mi(sual).com

Mihring zia a nih miau avang hian, thudik awmsa ni reng si hi, inhrilh nawn hi kan ngai tawn fo thin. Keima tawn tawh te leh ka vei thenkhat i han tarlang ila.

America ka chhuk ve tirh khan tourist visa a kal ve mai ka nih avang leh work permit nei lo ka nih avang bawk chuan hna ka tan duhtui a har hle mai. Remchang apiang thawh hreh lo tura ka in puahchah mek laiin, Saithangpuia Sailo chuan a hnathawhna hmun a engineer pakhat, chumi pawnlam hna pui turin milo sawi fel sak thlap mai a chu niin, ka lawm ngei mai.

Hna thawk tan ve tur chuan Aizawl to Serchhip ang vel tura hla chu bus leh Rel (train) hmangin College Park khua, Maryland atangin Washington,DC ka zuk pan ta a. India zia ka la lo hle emaw ka tih lai chuan, “good morning sir,” in kan tan pawp mai a. A ni lah chuan, “engtin maw min koh kha, ka hming chu… a ni, thu rawh,” min ti ta hrawk mai. Angaihna hriat a har tep zawng a ni e.

Amaherawh chu hei tun hnu hian kan hre chho ve zel a, “SIR” tih hi Taxi driver hian an tawng hnem ber mai lawng maw aw, ka ti ta a ni. Keini aia hna sang an chelh avang ngawt khan SIR tih hi an lo ngai aw zawng lova, tul pawh a lo ni hranpa heklo. Favor emaw, entirnan, mi pakhatin tu emaw a pen a hman hawh tir lawk ta ang se, kut dawh pawh nise a pek kir hun khan, “thank you sir,” a ti ang.

Tichuan, hna chu kan thawk ve tan ta a, thla te a lo liam ve zel nen ka hnathawh ve te pawh chu ka thiam belh chho ve zel bawk a. Tum khat chu keimah in bungbel dahna bawm thar (cabinet) hi min vuah phei tir thap mai a. Ka zo ta tih ah chuan, a hnen ah kalin, “va en chhin teh khai, enge i ngaihdan, i duhthu samin ka vuah hlawm emaw chu,” inthlahrung angreng tak chuan ka va ti dek dek a. A ni chuan, a tha ka tih chuan tha a tih thuin mi chhang ta daih mai.

Khitiang tlem ka han tarlan bakah leh ka mit hmuha thil thleng te avang hian Mizoram Mizo te tana awh leh duhthu han sam ve vak ngawt mai hi a awl ngei mai.

Helam ah chuan, min hna a thawk a nih chuan a rinawm turah an ngai nghal phawt thin. Mi ngaihdan ah inghah an tum lemlo, mi tih pui turin hna emaw an dah ngailo. Mahni a tih ve theih ngei an tum a, an ti thei mai zel bawk. Hna ah an rinawm a, a hun ni lova thil tihpui tur ang chi pawn sawm enah tumah an in en lo. Hlawh san phut in an nawr ve lova, an hnathawhin a phu reng em tih thlir niawm tak hian hlawh pun hun thlahlel takin an nghak mai. Kaisan (promotion) leh lawmman (award) ang te hi a hun ah chuan lo thleng mai turah an ruat tlangpui ni hian ka hria. An nawr an nawr ka hre ve ngai hek lova, an hotu ten phu an tih hun a chawimawina pawh dawng mai turin an nghak mai.

Mizo ina chin ve atan tha ka tih ve pakhat chu, sawrkar hnathawk officer lian ( eng dept’ ah emaw) a nih vang ngawt a kan SIR ngawt hi sim a tha ka ti. Kan hnathawh danin kan pu te kan zah leh zah loha ti lang tho tho. A thu hrim ah sir tih aiah, Pu… ti ten emaw ko (address) ta zawk ila. Tin, hnathawhna hmun thian kawmnan a kan hmang hian hna a ti thuanawp tih kan hrechiang. Heihi Mizo, Mizoram hmangaih tu inti tan chuan sim chi ah ka ngai bawk. Hotu te/thawhpui te leh kan mi biak hrim hrim te hi kan zia diktak nisi, kan ze mawi lai ber a dawr tur an ni. Zia thup a vai ang maia, nuih tlawn heuh heuh emaw a tullo, mahni nih phung pangai in awm ila,keimah ni pawh kan hahdam.

This entry was posted on Saturday, October 24th, 2009 at 12:26 pm and is filed under Mizo Society & Culture, Opinion. Both comments and pings are currently closed.