January 12-a AYUSHCON kan neih ţuma kan Senior Adviser, Dr B Thangdailova thusawi pakhat hi i han sawiho leh lawk teh ang u hmiang. Tunlaiin Homeopathy a lo lar zel mai si a. Central Sawrkar lahin Mizoram sawrkar hnenah tichangtlung turin notification a rawn pe reng mai bawk si!
Directorate hran siam chungchang a sawi kaina-ah Dr. Thangdailova chuan, ‘Central lama an sualchhuah ang khuan State-ah pawh in sualchhuah a ngai a ni,’ a ti a. Ka ngaihtuah chiang a, a lo ni thei dawn tak e – Health services zawng zawng monopoly ni thin kha, homeopathy leh ayurvedic option a rawn awm dawn ta a ni a. A lo awm sa tan chuan theihtawp chhuaha lo dan tum chu a awm ngawih ngawih reng a ni.
Dr. Thangdailova chuan Central sawrkar lamah AYUSH (chutih lai chuan ISM&H a ni a) din a nih dawn hian nasa takin MBBS te’n an dodal thu a tarlang a. Mahse, AYUSH lam mite hi an tawng theih ema vang leh influence an ngah ema vangin MBBS te’n an dang hneh ta lo niin a sawi a.
Ka ngaihtuah ta neuh neuh a, tunah pawh hian AYUSH (a bikin Homiopathi) a lo lar chho mek a. Hman kumah khan Science Vision magzine-ah nasa theihpatawpa sawichhiat a ni tawh a. Tin, tunhnaiah Sakhuana thila kailekin sawisel a ni leh a. Tute emaw indirect influence a ni thei ang em le?
A tir phata ta Homiopathi hian sawisel a hlawh nasa hle! A dinchhuaktu Dr. Samuel Hahnemann ngei pawh kha German rama tanga hnawhchhuah niin France-ah a tlanchhe hial reng a ni. Mahse, do hneh theih loh a ni miau a. Tute emaw tawngkam takin, thawk muang deuh angin lang mah se, a goal a hlah ngai lo a ni ber mai.
