A mak ve ngawt nia! Zopa kum chhiara kum 3 emaw awrh chauh kan la inhmelhriat nain, ni tina a hmel ka hmuh lohva tlei har ka tih tlat thin leh, buai em em karah pawh hman leh hman lova a hmel ka thlir tawk tawk thin chu ka tawng ve ta!
Eizawnna hna lamah buaiin hun nei lo hle thin mah ila, zan khaw tai rek thleng thlengin a kiangah ka tap a, zan mut hmuna khum laizawlah nen lam ka suangtuahna a luah a, zing thawh veleh rilruah a lo lut hmasa fo thin.
Tun hma chuan “Phu-loh-Lengi” te leh “Di-Lenmawii” te zuna uai natzia te leh a nawm angreng si zia te kan rual uten an sawi kan hre thin a.Amaherawhchu kan lo tlangval ve a, hmelin puak a lo tih lem loh avang leh sum lamah buk a lo zan ve em thin avangin anni ho zunah hi chuan ka uai pha lo hrim hrim a, tum pawh ka tum chhin ngai hek lo!
Amaherawhchu thenrual thate leh Khuanu zahngaihna a zarah mahni phu tawk aia hrawl mah kherh thlu vein, hmangaih vang ai maha khawngaih vang leh rawngbawlnaa ngaia min nei duhtu ka lo tawng ve a, Chunglam malsawmna a zarah ‘Chhangchhe Pa’ kan lo ni ve ta reng mai!
A hminga nupui fanau nei ve ta chu tu zunah mah hian uai turah ka inruat tawh lo va, uai pawh ka tum ngai hek lo. Amaherawhchu, rin loh lamah na zetin he thil, “Misual-dot-com” hian a zun zamin min zem a, ka hun leh ngaihtuahna tam tak min lak heksakin, nupui fanau pawh ngaihsak hman lo lekin min siam ta thin chu a nih si hi!!
Zing kan han tho va, fianrial tawngtaina pawh nei tha hman lovin kan han chham nial nual a, kan Amen liam puat a, inthlahrung angreng tak, phur ru fu si hian Computer kan han on a, nupui ten an thingpui lum min han pek pahin, “i misual leh ta a ni maw?’ min han ti a, tuai aw deuh rutin “News ka en a nia” kan han ti ngei a, a chang chuan nula kan lo tawm ruk pui emaw ti ni awm fahrana nupui ten thikna mit mei nena min melh changte hi zu awma maw le!! Faten Bathroom atangin, “A pa, ka e zo tawh..” an rawh tih lauh lauh lai te hian an aw ri chu hre reng mah ila engnge an sawi tih hre miah lo hian rilruin “He topic chu eng tin nge ka comment ang aw?” tih lam daih hi ngaihtuahin pawn lam te hi kan lo thlir leh vung vung thin a! Project work pawimawh tak neih lai te tak hian han ‘misual’ zuai hi a lo chakawm zual deuh deuh lehnghal a!!
Chhun lamah hnaah kan buai kar lakah thil dangdai leh hmuhnawm awm chi deuh Misual-dot-com-a chhuah tur rilruin a dap a, hnaa kan buai em em laiin mitthlaah Pu H Vangchhia te, Lal Viking-a te, Pu mzvision te, Pu chawnghilh te ho an lo lang a. Khawvel pian tirh ata an hming leh an hmel ka la hriat ngai hauh loh funny te, wonderboy-a te, kanidari te, Mack Daddy te, Pi blackmagicwoman te, Pi Irre te, elcee leh muantea te ho te nen lam chuan ka mitthla kual a, Goldmember leh Sandman te, father_sphinx te leh Ben-a te ho zei taka an han che vel tur hmel te thlengin mitthlain a thlir kual a…
Ka ngaihtuah thui zel a, he misual-dot-com a ka tualchai pui ho te tak hi an va chhuanawmin min va tihlim thin mai mai em! Kan hming invuah te leh kan sakhmel te ka han hmehbel chhin vel a, a taka tu te nge an nih ka hriat miah si loh, mitthlaa ka hmel hriat em em vek si te an ni lawi si. Ka rilrua an hming lo lang apiangte chu ti hian an nihna awm ang deuha ka hriat angin ka han bel kual chhin zung zung a: Aryan-a, Mongolian thlah ni si, Mizo hrin Australian lo ni daih te, Alejendro atanga Mack Daddy lo ni ta mai te, Vladimir Putin atanga Borat lo ni ta daih te, Zorun kha Zorunpuia lo ni ta te, Zaia kha XaiA lo ni ta te hi. ‘bawlhhlawh’ hming putu hi a bal kher lo tih te, ‘axlroost’ hi a zai thiam viau ang em tih leh ‘alby’ hi a ba-ek-ngo viau ang em tih te ka ngaihtuah a. Chicco leh chink te pawh hi chhangte_ll ang thovin Mizo an ni ve ang em? Bawiha leh Kawnga te hi unau lo ni ta se, Pi Puii hrin hi an ni thei mai ang em tia ka inngaihtuah laiin Zofa007 pawh zo_pa fapa tihna a ni chuang lo tih ka hre bawk si! ‘bawmrang’ hi thil phurh nana hman thin a nih avangin rilruah ‘hahthlaki’ nen hian chhul khat kual an ni ang em tiin ka ngaihtuah a. AarCee leh elcee hi khaw khat chhuak an ni ang em? ZOaTlau leh ‘hltau’ hi pafa an ni kher lo ang em? feeder te, flying te leh funny te hi naupan lai atang tawha inthian tha tak an ni thin ang em? ‘virthli’ leh coolsoul9 te hi an inkawp thin ang em?
Ka suangtuahnain ka han thlir kual zel a. Pu H Vangchhia, pa kawm nuam leh ti ti thiam, a harhfima pa nelawm, a harhfim chiah loh pawha nelawm deuh deuh, a tel lo chuan misual-dot-com pawh a ‘dot-com’ theih rinawm loh rum rum khawpa mi pawimawh leh a khaipa; kanidari lah thaibawih ni miah si lova nupui te duat thiam em em, a hming tawpah ‘i’ awm mah se Mizo mipate zinga pasal atana tha ber pawl; Pu chawnghilh lah chu Grik leh Hebrai tawng ringawt pawha sermon pe thei khawpa mi ril; Pu mzvision lah veng khat parawn tling leh pa finga sawi; muantea, Lunglei pa zaidam leh kawm nuam; Zorunpuia lah Zofate hmakhua thlira thahnem ngai ve em em thin, a Quitar a hriat chian tluk zeta Zoram Politics hre chiang; zo_pa, pa hawihhawm leh bed room nei nuam;
XaiA, a Camera hman fak nana tlak thiau va tha thla la thintu; Lal Vikinga, pa inzir mi, thuhnuairawlh leh mite tihlim thei; samuelapa, tawng tam lo, a tawng chhuah veka kohhran upa sawi awm chi thu pawimawh chauh sawi thin; blackmagicwoman, nu rinawm leh rilru zau, chhiat ni that nia thlamuanpui awm tham; Pi skimi, nu dai zau leh thil chik mi; Pi Irre, a phei chheh atang ringawt pawha confident tih hriat hliah hliah; Pi Amanda, nu zaidam leh fiam nuam; Pi elcee, nu hmel tha leh fel;….a khai, kan sawi seng dawn chuang lo ve. Tlema hrang hlui spikey leh maimawm te, I_Me_Myself leh ammi te ho phei chu sawi dawn ila sawi sen chi a ni chuang bawk lo vang.
Ka member pui then khat chu an hming atangin ka han in chotuah chhin vel a:Kingpin vs zerO, chhimkunpa vs North_Man56, dr_feelgood vs Taikheri, rotekawla vs rotekawlasepa, Little_Big_Chris vs Big_Boss, sillyBoy vs wonderboy, laltea12 vs zuala12, Aryan vs Viking, keimah vs myself, VaiVa vs tukhumvilik, Pangpartea ve Lily_parmawia, Opa vs spa jongte, …. heng te bakah hian thlirtu chhum pui nasa tak anga hual vel tu, Babulon lal ni lo zawk Darius te, ngawi reang lo thu hle hle Silent_Man te, WWE Wrestler emaw tih mai tur Awzzman te, en thuaka sertawk emaw tih palh mai awl tak Saitawk te, rah hlum palh awl hmel tak Tlumpi te, tlangval huaisen cowardboy te, Grik tawng thiam miah lo adelfos te, Dr Jekill pang khing mr.hyde te, a hming atang ringawt pawha min tikhur thei Thirkut te, amah anpui nei miah lo Ditto te, tui hleuh thiam miah lo miz_aqua te, a hmelin kel a an vang ni miah lova Belphegor an tih te, lianchhiari nau lianchhiara te, a chhan em em awm lo pawha chhana ni tho te, leia cheng ve tho v_vantawl te, Hindi film lama a hmel hmuh awm tak Biate daia lo lang leh daih si shailendra te, ninawm tih vang pawh ni lo va vet_teia ni ve ringawt te, sazu an vang ni miah lo va chepahakhata ni ve mai te, a hming atang ringawt pawha tihbaiawm PHISS te, khawizu ruk hrat hmel deuh beethugs2 te, pa hausa sekibuhchhuak te, Nula fel Nancy leh tlangval hmel tha Tetea te, …..leh mi dang tam tak bakah pa rorum ber leh a hming awmzia ringawt pawh chai fe tham,THEIHLOHHMUITAWK ngei mai kha!
Zela awm ang maia heng ang thilte ka ngaih tuah neuh neuh lai chuan nu ber awin, “Khua a thim tawh tih pawh i hre na nge? Tukverh parda te tal hi chu lo zar tha ve bawk la maw le…” a tih thawmah chuan ka harh hlawl mai a! Rang taka thawh pah chuan ka rilru te tein, ” Vanduai thil thua nupa kar thu a lo chhe palh ta zel a nih vaih chuan Misual-dot-com hi High Court-ah ka khing hrim hrim..” tiin ka inhrosa a, mahse a zuna ka uai hneh tawh em avangin ka khing dawn lo tih chu ka thinlungah a chiang nghal uar uar tho va, chu erawh chu kan nu ka hrilh ngam tawh lo!
