Hman ni deuh khan Nghahloh Dawr chungchang kha post a awm tawh a,a ropui khawp mai. Rinawmna leh Tlawmngaihna tlahniam tawh hle a kan ngaih lai hian khaw entawntlak tak tak pahnih chanchin ka rawn tarlang ve ange.
CHHIAHTLANG: Chhiahtlang khaw tlawmngaihna hi a ropui khawp mai.Tumkhat chu Chhiahtlang khaw chhungah hian leiminin min dang a,motor panga vel kan ding thap bawk a.Ruah a sur avangin tuman chhuah kan tum lem hlei law.
Chutih lai chuan pa pakhat leh a fapa rawlthar hi nihliap khumin bawngtuthlawh nen an rawn kal a,min dangtu leimin chu tumah phut hran lovin an rawn hai ta mai a nih chu! Chumi kan hmuh chuan a thalai deuh zawng chu kan chhuak a rei vak lovah kan thian fai ta mai a.Hemi tum chauh lo pawh hi midangte tanpuia tlawmngai taka Chhiahtlang khaw mite thawh thin thu hi ka hre nual mai.
CHEURAL: Cheural khua hi Phawngpui tlang bul lawka awm,in za nufa vel khua a ni a,he khua aia khaw rinawm hi ka la hre lo.An khaw High School zirtirtu min hrilh dan chuan an khaw pumah hian kawngkhar kalhna, socket bolt, nei hi pahnih khat bak an awm lo.An khuaah hian thil a bo ngai lova,kawngka pawh an kalh ngai lo.Bungrua pawh pawnah dah tawp mahse a bo ngai chuang lo.
Tin,an khuaah hian ruihtheih thil ti an awm lova.Tumkhat chu chhungkaw pakhatin zu zawrh tumin an rawn pem a, YLA leh mipuiin an duh lohzia lantirin puandum sinin kawng an zawh khum a,an tawp chiang teh asin. Hetianga khaw rinawm hi kan ram riangteah hian awm ve maw? “Pipu lungmawl runah kalhfung a ngai nem maw!” tih hla kha i sa rual ang u hmiang!
Similar Posts:
- Mizoram khaw hming A – Z
- Tlawmngaihna
- Lungphun pahnih
- Ram tana nun hlantu Naik Lalngaihzuala vuiliam a ni
- TLAWMNGAIHNA vs NIHNA
April 15th, 2009 at 7:53 am
Mahni hmasialna khawvel,midang ngaihsak lohna lam hlir kan hriat na hmunah hetiang nunmawi chanchin han hriat hian thlan sa a ti dai sawng sawng thin.Nia,kan la chhe vek lo a nia,thenkhatah pheichuan hmanlai ai in tlawmngaihna hi a sang zawk a ni.Baal hma a thingthi ngailo …tih kha i hre thar leh ang u.
Report this comment
April 15th, 2009 at 1:07 pm
Mizoram khaw lianve pawl tak pakhat a kan om ve thin lai te poh khan, in kalhloh kha chu ala tam ve a sin male!
vai ho hian kan in tukverh bar kan vuah lo leh tile bang kan hmang te kha mak an ti teh a nia! Hmanlai an chang zo tep chu a nih ber mai hi!
Report this comment
April 15th, 2009 at 2:04 pm
Rinawmna leh tlawmngaihna hi chu a la bo lo, mahse hmanlai zofate rinawmna leh tlawmngaihna kha chu kan pha ta lo vai vai khawp mai. TLAWMNGAIHNA hi kan zosap hmansa ber Pu. Buanga (J.H Lorrain) chuan tihian a hrilhfiah, “taimakna leh chhelna te, dawhtheihna leh zaidamna te, hawihawmna leh thuhnuairawlna te, huaisenna leh insum theihna te, aia upate zahna leh mi dangte tana nung tura mahni inpekna te a huam vek ani” a ti.(JH Lorrain, p.513) Rinawmna pawh hi tunlaiah hi chuan kan tlacham ta. A ler tawh lutuk. Mahse, kan ram hi siam theih a la ni….. tan i la thar ang u hmiang.
Report this comment
April 16th, 2009 at 12:39 am
Chhiahtlang —Vaihal an ti bawk a, SEDAL-ho lehkhabu Serchhip Kum 100 Lawmna Bu ka chhiarah pawh Chhiahtlang chanchin bengvarthlak tak tak a awm nual. Kawng thlanga THUL inkhai chanchin te nenlam!
Minpui an tuar nasa hle a; Truck leh Bus hial pawh leiminah khan kawngpui atanga chuanhnuai fe thleng an tlak thlak tum te pawh kha ka la hre reng thin. A khaw buai mai pawh ni lo; zinveivak mite he khuaah an chambang nghek nghuk tawh thin a nih kha. Khaw lungrual leh fakawm an ni thlawt e.
Ti ta daih ila; in chuanna motor chu leiminin a dang ta a. Motor chhungah chuan tlangval thaza rual engemaw zat lai in awm a. Tlawmngaihna chu a khawchhunga mi —pa-fa-te chuan an rawn INITIAT phawt loh kha chuan … a dormant ve deuh tihna em ni?
Tlungvel Quarry-ah khian accident an awm ta zauh zauh —kham a sang hle bawk. Damchhuak leh damkhawchhuak lo pawh an awm nawk zel a; lung lakna ngang, blasting avanga leilung nghet lo a ni bawk a, chim huk chang nei pawh a ni. Tlungvel hi ka la bel chiang lo nain, fak hlawh tlak an nihna ka tarlang duh.
An dai-hnaia accident a awm reng rengin … ruihhlo ngai leh zu rui mi reng reng RESCUE TEAM-a an tel ve an phal ngai lo. An invawng fel hle. Rapelling thleng thlengin an inzirtir thiam a; hruizen leh thil dang dang pawh an khua hian an mamawh. Tin, accident-na hmuna sum bothlau pawh a awm ngai lo; rinawm takin an recover theih ang ang chu kimchang takin an pe kir thlap thlap thin.
An hotute ngei hmaihmaah pawh ka kawm tawh … Mizo Officer lian tak pakhat, an chunga a lungawi loh thu pawh ka hnenah vuivaina an sawi ve a; mahse, a hnuah chu Mizo Officer lian tak pawh chuan an rinawmzia a hre chiang ve leh hnuhnawh ta bawk a nih kha! Mizo Officer chhungte accident an awm thu-hla a ni. Engmah bothlau a awm lo!
Report this comment
April 16th, 2009 at 1:39 am
Pu Chawnghilh,ruah a sur avang khan thil awmzia ngaichang chungin kan thu thap mai chu a nia! Khaw tlawmngai leh rinawm sawi tur kan hriat nual ka ring.Khaw pakhat(hming thup) ve thung erawh chu an khaw chhung kawng chhe lutuk a motor namchhuahpui man an thing vel! An ngeiawm lehzualna chu an nam pahin motor an tiberh lui vak zel nia!
Report this comment
April 16th, 2009 at 2:44 am
‘Tlawmngaihna’ tih tawngkam tak hi chu nei lo mah se, sap zingah hian tlawmngai sawi tur an tam mai. Edwin Roland unaupa niin ka hria, an chuanna lawng lian a pil dawn a, lawnglenga chuang tur an pawt a, a pawt fuh ve hlauh mai a. A bula mi pawt fuh ve lo chu “I piangthar tawh em?” tiin a zawt a, “Piangthar lo” tiin a chhang a. Ani chuan, “Lawnglengah ka aiin kal zawk rawh, kei chu ka piangthar tawh e” a ti a, a chance chu a kian a ni, an ti. Chuan lawng lian chuan a pilpui ta a ni. Piangthar inti tam tak hian kian phal lo mai thei. Pathianin min pawh fuhtir hlauh a, kan ti ang a, report ngaihnawm tak kan sawi duh zawk daih ang.
Report this comment
April 16th, 2009 at 8:17 pm
@muantea : Just kidding … leiminah te hian tawngpawng chet nghal ngawt chi a ni lo … min belh tur hlauhawm a la awm em tihte hi finfiah ngai hmasa a ni a … tin, chhiatrup thil thlengah hian kan tlawmngaiin —kan teichhuak tam thei khawp mai a, division of labor fel fumfe awm si lo hian kan innek chep buai a … hetiangah hi chuan supervisor fel leh fing, tlachawpa thil rel thiam tuemaw hi chu kan mamawh fo thin.
Zanlaia kangmei chhuakah tum hnih chu underwear nen chiaha supervise lauh lauhtu ka hmu tawh! Mi hmanhmawh ve te … kangmei thelha satin leh nylon thuam rawn inbelte tan hian chet ngaihna a awm lo thei khawp asin!
Report this comment