-Mawizuala, Ex-Secretary,MNF.Gen.Hqrs , Mizoram
Brig.T.Sailo chunga thil thlen dan hi Pathian thiltih mak tih loh rual a ni lova. Thlarau mit keu tan
chuan hriat thiam ngei chi a ni. Mak ve tak mai chu, keima mimal leh ka chhungkua a thil thleng mak ka tih em em nen a intawk fuh chat chat hle bawk a. Keima taksa chung ngeia natna, a na lai dawm chunga ka tawngtai changa chawpchilha Lalpa tihdamna ka chan thin dan leh, thenkatte chunga kan nupa a kut nghata kan tawngtaina chhanga chawpchilha Lalpa tihdamna chang Lalpan min hmuh tir zauh zauh bawk a. Mahse, hetiang lam thu chu sawi tur awm ve nual mah se, Lalpa remtih awm chena ka ngaih chauh ka tarlang mai a ni a. Chutih rual chuan ngaihtuah zui dan kan thiam theih nan keima mimal leh chhungkaw chunga thil thlengte tarlan hmasak a tul a.
MPC a ka luh hma chhung zawng khan Brig.T.Sailo hi a CM laia Special Force din a MNF te do angin ka ngai nghet hle a. Amah pawh hi thih hlauhawm dinhmunah a ding reng maiah ka ngai a. Kum tam fe hnu ah, hmanni lawk khan Special Force kha a din a nih loh zia a rawn sawifiah chauh mai a. A mak leh pek khawp mai. Thih hlauhawma a din lai khan, MNF chuan kah hlum tumin tan an lo la ngei a. Mahse, a kaptu turte khan an silai a tlawlh zel thu leh an zinga tel ve zingah Brig.T.Sailo lam hawia silai tin thei miah lo an awm tih kan hre thar bawk a. Tin, Pu Laldenga, silai tung nghal mai lova tan la tura a fuih avanga Jailah a tan phah hrep thu te khan rilru a rawn luah thar hneh hle bawk a. Pu Zoramthanga leh Pu Lalthanhawla te ni se an in justify ngun tur zia tih te ka ngaihtuah bawk a. Brig.T.Sailo hi a dikin a lo pa rem rem hle mai tih min hriatchhuah tir bawk a.
