mi(sual).com

THINLUNG THIANGHLIM, Isua zirtir dan (July 15, Nilai thupui enlawkna)
Chhiar tur : Mat. 5:3-8; Mk. 7:14-23

Juda-te chuan sakhaw thila thianghlimna an ngaipawimawh hle a; Chuvângin, serh leh sang an ngah em em a ni. Zâwlnei Isaia te, Amosa leh Mika-te hun lai khân Pathian biakna lamah an urhsunin an ti nasa hle thîn a. Mahse, chhungril lama thianghlimna leh Pathian tihna tak tak erawh chu an nei tlem deuh a ni mai thei. Isaia chuan an inthawinate Pathianin a khamzia thu a sawi a (Isa. 1:10-17).

Amosa pawhin an inkhawmpui urhsunte Pathianin a kham thu a sawi bawk a (Amos. 5:21). Mika chuan Pathian biak dân dik hrilhin, Lalpan a phut chu dik taka tih leh khawngaihna ngainat leh Pathian nena thuhnuairawlh taka len dun a nih thu a sawi bawk (Mk. 6:8).

Lal Isua hun lai pawh khân Juda-te chu an la puithu hle a. Mosia dân leh upate thurochhiah an sakhaw hruaituten an hrilhfiah dante chuan an nun a tichepin an zalen lo em em a ni. Hetianga an zirtîrna hi Lal Isua khân a dik loh dan te nasa takin a hrilh a. Juda sakhaw hruaitute tân chuan Lal Isua kha mi hnawksak tak a ni ngei ang.

An sakhaw hruaitute chu thlinlung hnawih var, chhungril lam tha si lo angtein a sawi a. Zirtîrna thar tichhuakin, “Kei erawh chuan,” tiin an zirtîrna kalhin a zirtîr thîn a. A zirtîrnate hi Juda sakhaw tân thil thar a ni. A zirtîrna avâng hian Juda sakhaw hruaitute tân lawm chi a ni lo. Mi hnawksak, zirtîrna dik lo keng, Pathian dân pawisa lovah ngaiin, thi tlakah an ngai hial reng a ni. Juda-ten sakhaw thila thianghlimna an ngaih pawimawh em em laiin Lal Isua chuan thinlung thianghlimna a zirtîr thung. Ei leh in thianghlimna chungchângah pawh an zirtîr dân a inkalh hle. An zirtîrna inan loh dân lo sawi ila.

1. Ei leh in chungchâng
Juda-ten ei thiang leh thiang lo an neih aante kan zir tawh a, kan la hre reng awm e. Ei thiang an ei dâwn pawhin an kut an sil hmasa phawt tur a ni. Tin, dawr hmun (bazar) atanga an hawn a, thil ei an duh pawhin an inbual hmasa phawt tur a ni. An inbual phawt loh chuan thil an ei ngai lo (Mk. 7:1-4).

Hetiang taka inbual leh kut sil an ngaih pawimawh lai hian Isua zirtîr thenkhatin kut sil lovin chhang an lo ei a, Pharisaite chuan Isua hnenah, “Engati nge i zirtîrte upa thurochhiah anga awm lova, kut bawlhhlawha chhang an ei?” tiin an zawt a ni. He zawhna hi Isuan hetiang hian a chhang a, “Mihring pawn lam ata a kawchhunga luta amah tibawlhhlawh thei eng mah a awm lo, mihring kawchhung ata lo chhuakte chu mihring tibawlhhlawhtu a ni zawk e,” tiin (Mk. 7:5). He thu awmzia chu, “Mihring thinlung atang chuan ngaihtuahna sualte a lo chhuak a, chu chuan mihring chu a tibawlhhlawh thîn,” tiin a sawi a ni. Mihring thinlungah chuan inngaihna te, rukrukna te, tualthahna te, uirena te, awhna te, bumna te, hurna te, îtsîkna te, sawichhiatna te, chapona te, atna te a awm a, chengte chuan mihring a tibawlhhlawh thîn,” tiin a sawi a ni (Mk. 7:21-23).

Heng sualna leh bawlhhlawhnate hi inbual leh kut sil avanga tihthianghlim theih a ni lo va. Tin, ei leh in avanga tihthianghlim theih pawh a ni lo. Sual sima, thinlung thar neih atang chauhva tihthianghlim theih a ni.

2. Thinlung thianghlim nân Thlarau Thianghlim a pawimawh “Thlarau Thianghlim chuan mite thinlungah an sualzia leh an chungpikziate a hriattîr a. An duhthlannate chawk thovin, Isua Krista chu an Lalpa leh chhandamtua pawm tura ngenin, pawm thei turin a pui a, anmahniah felna rah chi tinreng a thawk chhuak thîn,” tiin kan thurinin min hrilh a. Hei hi Lal Isua zirtîr dân nen a inrem a ni. Lal Isua chuan, “Thlarau Thianghlim a lo thlen hunah chuan sual thu-ah te, fel thu-ah te, rorel thu-ah te khawvel an thiam loh a hriattîr ang,” (Joh. 16:8) tiin a sawi a. Thlarau Thianghlim hnathawh avâng chauhvin mi sual kan nihzia kan hre thei a ni.

Thlarau Thianghlim chuan mi sual kan nih thu chauh min hrilh lo va, chhandamtu Lal Isua min kawhhmuh nghal a. Lal Isua chu Lalpa leh chhandamtua ring a, pawm turin a tanpui a, a tichak bawk thîn. Lal Isua ringa chhandamtua pawmtute chuan an sualte simin nun thar neiin thinlung thianghlim, Lalpa lawm tlâk an lo nei thei thîn a ni.

3. Thinlung thianghlimten Pathian an hmu dâwn Lal Isua chuan, “Thinlunga thianghlimte chu an eng a thawl e, Pathian an la hmu dâwn si a,” (Mat. 5:8) tiin a sawi a. ‘Thinlunga thianghlim’ tih chu thinlung sakhat, ngaihtuahna sakhat, tihna a ni ber awm e. Rilru hlawm khat, ngaihtuahna sakhat hmanga Pathian pawl thînte chuan Pathian ropuizia leh a thianghlimziate an hmu thar zel a, Pathian anga thianghlim zual zel an duh thîn. Thinlung hi mihringte nun kaihruaitu a ni a. Thinlung bawlhhlawhte tân thianghlim taka nun a harsa a. Mahse, Thlarau Thianghlim chuan mite thinlung tidanglamin, thinlung thar a siamsak thei.

Ei leh in emaw, kut sil fai leh inbual fai emaw avanga thinlung thianghlim neih ngawt theih a ni lo. Thinlung thianghlim neituten ei leh in tur thianghlim an duh a, fai tak leh thianghlim taka buatsaih an duhin, athatna leh pawimawhnate an lo hre zual deuh deuh thîn a ni. Thinlung thianghlim chuan thianghlim taka nun a duh a, Pathian fa ni awm renga nun an duh thîn. Thinlung thianghlim Lal Isuan a ngai pawimawh hi a awmin a pawimawh em em a ni.

Sawi ho turte
1. Thinlung thianghlimna tel lovin thianghlim takin kan nung thei ang em?

2. Thinlung thianghlimna atâna Thlarau Thianghlim pawimawhzia sawi ho ni se.

Similar Posts:

• Presbyterian Kohhran Beihrual thupui September 15, 2011
• Pentecost pualin
• Thlarau Thianghlim (Pentecost Pual)
• Isua i pai ngam dâwn em?
• Thlarau Thianghlim Baptisma (Pentecostal Sermon)

Recent Posts:

• misual.com tih tawp a ni dawn?
• SIH HUAI NEI (True Story)
• TLEIRAWL HMANGAIHNA
• January 2017, Mizo(ram) Diary
• ZOLÛTI LEH PÛK HUÂI

This entry was posted on Monday, July 13th, 2009 at 10:56 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.