Hmânni chu OM Bookstore ah eng engemaw zawngin ka zu leng lût ve a. Audio CD an dahna tlar ah hian rinloh takin Mizo hmeichhe zaithiam te zinga thiam ka tih ber leh “hmêl ngainatawm” ka lo tih rilrûk ve êm êm thin, Pensy-i English album a lo awm ve tlat mai a. Hmu fuh inti tak chuan ka ban nghal chat a. A man pawh Mizo CD tur chuan a to thawkhat ve viau a, mahse Zoram pâwn lamah hi chuan Mizo zâi CD lei tur hi a vân êm avang hian ka lei ta tho a.
Haw lamah chuan motor chhûngah ka ngaithla phei veng veng a, mawi hi ka ti êm êm mai a. A kâwm (cover) a nalh mai bâkah, music leh recording te pawh sawiselna tur vak a awm lo a. A hla thlûk atang leh a satu awphawi atang ringawt phei chuan sâpram product emaw tih mai theih khawpin a mawi ka ti a. Amaherawhchu, in ka’n thleng a, a chhûnga booklet, hlathu (lyrics) ziahna ka’n phawrh ta a. Hlauhthawn ang ngeiin, Pathian hla, a thu that hmel tak tak, mahse belhchian dâwl miah lêm si lo hlîr hi a lo in hnawh khâwm leh pek a. Ngaithla chhunzawm peih ta lo chuan ka chhûngte ngaihthlâk atân tiin TV bulah te chuan ka dah ta mai mai a.
OM ah chuan Chris MS Dawngkima leh Liandingpuii te English album pawh a lo awm ve. Mahse pawisa ka neih remchân loh avangin hun remchâng danga lei atân ka khêk ta zawk kha ania. Tunah erawh chuan ka vawikhat lei ve na ah ti fuh lo ka in tih êm avangin Mizo English album reng reng lei hi ka fimkhur ta khawp mai.
Hlathu belhchian dâwl lo?
“Hlathu belhchian dâwl lo” han tih dawt mai kha “A tawngkam a na lutuk deuh lo maw?” ti te pawh kan awm maithei. A aia mawihnâi zâwka ziah dân chu a awm ngei ang. Mahse a pehhêl zawnga thil sawi thiam mi ka ni lo a. “Hlathu belhchian dâwl lo” tih khân a chhûnga hla inziak te kha “Pathian chawimawi nân a tlâk lo e” emaw “mi te hriat a sak atân a tha tâwk lo e” kan tihna chu a ni miah lo. Amaherawhchu, hla thlûk nei siam rêng rêng hian a kalphung bik a awm a, a thu in poetic flow leh rhythm a nei ngei ngei tur a ni tih ah hi chuan ka chiang ve tlat. Hei hi mi thenkhatin music ah pawh an ngaih loh, Rap leh Hip-Hop lyrics ah te pawh hian a dik êm êm a ni. Zoram ah sâp hlaphuah te kan uar tawh in kan intihhmuh nasa viau nachungin, leh rimawi khawvêlah hian hma kan sâwn ve viau tawh emaw tih laiin, hlaphuah (songwriting) a he dân bulpui (basic rule) pawimawhna hi Zofate hian ka la hre lo emni chu aw ka ti thin. A thlûk leh music ngawr ngawr tih mawi ringawt hi kan tum anih chuan rimawi lamah hian kan la ril tâwk lo hle aniang.
A ziaktu pawh hi literature leh musical theory lamah chuan lâktlâk loh ve tak ka ni a. Têt te atânga music lam ngaina mi leh ngaithla nasa, thiam ang tâwk a zâi ve thin ni mah ila solfa te hi tun thleng hian ka la thiam thathum lo. Hla thlûk leh thu (music and lyrics) phuah te pawh ka nei ve nual tawh. Ka thiam lêm lo aniang, thiam ni ila chuan mite pawhin min hlutsakin sak atân te pawh min rawn dil ve huai huai tawh tur hi a nia. Kan band “Ninth Side” tâna ka hlaphuah pakhat, “All that you are” kha chu NE Today Magazine in an August 2009 Issue CD ah khân an telh ve a (thiantha thenkhat phei chuan, “Kan Mizo underground band neih chhun pawh in magazine ah an hla an chhuah chuai chuai mai” tiin mi chhaih nân tak an la hmang lehnghal a). Pathian khawngaihna zara heti khawpa rei music lo tuipui a lo buaipui ve tawh si hi, chu hla pakhat tê chiah chu ka hlaphuah zinga hriat hlawh ve deuh awm chhun chu a ni mai âwm e. Mahse, lo tuipui rei ve tawh nangang chu thil ho angreng taka lang, pawimawh bawk si, neuh neuh hi hriat kan lo nei ve nel nual tawh a. Senior tawh lamah phei hi chuan kan lo in ti fing ve tawhin experience kan lo in ti nei ngah ve tawh bawk nên, ngaihdân te hi kan sawi ve ta pawp pawp mai chu a ni hi.
Mizo hla aiin sâp hla hi ka ngaithla tam zawk a. Ka changkan bik vang leh Mizo hla ka ngaihnêp vang ni chuang miah lovin, sâp hla hian ka lung a kûai zâwkin a sak te pawh hi nuam ka tih tlat zawk vang a ni. Zaipâwl leh Group song (male/female voice) ang chi ah te pawh hian sâp hla hi ka thlêkna lam zawk a la ni fo. Chuvângin, tuna kan thu khel lai mêk pawh hi sâp hla, Zofatena kan phuah ve thin bihchianna (examination) a ni deuh ber.
Rhyme pawimawhna:
Magdalene album, “Life Beyond Death” a lo chhuah khân Dr. Ruatliana’n lo ngaithla ve rawh ti in a CD hian min rawn pe ve a. Music, zâi leh style ngawr ngawr ah chuan thiam ka ti khawp mai a. Sawiselna erawh pakhat chiah ka nei leh hrâm. An lyrics composition ah bawk ka lo buai leh pek tawh a. Mak ka tih leh ngaihmawh ve ber pakhatah chuan, kan thalaite zînga sâp hla thlûk leh music phuah thiam êm êm si ina, an hlathu/hlachângah rhyme an hmang miah lo hi a ni. A hma a kan sawi tâk Pensy-i album a hla te pawh kha chuvang ber chuan alawm “hlathu belhchian dâwl lo” ka lo tih leh hman fawk tawh ni. Ka pianhnu a sâp hlathu, “sâp ho phuah” han ti deuh kher teh ang, ka ngaihthlâk tawh zawng zawng (99.9 % ti ila kan sawi sual lovang) te hi rhyme nei thlapa siam vek an ni. Hei hi Zofate hian ngatinge kan la hriat loh? Kan thiam ve lo nge nia kan taimâkna in a tlin lo zâwk?
Hlathu ah rhyme emaw flow a awm loh na na chuan, a mawi tur angin a mâwi tâwk thin lo a ni. A satu tân pawh sak nalh a har phah mai bâkah vawn (memorize, by-heart) te pawh a har phah hial a. Entirnân mai mai, kan Mizo Kristian Hla Bu ami hla lehlin thenkhat te hi a sâptawngin tawi tê tê in i lo thlîr chhin teh ang u –
Amazing Grace (“Khawngaihna Mak”) Year: 1779
Amazing Grace, how sweet the sound,
that saved a wretched like me
I was once lost but now I found,
was blind but now I see
The Gate Ajar for Me (“Kawng zau tak a hawnin a awm”) Year: 1872
There is a gate that stands ajar,
And through its portals gleaming
A radiance from the cross afar,
The Savior’s love revealing.
The Old Rugged Cross (“A saw raltiang tlângah”) Year: 1912
On a hill far away, stood an old rugged cross, the emblem of suffering and shame
And I love that old cross, where the dearest and best, for a world of lost sinners was slain
Tunlai Kristian rimawi (Contemporary Christian Music), Musical style chi hran pahnih te hi han târlang ve leh zawk teh ang –
“Build an Ark” (Gaither Vocal Band) Year: 1960s
Build an ark, head for the open water
Save your sons and daughters
Build an ark, when the storm has ended
You know the world has been mended
“Gimme your eyes” (Brandon Heath) Year: 2008
Look down from a broken sky
Traced out by the city lights
My world from a mile high
Best seat in the house tonight
An phuah kum saw han en thla dan dan ila English medium a pawl sawm pass chin chuan kan sawi tum chu kan hrethiam tawh mai âwm e. Entirnân leh mai mai, Brandon Heath-a hla saw tunlai Zofate zinga phuah chu ni se, ti deuh nuaih hi anih ka ring –
Look down from a sky that’s broken
Traced out by lights in the city
My world from a mile high
Tonight, it’s the best seat in the house
A chunga kan han phuah danglam chhin tâk pawh khi a thlûk leh music thlâk miah lovin a sak tluan ve parh theih a rinawm. Mahse, hla thlûk nei in a ken tel ngei ngei tur, a poetic nature, a mâwina zawng zawng deuhthaw chu kan thai bo vek ta thung a ni. Chuvângin, Zoram a sâp hla kan phuah tam zawk te hi sâpram Record Label ah an lo produce/release ve duh mahna ti in han thawn ngawt ila, a lyrics vang ringawt pawh hian an lo hnâwl (reject) maithei asin.
Rhyme ngei ngei tur em ni?
Hla thlûk nei zawng zawng hian hlathu rhyme an nei vek tur a ni chu kan ti hauh lo. Mizo hla ka hriat ve chhun te phei hi chu rhyme nei miah lo vek an ni hlawm. Hei hi chu kan tawng la hausak tâwk loh vang te pawh aniang (Kan sawi tawh angin tuna kan buaipui mêk hi chu sâp tawnga hlaphuah a nih kha). Sâp hla lâr thenkhat ah pawh rhyme nei miah lo an awm ve. Mahse, a tlêm êm avangin keipawhin han sawi tur ka hrechhuak thei mai lo. Amaherawhchu, eng hla pawh hi kan sawi tawh angin, structure awmze nei takin a hlathu a kâihruai tur a ni tih hi chu khawvel huapa pawm (universally accepted norm) a ni. Hetah tak hian hmabâk kan la nei ngah khawp mai. Sâp hlaphuahthiam pakhat chuan heti hian a ti – “Again, I will say that songs do not have to rhyme, but I will also say that the vast majority of successful songs do rhyme…”
Mizote zingah:
Zofate zinga sâp hlaphuah thin ka hriat ve te zîngah, uluk leh thiam ka tih ber chu Jeremi Zobiaka (JBA) kha a ni. A hlaphuah pakhat, “We’ve got to try” tih tun hnaia Lianzuali sak thar leh hi a tawp nân i lo thlir leh lawk teh ang u –
I look around
Everywhere I turn
I see the scars of Satan’s whip
Distorted mind
Steeped in wine
Refuse to leave the sinking ship that’s bound for hell
We’ve got to try
You and I
To break the Devil’s chains and bonds
We’re not alone
It’s good as done
The Holy Spirit won’t let us down
He’s on our side
Jerêmi-a hian grammar emaw vocabulary un leh har hman a tum miah lo. Mahse a hman dân a dik mai bâkah a rhyme leh structure, leh a English hman khi a mawi êm êm a ni tih kan hmu thei. Sâp hla kan phuah in English leh a grammar thiam ringawt a tâwk loh zia chu tikhân kan hrethiam mai tawh âwm e.
Mizoten kan sâp hlaphuah kan zaithiamten an sak thin hi grammar lamah chuan kei chuan sawiselna tur ka hre lo a. Sawisêl tur pawh in ka sâptawng thiamna in a daih lo. Mahse, sâp hla kan phuah ve thin te hi structure leh form ah hmabâk an la nei ngah hle tih hi chu a chiang. Rilru a lang ang apiang ziahthlâka, a thlûk leh music siam tawp ringawt mai hi kan tihdân tlângpui a ni mai hrih awm e tunah hi chuan.
– Dawnglura Pachuau
