Mizo nih hi a va nuam tak em! Mizo te hi kan vannei a, kan society hian a huam zauvin kawng engkimah inhriatthiamna leh inngaihhnathiamna kan ngah a, hei hi hnamdangte laka kan danglamna leh kan bikna riau a ni a, a nuam hle reng a ni. Mahse khawvel thang chho zelah hian changkanna leh tunlaina ten kan nunphung leh tihdan engkimah inrawlh an rawn tum a, hei hian kan hnam nun leh tihdan phungah harsatna tenau min siam ta zeuh zeuh fo niin a lang.
Tunlai khawvel a changkang chho zel a, chu changkanna chuan kan Mizo nun ngei pawh a rawn nghawng lo thei bik si lova, thangthar te khawvelah kan cheng a, thangthar te duh dan leh ngaihdan chu rual u zawk te leh kum lam upa deuh te ngaihdan leh pawmdan nen a insaikalh ta fo mai a. Hei vang hian kan hnam culture leh chindan chenin a a nghawng a, tunlai mila kan culture her danglam duh pawl leh hmanlai tihdan anga a ngaia kal reng duhtute kan inchai buai mek zawng anih hi. Kan hnam nun leh culture humhalh chungchangah pawh inhnialna leh sawi neuh neuh kan tawng ta fo mai.
Hemi chungchangah hian rual u zawk te leh thangthar te thu a inhmulo deuh zeuh zeuh ta thin niin a lang a. Kan pipu pute atanga kan lo tihdan leh chin thin dan chhawmnun zel mai kha nge tha ang tunlai khawvel danglam chho zel mila in siamrem hret hret tih thuah hian thu tlukna siam mai harsa khawpin lamtang kan insiam mek a ni. Thildang chu lo dahtha ta ila a bik takin Mizo tena chhiatni thatni a kan insawngbawl danah pawh hian tlemlai deuh atang khan ngaihdan a phir tan ta hle mai a, hemi chungchang leh a chhehvel te hi chiang zawka ngaihtuahna fim tak nena thangthar te leh rual u zawk te hian kan ngaihtuah chian a tul hle a ni.
Chhiatni thatni a kan in sawngbawl danah hian tunlai khawvelah hian thangtharte duhdanin kan kal dawn nge, hmana kan mizo pi leh pute tihdan ang chiah kha kan chhawmnung chho zel ang tih pawh hi zawhna awm thei tak a nita in alang. Hemi chungchangah hian rual u zawkte leh thangthar te kan inhnial mek anih hi, engtin tak ni zel ang maw?
Hman deuhah khan Aizawla veng pakhat YMA te chuan khawhar in riah hi tul tawhlo an tih thu thuchhuah an rawn siam a, khawhar in riah chungchangah an veng chhungah eng engemaw harsatna te an tawh thin avangin an vengchhung bikah chuan khawrhar in riah an titawp anih kha. Kha thil khan a tirah chuan inhnialna nasa tak a chawk chhuak anih kha, thenkhatin awm an tih em em laiin thenkhat thung chuan Mizo society palzamna leh Mizo culture paih bo na ang lek lekah ngaiin an rawn hnial chiam anih kha.
A hlimchhawnah kha chuan mi a nghawng na in kan sel rawn luam luam anih kha, mahse hun a lokal zela khawvel nunphung a danglam chho zel a, hmana tha kan tih kha tunah chuan kan sit tan a, hmana tha lo ti a kan dodal em em thin kha tunah chuan kan belchiang tan mek a ni. Khawhar in riah tihtawp thu kha a hlimchhawnah khan kan han hnial vak takna a tunah hian a hnialtu zinga thenkhat te kha han zawt leh ta ila, ‘tih awm tak an ti a lo ni’ ti a min chhang an awm nual tawh mai thei. Chu chu kan tunlai khawvel a ni, chuvang chuan hemi chungchang hi ngunthluk taka ngaihtuah peih ten kan ngaihtuah a hun ta hle a ni.
Kum 2009 Krismas leh kumthar vuak vetah khan Serchhip Hmar Vengah chuan ni 3 chhung lekin mitthi 4 an vuiliam a, kha thilthleng khan YMA hruaitute lu a tihai khawp mai. Khawhar in kal dan pawh a kal tur list siamin an inthen phah hial a ni. Veng khatah khawhar in 4 lai a awm avangin khawrhar in riak tur tlangval nei mumal lo pawh an awm! Chutih laiin khawhar in dangah chuan inriak an khat tlat lawi si. Hetiang hun hi kan la tawk chho deuh deuh dawn niin a lang. Khawpui lamah pawh tuna mi ang tho hi kan problem a ni. YMA hruaitu ten khawhar in a riak tura member tlawmngai kan insawm lawm lawm tum te pawh a awm ta fo mai.
Thlan laih chungchangah tunah hian Aizawl khawpui chhunga YMA Branch hrang hrangah te hian survey nei ta ila, branch tam zawk te chuan hlawhfa rawiha thlan laih hi kan pawm mai lo maw tih theih a ni. Titi naah pawh sawi hlawh pawl tak a ni tawh. Aizawl khawpui chauh a ni lo thiltlang khaw lian deuhah te pawh he thu hi kan sawi ri zeuh zeuh tawh, a rawt chhuaktuah kan tang ngam lo mai mai a ni. Aizawl ang khawpuiah chuan thlanmual awmna te a lo hla tham tawha ke a kal mai remchan lohna tam tak a awm, motor hmanga thlan lai tura kal ngaihna pawh a awm nual. Tin tunlaiin mahni hnaah mi kan tul tawh em em a, private company leh firm te tam tak kan ramah an rawn lut a, chungah chuan kan thalai mi tak tak an thawk mek a ni a, sawrkar hnathawk ina awlsam taka leave an lak mai theih ang kha private firm angah te chuan a theih ve loh. Chuvang chuan chhiatni/thatniah kan tlawmngaih loh vang ni miah lovin thalai tam tak te hi chu kan tel hleithei tawh lo.
Aizawl a YMA Branch thenkhat chuan thlan hi laihlawk mai te pawh an sawi ri viai viai tawh a ni awm e. An demawm hauh loh mai. Heng kan tarlan tak tlemte a tang ringawt pawha han thlir hian tuna chhiatni thatni a kan inenkawl mek dan hi kan tan phurrit a chang tan ta lek lek niin a lang a, mualpho kan hlauh vangin tlawmngai turin mi kan intahawh chhuah tan ta mek niin a lang. Chuvang chuan mitin kan thattlan na anih zawk dawn chuan kan insiamrem deuh a heti zawk hian kan tih hun pawh a la thleng ngei dawn niin a lang.
Mi tam tak chuan thenkhatin a khawhar in riah leh thlan laih chungchanga rawtna thar an siam hian Mizo tlawmngaihna thlauhthla ta ang leh Mizo society pawlhdal zawnga hmala ang hrimah kan chhuah mai thin a, hei hi ngaihdan leh puhna thalo tak a ni. Hetianga ngaihtuahna thar rawn rawtchhuaktute hi dem ngawt tur an ni lo. Chuvang chuan pawngpaw hnawl ngawt lova heng ngaihdan thar te hi kan zirchian a tul hle zawk a ni. Tunlai khawvel a changkang chho zel a, kan hnam nun pawh hemi rual hian kan hriatlohvin a inher hruk hruk zel a ni tih hi kan hriat a tha. Chuvang chuan dan mumal awm miah lova, khawvel hmasawnna hnuaia kan hnam nun kan inrelbawl anih chuan nakinah kan la buai tho tho ang. Kan thenawm te aia khawdanga kan chhungte leh thiante kan biak ngun tawh zawkna khawvela cheng kan nih avang hian kan society hian kawngtharah min hruailut mek a ni tih hi kan hriat ngam a pawimawh.
‘Tunlai khawvel changkanna hian kan hnam kalphung engtikawng mahin a su buai tur a ni lo, Mizo chu Mizo kan ni a, tunhmaa kan kaldan kha a la tha ber, kan hnam inrelbawlna hi tunlai khawvel mila kan thlak danglam kher a tullo’ kan ti anih chuan huaisen takin ding ngam ila. Thangtharte hnenah kan hnam tihdan phung leh chindan te hrilhfiahin zirtirna tha tawk pe ila. Chuti ni lova, ‘tuna kan kaldan mek hian tunlai khawvel ah min zo tawh love, chhiatni a kan inrelbawl dan hi tunlai khawvel mil deuhva kan her rem a tul ta a ni’ kan ti anih pawhin huaisen takin siamtha ngam ilachu kan hnam zahawm zia leh inlungrualzia a tilang ang.
Mihring kan pung chakin tunlai khawvelah natna te a tam si a, mitthi hi kan la nei chho zel dawn niin a lang. Nakin lawkah chuan mitthi kuang tur thingzai lei tur pawh a van viau hun a la awm ang, khawhar in kal tur kan inhmuh zawhloh hun te, thlanlai tura hlawhfa kan rawih hial hun te pawh a la thleng loving tih a sawi theih loh. Chutih hunah chuan nula/tlangval khawhar in kallo chu nikhua talo riauva kan hmuh a, thlan lai ve hman lo tlangval chu hnunglam atanga kan hmuhsit mai chuan kan tlawmngaihna chu Mizo tlawmngaihna dik a ni lo tihna a ni ang.
Kan nunzia leh chetphung kan changkang chho zel anga tuna chhiatni thatni a a nawlpui huapa kan in relbawl dan hian min zawhloh hret hret hun a la thleng ang. YMA hruaitute an inngaihtuah buai rum rum chang a la thleng ang. Chung hunah pawh buai miah lova kan hmachhawn zel theih nan tuna kan kaldan bak hi ruahmanna felfai tak kan lo neihruk hi a hun tawh lo maw?
January 14th, 2010 at 12:45 am
Zan lam chhiar tur ah in dah teh ang,a sei deuh
Report this comment
January 14th, 2010 at 12:50 am
Khawhar In riah : A motive dik tak zawkah chuan khawhar chhungte chetmawh avanga puitu tura ngaihte’n an riahpui thin a ni. Tui chawi, buh den, buh thlei, thing tuah tur phurh etc., zawng zawngah.
Tunlaia khawhar ina kan riah hian —a bengchheng ber berah kan tang ta emaw ni, YMA-ah pawh inzilh thar kan ngai viau! Tui phei chu kan chawipui lo khawp mai! Khawhar chhungte thingpui lum hmin sa, kan muthmunah an rawn sem ta zawk hial! Insiamthat chu kan ngai khawp mai, tlawmngaihna ni chuang tawh lovin, kalphung pangngaiah kan ngai ta a ang zawk.
Khawhar ina tlangval an riah nachhan bulthum ber chu mitthi pangngaiah a lo ni ngai lo tih Tualte pitar pakhatin min hrilh tawh. A sawi danin hlamzuiha thi an awmin tlangval in riak an awm thin. Nu berin engmah a thawh theih loh avangin; puibawmtu atan an riak thin, a ti. Awmlaia thi chhungte zingah khawhar in riak an awm ngai loh thu leh hun rawn inher zelah khawhar in riah kha hlamzuiha thihna lo chhungkuaa an neih zui ve tak thu min hrilh thlap. ka awihsak dawn lo na khan, a tang huai khawp mai.
Tlangval khawhar ina riakte hi helper, help mate angin kan khawsa meuh em?
Tlangval in riak an awmna zingah chhuichhuah harsa ting siin Gas bur bo, thiante mobile phone bo … thil bothlau a awm ta fo mai! Tlawmngaihna hming pu ting siin suahsualna a hringchhuak zui ve leh ta. Zarkawt pawhin rawtna zahthlaka lang, an hlawkpui zawk thil an dai lut mekah ka ngai! Kan Home Minister-in min khak ve em lo’ng chu, kei chu Reverend ka ni ve miah lo. Ka hming “HNAISAILO (worthless)” —Pa hmaah Isuan a tan ang a, tih Isaac Watts-a hla hi ka hla ngawih ngawih a ni thung e. Reverend aiah Worthless ngat!
Report this comment
January 14th, 2010 at 1:03 am
Khawvel thang chho zel um pha siin mahni culture leh tradition a humhim theih. Chiang takin typical Indian (Vai) ho, Japanese leh Chinese angah te pawh hian a hriat theih a ni.
Mizo te erawh chuan phak lo chung2 hian midum leh mingo ho chet dan hi copy kan tum a, a hahthlak lulai chu a ni e. Kan copy tum dan lah hi mahni culture and tradition ngainep zawngin a la ni mah mah zui.
Mizo nih nuam ka tihna ber pakhat chu, chhiatni leh thatni hian kan in tawrhpui in kan in lawmpui tlang dial dial hi a ni. Hetiang te hi Mizo min huikhawm tu, min inti unau tu tha tak a ni. Hemi hi ti talo ila, kan selfish hlawm ropui si a kan phirsi rang khawp ang le.
Report this comment
January 14th, 2010 at 1:11 am
Thlan laih : Veng hrang hrangah tihdan kalhmang hrang an nei tlangpui. Sorkar hna thawk OB an nih veknaah phei chuan an Office hlana thil thlengah buaipui tur thil tam tak a awm thei ang!
Hlawhfaa thlan laitu nei thei veng pawh dem tur an nihna a awm chuang lo. Tlin loh leh theih loh thil tih luih talh a ngai lo. Remchang fel zawk leh hmangchang fel zawka chet ngam a hun. Kum 40 liamta ang kha kan ni tawh lo tih hrethiam apiang an fingah ka ngai mai!
Report this comment
January 14th, 2010 at 1:22 am
Well done chawnghilh !!!
2001 ni ta in ka hria, mithhi lumenna ah kei pek chuan titi hona ah “Hetia tlaivar zan a mitthi lumente hnena chhangthawp kan han sem thei hi chu a zia mange” ka ti ngawt pek a, YMA active member pakhat chuan ‘hmanlai pawn engmah an sem hleinem’ tiin inti fuh takin min lo khak a, kei pek chuan, “Hmanlai culture zawm i duh leh khulai a thing lubul khu PATHIAN ah zuk bia la ti nia, na i neih apiangin i inthawi thrin anga” ka ti pek a, a nui tawi tuk.
Remchang fel zawk leh hmangchang fel zawka chet ngam a hun. Kum 40 liamta ang kha kan ni tawh lo tih hrethiam apiang an fingah ka ngai mai.
Report this comment
January 14th, 2010 at 1:34 am
chawnghilh, i sawi dik chiah a ni, #3 1st para ka ziah nen khian i sawi hi thuhmun ah ka ngai
Saitawk, kan zawm zat teh ang che. Mizo mipa ho hian kan hmeichhia te hi puan veng tur hian kan fuih fo mai. Vai thuamin in thuam suh u eke bale tih hi kan ching. Vai thuam a Mizo hmeichhe inthuam kher hi chu ka hmu thei hlawllo a ni ber mahse, kan hmanlai inthuam a hmeichhia te in thuam tura kan duh chuan mipa pawh hian Hrenpereng emaw, puan chhing khup thleng emaw ang kha bih ve leh ila aniang chu tiraw.
Hnam hrang2 in hmuhkhawm na emaw, Mizoram pawn angah te emaw ruai/feast emaw ei na hmun angah te hi chuan a mawi ngawt chuan ka hre thung.
Bih leh veng hi ka hriat pawlh fo ka hmang dik emaw !
Report this comment
January 14th, 2010 at 1:38 am
Thlan laih hi ka’n sawi zau leh teh ang —Sunday hian thlan laihnaa kal kan buk zual hret. Thlan lai vek chu kan ni chuang ngai miah lo.
80 vel kal zingah, 6 emaw chauhvin thlan an inluh chhawk thin. Mi dang an phutchhuak ngam si lo; thlan kotlanga mite lahin chhawk an tum si lo. Tlawmngai hmingpua thlan hmun thleng vek chu an ni. Berh miah lova in lam haw thleng leh thei ka hre hnem lutuk! Thlan laiha suahdur hum ngai miah lo pawh ka hre hnem; Val Upa titi pawl chu an ngaithiamawm.
Val Upate hian thlan laiha lut ngam lo an chhinchhiah ngun tur pawh a ni. Titlangnel tur pawhin an luh luihtir tur a ni a, a zahthlak lo zawngin, tlangnelna siam thiam ngei turin a kaihruai thiam bawk tur a ni. Vawi khat lut tawh chuan zahzumna an dah tha ve thiam tawh a; luh turah an ngai hlen tawh. Val Upaten an rawlthar kilkawihote an instigate thiam ngei ngei tur a ni. An hna pawh chu chu a ni!
Thlan laihna hmuna kal mi dangte chu ninhlei, titi leh pawt ve mai mai an ni ziah! Hei hi ka hre chiang tawk hle. A kal zawng zawng thlan lai tura inphut chi pawh a ni lo. Mahse, kalphung zahthlak lo, finthlak tak —education tha tak kalpui thiam Val Upate an chhuanawm zui zel ang. Mi fel chherchhuak thei Val Upa, veng tina mite ka lawmpui e.
Eng ang chiahin nge kan Veng leh khawtual mipuite kan nula leh tlangvalte-ah an innghahfak, lungawi tlanna leh thawhhona tha a pawimawh ber mai! Kan nula leh tlangvalte-ah kan khawtual a lungmuang em? Culture leh tradition ringawt a ni lo; zualko pawh kan in-sms thei tawh, rawlthar kea an tlan chhuah kher a ngai lo! Thil i singsa fel thiam lul ang u.
Report this comment
January 14th, 2010 at 1:42 am
Lunglei a veng pakhat ah chuan thlan lai tur a kal ten CHEM an keng threuh a, a lai lo ten thlanmual hnin hnawk an lo sam fai a, a thra ka ti khawp mai, a hranpa a thlanmual samfai hnatlang neih a ngailo.
Report this comment
January 14th, 2010 at 1:43 am
HV leh Chawnghilh in ti ti ka lo ngaithla kiau e, a ngaihnawm khawp mai.
Report this comment
January 14th, 2010 at 1:47 am
Saitawk Azl lamah pawh chin chi a ni ve maithei a ni, kan veng YMA hotu (bawhvak theih atanga ka thian) kalo hrilh ve teh ang
Report this comment
January 14th, 2010 at 1:54 am
HV, a thra riau a sin, thlan lai tur a kal zawng2 hi thlan khur khat ah hian kan leng vek lo a, a lo thru mai mai pawl leh zakzum deuh pawl hi awm loh theihloh a nia, remchanna leidan kawng thra tak niin ka hria.
Report this comment
January 14th, 2010 at 1:55 am
Nula te — chhiat tawhin nulaten chanvo a nei ve leh … thlan laiho hnenah thingpui leh a hmeh pawh an khai thlensak ve a. Tuisik in tur pawh an chhawpsak ve thin (hei hi a tul dan azirin an che mai turah ngai ila).
Zan lama nulate thingpui sem hi kan ching fo nain, tlangval an awm tho chuan, an chawi chak zawk a, tlangval fatu tluanchhuak mai se … nulaten khawhar hla saknaah bu khuar se, a mawi. Zana nula vei vei —lainat an ngai ve a nia!
Mitthi buhfai leh thingfak khawn khawm thin kan ni a. Chu chu hmeichhiate responsibility-ah kan dah deuh. Pherhte pawhin an lo tawiawm ve a nih leh a pawi hran lo!
Thingfak pawh LPG kan hman achinah chuan kan khawn ta ngai lo. A aiah Veng tin tih dan a inchen vek leh vek loh ka hre lo, Rs 3 te, Rs 2 te lak khawm a ni mai thin a. Buhfai pawh Dudh No 1 den den chhung tin atanga collect a ni thin. Nulaten an chhungkhawm a; bial chan neiin, mahni section tinah an che siau siau thin.
Mi hausa tan in tin atanga chhun khawm buhfai chi hrang hrang an mamawh ka ring hran lo, mahse, an lo accept thiam te hi Zo nun timawitu an lo ni leh zel a. A nuam thin.
Veng hrang hrangah tihdan a inchen pit pet tawh lo vang; mahse, kan Culture bulthut chu kan hloh lo tlangpui. Mi lian liante hi tlawmngai ber ber an ni zawk zel, Mizo nih a nawmna chu rethei leh hausa kar thuk takah pawh dawhzawmna lei (bridge) rei lo te tal kan la in-share-ho thei hi a ni.
Mizo Tlawmngaihna hi kan hnaivai Gorkha-ho pawhin an chhawm nasa ve hle, ka thianpa phei chuan, “Mizo tlawmngaihna hi thangtharten an chhawm nung peih lo a nih chuan, Gorkha thalai talin kan chhawm nung hrim hrim ang,” tiin min cho let. That’s thought-provoking!
Report this comment
January 14th, 2010 at 1:58 am
Chawnghilh, ka nui huk, pherh i admit kher vang khian, MIZORAM i ngaih hmel!
Report this comment
January 14th, 2010 at 2:02 am
ben pherh hluai an chawkawm thin
Report this comment
January 14th, 2010 at 2:04 am
HV, i dan ngai te!
Report this comment
January 14th, 2010 at 2:10 am
# 12 khi ka hloh emaw ka ti a, ka ziah nawn phah vel … a version inang lo lai awm thei tho vang chu maw —min ngaithiam hram mai r’u!
Nulate : Chhiattawh changin nulaten mawhphurhna an nei ve. Thlan laite tan mitthi in atangin thingpui leh a hmeh an khai thlensak ve fo ta, tuisik in tur chenin.
Buhfai khawn leh thingfak pawh nulate kutah a awm thin. Kan Culture leh tradition ang diak chuan ka ti leh thei ta hauh lo! Buhfai chu kan la khawn e, thingfak hnih aiah Rs 5 em ni ta —economy kalphungin kan her danglam ve mai thei.
Fiamthu-ah phei chuan veng pakhata nula buhfai khawn thil tawn danglam an sawi fo, “Rice kan ei lohna hi a rei tawh deuh va, a aiah apple pum li hi la ta mai che u,” an lo tia maw ni! :lol:
Nulate hian mawhphurhna mawi tak an nei ve. Tin, thingpui sem atan hian kan hmang fo nain, zan thima kawtkai rualrem lo taka nula vei tawn vei tawna kan siam fo ai chuan, ban vung lian lo tlangval kan la ngah a, rit chawi an chak zawk bawk a —lumen zante hian tlangvalte che law law se, a ziaawm tawh zawk. Amaherawhchu, mi hi kan tenchhiat dan a inchen lo va, drugs ti mi chuan thingpui sem ve lul suh se. An tlawmngaihna a ropui e; mahse, awlthawng turah i ngai phal ang u.
Zanlai thlen hmaa khuang nena khawhar hla, zanlai pelha sol-fa kia zai —hei hian zan a titumtawi duh deuh. Zana thingpui ringawt mai hi chu a chauhthlak khawp, engemaw ei tur an han chhawp hian pum tri-troh lutuk a veng a; kawpuar a chhawk hret bawk. A senso hi a tam chuang lo va, inralna sum lut atangin a rulh theih chiang khawp mai!
Report this comment
January 14th, 2010 at 2:13 am
Kum tir te ala nia, ngaithiam mai zel e hairehai
Report this comment
January 14th, 2010 at 2:49 am
Zualko tlan : Rawlthar kova lum thin kha, chhiattawha chanvo hahthlak ber pawl a tling thin. Kan va zualkonate pawhin tukthuan, zanriah, chawchhun min lo hlui ngial a, “Ka chak lo ve, ka ril a tam lo ve,” kan tih thinna kha —kan lo bye bye liam ve tan ta!
All India Radio leh Police Wireless Station lam kha kum tam tak chhung chu kan hawlh buai hle thin. An lo tlawmngai em em thin kha a faktute zinga mi ka la ni hman tlat! Lehkha them nen kan pan vang vang a, annin an hna karlakah tlawmngaih an lo chhuah a. Thingtlanga miten khawpuia mite ningkhawng kan hrilh hriat theihna an ni—zualkova tlan phakna piah lamah chuan.
Telephone a awm hnuin, kan la che tam thei vak lo. Mahse, kan hmuh phak ngai loh hnamte finna a pung belh zel a. Kan chhim ve ta zel a. Mobile phone kan hum ta fir fer a, zualkova tlan kher chu a ngai ta hauh lo. Hetiang hun kan thlen deuh tawh hun ni si, transitional period-ah khan zualkova kal chak em em te kha hriat reng an tul ve, lirthei ke-hnih neite kha, “Va tlan lawk ula,” han tih tawh chuan, an phur em em thin a. An FUEL hek tur an dawn tawh lo, lawm tak leh tlin taka an ti thinte kha a ropui ka ti viau zel.
Mizo thalaite hi chu MACHINE hmangin mi taima kan ni thei tih hi ka hre chiang, kuta kan khawih peih loh hi machine-a handle tur awm chiah hlawm se, chaw ei nachang hre lo khawpa thawk rim thalai rual kan nei chiang viau ang.
Machine pung se, REVOLUTION kan hmachhawn a ni mai …
Report this comment
January 14th, 2010 at 3:05 am
Zualko tlan hi tlawmngaihna a nih rualin tlawmngai tak2 leh hming thatnan emaw, a hming maia ti hi a hriat theih khawp thin mai. Ka tlawmngai fal bik ka tihna ni hauh lovin, ka thil mak tih pakhat kan sawi mai2 ange.
Tum khat chu mut hun hma deuh (nita in ka hria) tah chuan mitthi kan nei a, tlangval ho chuan zualko na tur veng/list an la sap sap hlawm a. An tlawmngaiin an chuhhelh hle bawk, zualko list in a daih lovanga zualko turin an chhuak ve thei lovang tih an hlau a ni ngei ang.
Reilote ah chuan a zo duak mai a mahse, phek khat chu rei fe tuma lak lovin a awm ta tlang mai a, chu chu Lungleng a zualko na tur lehkha a ni. Hetih lai hian Lungleng hi Tlangnuam lam atanga kal ala ni ber a, ke a kal ngai a ni bawk. Zing zu in pah rem tur taka ka lak, Tuikual lam chu midang pe in Lungleng chu ka la ta a.
Khua a dur tha bawk a, ka flashlight/torchlight chu a eng duh tawk a har ngei mai. Chutia hmanhmawh pheleng a Lungleng lam pan a ka kal lai chuan Ramrilui kiang kopang chu a rawn ri thla ta sun sun mai a, “AW” kan thian thin a, kan “KUK” bawk thin, tuman min chhang silo. Hetih lai hian helai velah hian Savawm te pawh an la awm fo a ni. Ka chempui ah chu phawrh in min rawn bawh tu tu chu kawng thlanga tla turin bum tum ran chungin kalo ding khur ve zawih zawih a.
Chutah leh, kawng chhak (thingtlang ke kawng) atang chuan lianpui mai hi a rawn zuang thum thla ta dup mai a. Mi zuan ta hauh lo mai, chem a sah mai ka in rin mek lai chuan Khasi Veng tlangval u tak, u Zova chu nui huiin ka hmu ta a. Keimah a ka kal tur a hria kha mi tawiawm turin milo um a lo ni a, a hmanhmawh lutuk a, hnim che ri bengchheng si (Di hmun) ka kuk ri vel pawh alo hre theilo chu a lo ni a, ka lawm ngei mai.
Rawn zuang thla, u Zova chu hei hi
https://i45.tinypic.com/k00o02.jpg
https://i49.tinypic.com/21mxf7c.jpg
U Zova pheikhawk hairehai
Ka sawitum tak chu tlawmngai taka zualko tlan emaw kan tih te pawh hian a awlsam leh nuam lai hi kan lo chuh fo niin ka hria keipawh kha ka ni tho, ka tih tumna mai a ni. Phone kan hmang ta mah a tah te hian “minute ka nei tlem,” kan ti mai lovang chu maw!?
Report this comment
January 14th, 2010 at 3:23 am
comment chu ka van sei hlawm ve. A bengvar thlak khawp mai.
Report this comment
January 14th, 2010 at 3:43 am
Zualkova tlan ngat hi chu kan tradition ni thin mah se, kan fiamthu ti tamtu mai mai atan kan hmang ta a ang. Zualkote chuan a ruh lang rawtin thu an va thlen ngai lo va; chu chu kan culture chi khat a ni ve tlat, pehhel, thu-khuhin kan va hrilh a. Thi tawh, a ruang pawh uih tawh hial mah se, “a hritlang deuh a ni awm e,” ti mai maia va sawi a ni thin!
Chu kan tradition chu kan hnualsuat ni chuang lovin, kan hluihlawn thiam ta tlat a ang! Nuihza fiamthu mai maiah kan la tawh —chutiang bawkin kalphung tha zawk leh hmangchang fing zawk hi chu dan rual lohva min la chimtu a ni zui zelin ka ring.
Great Wall of China chhungah an nuhote kephah a te hle thin; an ralmuang tawk bawk a niang! Finna pawh an Bangpui pawn lama a awm ve an ring lo; mahse, tunah chuan thil a inthlak chiang ta hle —Chinese nula kephah hlaiten intihsiakna tinah Medal an awrh chu a ni leh ta mai, kum 60 liamta vela kal su lei lei an nih vei nen khan! Mizote pawhin EYE OPENER kan la hmuh belh dawn chauh!
@HV : Lungleng-a zualkova kal chanchin a ngaihnawm ru kher mai, jewels tam tak a inphum! Zualkona tur list khaikhin vat vat ho thinte kha thluak nei ran an ni ve tih hriat tur, hai re hai!! :oops: :cry:
Kawnglaka lo barakhaihtu che hi kei pohin ka tihkhai deuh roh
https://img191.imageshack.us/im.....auhom1.jpg
Report this comment
January 14th, 2010 at 5:59 am
Pu Chawnghilh&Vangchhia comment zet chu a ngaihnawmin hret reng tlak a nih hi le. Kan file keuh teh ang.
Report this comment
January 14th, 2010 at 8:55 am
Puchawnghilh: zanlamah “nula ten thingpui an sem thin,” i tih hi khawi khuaah nge le aw.! Ka hriat ve theih chinah chuan Mipa (rawlthar)hlirin kan la sem.
Kan thianpa pawh Paikawngin no ruak a khawm, a ti fuh loh teh a sin.
Report this comment
January 14th, 2010 at 9:20 am
Kan Zonunmawi hi tunhma nun angin parthei tawh lo mahse, tunlai zemil zelin kanla partirzel ang chu.
Tlangval tlawmngai chuan a Phone a balance neihloh a hrehna chhanber chu, zualko thut ngaiah a hman theihloh a hlauh vang a ni ta.
Report this comment
January 14th, 2010 at 10:45 am
Tuma inlo lutduhlo e mai, 1st an phal lo bawk a. Last..!
Report this comment
January 14th, 2010 at 12:35 pm
Cremation hi kan la ching lo na a, kei chuan ka khawvel nun tawp huna ka duh dan ani that. Ti hmasa ber pawh ni ila pawi ka ti lo. Electric cremation ngat lehnghal.
Report this comment
January 14th, 2010 at 12:37 pm
Chumi hma in ka taksa peng (organ) donate tur an awm chuan ka phal rai bawk ang.
Report this comment
January 14th, 2010 at 12:41 pm
Rawlthar kan nih lai, mithhi lumena kan tlaivar ve tirh hian tum khat chu Lunglei veng pakhatah hian kan zualko a lawm le. Thian pathum kan ni a, kan mi zawnte in kha kan hre chiang vak lo va, Kawngka luchunga Name Plate hi ngaihtuah vak lo hian kan chhiar ri phei lauh lauh a. In pakhat kawt sir lang mang lovah chuan pa pakhat hi kan hmuh loh hian a lo awm reng lo niin. Ani, a hming pum kan han sawi ta lawl lawl mai kha a lo thinrim khawp mai a. Min rawn au ding a, min cho ta mai. Thil awmzia kan han sawi fiah ngial hnu pawh khan a thin a rim laklawh tlat mai a. A buaithlak duh teh a sin aw.. Zualko-a kal e ti lo chuan, han sawp hrep ka chak khawp mai a (ngam ila chuan
) Engtin tin emaw chuan insual em lo chuan tlawm inti rilru tak chuan kan inkiansan thei ta hram a..
Report this comment
January 14th, 2010 at 12:58 pm
Thangthar leh rual u deuhte ngaihdan in ang lo thin hi, heti zawng hian kan ngaihtuah ve thin a tul. Thalai rilru pu ni-a ka la inhriat reng lai leh ka ngaihdan pawh tunlai tak ni-a ka la inngaih lai hian naupang leh zualte tan chuan ka lo thring ru reng tawh thei. Chu chu a taka ka inhmuhchhuah chang a awm zeuh zeuh tlat. Kan rual u deuhte ngaih dan thring tak, kan ngaihdan tunlai taka thlak sak kan tum ang chiah hian kan nau te chuan kan ngaihdan hi ral khat atang deuhin an lo helh ve tan mek tih hi hriat a tul a. Chuvangin Generation Gap hi eng lai pawha kan problem tur a ni reng tih hria a, puitling nih tawh chuan eng stage-ah pawh awm ila, ngaihdan zau tak kan put ve hrim hrim hi a tul a niin ka hre ve thin.
Report this comment
January 14th, 2010 at 8:59 pm
Thlanlaih mite eizawn nan hmang ila a tawk chiah hei hi kan thranmawhbawk ani.
Khawhar inriah pui phei chu titawp an awm nual tawh
Zualko tlan a intirh phei chu thingtlangah lo chuan a awm tawh lo, inbiakhlatna thra ta zel hian a ti trul tawh lo
Inlenpui pawh hi tih rei loh a trul
Report this comment
January 16th, 2010 at 12:08 pm
@30 mzv:
ka support khop che mai. Bawng vun nena buaina lo kiang la… kan ti reng hi bansan a hun toh hrim2, a bikin khawpuiah phei chuan.
Khawhar in riah poh hi khawpuiah chuan tih tawp a thra toh jok. Khawhar in riah leh thlanlaih hi bo mahse kan mizona a bo dôn chuang lo. Zualko kal a trul toh loh avang hian kan tlawmngaihna a bo chuang hek lo. Laltanpuian rawng taka mi a thah avangin Salem veng an sual ta vek a ni hek lo.
Report this comment