Nei teh reng mai. Kan unaute an ni a, kan Mizo pui, kan thiante an ni a; Anni nen hian chhulkhat kual kan ni. Malsawmna tinreng dawnga mobile phone changkang ber ber hmang chunga, Car nalh tak tak i khalh lai mek pawh khan i tawng ang hmang, i mizopuite chuan an lam hawia i nuih hun an nghak a, engtiknge i chetchhuah ve dawn le ?
Sa tel lova chaw ei har i ti a. Anni chuan ruai theh ni khua leh khual tha an thlen chang chauh lo chuan sa pawh an hmeh pha ve hauh si lo. An duh vang renga rethei an ni lova. An pian leh murnain a zir loh vang maia rethei an ni.
Theih ni se Aizawl khawpui hulum lai bera piang leh seilian nih ve an chak ang. Mahse, duhthlanna pek an ni lo. An tana khuarel ni reng awma mawi hi nang leh kei hian kan thlak thei a. Hmasawnna chu an hnenah kan thlen thei.
I hausakna te, i thiamna te, hmangaihna leh khawngaihna i thinlunga Siamtun a dah kha hengmite tan hian a ni dawn lawm ni ?
Nun hlimna chu midangte tanpuinaah hian a innghat a, midangte tana nunah hian hlimna famkim chu a awm si.
