October 2008 Mizoram Diary

November 2nd, 2008 9:11 am by chhana

1^st. Wednesday: Tlungvel bulah KV Line hrui a chah avangin vawiin chawhnu lam atang khan Serchhip leh a chhehvelah Power Supply a awm lo.

2^nd. Thursday: 31st Mir Iqbal Trophy – 2008 (Under-16 Nationals Football Tournament) Punjab-a khelh mekah Mizoram chuan vawiin khan Tournament thlengtu Pubjab an hneh lova, Semi-Final-ah Assam nen 4^th October (Inrinni ) khian an intum dawn a ni.

3^rd. Friday: Zaithiam lar, H.Lalmuankimi chuan Aizawl ITI tlangval Lalzarmawia chu vawiin khan Presbyterin Kohhran ITI Vengchhak-ah ‘ tiam tlat e’ a tihpui ta.

4^th. Saturday: Mamit Dist. a Silsuri Middle School Headmaster chu vawiin tlailam dar 4 vel khan misual tu tih hriat loh mi 6 vel ni a hriat AK 47 silai keng te chuan an ru bo.

5^th. Sunday: Mizoram sorkar hnuaia Service Association pahnih – Mizoram Ministerial Service Association (MMSA) leh Mizoram Secretariat Service Association (MSSA) an member belhkhawm mi 6000 rual zet te chu sorkar laka lungawilohna lan tira vawiin atang a tiamchin awm lova Mass Casual Leave la a nawrh an tum chu CM ngenna avangin thulh leh a ni.

6^th. Monday: Inrinni kal taa rukbo Silsuri M/S Headmaster chu Mizoram Police Pu Ramthlengliana Mamit S.P leh a hote chuan theihtawp chhuah in an umzui nghal a, Kidnap tute leh an mi kidnap hi Mizoram leh Bangladesh inrina bul Mizoram chhung ah nang chingin vawiin khan an man leh nghal a, tun ah hian Mamit Police Station Custody ah mi ru bo tute hi hren mek an ni.

7^th. Tuesday: Mizoram Pradesh Congress Committee General Secretary, Pu Lalsawta, an pary thupuangtu ni bawk chuan Kautlabung leh Tuipanglui Small Hydel Project siam hna thawh chhunzawm anga insawia cheng nuai tam tak eiruah Chief Minister Pu Zoramthanga a puh.

8^th. Wednesday: Aizawl City Traffic Police-te’n a motor dahsawn tura an tih avanga lungawi lo, John Rotluangliana, Ex-Minister chuan Traffic Police Duty chu a motor-in a su a, hemi avang hian Traffic Police-te’n Aizawl Police Station-ah FIR an thehlut.

9^th. Thursday: Vawiin atang khan Mizoram chhung leh ram pawna Presbytery 36 zinga 33 ten Presbytery Inkhawmpui an hmang tan.

10^th. Friday: Tun kar laihawl vel atanga Vairengte leh a chhehvel kal hleihtheih lohva awm chu vawiin atang khan kal theihin a awm leh ta.

11^th. Saturday: Lunglei ADM(J) Pu KL.Liana tunhnaia Addl Session Judge a kaisang ta Aizawl a awm tur chuan vawiin khan a hna thar zawm turin Aizawl a pan ta.

12^th. Sunday: Nilaithawhtan ni atanga tan Mizoram Synod hnuaia Presbytery inkhawmpui chu a tiak ta.

13^th. Monday: Mizoram Football-a lawmman, tangkafai inchuh tamna ber, BSNL Cup 2008-ah 3rd Batallion MAP chu SSA Football Club si thum faia hnehin an champion ta.

14^th. Tuesday: Mizoram leh State dang pali Assembly inthlan hun chu Election Commission chuan vawiin khan a puang chiang ta a, Mizoramah chuan thla thar ni 29-ah Vote thlak a ni anga, December ni 8-ah vote chhiar a ni ang.

15^th. Wednesday: Kum hlui October ni 1-a a chenna, Khatla Pastor Quarter-a thi-a hmuh, Khatla Bialtu Pastor, Rev. Chanchinmawia thih dan chhui tura Pathianni-a Aizawl lo thleng, CBI Team-te chuan hnu chhui tanin thuzawhfiah awm hrang hranga an hriatte an zawtfiah tan ta.

16^th. Thursday: Assembly Secretariat hnathawk, Mizoram Legislative Assembly Secretariat Service Association (MILASSA) chuan Assembly Speaker Pu Lalchamliana chu a hnathawh that avangin vawiin khan chawimawhna thuziak an hlan.

17^th. Friday: Synod Revival Team speaker T/Upa H. Lalchhanhima leh a team-te chuan vawiin atang khan Mamit Tlangkhang Kohhranah Crusade an neia; he crusade hian tun thla ni 30 thleng a awh ang.

18^th. Saturday: Mizo Zirlai Pawl (MZP) chuan School Education Minister chu zirna hmanga Politics khelah an puh.

19^th. Sunday: Vawiin khan Durtlang Presbyterian Kohhranah MPF Awareness Campaign neih a ni a, chawhnu inkhawmah Upa Lalramthanga, MPF Gen. Secretary-in hun a hmang a, zan inkhawmah Upa Lalhunliana, MPF Campaigner-in hun a hmang thung a ni.

20^th. Monday: Mizorama Political Party hrang hrang leh Central YMA chuan Mizoram Assembly inthlan ni chu Inrinni ni lo, ni remchang danga sawn turin Election Commission an ngen.

21^st. Tuesday: YMA General Conference vawi 63-na chu zanin atang khan Serchhip-ah palai lawmna hun hmanga tan a ni a, 23^rd October (Ningani) thleng a awh ang.

22^nd. Wednesday: SP CID Crime hnuaia Special Narcotic Police Station Staff-te chuan vawiin khan Bawngkawn Hmar Vengah Ganja kg 2 an man a, a neitu Lalrinawma, kum 28, Thuampui Venga Vulliana fapa chu an man nghal a, thubuai an siam sak a ni. He Ganja hi cheng 5,000/- man ni-a chhut a ni.

23^rd. Thursday: YMA Con. chu a tiak ta. Nakum cofn. na hmun tur chu Darlawn a ni. Kumpuan a awm lovang.

24^th. Friday: Chief Minister, Pu Zoramthanga chuan Vairengte-a Serlui Constituency MNF North Block Conference naah, “Pathian remruat a danglam ngai lo, MNF-in thuneihna a chang leh dawn a ni,” a ti.

25^th. Saturday: Mizoram University Convocation vawi 4-na chu vawiin khan Tanhril-a MZU Campus-ah hman a ni a, he hun hi sorkar laipuia Principal Scientific Adviser, Dr. R.Chidambaram-a’n hmanpuiin kumina zirlai tithate hnenah lawmman a hlan a ni. He Convocation hi MZU Registrar, Pu Benjamin-a’n a kaihruai a ni. He Convocation-ah hian Vice Chancellor, Prof AN Rai-a’n mi 7 hnenah Doctor of Philosophy (Ph.D) degree a hlan nghal bawk a ni.

26^th.Sunday: Lalchhandami (29) Kulikawn chu tukin khan a pasal um lai Lalchhuanthangate chhuatlaiah thia hmuh a ni. Lalchhuanthanga chuan thilawmdan (a thah ngei a nih thu) hi an VC te hnen ah Report in vawiin vek khan a inpe nghal a, Serchhip Police ten an man nghal a ni.

27^th. Monday: Chief Electoral Officer, Pu Lalmalsawma’n Mizoram Assembly Inthlanna, November ni 29-a neih tur atana District hrang hranga inbuatsaih dan District Election Officer leh mi pawimawh dangte vawiin khan a thlir letpui.

28^th. Tuesday: Zoram Taxi Owners Association (ZTOA) chuan vawiin khan an pawl khawmpui lian vawi 8-na Central Hall, Venghlui-ah an hmang a, Traffic SP, Pu Lalbiakzama pawhin a hmanpui.

29^th. Wednesday: Lunglei Circuit House Conference Hall-ah vawiin khan Seminar on Human Rights neih a ni. He Seminar hian 31^st October (Zirtawpni) thleng a awhang.

30^th. Thursday: Mizorama Political Party hrang hrang leh Central YMA tena Mizoram Assembly inthlan hun tura ruat Inrinni ni lo, ni remchang danga sawn tura Election Commission an ngenna chu hlawhtlingin Inrinni nilo 2^nd December (Thawhlehni) ah sawn a nih tur thu vawiin khan puan a ni.

31^st:Friday: Thuampuia NREGS hnuaia inhlawhte zinga mi 10 chu an kawng laih ko minin a chhilh a, vanneihthlak takin thi an awm lo hlauh.