mi(sual).com

Kum 2009 chu kan hmang zo leh ruai a ni ta mai a. Thla khat tha awrh chauh hun kan nei a ni leh ta mai a. Tun kum chhunga kan hun hman dan thlir kir ila, hmang tha tawk kan inti em ? Hun hmang tha tawk in tih hi a har hle mai a. Kumin atana kan thutiam te kha kan ti hlawhtling tha em le ? Eng vanga ti hlawhtling lo nge kan nih ? Hun hman dan kan in ruahman that loh vang a ni ngei ang. Hun hi mitin hian inchen theuhvin kan chang a. Kan hman daihzai dan erawh a inchen lo hlawm hle ang.

Kan hun hman dan hian mimal nun te, chhungkua leh khawtlang nun te, ram leh hnam nun te nasa takin a nghawng a. Uluk taka hun hman dan tur kan ruahman a tul a ni. Mi tam tak chuan Sam 37:5 thu “I awmdan tur chu Lalpa chungah nghat la, Amah chu ring la, Aman a ti vek ang” tih chang chawi hian kan awmdan tur leh hun hman dan tur kan ruahman lo thin a. A tlachawpah kan innghat thin. Thufingte ziaktu erawh chuan “Rilru lo ruahmanna hi mihring chan a ni a, lei(tongue) chhanna erawh chu Lalpa atangin a ni” (Thufingte 16:1) a ti. Ruahmanna siamtu tur chu mihring a ni a, a hlawhtlinna chu Lalpa hnen atanga dawn tur a nih thu a sawi.

Thufingte 16:1 thu ang hian mihring chu ruahmannna siam tur kan ni a, Sam 37:5 thu ang hian Lalpa-ah innghat tur niawm tak kan ni. A bikin Mizo te hian tul lovah hun kan khawhral nasa hle thin a, tul lovah sum kan insen phah leh vak thin. Engvang nge ni ang? Thutlukna (decision) siam kan harsat thin avang te, thil pawimawh leh hmanhmawhthlak kan thliar thin loh vang te, phungthluk tum luat vanga tha leh hun kan khawhral thin vang te, midang hmai zah tih nat vanga zawh loh nghawngkawl kan inbah tir thin vang te, len mai mai leh tul lova men rei leh zing thawh tlai kan chin vang te a ni thei ang. Nitina kan hun hman dan te, chawlhkar tina hun kan hman dan te, thla tina hun kan hman dan te leh kum khat chhunga hun kan hman dan te chhui kir ila.

Kan tihtur tam tak ti lova, thil sawt leh hlawkna awm lova hun kan khawhral tam si zia te sawi tur kan ngah ang. Kan hun hman dan tur ruahman i ching ang u. Chawpchilh taka thil tih leh a tlachawpa thil tih hi kan ruahmanna siam nen a inkalh em tih te buk thin ila, kan kawng zawh tur zawk thlang fimkhur ila, hun kan hmang daihzai thei thin ang a, nun hlawhtlinna bul a ni zawk ang. Hun kan in ruahman lawk thin loh avang hian chhungkaw tan hun kan pe tam tawk lova, chu chuan chhungkaw hlawhchhamna a thlen a, fa sual kan neih phah thin.

Hun ruahman that loh vang hian mawhphurhna kan hlen that loh phah a, hna thawh zawh loh kan neih phah a. Kan thiamna leh theih tawk aia hniamin hna kan thawh phah a, thil namnul a ngaih phah thin. Thil hrang hrangah kan tlai phah thin a, chhuanlam siam leh in phatmar a ngaih phah thin. Chu chuan dawtsawi a ngaihtir a, tha leh zung a thlawna sen a tul phah thin. Kan hunte vawng tha ila, thiltih tur duang fel ila, kan ruahmanna te Pathian hnenah kawltir ila, a chhanna a hring a hranin kan hmu ngei ang. Chu chu nun hlawhtlinna bul a ni. Tuna tang hian kan hun hman dan tur duan ching thar ila, bul i tan tha ang u.

Similar Posts:

• Sum lak luh dan thianghlim
• Pipu sulhnu i humhalh ang u
• Mut Thlahlel Suh
• Mi Rethei Chunga That Chhuah
• Annual Budget 2011-2012 pharh a ni

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Sunday, November 29th, 2009 at 9:20 am and is filed under Opinion, Religion. You can follow any responses to this entry through the RSS 2.0 feed. You can leave a response, or trackback from your own site.