A kalphunga faktlak leh sawisel lai tur awmte
Joseph L. Ralte
‘NLUP Manual 2009’ chu mipuite hmuha chhiar theihin chhawpchhuah alo ni ta a. Mizoram Congress sorkar policy hmatheh, mipui nawlpui nghawng tur kaihhruaina bu a nih dawn avangin ngaihven a hlawh a. Economist te, Politician te, Chanchinbumite leh midang dangin an la rawn bihchian ve pawh ka ring a. Ka rawn thlirna hi chu ‘entrepreneur tarmit’ atangin a ni dawn a, ziah tur leh sawi tur hi chu ka ngah em em naa chhiartu tam tak chhiar peih tawk velin ka han thai a ni.
NLUP Manual 2009 hi NLUP Implementing Board-in a tihchhuah, Mizoram sorkarin a lehkha no. G.28014/21/2009-AGR of 14/09/2009 a apawmpui, A4 size-a chhut, annexure te nen phek 31-a chhah a ni. Bung sawm leh pakhatah then hran a niin “Manual†tih meuhva han dah atan chuan a chipchiar tawk lo deuhin a lang. “NLUP Operational Guidelines 2009†emaw te pawh ti ta zawk ila a fuh phian awm e.
Fakna tur point-te :
Ngun taka biha vawi hnih vawi thum chhiar nawn chuan he manual duangtute an fakawm hle mai. An thawkrimin ngaihtuahna an seng nasa tih a hriat a, central ministry kalphung pawh an zir nasa hle tih a hriat bawk a. An ngaihtuahna leh hmathlirna chuan a hlawhtlin ngei ngei theihna tur kawng an dap nasa tih pawh a hriat theih a. Ruahmanna hi ar-khaw-thim-daia tih mai mai a ni lo tih pawh a hriat khawp mai bawk.
A duangtute rilruah hi chuan politics taka dawngtu tur induhsakna lam a lang lo hle a. Mizoram din chhuahna tur leh mipui nawlpuiin eizawnna ngelnghet an neih theihna tura thahnem ngai taka ruahmanna inlalawn a ni tih a lang. Congress hun hmasa lama NLUP hlawhchhamna pakhat chu department hrang hrangte inlaichinna (coordination) that tawk loh vang te, thu neitute enzui (monitoring) that tawk loh vang te leh hralhna (marketing) lam ngaihtuahtu bik an awm loh vang nia tarlan a ni hian tun tum NLUP-ah hi chuan an hlawhchhamna ngaiah tluk leh an tum lohzia a tilang chiang viau mai.
Ka lo ngaih pawimawh ve em em thin, central ministry hrang hrangte pawhin an kalpui mek chu eng trade emaw activity emaw sector pawh nise a ram inhnaivaia a huhova thil chi khat ti tura beihpui thlak(cluster approach) hi a ni a. Chu chuan kawng engkima hlawkna a thlen tih hriat a nih vang a ni. NLUP scheme-ah pawh hian a theih chin chinah chutiang anga kalpui chu tum a ni. Kuthnathawktute chhawk zangkhai nan Price Support, Market Intervention Scheme, Market Access Initiatives leh Transport subsidy te thlenga ruahmanna a awm hi a fuh em em a ni.
“Backward-Forward Linkages†an tih mai, tharchhuah, lakkhawm leh sengkhawm, siam danglam leh hralh (products, processing and marketing) chungchangah pawh ruahmanna a fel thawkhat viauvin a hriat theih a. Marketing atana infrastructure mamawh tarlante pawh hi a tak taka mamawh a ni. Wholesale Market, Godowns, Cold Storage, Cleaning/Grading leh Packaging chungchangte pawh tarlan a lo ni ta a. Kan mamawh dik tak a nih avangin a lawmawm hle a ni. Sorkar ringawt chuan a tithei dawn lova, farmers society, trade association leh entrepreneurs body te nena in tie-up that a ngai hle dawn a ni.
Thil lawmawm leh tak pakhat chu Information Technology lam thiamna tangkai taka hman theih tura India sorkarin a chhawpchhuahsa “Market Intelligence Network†hmang tangkai tura hma lak nghal a nih tur thu hi a ni. State tam takah chuan “e-choupal†an ti a. Internet hmang tangkaiin loneitute’n an thawh hah man an tel tur an hre lawk thei tawh a. Keini pawhin block tinah Community Information Centre kan nei tawh a. Internet a inthlunzawm tawh a, tlema han thuam that deuhva tangkai tak tur a ni. He lam kawnga kan hotute an harh thar hi a lawmawm em em a, technopreneur te tan chuan kut ben na tham a ni.
Kan ram thilchhuak (products/produces) te Mizoram-chhuak-thil-bik (branding) a nihna tihlan theihna tura hma lakna hi a pawimawh tak meuh. Hei hi sorkar ang te, mimal sumdawng lian te leh funding institution te ngaih pawimawh em em a ni. “Brand Mizoram†a India leh khawvela kan thilchhuak (products/produces) kan tarlan ngamna tur chu “quality control†a ni. Hetiang anga ngaihtuahna changkang rawn nei thei NLUP duangtute an fakawm ka ti takzet a ni.
NLUP sum leh pai hmang lo chheprelh chungchangah sorkar hnathawk emaw Village Committee te a na thei ang bera hrem an nih tur thute, hma lak dan tur ruahmanna hrang hrang, NLUP ram thlan dan tur chungchang te leh tanpuina sum leh pai emaw a bungruaa sem chhuah tur chungchang thlengin langtlang (transparent) a nih theihna tura hmalakna te hi a fakawm tak zet a. Thup tit tet leh party unit committee-in a ruka rala an tih mai mai theih lohna atana district hqrs. tina NLUP dawngtu (beneficiaries) te list leh an project profile-te en theih vek tura tih te hi a tha-in a lawmawm a, a langtlang dawn a ni.
Sawisel tur point-te :
NLUP hian keimahni kutkawih, keimahni thluak, keimahni thawhrah ngeia eizawng turin min siam a tum a. Chu kawng chu kan zawh fuh a, kan tihfuh hlauh chuan state hausa, intodelh leh changkang kan ni mai dawn a. A lo dawngsawngtu, a dawnthleng, mipui lam siamrem hmasak phawt a ngai tih hi kei ka thupui ala ni fan. NLUP dawng tur reng reng chu thla khat (ni 30) tal Entrepreneurship Development Programme emaw Skill Development Programme Courses an la ngei ngei tur a ni, ti ila. Duh dan takah phei chuan an thil zir kha exam ngei se la a tha. Thla khat chhung lek pawh titha peih lo chu a thil tihturah a tui tak tak lo, tih a lang sa reng. Chutiang ang Capacity building programme chu “Motivation Campaign†huang chhungah I rin lut leh hram teh ang u.
Entrepreneurship han tih hian a huam zau khawp mai a. Industry lam kaihhnawiha eizawngtute chauh hi an ni lova. Agriculture lam hawi eizawnna farming sector kan tih lam hote pawh hi “Agripreneur†an ti mai tawh a. Technology lama eizawngte pawh “Technopreneur†an ti leh mai a. Politics lam hawia ram thatna ngaihtuahtu tak takte pawh “Political Entrepreneur†an ti leh mai a. “Nlupreneur†kan ni vek mai dawn a ni. Kan tihtur (area of concern) ang zelin EDP/SDP course structure pawh kan siam ang a. Sum senso nise a hautak lo khawp mai bawk si.
A dawt lehah chuan ‘hlawhchhamna’ chungchang a ni. A dawngtute (benefiaciaries) suahsual tukhum pawn vang ni lemlo, chhan hrang hrang avanga khawvela harsatna lo thleng thin avangin mi tam tak chu an NLUP tanpuina dawnah an hlawhchham leh dawn tih hi hriat tur a ni. Chutiang ang case atan chuan “Rehabilitation and Reconstruction Package†an tih ang hi kan dah ngei a va tul em! India sorkar hi chuan The Sick Industrial Companies Act 1985 hnuaiah Board of Industrial & Financial Reconstruction a nei a. Chu BIFR chuan chhan mumal tak avanga enterprise tla chhiate a chhawm dawlin a tungding leh thin a ni.
Kan beneficiary-te’n harsatna an tawh dan zirchiansakin a chhan chhuanlam tling (genuine) a nih chuan tlem azawng working capital pek belha chhawmnun leh tlak emaw management emaw technology emaw technical lama han puih hleka dingchhuak leh theite tam tak an awm dawn a ni. Chutiang ang dan chu thil thar a ni lova, han siamrema Mizoram mila hman mai tur dan (act) tam tak awm sa a awm a ni. Pung awma puktir thin bank hrang hrangte tana kaihhruaina, Reserve Bank of India meuhvin a siamah pawh chutiang ang sick unit-te tana an dinchhuah leh theihna a nih dawn chuan hamthatna a siamsak fan a nia. NLUP dawngtu mi harsa te te, an tihthat theih tawh loh a hnu hmanah 5% interest chawitir kan la tum a nih chuan kan tisual ngawt ang.
Thil pawimawh leh em em a awm. Kan NLUP hi duh aiin a Agri-oriented policy lutuk mah mah a. Farm sector leh Non-Farm sector kha a kalkawp tlat si avangin trade hrang hrang te mil tura ‘Insurance Scheme’ sawilan a ni lo erawh hi chu a hrilhhaithlak khawp mai. Ennawn leh theih hram atan a duhawm hle. Ran vulh lam sector tan te, entrepreneur leh artisans te huap thei tur “Insurance schemeâ€Â duan a, mipuite thla vengah Insurance policy kan kalpui ngei ngei a ngai.
Department hrang hrangte thawhhona a that hmel ta khawp mai a. NLUP board hranpa liau liau alo awm ta bawk a. Hemi hun rangkachaka hmang hian kan sorkar chak tak hian “Single Window System†hi hman tumin hma han la thut mai teh u. Europe, Far East leh India ram state thenkhat pawhin an introduce tawh thil a ni. Mipuite awlsamna leh zangkhaina a ni. Han hmang chiah ula chuan Entrepreneurs ho phei chuan kan vote nawn tlut tlut ang che u. Officer ho kara file kal kual, tul lova hna timuang (red-tapism) tibotu a ni ang. Scandinavia ram an sawi ang maiin “It takes only a day to start a business and a day to close it,†tih kha kan ni ve mai dawn alawm.
Sawilan zinga tel ta lo chu “Databank†siam leh  “Management Information System (MIS)†thu kha a ni a. NLUP pawisa kan sem (disburse) chiah atanga thla 6 danah research/survey la-in kan duh ang thlap, kan hmasawnna tilang thei, kan harsatna haichhuak thei tura a methodology siamin statistics la khawm ang u. Sumpai a ngai tam lo. Department staff an indaih loh pawhin NGO emaw trade association lamah kan outsource mai ang a. A kum leh planning leh programme siam nan te, website-ah kan data zawng zawng update nan te kan hmang ang a. Chu chuan transparency a siam lehzual bawk ang.
A tawp berah chuan hei hi a ni. Pa pakhat chuan a serthlum huan a enkawl tha a, mithiamte thurawn ang thlap thlapin a thawk a. A hlawhtling ta a, a thenawmpa chuan a peih ve lem lova, a hlawhtling ta vak lo. Pa pakhat leh chu thilthar ngaihtuah mi, thluak hmang thiam riau a ni a. A industry/enterprise tenau din chu a hlawhtlinpui hle mai a. Pakhat leh chu ti leh ti lo, Zu leh sa nena chen chungin a khawsa vel a. A hlawhtling ta vak lo. An inang dawn lo hle mai. A taima leh hlawhtling te, thiam thil bik riau hmu chhuakte kha chawimawi an phu a ni. Chu chuan mite a tihphur thin. Trade hrang hrangah District level leh State level award siam ila, chawimawina pawisa fai nen. Kumtin kan Chief Minister-in lawmman te sem thin ta sela. Mipui kan motivate ang a, mi hlawhtling kan chherchhuak teuh thei ang. Chawimawi phute chawimawi hi hnam changkangte tihdan a ni si.
Feedback : SMS at +919862566772
