Naupang kumtling lo chhawr chungchangah Aizawl leh a chhehvel chu a fihlim lo hle niin zirchianna pakhat chuan a sawi a, hmalakna mumal a awm lo tih sawichhuah a ni bawk. Centre for Peace and Development (CPD) in zirchianna a neihah chuan naupang kumtlinglo te chu dan kalha chhawr an nih thu tarlan a ni a a, dawr (establishment) 200 ah survey neih niin heng zingah hian 80 chuan dan kalhin naupang an chhawr tih hriatchhuah a ni bawk.
“Dan in a sawi dan chuan kum 14 hnuai lam hi an duh thu a ni emaw ni lo emaw pawisa lakluh nana chhawr phal an ni lo a, Child Labour Registration and Provisional Act 1986 chuan a khap tlat a ni” tiin Angela Ch. Ralte, CPD chuan ZALEN a hrilh a ni. “Kum 14 leh 16 inkar pawh an chhawr duh a nih chuan medical certificate an nei tur tih a ni bawk” tiin dan bawhchhiatna chu a tarlang bawk.
Survey an neih atanga a lan dan chuan dawr/sumdawnna hmun an tlawh 40% zetin dan kalhin naupang kumtling lo an chhawr tihna a ni a. Automobile sumdawnna hmun 17 tlawh zingah 25 chu dan kalh a chhawr an ni a, construction hmun 10 tlawh niin 10 an awm. Thingpuidawr 147 tlawh niin 16 an awm tih hriatchhuah a ni a, stone quarry-ah 4 an thawk a, thil zuar thutpui 25 zingah 15 te chu kumtlinglo an ni bawk. Heng bakah hian survey-a te lo naupang, an thil zawrh ak-a kal kual thin engemawzat an awm bawk a ni.
