1st. Thursday: Vawiin khan Vanapa Hall-ah thisen pete chawimawina ni ‘National Voluntary Blood Donation Day’ Association for Voluntary Blood Donation leh MSACS buatsaiha hman a ni a, Health Minister, Pu Lalrinliana Sailo-in a hmanpui a ni.
2nd. Friday: Synod Committee Room, Zosaphluia Building-ah Pastor Nupui Intawhkhawm vawi 36-na neih a ni a, Upa Dr. R.L. Thanmawia, Ramhlun South chuan hmanpuiin ‘Nang malsawmna ni ang che’ (Gen. 12:2) tih thupui hmangin thuchah a sawi a ni. Presbyterian Kohhran Pastor Nupuite hian kum tin intawh khawmna hun an hmang thin a, mithiamte ruaiin thuchah ngaihthlak bakah thupui thlan bik paper te an zirho thin a, an pasalte rawngbawlna an tawiawm theih dan tur leh Kohhran tana Nu nih tling an nih theihna tura theih tawpa hma la tura infuihna hun te hman a ni bawk thin.
3rd. Saturday: Bethlehem Kohhranah Sunday School Zirtirtu Training neih a ni a, Pu Lalthahluna Ralte, MSSU Asst. Coordinator, Upa Lalchhuanawma, Zuangtui leh Pu Lalthanchhunga, Bungkawn (MSSU Trainers) te training neihpui hian an kal a ni. Zan Pathian Biak Inkhawmah Pu Lalthanchhunga’n Child Evangelism (Naupangte hmakhua) thuchah a sawi bawk.
4th. Sunday: Durtlanga St. Francis of Assisi Bial Catholic Kohhran kut hman a ni a, Aizawl Bishop, Most Rev. Stephen Rotluanga chuan Biak In kut lawmna hmanpuiin Kohhran member-te tan Pathian hnenah malsawmna a dil a, lawmthu sawina Mass leh Eucharist thianghlim a hlan a ni. Durtlanga St. Francis of Assisi Kohhran hi kum 2 kal ta atang khan bial puitlingah hlan kaia Puithiam awpa dah a ni.
5th. Monday: Luangmual Vengthlang Branch KTP member, Pathianni hmanga Thenzawl Field Veng KTP tlawhtute chuanna Bus, Thangvuka, Durtlang-a mi ta, MZ-01-B-5737, Aizawl pana lo let chu tukin dar 8 vel khan Changte kam, Aizawl lamah a meter 50 vela thui a luma, a hmunah Danial Lalruatfela (18), S/o R.Lalremliana Luangmual Vengthlang chu a boral nghal a ni. Mi 25 laiin hliam an tuar bawk. Bus chetsual chhan hi driver mutthluk vang a nih rin a ni.
6th. Tuesday: Mizo pa zinga Pathian rawngbawltu ropui leh Mizo te tana thu leh hla lama sulhnu ropui tak hnutchhiah tu Rev Liangkhaia piancham vawi 125 na ‘Quasquicentenial’ pualin Seminar leh Exhibition inkawp hman a ni a, Pu PC Zoramsangliana Art & Culture Minister in a hmanpui.. He hun hi Sahitya Academy Kolkotta, North East Centre For Oral Literature Hqrs. Agartala, Mizo Academy of Letters leh Zoppen Club International Hqrs. Aizawl te’n an buatsaih a ni.
7th. Wednesday: Excise and Narcotics Enforcement Staff duty-ten vawiin chhun khan Sihphir-ah sap zu, um 267 leh zu phurtu motor 2 an man. Hemi rual hian mi 5 man an ni bawk a, chungte chu: Biakliannguri, Bawngkawn, Lalramnghaki Dinthar-II, Lalmuanpuia Kolasib Diakkawn, Vanlalhruaia Kolasib Hmar Veng leh Lalchhandama Edenthar-te an ni. An motor mante hi Maruti Gypsy leh Maruti Car an ni.
8th. Thursday: Vawiin atang hian Mizoram chhung leh ram pawna Presbytery hrang hrangte’n Inkhawmpui an hmang tan. He hun hian Pathianni thleng a awh ang. Presbytery thenkhat chu remchan zawkna avangin hmang hma leh hmang tlai an awm bawk.
9th. Friday: UPC International Ladies Auxiliary Department khawmpui lian chu vawiin atang khan Lunglei Chandmary venga UPC Biak in-ah hman a ni. He inkhawmpuiah hian Zoram hmun hrang hrang atangin rorel palai 750 vel an tel a ni. Tun tuma khawmpuiah hian thupui atan “Thianghlimna†tih hman a ni.
10th. Saturday: Zomi Innkuan, Aizawl buatsaihin vawiin khan kum tin October thla-a neih thin, Khuado Festival 2009 chu Vanapa Hall-ah hman leh a ni a, ZIDCO Chairman, Pu Lalrobiaka’n a hmanpui
11th. Sunday: Saiha district chhunga Tuisumpui ramah ramvak C.Lalchungnunga (26) s/o C.Chhaly chuan a ramvah pui , LC Va-u (51) s/o LC Laihli chu sa emaw tiin a ulhbun silai (SBBL) in a lu-ah a kap a, musep 5 ngawt a taksa ah hian a lut a, a hmunah a thi nghal ani. C.Lalchungnunga hi hetia mi a kap tih a inhriat veleh hian engemaw chen chu nikhaw hrelovin a awm nghal a ni.
12th. Monday: Phullen khaw VDP-te chuan an khuaa misual pakhat, Silai lem nena mi vaua pawisa dil thin, Zarzoliana (29) chu tukin dar 3:30 khan mi rikrapna atana a hman silai (M-16) leh a mu lem, a tak ang tak nen an mana; hemi chungchang hi anmahni bialtu Saitual Police Station-ah hriattir nghal a ni a, vawiin khan Saitual Police-te chuan he misual hi an kuta kawl turin an la nghal a ni.
13th. Tuesday: Serchhip District-a Thentlang khuaah tukin dar 1:15 khan Pu Sangkhama In (Assam Type) chu a kang ral vek. A kang tih hriat a nih veleh he Ina chengte chu an tlan chhuak nghal a, thi leh hliam an awm lova, kangmei a chhuak tih an hriat hian thelh rual a nih tawh loh avangin an tlan chhuah paha mutbu leh thawmhnaw tlem azawng an tlan chhuahpui bak chu engmah chan an nei lo a ni. Kangmei tuar chhungkaw tanpui nan hian Serchhip DC chuan cheng 25000/- a pe a, vawiina YMA hnatlangte thingpui lum nan cheng 2000/- a pe bawk a ni. Hemi bakah hian Gratuity Relief ni 7 chhung atan an chhungkaw member 3 tan cheng 20/- zel a pe bawk dawn a ni.
14th. Wednesday: Assam-a zirtirtu lungawi lo, All Assam Teachers’ Akyamanch chuan darkar 12 chhung Bandh an huaihawt avangin Mizoram lam pan motor a tlem hle.
15th. Thursday: Mizoram Assembly Budget Session chu vawiin khan tan a ni. A tan ni hian Session hmasa leh tun Session inkara mi pawimawh thi tate sun a nih bakah 2009-2010 chhunga sorkar sum hman tur budget chu Chief Minister, Pu Lal Thanhawla, Finance Minister ni bawkin a pharh nghal bawk a ni.
16th. Friday: ZONET buatsaih, Mizo Idol thlanna, hun rei tak atanga neih chu zanin khan Chanmari Hall-ah zawhfel a ni taa; a pumpuiah H.Lalchhanchhuaha Sumsuih chu pakhatna niin lawmman tangka fai Rs 40000/- bakah thlatin ZONET lawmman hun engemaw chen a dawng anga; company leh mimal duhsaktute’n lawmman engemaw zat an pe bawk dawn a ni. Lawmmante hi Minister Pu Zodintluanga’n a sem a ni.
17th. Saturday: Mizo Student Union President hlui Pu K.Laldinthara chuan eiru nia rin thlanna buatsaihtu PRISM leh an thawhpuite chu mahni mita khanchhuk awm hmu lova mi mita hmawlhte ngaimawhah a puh.
18th. Sunday: North East India Christian Council (NEICC) puala tawngtai ni a nia; he pawla tel Kohhran hrang hrangte’n he hun hi hmangin hemi pual hian tumkhat thawhlawm lakkhawm a ni bawk.
19th. Monday: Tukin khan Tuikual South-a MIZOFED Gas semna bulah 407 truck, MZ 01 E-0610 UD&PA in bawlhhlawh paih nana an hman thin chu handyman Lalrinmawia (19) Tuikual North chuan tinungin, gear-ah a thuna; a thunun leh theih siloh avangin a hmaa taxi tlan lai MZ 01 E-6670, Lalhmangaiha, Durtlang Leitana mi khalh/ta chu a sua; taxi hi kawngthlang Assam Riffle bang hungna a sut chilha; a chhe hneh hle. Amaherawhchu vanneihthlak takin thi leh hliam an awmlo hlauh a ni.
20th. Tuesday: Mizo hmeichhe zaithiam lar leh hmeltha Felina Lalremruati chu C.Lalrokhuma (Puite-a) ex-MZP President nen Electric Veng Kohhran Biak Inah an innei.
21st. Wednesday: Larsap, Lt.Gen MM Lakhera chuan vawiin khan kum 72 a tling a, a piancham hi Raj Bhavan hnathawk-te’n an lawmsak.
22nd. Thursday: Tunkar Thawhlehni atanga tan YMA General Conference Chalfilh Run, Darlawna neih chu vawiin khan a tiak taa; nakum conference na tur atan Lunglei ruat ani. Kumpuan neih a ni leh dawna; kumpuan thupui atan ‘Khawtlang nun siamthat’ tih an thlang bawk. Nakum sorkar kum chhung atana YMA Budget atan Rs 5929700/- pass a ni. Kumin hi inthlan kum a nia; 2009-2011 chhung hruaitu atan heng mite hi thlan tlin anni: President: Pu Lalchungnunga, Ramhlun North. Vice President: Pu C.Zoramliana, Tuikual North. Secrectary: Pu Lalbiakzuala, Khatla. Asst. Secrectary: Pu Vanlalruata, Tuikual South. Tresurer: Pu R. Lalngheta, Hlimen. Fin. Secrectery: Pu J.Lalsailova, Mission Veng North. He conference-ah hian CM Pu Lal Thanhawla chu khuallian a ni.
23rd. Friday: Mashi Sangati Convention vawi 26-na, Bungkawnah tan a ni. He Convention-ah hian Hindi Bible School Principle Rev. John Sharma chu Speaker a niin thupui chu ‘I Pathian tawk turin inpeih rawh’ tih a ni.
24th. Saturday: Home Secretary, Pu Lalmalsawma chuan Tripura Camp-a awm Mizoram Bru Refugee-te lak let chu November thla chhung ngeia tan theih a beisei.
25th. Sunday:Zirtawpni atanga tan Mashi Sangati Convention chu zanin khan a tiak ta. He Convention-ah hian palai 3,000 chuang zet an tel a, Synod Mission Field hrang hrang atangin mi 98-in an chhim bawk a, ringthar, Baptisma chang mi 92 an awm a ni.
26th. Monday: MZP hruaitute chuan Youth Commission thil tum tipuitling tura theihtawp chhuah zel an tum.
27th. Tuesday: Mizorama khawpui hrang hrang – Aizawl, Lunglei, Saiha leh Champhai-a damlo enkawlna kawnga inrawn tawnna tura Internet hmanga inthlun zawmna, Telemedicine Service chu vawiin khan Chief Minister Pu Lal Thanhawla’n Aizawl Civil Hospitalah a tinung.
28th. Wednesday: Mara Autonomous District Council hnuaia VC 77 inthlanthatna ni 12-a neih tur chuan a vawrtawp a thleng ta.
29th. Thursday: New Capital Complex Welfare Committee chuan suahsual rawngbawltute lakah an veng chhung him taka vawn an tum.
30th. Friday: Bukpui khua chuan an khaw Branch YMA huaihawtin an khaw chhuak, Officer leh sakhaw rawngbawltu langsarte chawimawina hun an hmang. He chawimawina inkhawm, Bukpui khuaa neihah hian an khaw chhuak, sorkar officer ni lai leh ni tawhte leh sakhaw rawngbawltute, an vaiin mi 42 chu an khaw ,VCP Pu Lalengzauva’n an khawtlang aiawhin chawimawina Thangchhuah puan, Pangparthi leh Certificate a hlan a n
31st. Saturday: Zaipawl hriat hlawh tak, Baptist Choir, Aizawl te chuan kum khat teh meuh an buaitsaih hnu ah music video album ‘Min chhandamtu’ tih chu vawiin khan Upa C. Ramhluna, MLA Chanmari Hall-ah a tlangzarh.
