Mizo te hi thian ngaina mi kan niin, thenawm khawveng te in ah len luh nuam ti mi, inleng pawh nei peih reng chi kan ni awm e. Hlim taka inkawm khawmin, fiamthu te kan thawh tlanga, kan hna leh thil tih emaw te thingpui no dawm paha inkawmngeih taka sawi ho mi kan ni awm e. Nula tlangval te pawh hnathawhna lam emaw, an zirna lam atanga an lo haw hnu chuan, inthlakin tam tak chu thiante nen an chhuak leh nghal mai thin bawk. Hlim taka inkawm khawmin zirna lam, ngaihzawng te leh thuamhnaw thleng thar leh thil dang te sawi hovin hlim takin an inkawm khawm thin.
Hetianga hlim taka kan len theihna chhan leh hun kan neih na chhan te hi enge ni ta ang le. Hetianga thenawm te in emaw thiante in a ni emaw, dawr vela kan tei hawi hian enge keimah ni ah zawi zawi a lo thleng hi kan ngaihtuah ngai em aw?
A hmasa berah chuan,”awmpui,” neih hi ni berin ka hria. In lama kan chet ngai lovin kan thawh ai min thawh sak thei tu kan nei tawh miau alawm tiraw? A ni chiah reng a ni mahse, awmpui neih hian thatchhiat na te, ngaihsamna te, zawmthawtna te leh that lohna tamtak a keng tel tlat mai a ni. Awmpui nei lovin awm pawh kan awm thiam tawh manglo chu ani ber a mahse, inngaihtuah chian chu a hun khawp mai, ram thatchhe ber tawng thei deuh si kan nih hma hian.
A dawt leh ah chuan, sikul kan ban hnu emaw, hna atanga kan haw hnu hian awmpui neilo pawn awm awl/hahchawlh hi kan tum rilru viau ringawt tlangpui niin ka hmu. “Pathian in zan hi mut hun atana min pek a ni,” tih hi Mizoram ah chuan a takin a la hman theih avang hian kan vannei em em a ni tih hriat a tha hle in ka hria. Ram dangah chuan chhun leh zan pawh sawi lovin hnathawh te angai thin. Chuvangin, khua a la en lai tal hi chuan in lamah hian naupang atanga puitling thleng mai hian, enge tih tur awm hi in hrilh chawp ngai lovin kan en chawp tur a ni. Nu leh pa emaw, a upa lam chauh tih tura ruat fo hi thalai mualpho na liau liau a nih mai bakah, thatchhiat zirna a nih avangin a zahthlak em em a, zah na chang pawh hriat a tha hle awm e. Tlai chaw ei kham a lenchhuah emaw kan tum kher te hi a tullo lutuk, “weekend” mi ramah chuan an thlahlel em em thin, hetiang pawh hi chin ve tan a hun tawh viauin ka hria, nitin len chhuah ngawt ai chuan.
Thil reng reng hi tih tumna a awm loh chuan, tihtur hmuh hi har deuh mai ania. Chuvang te pawh chu aniang, Mizoram ah hna a awmlo reng reng kan tih fo mai ni. Sawrkar hna emaw, contract hmingpu emaw hna a nih lova kan thawh hreh tak em em na chhan te hi, duhamna rilru put vang, intih vei tumna vang te leh eirukna kan hmuhsit ngam loh zia a tilang chiang viauin ka hria. Hunawl kan ngah chuan mi chanchin sawina hun kan nghah a, inrelna te a tam duh. Hman lutuk hi thil zahthlak tak a nih hriat atha bawk.
Tin, Mizo thalai te hi nu leh pa kiangah nupui pasal neih thleng emaw neih hnu thleng pawh a la awm fo kan ni. Hetah hian tamtak chu nu leh pa chawm turin nupui te kan nei thin, zahna chang i hre tawh ang u. Mahni ngei chawm tur nupui neih te hi i zir tawh ila, a nih loh chuan nupui pawh neih ngamloh a hun tawh khawp mai. Chhungten min chawm a, theih tawp chhuahin, a chang phei chuan lu hai mup mup khawp ten an rilru a hah thin tih hriat atha ngai. Chuti lova, keimah ni min chawm tawh tih nak alaia, mi fa min chawm sak tur han hruailuh leh zel mai zawng, a zahthlak mai pawh a nilo, kan chhungtte tur (poison) thawk muang chiin kan hrai nitin ani ringawt ang chu.
Inthuamna nalh aiin eizawn dan ngaihtuah thalai ten a hun ta. Kut hnathawh te hi i hreh lovang u khai. Eizawnna tha zawk dap turin Mizoram kan chhuahsan thei a nih siloh chuan, engemaw tih tur dap chawp a tul khawp mai. Hna thawh tur te hi zawn chawp loh chuan a man min pan dawn lo tih te pawh hriat a hun ta. Mahni kutkawih ngei maia thil han neih te hi a hlu bik em asin, rilru lal a hlim duh. Rilru a hlim chuan kan ngaihtuahna pawh a thianghlim a, kan thil tih reng reng ah kan hmuingil phah em em zel a ni tih hriat reng a pawimawh.
Nunphung tha lova lo nung thin te pawn, thil kal tawh kan siamtha thei chuanglo tih hriat atha. Min an en dan che u a dang emaw in tih chuan, beidawng lova an ring sual a ni tih hmuh tir a pawimawh. Chuvangin nakin hun tur leh tunhma thil vangin rilru kan ti hah tur anilo, kan tun hun zel hi hmang tha ila, mi hlimna thlentu, mahni hlimna thlentu kan ni zel ang.
A tawp berah chuan, Eiruk hmang sim duh silo te hian Pathian hlauin an sim hma chu biakin luh pawh ngam lo sela, Kohran pawn chianglo thawhlawm dawnglo ngam bawk sela. Tin, Mizo te hi khawvel hmun hrang hrangah te kan lo inzar pharh ve ta zel mai, Zohnahthlak ngei nupui pasal ah i in zawng hram hram zel ang u khai, kan la tlem em hi.
