Thang khat lian zet tawha vairampura ka zir ve laiin kan thianpa pakhat hian ‘Hmanlai Mizote tlawmngaihna kha chu ‘Nopui’ dawm duh vanga tlawmngaihna lek a ni e’ tiin a sawia, ka ngaihdan kalh tlat anih avangin kan inhnial nasa viau mai a.
Hun rei tak hnuah, tunhnai mai khan kan titi honaah hetiang zawng bawk hian pakhatin a rawn sawichhuak lehpeka, hemi tum pawh hian ka tang na leh khawp mai!
Hmanlai Mizote tlawmngaihna, mahni nunna hial pawhin a tuar khawpa tlawmngai Neuva te, Taitesena te, Khuangchera te leh midang tam takte, kha chawimawina nopui hlawhchhuah duh vang maia khatia tlawmngai leh huaisen ta ni thei hian ka hre tlat lo.
Mihrang Sahrang hmaah mahni lu zuarin theihtawp an chhuaha, khawtlangin an muanpui em em thin a ni. ‘Mizo tlangval,thian chhan thih ngam’ tih hi chhuang taka kan sawi zel dan tur pawh ni thei se ka duh nghe nghe.
Kawng danga thlir chuan chawimawi duhna avanga tlawmngai niin an lang thei em? tiin ngaihtuahna pawh min sentir viau mai. Chawimawina Zu Nopui kha tunlaia Noble Prize ang hiala hlu a ni thei dawn a,khami chang thei kha chu khawtlangah pawh an langsar hle dawn a ni.
Chutianga chawimawina ropui dawng thei tur chuan theihtawp chhuaha, harsa ti viau mahse tilui hram hramin, khawtlang mithmuhah tlawmngai huaisen ang pawhin a inlantir theih viau dawn niin ka hre tho mai bawk a.
Engpawhnise, chawimawina hian mihring hi kawng tam takin chhawm nung bawk mahse, chapona tlangah a hlang chho awlsam riau thin a, mi tam tak tlakchhiatna pawh a lo ni tawh thin.
Tunlai, hian a phu miah loten chawimawina ropui tak tak an dawng nual tawh lo maw? tihte ka ngaihtuah zela. Phu avanga chawimawina hi chu a hlu a, inchawimawitir lam erawh hi chuan lukhawng a nei fahran awm love.
Tichuan, kan pipute kha chawimawi duh vanga tlawmngai nge an nih, tlawmngaihna kha an nunah abeh tlat avangin an tlawmngai zawk?
Similar Posts:
- Tlawmngaihna hi a tlahniam em?
- TLAWMNGAIHNA vs NIHNA
- Tlawmngaihna, kan chhuang ‘over’ em?
- Tunlai thalaite hian tlawmngaihna kan la nei e
- Inchawimawi
(Y)
July 27th, 2009 at 5:19 am
Tunlai YMA hnatlang neih tura mike a hnatlang tur in auhchhuah ngai hi Tlawmngaihna suak ah ka ngai a. Kan pi leh pu te Tlawmngaihna erawh kha chu ka hriat ve chin ah Tlawmngaihna sawifiah dan ka hriat nen inmil a ni.
Report this comment
July 27th, 2009 at 7:16 am
Chawimawi duh tlawmngaihna hi a awm alawm.
Chhiat ni that ni, vengchhung hnatlang, thlan laih etc. a tlawmngaia thawkchhuak te hi an fakawm a. Mahse heng mi tlawmngaite zingah peih lo chung chunga tilui hram hram kan tam ngawt ang.
Nula/Tlangval fel teh nan kan hmang tawh a, vairampur a Mizo thil tih leh inkhawmna vela tel ngai maih lo pawh mahni vengah chuan tih hram hram a tul….
Report this comment
July 27th, 2009 at 7:16 am
Zonun-ze-mawi tlawmngaihna chu a bo mek, globalization te Indianization leh materialism te’n a eizo mek. Mahse Chawmimawi duh Tlawmngaihna tal hi chu a awm reng beisei ila. Award chi hrang hrang te pawh hi chawimawi tlak an chawmawi avanga hlu ani. Mi tlawmngai phu leh tlawmngai tak tak te hi chawimawi zel ila.
Fak leh chawimawi hi Pathian pawhin a duh, keini Amah anga a siam tr pawh hian chawimawi nih kan duh vek. Chuvangin mi tlawmngai chawimawi phu hi chu chawimawi zel hi a trha. Tlawmngai kan tehna erawh thlan laih leh khawhar in kal chauh nilo, Mizo te hnam anga ti-hming-trha tura beitu te pawh hi huam vek ila.Minister ram tana a hun pawimawh em em hnatlang vel erawh hi chu DEM ngam thung ila. A hun hlutak zawk kha a rawn sen a trul lo reng reng. Chutiangin officer te nikhat hna an trhulh avangin nikhaat-in Hospital equipment pawimawh tak kan neih tlai phah thei, khawharin a a tlaivar avanga a tuk office hna a trhulh khan min nuna hlu tak an chan phah thei – khang ang mite chawimawi duh vanga lo tlawmngai kher ama hna leh a nghawng mipui te tawrhna thleng leh thei ang chi ho hi chu an hna trha taka thawh kha tlawmngai an ni zawk ka ti bawk.
Report this comment
July 27th, 2009 at 7:28 am
Kan tihluih hram hram hian Tlawmngai chu kan ni leh lawi bawk sia..!
Report this comment
July 27th, 2009 at 8:25 am
Muantea ka thlawp e.
Report this comment
July 27th, 2009 at 10:23 am
Pi pu te’n an sawi mizo tlawmngaihna kan tih khan tumah phut a nei lo. Unconditional dik tak a ni. Amaherawhchu mi ten min chhiar min thlir reng e tih a ni bawk a, hetiang mi an awm hi chuan en san an hlawh in ngaihsan pawh an hlawh nge nge.
Tin, mi ngaihsan hlawh duh vang pawh ni se a tha tho, ngaihsan hlawh duh vang a mi hriat lohva thil dik lo tih lam a ni chuang lova. Dik tak leh fare taka mi ngaihsan hlawh theihna a ni.
Tlawmngaihna ti dazat tu pakhat chu mi hmuh a tlawmngai nih duh si, tlawmngaihna tak tak rilru pu si lo hi.
Report this comment
July 27th, 2009 at 1:14 pm
Phil 1:17 : Mi thenkhat zawngin an ti tak tak lo, elrelna avang chauhin kawl ka bun chungchangah hian buaina mi belhchhahsak tura ti an ni.
1:18 Engnge a pawina? Aderin emaw, atakin emaw Krista Thu hrilh a ni ta reng reng a, chu chuan mi tilawm tho ve. A ni, ka lawm zel ang.
Enge maw le Nopui dawm duh vanga Tlawmngai an lonih pawhin a pawina le! TLAWMNGAI an ni ta tho tho a. Lawmman tello thil tih chu a thi a ni kan ti ve ngawt teh ang! Kan em thiang a lawm. Mitin in kan duh vek chawimawi, in fak te hi!(a der mah ni se!)
Nopui dawm tur ngawt a an lo tlawmngai a nih pawhin tunlai a chhungte laka nileng mut theihna permit neihna tlaivar pawh kan peih tawh mang lo anih hi!
I buai lo teh ang. Eng pawhnise, TLAWMNGAI an ni tho tho Tirhkoh Paula dan takah!
Report this comment
July 27th, 2009 at 1:55 pm
Tlirna hrang hrang a awm thei ang chu.Chawimawinna ka tan a awm a ngem ti in kan zai tlut tlut bawk si!Engnge maw khelh lutuk vang a tlawmngaih viau erawh a awm thei tho ang a,hetiang ho erawh kan hre tlang oui thin.
Report this comment
July 27th, 2009 at 2:04 pm
nopui an dawm loh pohin kan ngaisang a, ngaihsan hloh duh vang a ti poh an lo nithei tho. zaithiam ho phei chu ngahsan an duh hi an chiri lo chauh lo maw
Report this comment
July 27th, 2009 at 2:24 pm
In sawi zauna a ngaihnawm khawp mai. Heta ka rawn sawi tak hi chu hmanlai pipute tlawmngaihna kha nopui dawm duh vang ‘lek’ a an chhuah kha ka lai a nat deuh vang a ni. Recognition duh vang chauhva thawh hi chu a hlu nep deuh lo’ng maw?
Report this comment
July 27th, 2009 at 4:07 pm
Taitesena te ang kha NOPUI an dawm duh vang chauha tlawmngaia puh hi a dik thei lovang. Tlawmngai an awm hnuah NOPUI kha a chhuak chauh a ni zawk. NOPUI kha a dawm dawn tih inhria nise Taitesena khan a tihtur tam tak a ti lo zawkin ka ring a.
NGAIHDAN – Tlawmngaihna hi dal ta angin kan sawi fo thin. Kei chuan pawm har ka ti. Hmanlai chuan Tv. tlawmngai te khaw hla tak tak-ah an zualko tir thin, vawiinah chuan phone hmangin kan zualko mai. Hmanlai chuan damlo leh mitthite an zawn a, tunlai chuan motor a thlawnin kan hmansak leh mai. Hengte hi tlawmngaihna vek a ni. Kan pi leh pute tlawmngaihna kha a dal ta a ni love, a rawng a inthlak mai chauh a ni lo maw tih hi kei misual ngaihdan mawlte a ni e.
Report this comment
July 27th, 2009 at 4:38 pm
Mizo nih mai hi a tawklo, i ram hmangaih mai a tawk lo, i nundan…Zonunmawi in lar chhuak ngei rawh se.
Report this comment
July 27th, 2009 at 6:14 pm
Hmanni Sialsuk bul a Putar chak lo ke a kal ‘Lo chuang ve rawh’ kan tih lai khan lawmman reng reng kan ngaihtuah lo chu a nih kha
Report this comment
July 27th, 2009 at 11:10 pm
Peih loh chung chunga tih hi alawm le ropui le..Thilpek ah te pawh hian ui chung chunga pek hi a dawngtu tan a lawmawm daih zok. Pathian pawh hian kan phal deuh deuh ai chuan kan ui deuh thil kan pek hi zu phut tlat a. Nu leh pate’n kan fate kan enkawl thrat theihloh, counsellor, evan, missionary turin kan duh..mahse Pathian chuan a fel leh thra ber a kan hriat kha a lo phut zok daih.
Report this comment
July 28th, 2009 at 10:43 am
A hunlai a mi nih loh chuan tun dinhmun atanga an tlawmngaih chhan va sawi sak a har khawp ang le. Thilchiang tak erawh chu a hun laia an thil ngaihsan ber chu Tlawmngaihna kha niin a lang. Tunlaiah pawh tlawmngai tak tak, an nun a tlawmngaihna bet tlat, mi dang phutna pawh nei chuang lo, fak leh chawimawi beisei miah lo hi mi tlem a zawng chu an la awm in alang. Heng ho hi chuan chawimawi beisei chu sawiloh, chawimawi nih pawh an hreh hial zawk in a lang.
Engle khawle, tlawmngaih hrim hrim hi a tha in a ropui, a chhan chu eng vang pawh lo ni se. Kristiante pawh hi vanram kai beisei vang a heti hi kan nia lawm maw le.
Report this comment
July 28th, 2009 at 2:09 pm
muantea, kan pipute kha chawimawi duh vanga tlawmngaiah kei chuan ka ngai thei lova, ka ngai phal bawl lo a ni.
Kan pi pute hun lai a tlawmngaihna khan huaisenna a ken tel a ngai tlat a. Mi tlawmngai an tihte kha pasaltha, sa leh ral hma a zam lo an ni ti ila ka sawi sual lovang. Chawimawi duh vang ngawt a mahni nunna hlu tak thap chu mi a nilang tan lo chuan thil tih chi a ni lem lo. An chhungte, thiante leh khawtlang in an hlim/him zawk nan tlawmngaihna nun an nei a ni zawkah ka ngai.
Pu mzvision an a zeh zauh Fak leh chawimawi hi Pathian pawhin a duh a tih hi, ka sawi zawm chak deuh. kan pipute khan chawimawi duh vanga tlawmngai an ni ti ho chu kan Lal Isua pawh khan kan tan, kan sual man phur in a thi lova, Fak leh chawimawi a duh vang in a nunna a hlan ti in iak iak se an in hmeh tawk vel chauh ang tih hi ka misual ngaih dan a ni.
NOI
Report this comment
July 28th, 2009 at 4:02 pm
Diktea_Pa
Ka hnialchak lo che sawiho pui ka chak hle mai che helai thu hi, diktak chuan kan thusawi hi mi-naran zawm theih chi leh mi inpe bik chung chuang te nen hian kan sawi pawlh trhin avang hian kan buai trhin. A huho-va kan zawm theih tur chu Fak leh Chawimawi beisei vanga tlawmngaihna hi a ni a chu chu tun aia a lo pun theih nan tunai hian Fak leh Chawimawi hi kan chinchhuah a ngai zawk lo maw :?: tih hi kei misual ngaihdan a ni
Report this comment
July 28th, 2009 at 7:55 pm
Tlangval huaisen Nopui dawm a lal in a chawi mawi thin chung chang hi hmanni khan upa deuh tawh pakhat chuan ti hian a sawi,”Chawimawi nih hi an duh vak lo,a chhan chu kha tiang a chawimawina dawng tawh chu engtiklai pawhin mi leh sa hma a sulsu tu leh thawk nasa tur,hmatheh ber an nih a ngai a(tunlai a Miss an fel sawt ang deuh hian)an hah sauh a, an huai sawt a ngai a,Taitesena pawh chawimawina nopui a dawm kha chuan a farnu te chu an tap a,’a damrei dawn lo a nih hi’ an ti hial e” zuk ti ve mauh a.
Report this comment
July 28th, 2009 at 9:12 pm
Pu Mzvision ka hnialna lam che a ni lova,
@muantea’n
hmanlai tlawmngaihna kha chawimawi phut a tlawmngai an ni love tih kan sawina mai a nia. Fak leh chawimawi hi Pathian pawhin a duh tih lai rinchhan in hian kan tlawmngaihna leh rinna lamah pawh kan tlak hniam tawh zia i tawngkam ka’n hawh sak zawk che a nih kha
I tan ngaihthlak nuam loh deuh zawng a ka lo thaikawi a nih hlauh chuan Ngaihdam ka dil e.
Nia, kan tunlai tlawmngaihna hi chu a dal tawh em a, chawimawina avang tal pawh a tlawmngaihna hian par a chhuang thei dawn a nih ngai chuan tlawmngaite chawimawi chu thil tih awm loh lem lo tak chu a ni.
@XaiA i thil hriat hi a dik in ka ring! Upa deuh ho ti ti ka hriat dan nen a in mil khawp mai.
Report this comment
July 28th, 2009 at 9:17 pm
“rinchhan in hian” tih lai khi rinchhan in tih tur a ni e
Report this comment
July 28th, 2009 at 10:26 pm
Irliana,ka thlawp che. Kristian te hi meidil a tlak vek tur ti se chuan,Setana pawl ah kan in let dial mai long maw.Chutiangin,tlawmngaihna lam ah pawh a peih leh peihlo pawh kan thawh a in ang reng tho chuan, kan in ang vek in ka hria.Missionary te poh ramthim ramro ah hreom tuarin peihlo takin an chhuak thin,chuvangin peihlo chung chung a kan thoh hian Pathian in ‘Malsawmna’in min vur thin.
Report this comment
August 9th, 2009 at 8:55 pm
Tlawmngaihna tih hi he hmunah hian langsar pawl tak ani in ka hria. Kan chhuang over e tih te khan ka rawn sawi ve a. Ka ngaihdan tlang thei ang ber ah chuan ¨society hi tlawmngaihna tih ang reng vel in a a control chhung chu ala changkang tawk lo´ emaw `a nih dan tur kha society khan a la thleng lo` tihna a ni. Dan hian tlawmngaihna a hre lo, sawrkar hian tlawmngaihna a pawm lo. Thian chhan thih ngam!!! tunge tlawmngaih vang a thi tawh mizo zingah? tlawmngaihna hi tihna mah a ni lo, vai ho zingah pawh mi nunna chhan nan nun hlan an tam, tlawmngaihna an ti kher lo. Tlawmngaihna ai chuan mihring felna hrim hrim hi in zirtir nasa ila hma kan sawn zawk ang!
Report this comment
August 30th, 2010 at 3:03 am
chawimawi chu duhlo kan awm lovang. Chawimawi duh vanga tlawmngai tawk pawh an awm ang.
Report this comment