Chawlhkar tin, Trash Day-ah tawhphawt chuan zing dar 7 hmain kawtkai lamah kan inchhungkhur bawlhhlawh (trash bin bika khung) leh recycle tur thil (blue bin)-a khung bik ho etc., zawng zawng chhawpchhuah hman vek tur a ni a —dar 9 velah DUMP TRUCK-in a rawn lawrkhawm tawh thung ang.
Chawlhkar hnih danah LAWN MOWER-ten an bial bikah an rawn che leh ziah bawk ang. Inthlahdah theih a ni lo. Invawnfai kawngah, Zoram lamah pawh a buaipui peih Tv Vanlalsailova leh a trhiante an awm ve tak thu kan dawng; a lawmawm e. Rawpui khua ang veka invawng fai ni ila —-kan ram zim te, kan tuallenna chuti teh luaa zau ni chuang bawk si lo hi chu kan enkawl fai thei ve ngei ngeiin a rinawm.
A chunga mi khi thingtlang in mah ni se, a chhehvel hi bel chiang teh. A vawn fai theih a ni. Tin, kan ram ang lo takin, chenna hmunah reng reng Dawr ilo fahran hi a awm a thiang ve lo va … dawr awmna hmun chu kein emaw, car-in emaw pan nal nal a ngai thung. Pan eina chil pik sen leh chinai tahna ban hi a awm ve lo.
Cart emaw basket emaw lo inchhawp chu i duh ber thlang la, i thil lei tur chu khung khawm char char tawh mai rawh. Hun engemaw zauhvah GRAZING PERMITTED tih an lo tar vaih chuan, hmawmsawm leh thei inchhawpte kha ei char char mai rawh le. Mahse, Zonunmawi tibawrhbang zawng ni lovin!
Dawr reng reng —Grocery a ni emaw ni lo emaw … dawrtute car park-na hmun hi a remchangin hmun zau tak, car park-na hmun tur rin fel vek a ni a. Khawimaw-lai kilkhawra Dawr emaw pawh ni rawh se, Lengpui Airport aiin a pui daih zawk zel zu nia! Tin, car park-na hmuna wheel-chair lem awmna reng rengah hian tawngpawng park phal a ni ngawt lo va; rualbanlo (handicapped/disabled) bikte pual a ni; car windshield atranga lang thei mirror-ah handicapped card kha car chhunga tarlan ngei ngei tur a ni thung. Tin, an car license plate-ah wheelchair lem chuang a nih chuan Card khai kher a ngai lo. Rualbanloten khawngaih leh lainat an hlawhna ram, an dinhmun pawh sang taka dah a ni bawk.
Chawhmeh leina hmunte hi rimchhia hian a bawh lo hle a; thotle leh thochim pakhat te pawh hmuh tur a awm ngai lo. Tin, Dawr hmunah hian RESTROOM (zunram thiarna) thianghlim tak hi a awm vek zel bawk. Man chawi khera tlapawrha-thei lawh a ngai ve kher lo. Kan Zoram mawi leh duhawm, kan khawpui Aizawl, Lunglei, Saiha, Lawngtlai, Serchhip, Champhai, Mamit, Saitual, Hnahthial etc., sobjee bazaar-te hi a veiawm rum rum trhin.
Kawtkaia Lawng a inhun rup tawh hi chuan, “Hemi te chhung chu … an va nei deuh ve,” tih ngei ngei chi! Mahse, an chhungkaw thuruk ka hrilh ang che, lawng hi an han lei ngawt a —rualkhum intih vena chi khat a nih avangin … maintain a lo ngai ve reng bawk si, mahni hna lamah a trul nasa si, hun thawl neih a har si … hralh leh mai a har tawh avangin American mi awmthei intite rilru tihahtu ber a ni ve a nia aw!
Phaitual hnim thleng pawlh khawpa i park tak mai le? Nizan i phuais deuh a ni maw? Phuais suh ei, a hnungah hian Car dang rawn park tur a la awm a. E heu! Lirthei pawh chu in va ngah awm ve, nangni chhung chu? Chu lam a ni lo; he in hi chhungkaw ‘nga laiin kan inluah trawm alawm a! Kha daih kha a nia sin! Zoram-ah pawh, mi in hnuai pindan lehlam hi address-ah a awm ve thei tho.
Kawhtebel leh sangha-rep chhumpawlh hi i ngainatzawng a ni ve em? Hetiang i hmeh duh ahnu —Mizoram pum pui hi kan vawng fai ve thei, NH 54-a inphochhuak –thei zuar (fruit vendor)-te pawh kan thianghlim sawt viau a ni lawm ni … Sorkar leh mipuiin a tharin tran la tlang ta ila!
Mizo Society hi khawvela society nuam ber a ni; society trha ber tihna ni hran chuang lovin. Manner leh Etiquette lamah erawh chuan hnam fing zawkte kan entawn zawng a ngai hle. Kan Mizo chetdan ang anga kan chet chuan mi huihphai enin min ei hlen ang tih a hlauhawm em mai!
A chunga pangpar ze danglam tak ang mai khian thil reng reng hi kan mix kual thiam tho bawk a! Heng ramah te hi chuan trhenawmte nen kan intlawhpawh ngai mang lo chu a ni ber a; chhun leh zanah —veng (neighborhood) tin mai hi thihsan khawpui ang maiin a reh tlawk tlawk mai zawng a nih hi.
He thu tawite ka rawn ziak atrang hian American mi vantlang nunphung tlangpui 60% chu i hre ta a ni mai! Mi-hausa venga an khawsak dan leh neuh neuh rawn tarlan kan la tum leh dawn nia! Thlalak-ho hi ni li chhunga ka fawm khawm chawp sun sun a ni e.
Zoram a hlu ber, ram dangte chu mawi zawk pawh awm mah se!
