chhunga’n koh luh a duh lo, a term chhungin Pu Thenphunga’n a ko lut duh lo, a term chhungin Pu Deng a’n a ko lut duh lo, A chief minister chhungin Pu Lalthanhawla’n a ko lut duh lo. Ka thiam vek a ni, a ko lut hmasa ber ka ni dawn lo. Ko lut ila thangthar hian nakin zelah min ngaihdam ka ring lo. Chuvangin Zoram kan humna turin vai ram police tih dan dangdai nei ho hnuhluh hi ka duh lo hrim hrim, Zoram tan a that ka ring lo. Chief minister kal tawh zawng zawng pawhin tha an ti lova. Chuvangin, ka ko lut dawn lo,” a ti.

Lalthanhawla khan chief minister a nih laiin koh luh theihnan hma a la a, mahse, a tlakpui, hmalak zuina a awm lo. Chief minister dangin koh luh an duh lo tia, a sawi chu a sawi dik lo.

Mizoram hi state a nih hnuah Congress leh MNF party-in sorkarna an chang char char a, Lal Thanhawla’n CBI kohluh a nih theihnan ‘General Consent’ pawh a pe, chumi hnua chief minister ni leh awm chhun chu Zoramthanga a ni a, a ni chuan CBI koh luh chu Zoram humhim duh vang nia chhalin a duh lo. CBI koh luh hi Zoram tana thil tha lovah a ngai hial a ni.

Baffacos

Khawzawla vantlang inkhawmah chief minister chuan Baffacos chu buhfai leina tur a ni lo, tia sawiin, “Tam lo thleng tur atana lo indawm nana tan lo lakna tur a ni a, chu’ng tihnan chuan a then kudam ruak ni lo, kudam chhia kan repair a, a thar kan sa a. Tin, a panna kawng Jeep Road tal, motor-in a thlen theih lohna chin kawng kan siamsak a, baffacos atangin. Mautam ral tur lakkhawmna turin bamboo road kan kalpui a, a Industry lamah kan buaipui bawk a. Tin, chulovah Vawk vulh, Ar vulh, Sangha khawi, Sericulture, Agriculture, Horticulture leh chi dang dangah chu’ngahte chuan mipui eizawnna siam turin Department-in hma an la char char bawk a ni. Buhfai man tur, buhfai leinan Baffacos hi ngatinge an hman loh an ti. Pawisa laklawh avang erawh chuan pawisa tlemte chu kan hmang, Buhfai leina tur a ni lo, buhfai leina chu Non-Plan atangin dahsa kan nei vek,” a ti.

Chief Minister thu sawi hian belhchian a dawl hauh lo. Mizoram sorkar chuan buhfai leina atan baffacos pawisa a hmang chiang a, hman loh theih loh a ni bawk. Buhfai leina tura dah a nih thu hi Baffacos action plan Mizoram sorkarin a tihchhuahah chiang taka tarlan a ni a. Buhfai leina tur ringawt atan pawh 139.70 crore mamawh tur anga chhut a ni.

Baffacos hi kum nga chhung kum 2004-09 inkar chhung atana ruahman a ni a, chu ruahmanna hnuaiah chuan Mizoram-in rice a mamawh zat chu 168392 Metric tones anga chhut a niin chumi atana pawisa mamawh zat chu Rs 139.76 ni tura ngaih a ni bawk.

Tichung chuan Mizoram khaw tam takin harsatna an tawk a, mautam vanga harsatna tawk tanpuinan mi thil phal ten thawhlawm an thawh a. Kohhran thenkhatin kumthar ruai theh lovin thawhlawm an thawh phah hial bawk a. Chu mai a la ni lo, India ram pawn atangte pawhin tanpuina a lo lut hial bawk.

Chief Minister dangdai

Mizoram Chief Minister zingah Zoramthanga aia chanchinbu mi te hmachhawn hreh an awm lo.

A hun lai chuan Lal Thanhawla chu Chief Minister zinga nelawm lo leh chanchinbu mite biak pawh khat ber a ni a, a ni ngei pawhin chu chu pawmin Congress-in Assembly an neihnaah ngaihdam a dil hial.

Mizoram chanchinmu mi zingah Zoramthanga interview thei an awm lova, an awm lo mai a ni lo biak pawh hleihtheih a ni lo. Chutihlai erawhin phailam chanchinbu mite lakah erawh a inphal hle thung a, an duh tawkin an be pawp thei thung.

Chutak chu Chief Minister a nih laia a thiltihsual lian berte zinga mi a ni ang a. Kan Chief Minister zahawm tak hian Chief Minister a nih hun chhunga a chanchin ziaktu tur pawh a nei lo hial thei. Mizoram Chief Minister ni tawh zingah Journalist-te tana tlawh pawh leh biak pawh harsa ber a ni a, a tawngkam thlum ang aiin chanchinbumi tan chuan mi nelawm lo ber a ni thung.

Mizoram Chief Minister ni tawh zinga chanchinbu mi te ngaina lo ber tia chhal ngam a ni.

Aw, kar a hla
MLA Lalhmingthanga’n “Aw, kar a hla…” a tih vawng vawng chuan chief minister Zoramthanga chuan “Aw, kar a hla vawng vawng…” a tih a ngai ang!

Constable atanga DGP-a kaisan dan a hria a, chu kawng chu zawh turin police constable-te a fuih nghe nghe. May ni 8-ah khan PTC, Lungverha training chhuakte hmaah thu sawiin, constable atanga DGP thlenga kaisan theih a nih thu a sawi a nih kha.

Constable leh DGP inkarah hian rank a awm ve nual; police lal lo ber leh lal ber inkarah chuan a tam tur pawh a ni reng a ni. Hetiang hian tarlang ila a chiang mai awm e:

MRP
Constable – Head Constable – ASI – SI – Inspector – DSP – Addl. SP – SP – SP (Selection Grade) – DIG – IGP – Addl. IGP – DGP

Battalion
Constable – Lance Naik (hei hi tun hnaiah tihbo a ni) – Naik – Havildar – SI – Inspector. Inspector chung lamah chuan MRP nen a inang.

Tunlaiah hna a vâng a, hna a vâng mai a ni lo, a hmu tawhte pawh an tawt a, kaisang hlei thei lo khawpin an indip mek. Chutiang khawvel chu a nih avangin constable atanga Head Constable-a kaisang tur ringawt pawh hian kum 20 lo thawh (service) tawh te a ngai thin!

Amaherawhchu, constable vengva deuh, matric pass chin chu kum 5 velah te ASI-ah an inziak tling ve thei. Chumi hnuah SI-ah an la inziakkai thei bawk. Chuta tang chuan, diptu an neih miah loh chuan, emaw, an vanneih viau chuan, DSP leh Addl. SP-ah te an kaisang thei ang. Mizo zingah pawh constable atanga Addl. SP kai thei an lo awm tawh nghe nghe.

Addl. SP chinah chuan a tak talh tawh ang. MPS post an thleng tawh a, MPS an inziak tling a nih ngawt loh chuan SP emaw, aia sang emaw chu vana rah tluk a ni tawh ang.

A chung leh phei chu IPS post te a lo ni tawh a, a khirh lehzual ang. Mizoram sorkarin MPS a ‘confer’ ang a, chumi dawtah India sorkarin IPS a ‘confer’ leh te a nih chuan thuhran!

Chhangpialthiama
March ni 17-ah mai khan, Budget Session liam taah khan Zodintluanga, Buarpui bialtu MLA zawhna – “Tuirial Hydel Project hna chhunzawm loh chhan nia sorkarin a hriat dik tak eng nge?” tih chu chief minister, power changtu Zoramthanga chuan, “Thil man san chhoh zel dan milin Tuirial Hydel Project estimate hi NEEPCO-in revised estimate a siam a, chu chu Ministry of Power, Government of India-in pawmpuina (approval) a la pek loh avangin chhunzawm rih loh a ni,” tiin ziakin a chhang a nih kha.

“Chhunzawm leh turin Mizoram sorkarin hma a la mek a, NEEPCO phut angin zawh hnua power lei thu hlaah pawh Mizoram sorkarin unit 1 zelah Rs 3.00p-a leisak a remtihsak a, rei lo teah chhunzawm theih thuai beisei a ni,” CM chuan a ti a, “Ministry of power approval hmuh hmaa hnathawh chhunzawm theih a nih rih loh avanga chawlhsan lailawk tir a ni,” a ti bawk.

Hei hi tak tak a nih chuan Tuirial Hydel Project siam hna chawlh a nih chhan chu NEEPCO-in revised estimate a siam vang tihna a ni a, revised estimate siam a nih chhan chu thil man san chhoh zel vang a ni. Chutiang chu thil nihphung ve pakhat a ni a, a sualna a awm hran lo. Sorkar laipuia ministry of power-in chu revised estimate chu a pawm veleh tan leh mai tur niin a lang a, ministry lamin an la pawm loh avangin hna kal lai pawh chawlhsan lailawk rih mai mai niin a lang. Mahse, ministry of power hotute sawi dan erawh chutiang a ni lo!

Nikum September ni 11-ah khan Prime Minister’s Office joint secretary Sanjay Mitra chuan ministry of power hnenah Tuirial Hydel Project chungchangah hian lehkha a thawn a, chu lehkha chu December ni 12, 2007-ah ministry of power joint secretary Jayant Kawale chuan chhangin he project hna chawlhsan a nih chhan a hriattir a ni.

He hna hi June 2004 atanga chawlhsan a nih thu sawiin ministry of power joint secretary chuan, chawlhsan a nih chhan chu law & order thil vang niin a sawi. A chhehvela ram neitute’n an thlaite tihchhiat a nih manah compensation an phut hnem lutuk a, hei hian law & order thlengin a tibuai niin a sawi bawk.

Thil man sang chho zel chungchang pawh a sawi ngei a, June 1997-ah Rs 368.72 crores sihchhuah (sanction) a nih thu sawiin, thil man pun zel dan atanga chhut chuan October 2004-ah chuan senso hi Rs 687.80 crores-ah a chho dawrh tih a sawi tel.

Thil man san zel dan mila a senso punna tur chu ministry of finance lamin an pawm thei lo a, ministry of power chuan NEEPCO hi DoNER lamin cheng vaibelchhe 200-in pui mai se tiin an rawt tih te pawh lehkhaah chuan tarlan a ni.

DoNER lamin chuti zat zat grant pekchhuah chuan an remti rih lo tih tarlan a ni a, Mizoram sorkar pawh an electric eng chanpual tur chang bik lova, state-in a mamawh chu a vaia lei mai tura ngen an nih thu leh Mizoram lamin hei hi an remti rih lo tih te tarlan a ni bawk. He Hydel Project sak hna thawktu NEEPCO leh Mizoram sorkar inrem dan chuan, a power siakchhuah 12% chu Mizoram chanpual tur a ni a, mahse, sorkar laipui lam chuan chuti zat chang bik lo tur leh mamawh zat chu lei ve mai turin Mizoram sorkar a rawn tihna a ni.

Eng pawh ni se, he lehkhaa a lan dan chuan revised estimate pawmfel a la nih loh vanga he Project hi chawlhsan niin a lang lo. Compensation a tam luattuk vang zawk a ni.

Thil man sang chho zel milin compensation an chhut pung thur thur a, thil-ti-thei te’n an insem hiau hiau laiin chang ve ta lote an awm ang a, chutiang hnuah chuan revised estimate an siam ang a, chu chu sorkar laipuiin a pawm ta lo tihna a ni thei?

Tawngkam thain Sial a man
Champhai naupang, tuna Lungleia awm ta Zasiami chu kan chief minister Zoramthanga te nena naupan laia inkawm, inrual khat an ni a, Zoramthanga titi thiamzia chu a titi tui a ni.

Naupang te an nih lai pawhin Zoramthanga chuan a thawnthu phuahchawp a sawi a, mittui tla teuhvin an ngaithla thin a ni awm e. Zoramthanga thawnthu phuahchawp ‘Vur ram nula’ phei chu he nu hian a la sawi thei nghe nghe.

Naupang Zoramthanga chu a lo thanglian a, a tawngkam thiamna chu a awmna chin apiangah a hmingthan pui a ni ber. Ramhnuai sorkarah pawh khan Laldenga ADC-a an dah chhan chu a tawngkam thiam vang, Mizo tawng leh sap tawnga thu a sawi thiam vang te a ni pakhat niin chutih laia MNF hruaitu senior te chuan an sawi.

A thusawi thiamna hian politics-ah pawh a chawisang hle. Khingpuite tan pawh hnial a peihawm loh khawp ang. MPC nena an thawh dunna a keh hnua MNF sorkar hnuaia Mizoram Annual Budget pharh hmasak ber tum pawh khan House-ah khan MPC member-te chu nalh takin a chhang a nih kha.

MPC MLA te’n budget an han sawisel khan ani chuan Reiek tlangval chanchin a sawi a:

Reiek tlangval pakhat pawh a chhungte hriat mang lohvin sipaiah a lo intlar ve a, a tling mial lehnghal. Training-in a chhuak, training zawha a haw chu buhseng hun nen a innang a, a pain buhseng turin a ti a ni awm e. Ani inti vai ram awm chuan, “Buhseng ka thiam tawh lo…” a ti a, a pa ngaihdan a ni ta lo, “Mama, i thangbo chhung khan buh kan lo seng bik hlei nem,” a ti e, a tia Zoramthanga chuan!

He thu hi thutak a ni lo mai thei, mahse, thu ngaihnawm tak zawng a ni. Reiek tlangval kha kum tir lamah training-in a chhuak a, kum tawpah a haw a. MPC te nena an thawhho laia an hmalakna vek kha an pharh ta a ni, tiin chu thu chu Zoramthanga hian a sawi a ni.

Nawrh tum leh lungawi lote pawh a thlem thiam. Officer pakhat pawhin an department chungchangah a dawr a, “A nih chuan lehkha rawn ziak rawh,” a lo ti a ni awm e. Chu officer chu hlim deuhvin a haw a, mahse, lehkha a’n ziak dawn chuan hriatchhuah a nei; chief minister kha direct-in lehkha a lo thawn thei hauh lo!

“A theih loh,” lo ti bur se kha officer kha a lawm lo ang. “A theih loh thu min lo hrilh bung vut se chu ka lawm lo khawp ang. Mawl pawh ka ti viau ang chu,” tiin nui ruh ruh chungin chu offier chuan a sawi a ni.

“Chuti a nih chuan kan chief minister hian a mipuite hian engmah an vei tak tak lo tih a hriat avangin thiam takin a duh duh a sawi thin tihna a nih chu,” tiin chu officer thawhpui pakhat chuan a lo sawi bauh a!

@chhana: Khawngaih in i email i lo en dawn nia. Zozam enkhawltu te hriatpuina/phalna nen a ni em tih kan hre duh a. Zozam Weekly contact (mail/phone) theihna tur kan hmu mai si lova.

Similar Posts:

• Hnahthialah district ngenin mipuiin kawng zawh
• “Hnahthial District thar siam a ni lovang” – CM
• Cabinet thuchhuak nghah mek a ni
• Hnahthial district a piang ta
• MNF-in India a dona chhan, CM-in a sawifiah

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Wednesday, May 28th, 2008 at 4:25 pm and is filed under More than words, News. You can follow any responses to this entry through the RSS 2.0 feed. You can leave a response, or trackback from your own site.