“Kekawr mawngtet nen khawvel ka chen I ti maw”, ti a kohhran upa aw thum tham raih mai, pulpit chim hlauhna reng reng neilova a han au kha chu, “A dik mange aw” ti a mittui parawl kuang chunga ngaihthlak mai loh chu tihtur avang kher mai. A ni lah tak a, keini misualho, kan sualzia hre ve reng chunga thu ve ran tan chuan tah hawm hawmna tham reng zawng a ni e.
Mahse ka han dawnchiang a, “Mihring hi engnge maw a niha I hriat reng thin ni!!” tih kha ka rilruah a lo lang. Thenkhat in kum 5 chhung lekin in ropui ansa a, retheite chanai eizovin an inchhek milian a, eirukna sum a kohhran rawngbawlin, pulpit ah an lawn a, thawhlawm tamber an thawh bawk a. Kuthnathawkte thisen in an inbual a, mahse “I vanglai hian I siamtu hrereng rawh” an la ti fan a ni lawm ni. Thenkhat lah chu sawrkar zemzen tih takah sorkar zem hi an zen takzet zawng a ni. “Tap chungin kraws kawng ka zawh zel ang” tia ban pharin an nui vun vun mai zawng a nih hi. An ban pharna lam a an nghawkthluk, an aia pate zawk chu an haider lui si. “Aw nangni MISUALHO..” tiin min la au khum zui maw….
“MISUALHO MIN TI MAW!!!?”. Keizawngin, eiruka babel insang sak tumte, retheite eitur dangchat a missionary ka chawm intite, kuthnathawkte tap authawm palzut a thisen chhuah hmangte, sawrkar zem diklo tak a zen a diktak a pulpit lawn tum leh si te, chanhai leh riangvaite kutsil khum a tawngtai tlawr duah hote leh zoram mipui tamtakten eitur an neilo ani tih hre chunga dulkiar tak zut hun hun chingte ai hian zawng, “Keini misualho, kan sualna hria a ding chhuak ngam nih hi ka thlang zawk”. “An ni mifel nilova, fel inti ho” nih ai chuan misual mahni sualzia hretute nih hi ka la thlang cheu si. A chhan min zawt maw? “Keizawngin ka sualzia ka hriat lai tak hi Pathian ka hnaih lai ber ni in ka ngai ve tlat asin”. Amah KL Liana tihdan takah, “Bible phen a biru langsar kuk, eiruk hmang Farisai nih ai chuan, misual nih hi ka thlang zel dawn e” ka ti rilru ta zawk a.
