He ram hi…
A par kan tlan, kan duat si lo
A mawi kan ti, kan chhuang si lo
Ram tha kan ti, kan hausak pui si lo
Thlai-tin ngeih kan ti, kan intodelh si lo
Neihchhun kan ti, kan hmangaih si lo
Partin vulna ram kan ti, khua vel a vul si lo
Sik leh sä nuam kan ti, a hlut zia kan hre si lo
Kristian ram kan ti, kan èng a chhuak si lo
Zo Jerusalem kan ti, ramdang mi tih kan bang si lo
Green Mizoram kan ti, Lo hal kan bansan si lo
Border Trade kan ti, hlawkpui kan tum si lo
Gas leh Oil tamna kan ti, a tak hmuh ni awm thei si lo
Luitui khuah kan ti, kawmpawnset bak kan buaipui si lo
He hnam hi…
ILP kan ti, kan him si lo
Sap nun kan ti, kan zo si lo
Zu khap kan ti, kan hneh si lo
Kan thiam kan ti, kan ril si lo
Kan ril kan ti, kan thuk si lo
Chawmhlawm kan ti, kan zak si lo
Hlawhtlin kan ti, kan chhel si lo
Chhel tur kan ti, kan tum a ruh si lo
Harh hun kan ti, kai thotu kan awm si lo
Rinawm-in kan ti, dik loh kan hreh si lo
Kan thuam a sang, kan tum a sang si lo
Changkang kan ti, hmathlir kan nei si lo
Hnam huai kan ti, Assam ramri kan hum ngam si lo
Zam ngai lo val kan ti, vai velh bak kan ngam si lo
Ziak leh chhiar thiam kan ti, thiam sang kan tam si lo
Khawtlang nun siam that kan ti, mahni that kan tum si lo
Kristian chhungkua kan ti, Kan chhùngah Krista a LAL si lo
Zonun mawi kan ti, kan thawm a mawi si lo
Thian chhan thih ngam kan ti, inphatsan kan hreh si lo
