‘Hmanlai chuan mipa-in puan an veng a, hmeichhia-in an bih thung’ tih tawngkam hi kan hre fo tawh awm e. Kan hriatthiam dan erawh a inang lo mai thei. Tunlaiah chuan mipa-in puan kan veng ngai tawh lova, kekawr kan ha tawh zawk a; hmeichhiate pawhin puan an bih ngai tawh lova, a venin an veng tawh zawk. Puan bih a ngaih tawh loh nachhan pawh kawr an hak tawh vang a ni.
Saptawng a ni emaw, Mizo tawng a ni emaw, a tawng bul (roots) atanga hriatfiah duh kher kher mi ka ni a. Mizo tawngah pawh, mi tam zawkin kan hman dan a nih avang ringawtin a dikah ka pawm mai ngai lo. A tobul atanga chhui ka duh kher thin. Ka pa kha (may his soul rest in peace) Pawi (Lai) tawng thiam deuh mai a ni a, Mizo tawng tam tak hi Pawi tawng atangin min hrilhfiah thin. ‘Puan bih’ tih pawh hi, Pawi tawnga zung kaih a ni a, hmeichhiain zak hnuaia puan la vet kuala, an hnute khuha an bilh luh thin hi ‘puan bih’ a ni, tiin ka pa khan min hrilh thin. Pu Buanga (JH Lorrain) Dictionary-ah chuan heti hian hrilhfiah a ni:
puan ” bih, [ puan ” bih, ] v to wear a cloth with one edge fastened tightly below the armpits across the breast and back and the opposite edge hanging down. This mode is adopted by women when convenient.
A chunga ka sawi ang thovin Pu Buanga paw’n a hrilhfiah a nih hi. Tawng hi chu kan pi leh pute atanga kan lo hman dan humhalh zel hi a thain ka hria. Puan pawh hi ‘veng’ a awm a, ‘bih’ a awm bawk a, a nihna ang taka hman zui hi a thain ka hria. Engnge in ngaihdan le? Kawnga kan veh kual chuan (mipa pawh hmeichhia) pawh kan ‘veng’ a ni a, zak hnuaia kan veh kual chuan kan ‘bih’ a ni. Chuvangin, tunlai hmeichhiate hian puan an bih ngai meuh tawh lova, a venin an veng tawh zawk a ni.
.
Similar Posts:
- Mizo-na hi eng ber nge?
- Tawng chungchang
- Mizo Puanven
- In-laws
- Ka ‘kham’ vang ni lovin ka ‘kham’ thin..!!!
April 26th, 2009 at 5:21 am
I tidik khawpin ka hria. Thenkhatin hmeichhia puan an hak(wear) tak avanga bih ti veka kan sawi thin hi a dik lo. Bih dan a awm a, ven dan a awm bawk. Tunlai chuan bih lovin an veng tawh tlat alawm. Khasi hmeichhe ho puan hak(wear) ve dan khu eng nge ni ang le??
Report this comment
April 26th, 2009 at 6:02 am
tleirawl/rawlthar kan hmanpawlh dan ang tho a ni e
Report this comment
April 26th, 2009 at 6:45 am
Khasi-ho leh Pnar (Jaintia)-ho khuan puan khu an BAT ve thung niin ka hria a; nuho leh nula-ho puan bah dan pawh a dang leh hret asin! Chutiang bawkin Pnar-ho bah dan leh Khasi-ho bah dan pawh an koki lamah a inang lo tih chu anni Khasi leh Pnar-ho pawhin min hrilh ve chiang a; hriat chian zawk nan lo dap belh mai teh u.
Zak-hnuaia puan la ting-tawma Mizo hmeichhiaten puan an lo BIH thinna bulbal ber kha ZAKHNUAI-ah a nih miau si chuan; KAWNG (loin) hrim hrima VENG a lo tih tlat bawk si chuan —hmeichhia leh mipa-te BIH dan leh VEN dan zawng kawngkal riau lo awm thin tawh mah se; tunlai chhanah chuan Mizo mipaten kekawr an hak tawh hnuah; kawng (loin)-a VENG awmchhunte chu Mizo hmeichhe thenkhat an ni ta tlat mai a … an zakhnuai-a an BIH tawh chuanloh avangin an kawngah an VENG ni ve mai tawh rawh se; etymological taka (derivative lama uluk pawh ni ila) kan duh fir viau a nih pawhin Tv Pu KL-a rawn hrilhfiahna khi kan sawi nawn thiang ve fo turah chuan ka ngai awlsam then tawh mai asin!
‘Puan bih’ tih pawh hi, Pawi trawnga zung kaih a ni a, hmeichhiain zak hnuaia puan la vet kuala an hnute khuha an bilh luh thin hi ‘puan bih’ a ni …
tih hre chiang kan nih tawh si chuan zak hnuaia puan la vet kual tawh miah lova hnute khuha an bilh luh tawh bawk si loh chuan … MIPA ni lo mah se, an kawngah an VENG ve tlat tawh a ni ber lawm ni? An gender athu ni lovin; an fashion leh attire lam atanga TEH DIK tulin ka ngai ve thung tlat mai.
Funny-te, mkima te nen chuan —VENG chhing teng tawng han BIH chhoh kan chak mai thei zawk a nia! LOL
Report this comment
April 26th, 2009 at 7:23 am
Puan BIH hi a dik a ori a ni. mahse VENG hi ka hmang ta zel si. Hmeichhia in pasal an neih hian NUTHLAWI kan pi leh pu te chuan an ti pasal an then leh hian NUTHLAWI LENGLEH an ti thin tunlaiah erawh kan ti nuthlawi ta vek anih hi Aputea te ho nen lam hian NOI.
“Pathlawi ho ti ti ngaihthlak hi kan fin phah sawt” an lo ti ngaia tunlai chuan Pa-ho or PA-Va-lai ti ti ho te kan ti leh tawh anih si hi le hairehai
Report this comment
April 26th, 2009 at 8:27 am
Originality hmelma chu modified form a ni. Kan pipute kha hmeichhe hovin la deh an thiam em avangin thawmhnaw mamawh phuhru tawk chuan an nei. KL hi chuan kawr an hak hi tunhnu hleah a ngai niin ka hria a mahse kawr an hak hunlai kha rei ngial a ni tawh asin. ‘Mipain puan an venga,hmeichhiain an bih’tih hi hmanlai atanga hman dan a ni a, zakhnuai a ni emaw kawng a ni emaw tawng lo modernise hi a tul lo.Kekawr min rawn tawm tawh a,remchanga puan kan ‘veng’ lehzel min rawn tawmtir hi a dik ka ti thei lo a ni.,
Report this comment
April 26th, 2009 at 9:01 am
Hmeichhia chuan an puanhi an bilh lut a,mipa chuan kanthlep let thin, chuvangin hmeichhia in an bih a,mipa in kan veng thin ani.
Report this comment
April 26th, 2009 at 9:32 am
Hmeichhiain puan an bih a,mipain kan veng..lo modernise tum hi a trul lo ka ti hran lo kei chuan.
Report this comment
April 26th, 2009 at 10:18 am
“Kekawr min rawn tawm tawh a,remchanga puan kan ‘veng’ lehzel min rawn tawmtir hi a dik ka ti thei lo a ni.”
Mipa ho pawh hi kekawr hak hi vai/sap ho in tawm ve tho alawm le. In puan ven kan tawm in hlauh viau chuan veng leh vek ula chuan hmeichhia chuan puan kan lo bih leh vek ang.
Report this comment
April 26th, 2009 at 11:37 am
Kan tawng hi tunhnuah abikin ka chik mai mai thin a. Literature hi hmar lam hian an chang chho ta deuh a. Hmar lam hian nasa takin an standatized niin ka hre thin. A khawi ah tak hian nge Mizo tawng standard fak hi a awm min han hrilh teh u?????? Rozama standarh, Pu Buanga Standard, Bible Standard, Dr Laltluangliana standard etc..?
Mizo tawng dik leh dik lo hi tu siam nge, pi leh pute hman dan reng a lawm tih ni ta se, a nih chu chu tunge interpretation pe tu?
Mizoram leh pawn lamah language kan hman dan hi hegemonic lek lek thinin ka hria. Hei hian duhlian hmang lo tutute inkilhtawihna a thlen nasa fu mai.
Report this comment
April 26th, 2009 at 11:44 am
Hemi chungchang hi hmana Dr Laltluangliana ke bula seilian ka thianpa in a sawi tawh. Engpawhnise, Mizo tawng thiam deuh leh Mizo degree nei sang deuh sawiah ka khek phawt mai teh ang.
Report this comment
April 26th, 2009 at 11:55 am
chhim lam ah chuan ka hriat chin ah puan veng ti ngawt in kan sawi thin , KAN TI DIK LUTUK TLAT tih pawh kan lo in hre hlei hnem ehh.
Report this comment
April 26th, 2009 at 6:14 pm
Thil reng2 Hmanlai in an ti thin tih avanga dinna ngai a din ngheh tlat tur nge thlauh thla/paih bo chuang si lo a hmasawn pui tur zawk??
Report this comment
April 26th, 2009 at 6:19 pm
kan tawng hi tihausa zel ila ziakmi te hi an hlu leh zual ram zau tak an laduai duai mai anih hi.
Report this comment
April 26th, 2009 at 9:08 pm
Pawi tawng atanga lak anih vang ngawt chuan a dik ber tihna ani dawn em ni? Kan college kal laia kan Hmar thian pa chuan kekawr te pawh hi ‘bun’ a ti vek a, adik ber tiin atang ve tlat, pheikhawk pawh ke a ‘bun’ ania lawm zu ti tlat a. ka doctor lohna lam ani bawka sawi thui ve vak lo mai teh ang, comment hnuhnung pawl ka ni leh ngal. Mi inkhawm bang ve chauh te.!
Report this comment
April 26th, 2009 at 9:59 pm
Tawng hi chu a bul (roots)-ah kan chhui fo a pawimawhin ka hria. Veng leh bih pawh hi, tunlaia hmeichhiain an kawnga an veh kual hi ‘bih’ kan ti dawn a nih chuan, zak hnuaia an veh kual sawina kan nei hrang dawn lo tihna a ni. An veng tih sawina tura ‘bih’ kan hman hlauh chuan, kan tawng tihhausak aiin kan tipachhe sawt dawn tlat. Thingtlangah phei chuan tuikhura an inbual pawhin puan bih chunga inbual an la ching asin.
History a ni emaw, Pol.Science a ni emaw, a zira kan zir chuan, a ‘roots’-ah kan chhui zel thin. Language pawh hi academic discipline pakhat a ni a, a ‘roots’ atangin a dik ber kan chhuichhuah zel a tulin ka hria. Entirnan, ‘phaw’ tih pawh hi Pawi tawngah chuan ‘savun’ tihna a ni a, hmanlaia an phaw (shield) neih thin kha savun atanga siam a ni a, chuvangin a hming atan pawh ‘phaw’ tih an hmang zui ta niin a lang.
dr_feelgood, Pawi tawng atanga lak a nih avang hian a dik ber tihna lam ai mahin, Pawi tawng hi kan Greek/Latin tawng ang deuh a ni a, tawng awmzia chhui nan a tangkai ve tlat. Entirna pahnih khat chauh han tarlang ila:
‘Upa’ tih hi tuna thangtharin an hriat danah chuan kum lama upa (chronological age) ngawr ngawrah an ngai tlangpui. Kohhran upa-ah naupang deuh kan thlan pawhin inhmeh lo an ti dawn mai thin. Upa tih hi Pawi tawngah chuan ‘zahawm’ tih sawina a ni. ‘Kan pa,vana mi, i hming zahawm rawh se’ tih pawh hi Pawi tawngah chuan, “Van chung khua ia um kan pa, namin upatnak um ko se’ tih a ni. ‘Zahawm’ tih nan ‘Upatnak’ an hmang a nih chu.
‘Val upa’ tih awmzia pawh, tlangval ho khawmtu, tlangval kaihruaitu, tlangvalin an zah (respect) sawina a ni a, ‘Tlangval tana mi zahawm’ tihna tluk a ni. ‘Val upa’ hi tlangval senior an ni kher lo, tu leh fa nei duah tawh pawh, tlangvalten an zah leh hotu anga an en chu ‘Val upa’ an ni fo. Lal rorelpui (cabinet) pawh ‘Khawnbawl upa’ tih a ni a, khawnbawl mi zahawm tihna tluk a ni. Heta tang hian ‘Kohhran upa’ tih pawh hi, Kohhrana hruaitu leh hotu nihna chelh, ‘Kohhrana mi zahawm’ tihna tluk a nih mai chu. Ka ti mai mai thin a, kum 60 chung lam ‘upa’ an lo ti tlat pawh hi, hmanlai mizo te khan, kum tam hi zahawmna chi khatah an ngai a ni awm mang e, ka ti thin.
Tin, ‘Va’ tih hi Pawi tawngah chuan ‘lui’ tihna a ni. Serkawn-Zotlang rama lui pakhat pawh ‘Khawiva’ a ni a, ‘Khuai lui’ tihna a ni. ‘Khawiva lui’ tia sawi an awm fo, ‘va’ tih awmzia an hriat loh vang a ni. An sawi double mai mai a ni. ‘Va’ tih hi Hla thu (Poetical word) atan kan seng lut thei a nih chuan a tha khawpin ka ring.
Tuna kan tawnga a awmzia kan hriat fiah hleih theih loh pawh hi, Pawi tawng atangin tam tak hi chu a awmzia a chhui chhuah theih tlat. Chuvangin, Pawi tawng hi kan tawng lo pianchhuahna a nih tlat avangin, kan Greek tawng ka ti ve mai.
Report this comment
April 26th, 2009 at 10:06 pm
KL: full support!!
Report this comment
April 26th, 2009 at 10:15 pm
Pu Buanga Dictionary hi reference atana kan pek fo chhan pawh, Pu Buanga khan a ngaihdan a ziak lova, khatih hunlaia an tawng hman dan kha uluk takin a zir a, a thawpui Mizo hote kha a zawt fiah zel bawk a, chumi hnuah chuan, a hrilhfiahna hi a ziak thin a ni.
mzvision, nuthlawi kher kher hi chu i hre thelhin ka hria. Hmeichhia, mipa kawppui nei tawh, fa hial neih phah emaw, pasal atana nei hial tawh, mahse, inthen leh tawhte hi nuthlawi an ni zawk e. Hmeichhe pasal nei tawh zawng zawng nuthlawi i tih mai te chuan, ‘pasal pawmlai nei’ leh ‘nuthlawi’ kha category khatah i dah tihna a ni a, a dik nang. Pasal pawmlai nei mek hmeichhe ho hi ‘Nuthlawi a nih saw’ han ti ngawt teh, lei i chawi phah mai tur asin :).
Report this comment
April 26th, 2009 at 10:17 pm
@KL, Etymology hi a pawimawh thlawt, subject pawimawh lutuk tlat a ni — i duhtuina hi ka thlawp e.
Kan unau Pawi (Lai)-te hian kan trawngbul an la hmang nasa cheu va (Lusei-hovin kan hman nun zui tawh loh) chuvangin, kan purchawkna tur — a dik leh bulbal fumfe zawk kan hriata kan dap zauna turin Pawi tawng a pawimawh ka ti ve hle; a chunga Pawi tawng i rawn thawh pawh khian mi tivar hawk mai. Kan unau Lakher-ho hi chu an trawng hi ka la chik chiang ngai lo va; S. Vadyou saw ka hriat chiante zinga mi a ni a —chuti takin an trawng lam hi ka lo zawt ngai lo va; khaw hrang hrang sawn dialect an nei hrang emaw tih mai tur a nia …mahse, Lusei tawng nena inkungkaih saw a vang hlein ka hria.
Report this comment
April 26th, 2009 at 10:26 pm
‘Lengleh’ tih hi kan sawi belh lawk. Nuthlawi tam tak hi, sawn pai avanga nuthlawi an ni a, mahse, a sawnpaina nena innei mai thei dinhmuna ding an awm thei. Chutiang bawkin, pasal nena inthen pawh nuthlawi an ni tho a, mahse, nupui atana rim ngawt a la him lo thei. A pasal nen khan an insawirem leh mai thei a, chuvangin, tlangval fimkhur deuh chuan an rim ngawt ngai lo. “Nuthlawi lengleh a nih saw” an tih tawh chuan, tunlaia “full vacancy a awm e” kan tih ang hi a ni a, a hmaa a kawppui mipa te mitmeti ven ngai hauh lovin a rim theih tawh tihna a ni. Nuthlawi, zalen taka rim ngam sawina tawngkam atan ‘Nuthlawi lengleh’ tih hi an hmang tlangpui.
Report this comment
April 26th, 2009 at 10:34 pm
Nuthlawi lengleh ka va mamawh —min lo bengvar deuh teh u. Kan thianpa pawh a che chhe teh asin! An nupa an inthen zakw chhungin an lo inchukha deuh va; a va rim leh chiah chu … an lo inko hman tawh si. Hawihai ve khawp mai! Rilru lam a shattered ve ngawt chuan a rinawm!
Report this comment
April 26th, 2009 at 10:40 pm
@chawnghilh:
Kei pawh mara tawng hi chu ka belchiang vak lo. Mahse, Lusei tawng nen hian a inzulna a awm nual tih erawh ka hria. An tawng hi vowel-a tawp deuh vek a nia. Entirnan, ‘Mara ram’ kan tih chu ‘Mara ra’ an tia, consonant-in a tawp lo a ni. ‘Lalremruata’ tih chu ‘Bei-re-ru’; ‘Rodingliana’ tih chu, ‘Ro-dua-lai’; ‘Lalchungnunga’ chu ‘Bei-cho-no’; ‘Lalrampari’ tih chu ‘Bei-ra-paw’; ‘Lalthangmawii’ tih chu ‘Bei-tha-ngia’ (ngia hi mawi tihna a ni awm e). ‘Biakchungnunga’ tih chu ‘Bei-cho-no’ a ni e, an ti bawk. An hnam hming tam tak pawh hi Lusei hnam nen a inzul an ti, entirnan, Hlychho=Hlawnchhing; Khity = Khiangte; Syhlo = Sailo; Chozah = Chinzah, etc. Misual.com-ah hian Mara tawng hre deuh an awm lo’m ni? Ka hre dik em? Han contri hlawm se maw le.
Report this comment
April 26th, 2009 at 10:40 pm
ha ha ha P Chawnghilh!!!.. Khei ka lo bengvarsak ang che khawpui nuthlawi ai in thingltang lam nuthlawi hi an zia awmdeuh an tia i duh dan zawng te ni tak ang maw!! lol JK..
Nuthlawi hi an zeia an rualpui te ai mahin an aia naupang zawkte an duh zawk an tih leh meuh chu!!.. bawngtarpawn luangno a duh a lawm an ti em ni tiangang deuh ah an lut ni ber in an lang. Nuthlawi kan sawi kan sawia, Pathlawi leh Pahmei lamte pawh han sawi zau zel u la mawle.
Report this comment
April 26th, 2009 at 10:43 pm
‘Biakchungnunga’ tih khi ‘Bia-cho-no’ tih tur a ni zawk e.
Report this comment
April 26th, 2009 at 10:45 pm
“Pawi tawng hi kan tawng lo pianchhuahna a nih tlat avangin, kan Greek tawng ka ti ve mai.”A va mak kher e(h).
“dolung nge upa tuboh” a va ang deuh ve!!
Kan unau Pawi (Lai)-te hian kan trawngbul an la hmang nasa cheu va (Lusei-hovin kan hman nun zui tawh loh) chuvangin, kan purchawkna tur — a dik leh bulbal fumfe zawk kan hriata kan dap zauna turin Pawi tawng a pawimawh ka ti ve hle;
Report this comment
April 26th, 2009 at 10:45 pm
@KL Rev ZT Sangkhuma poh hian a dictionary ah chuan i tanhmun ang chiah hian a dah e.
VA tih a tawp hi lui tihna anih ang hian TUI hi lui tihna DARLAWNG tawng an tih teh mauh chu, i hrechiang em?? TUI-rial/vawl/rini/vai/chawng/phal etc Darlawng thlang tla hian Mizoram hi an luah hmasa a an phuah a ni an ti miau mai
Report this comment
April 26th, 2009 at 11:22 pm
@mzvision:
A dikin ka ring. Darlawngho phuah vek chu a ni lo mai thei. Zo hnahthlak tho an nia, Lusei tawng leh Darlawng tawng pawh hi a inzul tih ka hria. Zampui tlangdung (Tripura)-a thalai khawmpuia kan kalin Darlawngho chu zaipawlin an rawn kal ve a, an hla chu Lusei tawng nen a inzul khawp mai. An phuah vek a nih ka rin lohna pawh, Luseiin lui hming an phuah nia lang, Khawchhaktuipui, Chhimtuipui, etc.-ah hian ‘lui’ tih aiah ‘tui(pui)’ an hmang ve tho. Eng hi nge an phuah chin tih erawh hriat chian a har tawh mai thei.
Report this comment
April 27th, 2009 at 12:47 am
North Tripura-a Kailasahar kiang lawka Darchawi khuate khu Darlawng-ho awmna a ni. Trhian hlui, College-a ka lo hriat tawhte ka zuk hmu hrawk hrawk hlawm bawk a … Zotawng ni chiah si lo, ni ve lek lek thuartham an hmang … ka bo khawp tho.
Tripura hian district pathum chiah a nei a —Tripura West, Tripura North leh Tripura South. UT kan nih khan State an ni a; district duhthawh an ni vak lo a niang; tin, mipui tlawn nan District an tawngpawng thei sem lo tih a chiang.
East nei lo state a ni miau —khawi lamah nge ni a chhuah ve tak ang le? LOL
Report this comment
April 27th, 2009 at 12:51 am
Pu KL Syhlo=Sailo hi chu a ni lo deuh mai thei .Mara hnam ho zul pui hi Lusei hnam ah a awm ka hre khat khawp. Lai leh Mara hi chu a in zul deuh a . Mara chuan Lui hi ‘chava’ an ti ve.
Lai tawng hausatna ka hriat ve chu ‘duk tak’ (duuuuuuuuuukk tia lam tur) tih hi a nia , a hman na chu eg- Man utd chu duk tak an ni ti ila a awmzia ber chu man utd chu an sang filawr , an tluang etc ti in a ngaih theih ang.
Report this comment
April 27th, 2009 at 12:55 am
Lai tawng hausak lohna ve pakhat chu Direction sawi fiah kawngah a ni, “Khi khi khi …” ti chungin —hnuai lam kawh chhuk an ching!
Report this comment
April 27th, 2009 at 2:36 am
user kan tam tawlh2… inhnial tum kan pung chak hle
Report this comment
April 27th, 2009 at 9:27 am
Nuthlawi sawi hi chu nuam kanti tlang a ni tiraw? a nuam em lah tak a ni, Ni e, Hmeichhia te hian Puan an veng tawh a nih hi
Report this comment
April 27th, 2009 at 9:48 am
Ditto, duuk tih chu Lungleiah pawh kan hmang asin. Entirnan, long distance race-ah naupang an intlansiak ta a, a last lap velah emaw, an thianten an lo au va, “Come on, duuuk” an tih chuan, midang aia fal nalhin tlan tawh rawh le, an tihna a ni. Tin, inkhelhah pawh, “Ball a chan veleh, a rawn duuk phei char char a,” kan tih chuan, a rawn khalh fal phei char char kan tihna a ni.
Lai tawngah chuan, ‘ti ti phang phang’ (tri tri phaang phaang) tih hi ka duh riau. Rilru bet lo, ngaihtha lo, hlau thawng deuha awm sawina a ni. Entirnan, kan chhungte tu emaw a dam lo a, a na viau a, mahse, a dinhmun chiah kan hre lova, rilru dah dan kan thiam lo a ni. Tichuan, “Hetia ti ti phang phanga awm ai chuan, doctor hi i zawt chiang law law teh ang u” kan ti thei ta a ni.
‘Hmai khap/khap lo’ tih tawngkam hi a tha ka ti bawk. An ina i thlena nangmah duat em emtu tuemawm kha i lo mikhual ta a. Ar tak ngial pawh talhsak tur i nei lova, hrehawm i ti em em a ni. “In ina ka thlena min duat tehreng nen, engmah chawhmeh tui pawh ka siamsak thei lo che a, i hmai ka khap lo hle mai” tia ka chawi chuan a fiah riau asin.
Report this comment
April 27th, 2009 at 6:10 pm
Hmeichhia-in puan ka “veng” an tih hi a dik kan ti a maw ? Mizo tawng dik leh dik lo tehna standard kan neih that tawk loh vanga ngawta tawng dik lo na na na pawmzam thu va awm suh.
KL, i pa-in a hrilhfiah dan i pawm bur mai a, dik lo thei lovah i ngai a. Tin, Pu Buanga te hunlaia hmeichhe puan bih dan chu an hnute hnuaia vet kuala an bih thin avangin chu chu “puan bih” nihdan phung leh hrilhfiahna a ni ah i ngai bawk a. Mahse, kan ziaktu lar tak takte leh mizotawng thiam bera bera kan neihte thuziak hi han chhiar la, puan bih a nih reng reng chuan hmeichhiate nena hmehbel a nihzia chu i chiang uarh mai ang.
Eng anga sangah nge an bih a, eng anga mawng khuh emaw khuh zo lo khawpa fualin emaw nge an bih tih kan inzawhbuai a tulin a lang lo. Hmeichhiain puan an bih a, mipain puan kan veng a ni. Chu chu mizo tawng dik tak pawh a ni a, tunhnu hian kan tawnghmang hi kan thlahdah tak deuh avangin hmeichhiate hian puan ka veng an ti ta mai mai zawk a ni.
Mizo tawng dik leh dik lo a awm lo te pawh kan ti mai thei. Awm teh meuh mai. Standard pawh a awm. A ziak dan leh a thlukdan chenin standard a awm. Entirnan : “Khawihahpawhnichhuahnapiangahlalpanenkakalnaturchueninaawmzelang” tihte hi han chhiar teh u. Ziak dan dik lo a ni em ? A dik lo a ni in tih chuan standard kan neihzia chu in chiang mai ang. A tu ziak dan nge dik a, Pu Buanga nge JF-a tihah kan buai lo.
Report this comment
April 27th, 2009 at 10:53 pm
coolsoul09:
Ka pa’n a sawi apiang a dik ka ti vek ngai lo. Mahse, ka pa kha Mizo lehkhathiam hmasa a ni ve a, saptawng pawh a thiam a, Zo tawng pawh a chik peih khawpin ka hria. Puan bih chungchang min hrilhfiah dan pawh hi a dikah ka pawm. Tawng kher lovah pawh, a dik aiin a dik lo zawkin arpa chan a chan hun lai hi chu a awm alawm. Polish Astronomer Nicholas Copernicus-an “Niin lei a hel lo, leiin ni a hel zawk a ni” tih ngaihdan a han vawrh chhuah hun lai, 15th century velah kha chuan dawt sawiah an puh vek a nih kha. “Niin lei a hel” tih kha vantlang ngaihdan a ni miau a. Mahse, Copernicus kha a dik zawk tih chu mithiamte bawkin an rawn nemnghet leh ta tho a ni.
Tawng chungchangah pawh hian, mi thil chik mi kan mamawh khawp mai. Tawng dik hi ka hre vek bik lo. Upa te hi ka kawm chik a, tawng dik hi hmuh chhuah ka tum ve mek reng a ni. I sawi ang hian, kawnga hmeichhiain puan an ven hi, hmeichhia an nih chuan ‘bih’ a ni tih hi, mi thil chik mi, tawng chhui mite’n a dik an lo ti a nih chuan, ka tanna hi ka sahuai thingvawn tlat lo ve :).
Chutiang zelin thu ziak chungchangah pawh hian, tun hmain, sentence tawpah ‘mah se’ tih hi ka zawm thin a, entirnan, “Lala chu huaisen tak ni mah se, a chapo lo” tih angah te hian, ‘mahse’ tiin ka zawm thin a, upa zawkten min correct thin a, ka han chhut chiang a, ka ti dik lo tih ka hmuh chhuah hnu chuan ka zawm ngai ta lo a ni. Conjunction ‘mahse’ (Saptawnga ‘but’) nen ka lo ngaihpawlh vang mai mai a lo ni.
Chutiang bawkin, Damdawi In tih te, Biak In tih te hi noun a nih angin zawm tur a ni tih hi ka ngaihdan a ni thin. Mahse, compound noun hi zawm aiin zawm loh hian chhiar dik a awl zawk tih ka hmuhchhuah hnuah chuan ka zawm duh tawh lo. ‘Damdawiin’ “Biakin” tih chuan chhiar sual a awl tlat. Sapho pawhin compound noun, eg, Rescue Centre, Remand Home, etc. chu an lo zawm vek bik lo.
Keini aia naupang zawkte hian tawng hi duhtui se, chik peih se tih hi ka duh a, kan ngaihtuahna kai harh atan ka rawn post mai a ni e. Pu Buanga Dictionary pawh hi a dik vek ka ti lo. Mahse, Dictionary siam tura a pur chawkna (source) hi Mizo-ah pawh Mizo tawng thiama a ngaihte an ni tlangpui a, Mizo tawngah chuan Pu Buanga Dictionary hian ‘Authority’ a nei tlat asin. Kan sawisel dawn a nih chuan, a ‘source’ kha kan paithla tihna tluk a ni dawn a, fimkhur chu a ngai khawp.
Report this comment
October 14th, 2009 at 9:54 pm
tunah lawk khan he topic ah hian he comment hi ziah duh an amw mahse report comment angin a rawn kal palh a tah hian anonymous in kan dah mai
Report comment hi chu comment mawilo report nan chauh a ni e. – Admin
ka lo ngaih ve dan chuan \’puan bih\’ chu khup khuh ngalrek thlenga puan bih, \’puan veng\’ chu khup langa hi veng ka ti mai a.
Report this comment